ಜಿಮ್​ನಲ್ಲಿ ಬೆವರಿಳಿಸಿದ ರೋಹಿತ್, ಕೊಹ್ಲಿ: ಪಾಕ್ ವಿರುದ್ಧ ಕಣಕ್ಕಿಳಿಯುತ್ತಾರಾ ರಾಹುಲ್? ವಿಡಿಯೋ ನೋಡಿ

ನಡೆಯುತ್ತಿರುವ ಏಷ್ಯಾಕಪ್ (Asia Cup 2023) ಸೂಪರ್ ಫೋರ್ ಹಂತದಲ್ಲಿ ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನದ ವಿರುದ್ಧ ಕದನಕ್ಕಿಳಿಯುವ ಮುನ್ನ ಭಾರತ ತಂಡವು (India vs Pakistan) ಜಿಮ್‌ನಲ್ಲಿ ಸಾಕಷ್ಟು ಬೆವರು ಹರಿಸುತ್ತಿದೆ. ಈ ಹಿಂದೆ ಗುಂಪು ಹಂತಗಳಲ್ಲಿ ಎರಡೂ ತಂಡಗಳು ಮುಖಾಮುಖಿಯಾಗಿದ್ದವು. ಆದರೆ ಮಳೆಯಿಂದಾಗಿ ಪಂದ್ಯ ಯಾವುದೇ ಫಲಿತಾಂಶವಿಲ್ಲದೆ ಕೊನೆಗೊಂಡಿತು. ಇದೀಗ ಈ ಉಭಯ ತಂಡಗಳ ನಡುವಿನ ಎರಡನೇ ಕದನಕ್ಕೂ ಮಳೆ ಅಡ್ಡಿಯಾಗುವ ಆತಂಕ ಎದುರಾಗಿದೆ. ಕೊಲಂಬೊದಲ್ಲಿ ಸುರಿದ ಭಾರೀ ಮಳೆಯಿಂದಾಗಿ ಭಾರತೀಯ ಆಟಗಾರರು ಗುರುವಾರ ಒಳಾಂಗಣದಲ್ಲಿ ತರಬೇತಿ ನಡೆಸಬೇಕಾಯಿತು. ಹೀಗಾಗಿ ಬ್ಯಾಟ್ ಹಾಗೂ ಬಾಲ್​ಗೆ ಕೊಂಚ ಬ್ರೇಕ್ ನೀಡಿದ ಟೀಂ ಇಂಡಿಯಾ (Team India) ಆಟಗಾರರು ಜಿಮ್​ನಲ್ಲಿ ಹೆಚ್ಚು ಸಮಯ ಕಳೆದರು.

ನೇಪಾಳ ವಿರುದ್ಧದ ಏಷ್ಯಾಕಪ್​ ಪಂದ್ಯದಲ್ಲಿ ಟೀಂ ಇಂಡಿಯಾ 10 ವಿಕೆಟ್​ಗಳ ಭರ್ಜರಿ ಗೆಲುವನ್ನಾಚರಿಸಿತ್ತು. ಆರಂಭಿಕರಾಗಿ ಬಂದಿದ್ದ ರೋಹಿತ್ ಶರ್ಮಾ ಮತ್ತು ಶುಭ್​ಮನ್ ಇಬ್ಬರೇ ಪಂದ್ಯವನ್ನು ಮುಗಿಸಿದ್ದರು. ಅದಾಗಿ 5 ದಿನಗಳ ಬಿಡುವಿನಲ್ಲಿರುವ ಮೆನ್ ಇನ್ ಬ್ಲೂ, ಸೆಪ್ಟೆಂಬರ್ 10ರಂದು ಬದ್ಧ ಎದುರಾಳಿ ಪಾಕಿಸ್ತಾನವನ್ನು ಎದುರುಗೊಳ್ಳಲಿದೆ. ಕ್ರಿಕೆಟ್​ನಲ್ಲಿ ಭಾರತ-ಪಾಕ್ ಮುಖಾಮುಖಿ ಆಗುತ್ತಿವೆ ಎಂದರೆ ಅತ್ತ ಇಡೀ ಜಗತ್ತಿನ ಕ್ರಿಕೆಟ್ ಪ್ರೇಮಿಗಳ ಚಿತ್ತವೆಲ್ಲಾ ನೆಟ್ಟಿರುತ್ತೆ. ಹೀಗಾಗಿಯೇ ರೋಹಿತ್ ಪಡೆ ಭರ್ಜರಿ ಸಿದ್ಧತೆ ನಡೆಸುತ್ತಿದೆ.

ಪ್ರ್ಯಾಕ್ಟೀಸ್ ಸೆಷನ್​ಗೆ ಚಕ್ಕರ್ ಹಾಕಿದ ವಿರಾಟ್ ಕೊಹ್ಲಿ, ರೋಹಿತ್ ಶರ್ಮಾ

ಜಿಮ್​ನಲ್ಲಿ ಬೆವರಿಳಿಸಿದ ರೋಹಿತ್, ಕೊಹ್ಲಿ!

ಪಾಕಿಸ್ತಾನ ವಿರುದ್ಧದ ಪ್ರತಿಷ್ಠೆಯ ಪಂದ್ಯದಲ್ಲೇ ಹಿಟ್​ಮ್ಯಾನ್​ ರೋಹಿತ್ ಮತ್ತು ಕ್ರಿಕೆಟ್ ಕಿಂಗ್​ ವಿರಾಟ್ ಕೊಹ್ಲಿ ಇಬ್ಬರೂ ಮುಗ್ಗರಿಸಿದ್ದರು. ಏಷ್ಯಾಕಪ್​ 3ನೇ ಪಂದ್ಯದಲ್ಲಿ ಪಾಕ್​ ವಿರುದ್ಧ ಕ್ಯಾಪ್ಟನ್ ರೋಹಿತ್ 11 ರನ್ ಬಾರಿಸಿದರೆ, ಕೊಹ್ಲಿ ಕೇವಲ 4 ರನ್​ಗೆ ನಿರಾಸೆ ಅನುಭವಿಸಿದ್ರು. ಆವತ್ತು ರೋಹಿತ್-ಕೊಹ್ಲಿ ಇಬ್ಬರೂ ಕ್ರಿಕೆಟ್ ಅಭಿಮಾನಿಗಳನ್ನು ನಿರಾಸೆಯ ಕೂಪಕ್ಕೆ ತಳ್ಳಿದ್ದು ನಿಜ. ಆದರೆ, ಮತ್ತೆ ಸೆಪ್ಟೆಂಬರ್ 10ಕ್ಕೆ ಸೂಪರ್ 4ನಲ್ಲಿ ಭಾರತ-ಪಾಕ್​ ಎದುರುಬದುರಾಗುತ್ತಿವೆ. ಈ ಪಂದ್ಯದಲ್ಲಿ ರೋಹಿತ್, ಕೊಹ್ಲಿ ಅಬ್ಬರಿಸಿದರೆ ಅದರ ಗತ್ತೇ ಬೇರೆ. ಇದೇ ಕಾರಣಕ್ಕೆ ರೋಹಿತ್, ಕೊಹ್ಲಿ ಇಬ್ಬರೂ ಹೆಚ್ಚಿನ ಸಮಯವನ್ನು ಪ್ರ್ಯಾಕ್ಟೀಸ್​ನಲ್ಲಿ ಕಳೆಯುತ್ತಿದ್ದಾರೆ. ಜಿಮ್​ನಲ್ಲಿ ಬೆವರಿಳಿಸ್ತಿದ್ದಾರೆ.

Determined as ever 💪

Getting Super 4️⃣ ready, ft. #TeamIndia 👌👌 – By @RajalArora

WATCH 🔽 #AsiaCup2023

— BCCI (@BCCI) September 7, 2023

ಪ್ರ್ಯಾಕ್ಟೀಸ್​ ವೇಳೆ ಮೈದಾನಕ್ಕಿಳಿದ ರಾಹುಲ್

ಪಾಕ್​ ವಿರುದ್ಧ ಪಂದ್ಯಕ್ಕೂ ಮುನ್ನ ಬರೀ ರೋಹಿತ್-ಕೊಹ್ಲಿ ಮಾತ್ರ ಪ್ರ್ಯಾಕ್ಟೀಸ್​ನತ್ತ ಹೆಚ್ಚು ಗಮನಹರಿಸಿಲ್ಲ. ಬದಲಿಗೆ ಟೀಂ ಇಂಡಿಯಾ ಪ್ರತೀ ಆಟಗಾರರೂ ಕೂಡ ಶ್ರಮವಹಿಸಿ ನೆಟ್​ ಪ್ರ್ಯಾಕ್ಟೀಸ್​ನಲ್ಲಿ ತೊಡಗಿಕೊಂಡಿದ್ದಾರೆ. ಇದರ ವಿಡಿಯೋ, ಚಿತ್ರಗಳನ್ನು ಬಿಸಿಸಿಐ ಸೋಷಿಯಲ್ ಮೀಡಿಯಾದಲ್ಲಿ ಶೇರ್ ಮಾಡಿದೆ. ಇನ್ನು, ಗಾಯಕ್ಕೀಡಾಗಿದ್ದ ಕನ್ನಡಿಗ ಕೆಎಲ್ ರಾಹುಲ್​ ಸದ್ಯ ಸಂಪೂಣವಾಗಿ ಫಿಟ್​ ಆಗಿದ್ದಾರೆ. ತಂಡದ ಪ್ರ್ಯಾಕ್ಟೀಸ್ ಸೆಶನ್ ವೇಳೆ ರಾಹುಲ್​ ಕೂಡ ಮೈದಾನಕ್ಕಿಳಿದು ಅಭ್ಯಾಸ ನಡೆಸಿದ್ದಾರೆ. ಹೀಗಾಗಿ ಕೊಲಂಬೋದಲ್ಲಿ ನಡೆಯೋ ಪಾಕ್​ ವಿರುದ್ಧದ ಕುತೂಹಲಕಾರಿ ಪಂದ್ಯದಲ್ಲಿ ರಾಹುಲ್​ ಕಣಕ್ಕಿಳಿಯುವ ಸಾಧ್ಯತೆ ಹೆಚ್ಚಿದೆ.

ಇನ್ನಷ್ಟು ಕ್ರೀಡಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

Published On - 9:10 am, Fri, 8 September 23