ಮೊಹಾಲಿ ಮೈದಾನದಲ್ಲಿ ತಡರಾತ್ರಿ ಬ್ಯಾಟಿಂಗ್ ಅಭ್ಯಾಸ ನಡೆಸಿದ ಅಶ್ವಿನ್; ವಿಡಿಯೋ ನೋಡಿ
Ravichandran Ashwin: ವರ್ಷಗಳ ಬಳಿಕ ಏಕದಿನ ತಂಡದಲ್ಲಿ ಸ್ಥಾನ ಪಡೆದಿದ್ದ ಆರ್. ಅಶ್ವಿನ್ ತಕ್ಕ ಮಟ್ಟಿಗೆ ಉತ್ತಮ ಪ್ರದರ್ಶನ ನೀಡಿದರು. ಅಕ್ಷರ್ ಪಟೇಲ್ ಇಂಜುರಿಗೊಳಗಾಗಿರುವ ಈ ಸಮಯದಲ್ಲಿ ಅಶ್ವಿನ್ ನೀಡಿದ ಈ ಪ್ರದರ್ಶನ ಆಯ್ಕೆ ಮಂಡಳಿಗೆ ಕೊಂಚ ಸಮಾಧಾನವನ್ನುಂಟು ಮಾಡಿರುವುದಂತೂ ಖಚಿತ.
Updated on:Sep 23, 2023 | 11:38 AM
ಮೊಹಾಲಿಯಲ್ಲಿ ನಡೆದ ಮೊದಲ ಏಕದಿನ ಪಂದ್ಯದಲ್ಲಿ ಟೀಂ ಇಂಡಿಯಾ, ಕಾಂಗರೂಗಳ (India vs Australia) ವಿರುದ್ಧ ಐದು ವಿಕೆಟ್ಗಳ ಸುಲಭ ಜಯ ಸಾಧಿಸಿದೆ. ಇನ್ನು ಈ ಪಂದ್ಯದಲ್ಲಿ ಟೀಂ ಇಂಡಿಯಾ ತನ್ನ ನಿಯಮಿತ ನಾಯಕ ರೋಹಿತ್ ಶರ್ಮಾ (Rohit Sharma), ಸ್ಟಾರ್ ಬ್ಯಾಟ್ಸ್ಮನ್ ವಿರಾಟ್ ಕೊಹ್ಲಿ ಮತ್ತು ಕೆಲವು ಪ್ರಮುಖ ಆಟಗಾರರಿಲ್ಲದೆ ಕಣಕ್ಕಿಳಿದಿತ್ತು. ಹೀಗಾಗಿ ತಂಡದಲ್ಲಿ ರುತುರಾಜ್ ಗಾಯಕ್ವಾಡ್, ಆರ್. ಅಶ್ವಿನ್ (R Ashwin) ಹಾಗೂ ಶಾರ್ದೂಲ್ ಠಾಕೂರ್ಗೆ ಅವಕಾಶ ನೀಡಲಾಗಿತ್ತು. ಇದರಲ್ಲಿ ಅರ್ಧಶತಕ ಸಿಡಿಸಿದ ರುತುರಾಜ್ ತಮ್ಮ ಆಯ್ಕೆಗೆ ನ್ಯಾಯ ಒದಗಿಸಿದರೆ, ವರ್ಷಗಳ ಬಳಿಕ ಏಕದಿನ ತಂಡದಲ್ಲಿ ಸ್ಥಾನ ಪಡೆದಿದ್ದ ಆರ್. ಅಶ್ವಿನ್ ತಕ್ಕ ಮಟ್ಟಿಗೆ ಉತ್ತಮ ಪ್ರದರ್ಶನ ನೀಡಿದರು. ಅಕ್ಷರ್ ಪಟೇಲ್ (Akshar Patel) ಇಂಜುರಿಗೊಳಗಾಗಿರುವ ಈ ಸಮಯದಲ್ಲಿ ಅಶ್ವಿನ್ ನೀಡಿದ ಈ ಪ್ರದರ್ಶನ ಆಯ್ಕೆ ಮಂಡಳಿಗೆ ಕೊಂಚ ಸಮಾಧಾನವನ್ನುಂಟು ಮಾಡಿರುವುದಂತೂ ಖಚಿತ.
ಭಾರತಕ್ಕೆ ಸುಲಭ ಜಯ
ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಆಸ್ಟ್ರೇಲಿಯಾ 50 ಓವರ್ಗಳ ಸಂಪೂರ್ಣ ಇನ್ನಿಂಗ್ಸ್ ಆಡಿ 276 ರನ್ಗಳಿಗೆ ಆಲೌಟ್ ಆಯಿತು. ಈ ಗುರಿ ಬೆನ್ನಟ್ಟಿದ ಭಾರತದ ಪರ ಶುಭ್ಮನ್ ಗಿಲ್ (74), ರುತುರಾಜ್ ಗಾಯಕ್ವಾಡ್ (71), ನಾಯಕ ಕೆಎಲ್ ರಾಹುಲ್ (ಅಜೇಯ 58), ಸೂರ್ಯಕುಮಾರ್ ಯಾದವ್ (50) ಅವರ ಅರ್ಧಶತಕಗಳ ನೆರವಿನಿಂದ ಮೆನ್ ಇನ್ ಬ್ಲೂ ತಂಡವು 48.4 ಓವರ್ಗಳಲ್ಲಿ ಕೇವಲ ಐದು ವಿಕೆಟ್ಗಳ ನಷ್ಟಕ್ಕೆ 277 ರನ್ಗಳ ಮೊತ್ತವನ್ನು ಬೆನ್ನಟ್ಟಿತು.
ಭಾರತ- ಆಸ್ಟ್ರೇಲಿಯಾ ಎರಡನೇ ಏಕದಿನ ಪಂದ್ಯಕ್ಕೆ ಮಳೆ ಭೀತಿ; ಕ್ರೀಡಾಂಗಣದ ಅಧಿಕಾರಿಗಳು ಹೇಳಿದ್ದೇನು?
1 ವಿಕೆಟ್ ಉರುಳಿಸಿದ ಅಶ್ವಿನ್
ಇನ್ನು ಈ ಪಂದ್ಯದಲ್ಲಿ ಭಾರತದ ಪರ ಬರೋಬ್ಬರಿ 20 ತಿಂಗಳ ನಂತರ ಕಣಕ್ಕಿಳಿದಿದ್ದ ಹಿರಿಯ ಸ್ಪಿನ್ನರ್ ರವಿಚಂದ್ರನ್ ಅಶ್ವಿನ್ ತಮ್ಮ ಖೋಟಾದ 10 ಓವರ್ಗಳಲ್ಲಿ 47 ರನ್ಗಳನ್ನು ಬಿಟ್ಟುಕೊಟ್ಟು ಮಾರ್ನಸ್ ಲಬುಶೇನ್ ರೂಪದಲ್ಲಿ ಅವಶ್ಯಕ ವಿಕೆಟ್ ಪಡೆದರು. ಭಾರತ ಕೇವಲ ಐದು ವಿಕೆಟ್ಗಳ ನಷ್ಟಕ್ಕೆ ಗುರಿಯನ್ನು ಸಾಧಿಸಿದ ಕಾರಣ ಅಶ್ವಿನ್ಗೆ ಬ್ಯಾಟಿಂಗ್ ಮಾಡಲು ಅವಕಾಶ ಸಿಗಲಿಲ್ಲ. ಆದರೆ 37 ವರ್ಷದ ಈ ಸ್ಪಿನ್ ಆಲ್ರೌಂಡರ್, 2023 ರ ವಿಶ್ವಕಪ್ಗೆ ತಂಡ ಸೇರಿಕೊಳ್ಳುವ ತವಕದಲ್ಲಿದ್ದು, ಮೊದಲ ಏಕದಿನ ಪಂದ್ಯ ಮುಗಿದ ಬಳಿಕ ಮೈದಾನದಲ್ಲಿ ಬ್ಯಾಟ್ ಹಿಡಿದು ಕೆಲ ಹೊತ್ತು ಬ್ಯಾಟಿಂಗ್ ಅಭ್ಯಾಸ ನಡೆಸಿದರು. ಈ ವೇಳೆ ಮುಖ್ಯ ಕೋಚ್ ರಾಹುಲ್ ದ್ರಾವಿಡ್ ಮತ್ತು ಬ್ಯಾಟಿಂಗ್ ಕೋಚ್ ವಿಕ್ರಮ್ ರಾಥೋರ್ ಈ ಅಭ್ಯಾಸದ ಅವಧಿಯನ್ನು ಸೂಕ್ಷ್ಮವಾಗಿ ಗಮನಿಸಿದರು.
— Nihari Korma (@NihariVsKorma) September 23, 2023
ವಿಶ್ವಕಪ್ ತಂಡದಲ್ಲಿ ಸ್ಥಾನ?
ಅಶ್ವಿನ್ 15 ಸದಸ್ಯರ ಏಕದಿನ ವಿಶ್ವಕಪ್ ತಂಡದ ಭಾಗವಾಗಿಲ್ಲ. ಆದರೆ ಈಗ ಅಕ್ಷರ್ ಪಟೇಲ್ ಗಾಯಗೊಂಡಿರುವುದರಿಂದ ಅವರು ಸಮಯಕ್ಕೆ ಸರಿಯಾಗಿ ಚೇತರಿಸಿಕೊಳ್ಳದಿದ್ದರೆ ಅಶ್ವಿನ್ ಅವರನ್ನು ಅಕ್ಷರ್ ಪಟೇಲ್ ಬದಲಿಯಾಗಿ ವಿಶ್ವಕಪ್ ತಂಡದಲ್ಲಿ ಆಯ್ಕೆ ಮಾಡುವ ಸಾಧ್ಯತೆಗಳಿವೆ. ಅಶ್ವಿನ್ ಕೊನೆಯದಾಗಿ 2022 ರ ಜನವರಿಯಲ್ಲಿ ಏಕದಿನ ಪಂದ್ಯವನ್ನಾಡಿದ್ದರು. ಇದೀಗ ಅಕ್ಷರ್ ಪಟೇಲ್ ಬದಲಿಯಾಗಿ ಕಾಣುತ್ತಿರುವ ಅಶ್ವಿನ್, ವಿಶ್ವಕಪ್ ಆರಂಭಕ್ಕೂ ಮುನ್ನ ತಯಾರಿಯಲ್ಲಿ ತೊಡಗಿಕೊಂಡಿದ್ದಾರೆ.
ಇನ್ನಷ್ಟು ಕ್ರೀಡಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 11:37 am, Sat, 23 September 23
