ಸೌತ್ ಆಫ್ರಿಕಾ ಟಿ20 ಲೀಗ್​ನ ಮುಂದಿನ ಮೂರು ಸೀಸನ್​ಗಳಿಗೆ ದಿನಾಂಕ ನಿಗದಿ

ಸೌತ್ ಆಫ್ರಿಕಾ ಟಿ20 ಲೀಗ್​​ನ ಮೂರನೇ ಸೀಸನ್​ ಮುಕ್ತಾಯಕ್ಕೂ ಮುನ್ನವೇ ಮುಂದಿನ ಮೂರು ಸೀಸನ್​​ಗಳಿಗಾಗಿ ದಿನಾಂಕ ನಿಗದಿ ಮಾಡಲಾಗಿದೆ. ಅದರಂತೆ SA20 ಲೀಗ್ ಸೀಸನ್-4 ಡಿಸೆಂಬರ್ 26 ರಿಂದ ಶುರುವಾಗಲಿದೆ. ಅಂದರೆ ಬಾಕ್ಸಿಂಗ್​ ಡೇ ಮೂಲಕ ಮುಂಬರುವ ಸೀಸನ್​ ಆರಂಭಿಸಲು ಸೌತ್ ಆಫ್ರಿಕಾ ಕ್ರಿಕೆಟ್ ಬೋರ್ಡ್ ನಿರ್ಧರಿಸಿದೆ.

• ಸೌತ್ ಆಫ್ರಿಕಾ ಟಿ20 ಲೀಗ್​ನ 4ನೇ ಸೀಸನ್ ಡಿಸೆಂಬರ್ 26, 2025 ರಂದು ಪ್ರಾರಂಭವಾಗಿ ಜನವರಿ 26, 2026 ರವರೆಗೆ ನಡೆಯಲಿದೆ.

2026 ರಲ್ಲಿ ಟಿ20 ವಿಶ್ವಕಪ್ ನಡೆಯುವುದರಿಂದ ಡಿಸೆಂಬರ್-ಜನವರಿ ನಡುವೆ 4ನೇ ಸೀಸನ್ ಅನ್ನು ಆಯೋಜಿಸಲು ನಿರ್ಧರಿಸಲಾಗಿದೆ. ಅದರಂತೆ ಇದೇ ವರ್ಷಾಂತ್ಯದಲ್ಲಿ ಮತ್ತೆ ಸೌತ್ ಆಫ್ರಿಕಾ ಟಿ20 ಲೀಗ್ ನಡೆಯಲಿರುವುದು ವಿಶೇಷ.

• ಸೌತ್ ಆಫ್ರಿಕಾ ಟಿ20 ಲೀಗ್​ನ 5ನೇ ಸೀಸನ್ ಜನವರಿ 9 ರಿಂದ ಫೆಬ್ರವರಿ 14, 2027 ರವರೆಗೆ ನಡೆಯಲಿದೆ. ಅಂದರೆ ಹೀಗಿನಂತೆ ಮತ್ತೆ ಜನವರಿ-ಫೆಬ್ರವರಿ ನಡುವೆ ಟೂರ್ನಿ ಆಯೋಜಿಸಲಿದ್ದಾರೆ.
• ಸೌತ್ ಆಫ್ರಿಕಾ ಟಿ20 ಲೀಗ್​ನ 6ನೇ ಸೀಸನ್​ ಕೂಡ ಜನವರಿ 9 ರಿಂದ ಶುರುವಾಗಲಿದ್ದು, ಫೆಬ್ರವರಿ 13, 2028 ರವರೆಗೆ ನಡೆಯಲಿದೆ.

ಈ ಮೂಲಕ ಪ್ರತಿ ಸೀಸನ್​ಗಳನ್ನು ಇಂಡಿಯನ್ ಪ್ರೀಮಿಯರ್ ಲೀಗ್​ಗೂ ಮುಂಚಿತವಾಗಿ ಕೊನೆಗೊಳಿಸಲು ನಿರ್ಧರಿಸಲಾಗಿದೆ. ಇದಕ್ಕೆ ಮುಖ್ಯ ಕಾರಣ ಸೌತ್ ಆಫ್ರಿಕಾ ಲೀಗ್​ನ ಫ್ರಾಂಚೈಸಿಗಳು. ಅಂದರೆ ಸೌತ್ ಆಫ್ರಿಕಾ ಲೀಗ್​ನಲ್ಲಿ ಕಣಕ್ಕಿಳಿಯುವ 6 ಫ್ರಾಂಚೈಸಿಗಳ ಮಾಲೀಕರು ಐಪಿಎಲ್​ ತಂಡಗಳ ಓನರ್​ಗಳು.

ಸೌತ್ ಆಫ್ರಿಕಾ ಟಿ20 ಲೀಗ್​ನಲ್ಲಿ ಕಣಕ್ಕಿಳಿಯುವ ತಂಡಗಳು ಮತ್ತು ಮಾಲೀಕರು:

1. ಸನ್​ರೈಸರ್ಸ್ ಈಸ್ಟರ್ನ್ ಕೇಪ್ (ಸನ್​ರೈಸರ್ಸ್ ಹೈದರಾಬಾದ್ ಫ್ರಾಂಚೈಸಿ)
2. ಎಂಐ ಕೇಪ್​ಟೌನ್ (ಮುಂಬೈ ಇಂಡಿಯನ್ಸ್ ಫ್ರಾಂಚೈಸಿ)
3. ಜೋಬರ್ಗ್​ ಸೂಪರ್ ಕಿಂಗ್ಸ್ (ಚೆನ್ನೈ ಸೂಪರ್ ಕಿಂಗ್ಸ್ ಫ್ರಾಂಚೈಸಿ)
4. ಪಾರ್ಲ್ ರಾಯಲ್ಸ್ (ರಾಜಸ್ಥಾನ್ ರಾಯಲ್ಸ್ ಫ್ರಾಂಚೈಸಿ)
5. ಡರ್ಬನ್ ಸೂಪರ್ ಜೈಂಟ್ಸ್ (ಲಕ್ನೋ ಸೂಪರ್ ಜೈಂಟ್ಸ್ ಫ್ರಾಂಚೈಸಿ)
6. ಪ್ರಿಟೋರಿಯಾ ಕ್ಯಾಪಿಟಲ್ಸ್ (ಡೆಲ್ಲಿ ಕ್ಯಾಪಿಟಲ್ಸ್ ಫ್ರಾಂಚೈಸಿ)

ಇದನ್ನೂ ಓದಿ: ವಿರಾಟ್ ಕೊಹ್ಲಿಯನ್ನು ಹಿಂದಿಕ್ಕಿದ ಡೇವಿಡ್ ವಾರ್ನರ್

ಎಲ್ಲಾ ತಂಡಗಳು ಐಪಿಎಲ್ ಫ್ರಾಂಚೈಸಿಗಳ ಒಡೆತನದಲ್ಲಿರುವ ಕಾರಣ ಸೌತ್ ಆಫ್ರಿಕಾ ಟಿ20 ಲೀಗ್​ ಅನ್ನು ಮಿನಿ ಐಪಿಎಲ್ ಎಂದು ಬಣ್ಣಿಸಲಾಗುತ್ತದೆ. ಅಲ್ಲದೆ ಇದೇ ಕಾರಣದಿಂದಾಗಿ ಐಪಿಎಲ್ ಆರಂಭಕ್ಕೂ ಮುನ್ನವೇ ಈ ಟೂರ್ನಿಯನ್ನು ಆಯೋಜಿಸಲಾಗುತ್ತದೆ. ಅದರಂತೆ ಜನವರಿ 9 ರಿಂದ ಶುರುವಾಗಿರುವ ಸೌತ್ ಆಫ್ರಿಕಾ ಟಿ20 ಲೀಗ್​ನ ಮೂರನೇ ಸೀಸನ್ ಫೆಬ್ರವರಿ 8 ರಂದು ಕೊನೆಗೊಳ್ಳಲಿದೆ.

Published On - 8:26 am, Tue, 4 February 25