Rashid Khan: ಜಸ್ಟ್ 68 ಪಂದ್ಯಗಳಲ್ಲಿ ಹೊಸ ದಾಖಲೆ ಬರೆದ ರಶೀದ್ ಖಾನ್
Rashid Khan: ಈ ಪಟ್ಟಿಯಲ್ಲಿ ಬಾಂಗ್ಲಾದೇಶ್ ತಂಡದ ಶಕೀಬ್ ಅಲ್ ಹಸನ್ ಅಗ್ರಸ್ಥಾನದಲ್ಲಿದ್ದು, ಶಕೀಬ್ 100 ಪಂದ್ಯಗಳಿಂದ 122 ವಿಕೆಟ್ ಕಬಳಿಸಿದ್ದಾರೆ.
Asia Cup 2022: ಏಷ್ಯಾಕಪ್ನ ಮೂರನೇ ಪಂದ್ಯದಲ್ಲಿ ಬಾಂಗ್ಲಾದೇಶ್ ತಂಡದ ವಿರುದ್ದ ಅಫ್ಘಾನಿಸ್ತಾನ್ (AFG vs BAN) ತಂಡವು 7 ವಿಕೆಟ್ಗಳ ಭರ್ಜರಿ ಜಯ ಸಾಧಿಸಿತ್ತು. ಈ ಗೆಲುವಿನ ರುವಾರಿಗಳೆಂದರೆ ಮುಜೀಬ್ ಉರ್ ರಹಮಾನ್, ರಶೀದ್ ಖಾನ್ (Rashid Khan) ಹಾಗೂ ನಜೀಬುಲ್ಲಾ ಝರ್ದಾನ್. ಮುಜೀಬ್-ರಶೀದ್ ಖಾನ್ ಬೌಲಿಂಗ್ನಲ್ಲಿ ಮಿಂಚಿದರೆ, ಝರ್ದಾನ್ ಬ್ಯಾಟಿಂಗ್ನಲ್ಲಿ ಅಬ್ಬರಿಸಿದ್ದರು.
ಅದರಲ್ಲೂ ಮೊದಲು ಬ್ಯಾಟ್ ಮಾಡಿದ ಬಾಂಗ್ಲಾ ಬ್ಯಾಟಿಂಗ್ ಲೈನಪ್ ಅನ್ನು ಹಳ್ಳಕ್ಕೆ ಕೆಡವಿದ್ದು ಮುಜೀಬ್ ಹಾಗೂ ರಶೀದ್ ಖಾನ್. ಮೊದಲ ಮೂರು ವಿಕೆಟ್ಗಳನ್ನು ಮುಜೀಬ್ ಪಡೆದರೆ, ಮಧ್ಯಮ ಕ್ರಮಾಂಕದ ಮೂವರು ಬ್ಯಾಟ್ಸ್ಮನ್ಗಳನ್ನು ರಶೀದ್ ಖಾನ್ ಪೆವಿಲಿಯನ್ಗೆ ಕಳುಹಿಸಿದ್ದರು.
ಈ ಮೂರು ವಿಕೆಟ್ಗಳೊಂದಿಗೆ ಟಿ20 ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ರಶೀದ್ ಖಾನ್ ಹೊಸ ದಾಖಲೆಯನ್ನೂ ಕೂಡ ತಮ್ಮದಾಗಿಸಿಕೊಂಡಿದರು. ಅಂದರೆ ಇದೀಗ ಟಿ20 ಕ್ರಿಕೆಟ್ನಲ್ಲಿ ಅತ್ಯಧಿಕ ವಿಕೆಟ್ ಪಡೆದವರ ಪಟ್ಟಿಯಲ್ಲಿ ರಶೀದ್ ಖಾನ್ ಇದೀಗ 2ನೇ ಸ್ಥಾನಕ್ಕೇರಿದ್ದಾರೆ.
93 ಇನಿಂಗ್ಸ್ ಮೂಲಕ 114 ವಿಕೆಟ್ ಪಡೆದಿದ್ದ ನ್ಯೂಜಿಲೆಂಡ್ನ ವೇಗಿ ಟಿಮ್ ಸೌಥಿಯನ್ನು ರಶೀದ್ ಖಾನ್ ಹಿಂದಿಕ್ಕಿದ್ದಾರೆ. ಈ ಮೂಲಕ ಟಿ20 ಕ್ರಿಕೆಟ್ನ ಟಾಪ್ ವಿಕೆಟ್ ಟೇಕರ್ಸ್ ಪಟ್ಟಿಯಲ್ಲಿ 2ನೇ ಸ್ಥಾನಕ್ಕೇರಿದ್ದಾರೆ.
ವಿಶೇಷ ಎಂದರೆ ರಶೀದ್ ಖಾನ್ ಈ ಸಾಧನೆ ಮಾಡಿದ್ದು ಕೇವಲ 68 ಪಂದ್ಯಗಳಲ್ಲಿ ಎಂಬುದೇ ಅಚ್ಚರಿ. ಅಂದರೆ ಅತೀ ಕಡಿಮೆ ಪಂದ್ಯಗಳಲ್ಲೂ 100 ಕ್ಕೂ ಅಧಿಕ ವಿಕೆಟ್ ಪಡೆದ ಹೆಗ್ಗಳಿಕೆ ಅಫ್ಘಾನ್ ಸ್ಪಿನ್ನರ್ಗೆ ಸಲ್ಲುತ್ತದೆ. ಸದ್ಯ ರಶೀದ್ ಖಾನ್ ಕೇವಲ 68 ಇನಿಂಗ್ಸ್ ಮೂಲಕ ಒಟ್ಟು 115 ವಿಕೆಟ್ಗಳನ್ನು ಕಬಳಿಸಿದ್ದಾರೆ. ಈ ಮೂಲಕ ಟಿ20 ಕ್ರಿಕೆಟ್ 2ನೇ ಯಶಸ್ವಿ ಬೌಲರ್ ಎನಿಸಿಕೊಂಡಿದ್ದಾರೆ.
ಸದ್ಯ ಈ ಪಟ್ಟಿಯಲ್ಲಿ ಬಾಂಗ್ಲಾದೇಶ್ ತಂಡದ ಶಕೀಬ್ ಅಲ್ ಹಸನ್ ಅಗ್ರಸ್ಥಾನದಲ್ಲಿದ್ದು, ಶಕೀಬ್ 100 ಪಂದ್ಯಗಳಿಂದ 122 ವಿಕೆಟ್ ಕಬಳಿಸಿದ್ದಾರೆ. ಇನ್ನು ಈ ಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಲು ರಶೀದ್ ಖಾನ್ಗೆ ಕೇವಲ 8 ವಿಕೆಟ್ಗಳ ಅವಶ್ಯಕತೆಯಿದ್ದು, ಈ ಬಾರಿಯ ಏಷ್ಯಾಕಪ್ ಮೂಲಕ ನಂಬರ್ 1 ಸ್ಥಾನಕ್ಕೇರಲಿದ್ದಾರಾ ಕಾದು ನೋಡಬೇಕಿದೆ.