ಬರೋಬ್ಬರಿ 31 ಶತಕ: ಒಂದೇ ಒಂದು ಚಾನ್ಸ್ ಸಿಗದೇ ವಿದಾಯ ಹೇಳಿದ ಶೆಲ್ಡನ್​ ಜಾಕ್ಸನ್

ದೇಶೀಯ ಅಂಗಳದ ಸ್ಟಾರ್ ವಿಕೆಟ್ ಕೀಪರ್ ಬ್ಯಾಟರ್ ಶೆಲ್ಡನ್ ಜಾಕ್ಸನ್ ತಮ್ಮ ವೃತ್ತಿಜೀವನಕ್ಕೆ ವಿದಾಯ ಹೇಳಿದ್ದಾರೆ. 15 ವರ್ಷಗಳಿಂದ ಭಾರತೀಯ ಅಂಗಳದಲ್ಲಿ ಮಿಂಚಿದ್ದ ಶೆಲ್ಡನ್ ಒಮ್ಮೆಯೂ ಟೀಮ್ ಇಂಡಿಯಾಗೆ ಆಯ್ಕೆಯಾಗಿರಲಿಲ್ಲ ಎಂಬುದು ವಿಶೇಷ. ಪ್ರಥಮ ದರ್ಜೆ ಕ್ರಿಕೆಟ್​ನಲ್ಲಿ ಒಟ್ಟು 106 ಪಂದ್ಯಗಳನ್ನಾಡಿರುವ ಶೆಲ್ಡನ್ ಜಾಕ್ಸನ್ 45.80 ರ ಸರಾಸರಿಯಲ್ಲಿ ಒಟ್ಟು 7283 ರನ್ ಕಲೆಹಾಕಿದ್ದಾರೆ. ಈ ವೇಳೆ ಅವರ ಬ್ಯಾಟ್​ನಿಂದ 21 ಶತಕಗಳು ಮೂಡಿಬಂದಿದ್ದವು. ಅಲ್ಲದೆ 39 ಅರ್ಧಶತಕಗಳನ್ನು ಸಹ ಬಾರಿಸಿದ್ದಾರೆ.

ಇನ್ನು ಲಿಸ್ಟ್​ ಎ ಕ್ರಿಕೆಟ್​ನಲ್ಲಿ 86 ಪಂದ್ಯಗಳನ್ನಾಡಿರುವ ಶೆಲ್ಡನ್, 9 ಭರ್ಜರಿ ಶತಕ ಹಾಗೂ 14 ಅರ್ಧಶತಕಗೊಂದಿಗೆ ಒಟ್ಟು 2792 ರನ್ ಪೇರಿಸಿದ್ದಾರೆ.
ಹಾಗೆಯೇ 84 ಟಿ20 ಪಂದ್ಯಗಳನ್ನಾಡಿರುವ ಅವರು 1812 ರನ್ ಕಲೆಹಾಕಿದ್ದಾರೆ. ಈ ವೇಳೆ ಶೆಲ್ಡನ್ ಬ್ಯಾಟ್​ನಿಂದ 1 ಶತಕ ಹಾಗೂ 11 ಅರ್ಧಶತಕಗಳು ಮೂಡಿಬಂದಿವೆ.

ಹೀಗೆ ದೇಶೀಯ ಅಂಗಳದಲ್ಲಿ 31 ಶತಕ, 64 ಅರ್ಧಶತಕಗಳೊಂದಿಗೆ ಒಟ್ಟು 11887 ರನ್ ಕಲೆಹಾಕಿದ್ದ ಶೆಲ್ಡನ್ ಜಾಕ್ಸನ್ ಅವರಿಗೆ ಒಮ್ಮೆಯೂ ಟೀಮ್ ಇಂಡಿಯಾದಲ್ಲಿ ಅವಕಾಶ ಸಿಕ್ಕಿರಲಿಲ್ಲ.

ಅದರಲ್ಲೂ ಪ್ರಮುಖ ವಿಕೆಟ್​ ಕೀಪರ್​ಗಳ ಅನುಪಸ್ಥಿತಿಯಲ್ಲಿ ಭಾರತ ಟೆಸ್ಟ್​ ತಂಡದಲ್ಲಿ ಶೆಲ್ಡನ್ ಅವಕಾಶವನ್ನು ಎದುರು ನೋಡುತ್ತಿದ್ದರು. ಆದರೆ ಉತ್ತಮ ಪ್ರದರ್ಶನದ ಹೊರತಾಗಿಯೂ ಸೌರಾಷ್ಟ್ರ ತಂಡದ ಆಟಗಾರರನ ಆಯ್ಕೆಗೆ ಆಯ್ಕೆ ಸಮಿತಿ ಆಸಕ್ತಿ ತೋರಿರಲಿಲ್ಲ ಎಂಬುದೇ ಸತ್ಯ.

ವಿರಾಟ್ ಕೊಹ್ಲಿ ಜೊತೆ ಶೆಲ್ಡನ್ ಜಾಕ್ಸನ್

ಐಪಿಎಲ್​ನಲ್ಲೂ ಕಾಣಿಸಿಕೊಂಡಿದ್ದ ಶೆಲ್ಡನ್:

ಶೆಲ್ಡನ್ ಜಾಕ್ಸನ್ ಇಂಡಿಯನ್ ಪ್ರೀಮಿಯರ್ ಲೀಗ್​ನಲ್ಲಿ ಎರಡು ತಂಡಗಳಲ್ಲಿ ಕಾಣಿಸಿಕೊಂಡಿದ್ದಾರೆ. 2013 ರಲ್ಲಿ ಆರ್​ಸಿಬಿ ತಂಡಕ್ಕೆ ವಿಕೆಟ್ ಕೀಪರ್ ಆಗಿ ಶೆಲ್ಡನ್ ಆಯ್ಕೆಯಾಗಿದ್ದರು. ಇದಾಗ್ಯೂ ಅವರಿಗೆ ಕಣಕ್ಕಿಳಿಯಲು ಅವಕಾಶ ಸಿಕ್ಕಿರಲಿಲ್ಲ.

ಇದನ್ನೂ ಓದಿ: ಚಾಂಪಿಯನ್ಸ್ ಟ್ರೋಫಿಯಿಂದ ಆಸ್ಟ್ರೇಲಿಯಾ ತಂಡದ 5 ಸ್ಟಾರ್ ಆಟಗಾರರು ಔಟ್

ಆ ಬಳಿಕ 2015 ರಲ್ಲಿ ಅವರು ಕೊಲ್ಕತ್ತಾ ನೈಟ್ ರೈಡರ್ಸ್ ತಂಡಕ್ಕೆ ಆಯ್ಕೆಯಾದರು. 2015, 2016, 2017, 2021 ಮತ್ತು 2022 ರಲ್ಲಿ ಕೆಕೆಆರ್ ತಂಡದ ಭಾಗವಾಗಿದ್ದ ಶೆಲ್ಡನ್ ಜಾಕ್ಸನ್ ಒಟ್ಟು 9 ಪಂದ್ಯಗಳನ್ನಾಡಿದ್ದಾರೆ. ಈ ವೇಳೆ 8 ಇನಿಂಗ್ಸ್​ಗಳಲ್ಲಿ ಬ್ಯಾಟ್ ಬೀಸಿರುವ ಅವರು ಒಟ್ಟು 61 ರನ್​ ಗಳಿಸಲಷ್ಟೇ ಶಕ್ತರಾಗಿದ್ದರು.