ಭಾರತ-ಆಸ್ಟ್ರೇಲಿಯಾ ಪಂದ್ಯದ ವೇಳೆ ಯುವರಾಜ್ ಸಿಂಗ್​ಗೆ ವಿಶೇಷ ಗೌರವ: ಭಾವುಕರಾದ ಸಿಕ್ಸರ್ ಕಿಂಗ್

ಮೊಹಾಲಿಯಲ್ಲಿ ನಡೆದ ಭಾರತ-ಆಸ್ಟ್ರೇಲಿಯಾ ನಡುವಣ ಪಂದ್ಯದ ವೇಳೆ ಟೀಮ್ ಇಂಡಿಯಾ ಮಾಜಿ ಆಟಗಾರ ಯುವರಾಜ್ ಸಿಂಗ್ ಅವರಿಗೆ ವಿಶೇಷ ಗೌರವ ಸಲ್ಲಿಸಲಾಗಿದೆ. ಪಂಜಾಬ್ ಮೂಲದ ಕ್ರಿಕೆಟಿಗನಾಗಿರುವ ಯುವಿಯ ಸಾಧನೆಯನ್ನು ಗೌರವಿಸುವ ಸಲುವಾಗಿ ಇದೀಗ ಪಂಜಾಬ್ ಕ್ರಿಕೆಟ್ ಅಸೋಸಿಯೇಷನ್ ​​(ಪಿಸಿಎ) ಮೊಹಾಲಿ ಸ್ಟೇಡಿಯಂನ ಸ್ಟ್ಯಾಂಡ್​ಗೆ ಯುವರಾಜ್ ಸಿಂಗ್ ಹೆಸರು ನೀಡಲಾಗಿದೆ. ಹಾಗೆಯೇ ಮತ್ತೋರ್ವ ಪಂಜಾಬಿ ಕ್ರಿಕೆಟಿಗ ಹರ್ಭಜನ್ ಸಿಂಗ್​ಗೂ ಗೌರವ ಸಲ್ಲಿಸಲಾಗಿದ್ದು, ಸ್ಟೇಡಿಯಂನ ಮತ್ತೊಂದು ಸ್ಟ್ಯಾಂಡ್​ಗೆ ಟೀಮ್ ಇಂಡಿಯಾದ ಮಾಜಿ ಸ್ಪಿನ್ನರ್​ನ ಹೆಸರಿಡಲಾಗಿದೆ. ಅದರಂತೆ ಮುಂಬುರುವ ದಿನಗಳಲ್ಲಿ ಮೊಹಾಲಿ ಸ್ಟೇಡಿಯಂನ ಎರಡು ಗ್ಯಾಲರಿಗಳು ಯುವರಾಜ್ ಸಿಂಗ್ ಹಾಗೂ ಹರ್ಭಜನ್ ಸಿಂಗ್ ಹೆಸರಿನಲ್ಲಿ ರಾರಾಜಿಸಲಿದೆ.

ಈ ವಿಶೇಷ ಗೌರವದ ಬಳಿಕ ಮಾತನಾಡಿದ ಯುವರಾಜ್ ಸಿಂಗ್, ರಾಜ್ಯ ಘಟಕಗಳು ಅಂತರರಾಷ್ಟ್ರೀಯ ಕ್ರಿಕೆಟಿಗರ ಸಾಧನೆಗಳನ್ನು ಗೌರವಿಸುವ ಜೊತೆಗೆ ಮಾಜಿ ದೇಶೀಯ ಕ್ರಿಕೆಟಿಗರ ಸಾಧನೆಗಳನ್ನು ಸಹ ಪ್ರಶಂಸಿಸಬೇಕು ಎಂದು ಹೇಳಿದರು. ಈ ಮೂಲಕ ದೇಶೀಯ ಅಂಗಳದಲ್ಲಿ ಮಿಂಚಿದ್ದ ಕ್ರಿಕೆಟಿಗರಿಗೂ ಇಂತಹ ಗೌರವ ನೀಡಬೇಕೆಂದು ಪರೋಕ್ಷವಾಗಿ ತಿಳಿಸಿದರು.
40 ವರ್ಷದ ಅನುಭವಿ ಆಲ್‌ರೌಂಡರ್ ಸುಮಾರು ಎರಡು ದಶಕಗಳ ಕಾಲ ಅಂತರಾಷ್ಟ್ರೀಯ ಕ್ರಿಕೆಟ್ ಆಡಿದ ನಂತರ 2019 ರಲ್ಲಿ ನಿವೃತ್ತರಾದರು.

ಭಾವುಕರಾದ ಯುವರಾಜ್ ಸಿಂಗ್:

2011ರ ವಿಶ್ವಕಪ್ ಹೀರೋಗಳಲ್ಲಿ ಒಬ್ಬರಾಗಿರುವ ಯುವರಾಜ್ ಸಿಂಗ್ ಬಿಸಿಸಿಐನ ‘ಬ್ಲೇಜರ್’ ಧರಿಸಿ ಈ ಕಾರ್ಯಕ್ರಮಕ್ಕೆ ಆಗಮಿಸಿದ್ದು ವಿಶೇಷ. ಈ ‘ಬ್ಲೇಜರ್’ ಬಗ್ಗೆ ಕೇಳಿದಾಗ ಭಾವುಕರಾದ ಯುವಿ, ಪಿಸಿಎ ಸ್ಟೇಡಿಯಂನಲ್ಲಿ ಈ ರೀತಿ ಮರಳಿರುವುದು ಸಂತಸ ತಂದಿದೆ ಎಂದರು.

ನಾನು ಮೊದಲ ಬಾರಿಗೆ ನನ್ನ ಕ್ರೀಡಾಂಗಣದಲ್ಲಿ ಬಿಸಿಸಿಐ ಬ್ಲೇಜರ್ ಧರಿಸುತ್ತಿದ್ದೇನೆ. ಅದು ಕೂಡ ನನ್ನ ರಾಜ್ಯ ಕ್ರಿಕೆಟ್ ಅಸೋಷಿಯೇಷನ್​ನಿಂದ ಈ ಗೌರವಕ್ಕೆ ಪಾತ್ರರಾಗುತ್ತಿರುವುದಕ್ಕೆ ತುಂಬಾ ಖುಷಿಯಿದೆ ಎಂದು ಭಾವುಕರಾದರು. ಟೀಮ್ ಇಂಡಿಯಾ ಪರ 40 ಟೆಸ್ಟ್​, 304 ಏಕದಿನ ಮತ್ತು 58 ಟಿ20 ಪಂದ್ಯಗಳನ್ನಾಡಿರುವ ಯುವರಾಜ್ ಸಿಂಗ್ ಒಟ್ಟು 11,778 ರನ್​ ಕಲೆಹಾಕಿದ್ದಾರೆ. ಹಾಗೆಯೇ 148 ವಿಕೆಟ್ ಉರುಳಿಸುವ ಮೂಲಕ ಮಿಂಚಿದ್ದರು.