ZIM vs NZ: ಒಂದೇ ಇನ್ನಿಂಗ್ಸ್ನಲ್ಲಿ ಮೂರು ಶತಕ ಬಾರಿಸಿದ ನ್ಯೂಜಿಲೆಂಡ್ ಬ್ಯಾಟರ್ಸ್
ZIM vs NZ: ನ್ಯೂಜಿಲೆಂಡ್ ತಂಡವು ಜಿಂಬಾಬ್ವೆ ವಿರುದ್ಧದ ಟೆಸ್ಟ್ ಪಂದ್ಯದಲ್ಲಿ ಅದ್ಭುತ ಪ್ರದರ್ಶನ ನೀಡಿದೆ. ಕಾನ್ವೇ, ನಿಕೋಲ್ಸ್ ಮತ್ತು ರವೀಂದ್ರ ಮೂವರು ಬ್ಯಾಟ್ಸ್ಮನ್ಗಳು ಶತಕ ಸಿಡಿಸಿದ್ದಾರೆ. ಈ ಮೂವರ ಶತಕದ ನೆರವಿನಿಂದ ನ್ಯೂಜಿಲೆಂಡ್ ತಂಡ ಮೊದಲ ಇನ್ನಿಂಗ್ಸ್ನಲ್ಲಿ 600 ರನ್ಗಳ ಗಡಿ ದಾಟಿದೆ.
Updated on:Aug 08, 2025 | 10:51 PM
ಭಾರತ ಮತ್ತು ಇಂಗ್ಲೆಂಡ್ (India vs England) ನಡುವಿನ ಟೆಸ್ಟ್ ಸರಣಿಯಲ್ಲಿ ಶತಕಗಳ ಮಳೆ ಸುರಿದಿತ್ತು. ಈ 5 ಟೆಸ್ಟ್ ಪಂದ್ಯಗಳ ಸರಣಿಯಲ್ಲಿ ಎರಡೂ ತಂಡಗಳು ಒಟ್ಟು 21 ಶತಕಗಳನ್ನು ಬಾರಿಸಿದವು. ವಿಶೇಷವಾಗಿ ಸರಣಿಯ ಮೊದಲ ಪಂದ್ಯದಲ್ಲಿ, ಟೀಂ ಇಂಡಿಯಾದ ಮೂವರು ಬ್ಯಾಟ್ಸ್ಮನ್ಗಳು ಒಂದೇ ಇನ್ನಿಂಗ್ಸ್ನಲ್ಲಿ ಶತಕ ಸಿಡಿಸಿದ್ದರು. ಆ ಸಾಧನೆಯ ಸುಮಾರು ಒಂದೂವರೆ ತಿಂಗಳ ನಂತರ, ನ್ಯೂಜಿಲೆಂಡ್ ಕ್ರಿಕೆಟ್ (New Zealand cricket) ತಂಡದ ಮೂವರು ಬ್ಯಾಟ್ಸ್ಮನ್ಗಳು ಅದೇ ರೀತಿಯ ಸಾಧನೆ ಮಾಡಿದ್ದಾರೆ. ಜಿಂಬಾಬ್ವೆ ವಿರುದ್ಧದ ಎರಡನೇ ಟೆಸ್ಟ್ ಪಂದ್ಯದ ಮೊದಲ ಇನ್ನಿಂಗ್ಸ್ನಲ್ಲಿ ಮೂವರು ನ್ಯೂಜಿಲೆಂಡ್ ಬ್ಯಾಟ್ಸ್ಮನ್ಗಳು ಶತಕ ಸಿಡಿಸಿದರು.
ಆತಿಥೇಯ ಜಿಂಬಾಬ್ವೆ ಮತ್ತು ನ್ಯೂಜಿಲೆಂಡ್ ನಡುವಿನ ಟೆಸ್ಟ್ ಸರಣಿಯ ಎರಡನೇ ಪಂದ್ಯ ಆಗಸ್ಟ್ 7 ರಂದು ಬುಲವಾಯೊದಲ್ಲಿ ಪ್ರಾರಂಭವಾಯಿತು. ಪಂದ್ಯದ ಮೊದಲ ದಿನದಂದು ಮೊದಲು ಬ್ಯಾಟಿಂಗ್ ಮಾಡಿದ ಜಿಂಬಾಬ್ವೆ ಬ್ಯಾಟ್ಸ್ಮನ್ಗಳ ವೈಫಲ್ಯದಿಂದಾಗಿ ಮೊದಲ ಇನ್ನಿಂಗ್ಸ್ನಲ್ಲಿ ಕೇವಲ 125 ರನ್ಗಳಿಗೆ ಆಲೌಟ್ ಆಯಿತು. ಇದರ ನಂತರ ಬ್ಯಾಟಿಂಗ್ ಆರಂಭಿಸಿದ ನ್ಯೂಜಿಲೆಂಡ್ ರನ್ಗಳ ಮಳೆ ಹರಿಸಿತು. ಮೊದಲ ದಿನದಂದು, ಆರಂಭಿಕ ಆಟಗಾರ ವಿಲ್ ಯಂಗ್ 74 ರನ್ಗಳಿಗೆ ಔಟಾದರೆ, ಎರಡನೇ ದಿನ ಮೂವರು ಬ್ಯಾಟ್ಸ್ಮನ್ಗಳು ಶತಕ ಗಳಿಸಿದರು.
ಕಾನ್ವೇ-ನಿಕೋಲ್ಸ್ ಮತ್ತು ರಚಿನ್ ಶತಕ
ಬಹಳ ದಿನಗಳಿಂದ ಕಳಪೆ ಫಾರ್ಮ್ನಿಂದ ಬಳಲುತ್ತಿದ್ದ ಓಪನರ್ ಡೆವೊನ್ ಕಾನ್ವೇ, ಈ ಸರಣಿಯಲ್ಲಿ ತಮ್ಮ ಮೊದಲ ಶತಕ ಮತ್ತು ಅವರ ವೃತ್ತಿಜೀವನದ 5 ನೇ ಶತಕವನ್ನು ದಾಖಲಿಸಿದರು. ಅಂತಿಮವಾಗಿ ಕಾನ್ವೇ 153 ರನ್ ಬಾರಿಸಿ ಔಟಾದರು. ಅವರ ನಂತರ, ಹೆನ್ರಿ ನಿಕೋಲ್ಸ್ ಕೂಡ ತಮ್ಮ ಟೆಸ್ಟ್ ವೃತ್ತಿಜೀವನದ 11 ನೇ ಶತಕವನ್ನು ಸಿಡಿಸಿದರು. ಅಲ್ಲದೆ ನಿಕೋಲ್ಸ್, ಕಾನ್ವೇ ಅವರೊಂದಿಗೆ 110 ರನ್ಗಳ ಪಾಲುದಾರಿಕೆಯನ್ನು ಹಂಚಿಕೊಂಡರು. ನಂತರ ಬಂದ ರಚಿನ್ ರವೀಂದ್ರ ಅವರೊಂದಿಗೆ ಸೇರಿ ತಂಡವನ್ನು 550 ರನ್ಗಳ ಗಡಿ ದಾಟಿಸಿದರು . ಇತ್ತ ರವೀಂದ್ರ ಕೂಡ ತಮ್ಮ ವೃತ್ತಿಜೀವನದ ಮೂರನೇ ಶತಕ ಪೂರೈಸಿದರು.
ಒಂದೇ ಒಂದು ಸಿಕ್ಸರ್ ಕೂಡ ಸಿಡಿಯಲಿಲ್ಲ
ಈ 3 ಶತಕಗಳು ಮತ್ತು ಅರ್ಧಶತಕದ ಇನ್ನಿಂಗ್ಸ್ ಆಧಾರದ ಮೇಲೆ, ನ್ಯೂಜಿಲೆಂಡ್ ಪ್ರತಿ ಓವರ್ಗೆ 4 ಕ್ಕಿಂತ ಹೆಚ್ಚು ರನ್ಗಳ ದರದಲ್ಲಿ ರನ್ ಗಳಿಸಿತು. ಆದರೆ ಆಶ್ಚರ್ಯಕರ ಸಂಗತಿಯೆಂದರೆ 127 ಓವರ್ಗಳಲ್ಲಿ 578 ರನ್ಗಳನ್ನು ಗಳಿಸಿದರೂ, ನ್ಯೂಜಿಲೆಂಡ್ ಈ ಇನ್ನಿಂಗ್ಸ್ನಲ್ಲಿ ಒಂದೇ ಒಂದು ಸಿಕ್ಸರ್ ಬಾರಿಸಲಿಲ್ಲ. ಶತಕ ವೀರರಾದ ಕಾನ್ವೇ 18 ಬೌಂಡರಿಗಳನ್ನು ಬಾರಿಸಿದರೆ, ವಿಲ್ ಯಂಗ್ 11, ನಿಕೋಲ್ಸ್ 14 ಮತ್ತು ರಚಿನ್ 20 ಬೌಂಡರಿಗಳನ್ನು ಕಲೆಹಾಕಿದರು.
Rishabh Pant Injury Update: ಏಷ್ಯಾಕಪ್ನಿಂದ ಹೊರಬಿದ್ದ ರಿಷಭ್ ಪಂತ್; ಟೆಸ್ಟ್ ಸರಣಿಗೂ ಡೌಟ್
ಅಂತಿಮವಾಗಿ ಇನ್ನಿಂಗ್ಸ್ನ 128 ನೇ ಓವರ್ನಲ್ಲಿ ರಚಿನ್ ರವೀಂದ್ರ, ವಿನ್ಸೆಂಟ್ ಮಸೆಕೆಸಾ ಅವರ ಓವರ್ನಲ್ಲಿ ಸಿಕ್ಸರ್ ಬಾರಿಸುವ ಮೂಲಕ ಈ ಕಾಯುವಿಕೆಯನ್ನು ಕೊನೆಗೊಳಿಸಿದರು. ನಂತರ ಅದೇ ಓವರ್ನಲ್ಲಿ ಮತ್ತೊಂದು ಸಿಕ್ಸ್ ಬಾರಿಸಿ ರಚಿನ್ ಶೀಘ್ರದಲ್ಲೇ 160 ರನ್ಗಳನ್ನು ದಾಟಿ ತಂಡವನ್ನು 600 ರನ್ಗಳ ಗಡಿ ದಾಟಿಸಿದರು.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 10:40 pm, Fri, 8 August 25
