Ranji Trophy Final: ಭರ್ಜರಿ ಶತಕ ಸಿಡಿಸಿ ರಣಜಿ ಕ್ರಿಕೆಟ್​ನಲ್ಲಿ ದಾಖಲೆ ಬರೆದ ಸರ್ಫರಾಜ್ ಖಾನ್

ಬೆಂಗಳೂರಿನ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಮಧ್ಯಪ್ರದೇಶ ವಿರುದ್ದದ ರಣಜಿ ಟ್ರೋಫಿ ಫೈನಲ್​ನಲ್ಲಿ (Ranji Trophy Final 2022) ಮುಂಬೈ ತಂಡದ ಯುವ ಬ್ಯಾಟ್ಸ್​ಮನ್​ ಸರ್ಫರಾಜ್ ಖಾನ್ (Sarfaraz Khan) ಭರ್ಜರಿ ಶತಕ ಸಿಡಿಸಿ ಮಿಂಚಿದ್ದಾರೆ. ಮೊದಲ ದಿನದಾಟದಲ್ಲಿ 5 ವಿಕೆಟ್ ಕಳೆದುಕೊಂಡು 248 ರನ್​ಗಳಿಸಿದ್ದ ಮುಂಬೈ ತಂಡಕ್ಕೆ 2ನೇ ದಿನವು ಸರ್ಫರಾಜ್ ಖಾನ್ ಆಸರೆಯಾದರು. ಅದರಂತೆ 190 ಎಸೆತಗಳನ್ನು ಎದುರಿಸಿದ ಸರ್ಫರಾಜ್ 12 ಬೌಂಡರಿಗಳೊಂದಿಗೆ ಶತಕ ಪೂರೈಸಿದರು. ಈ ಶತಕದೊಂದಿಗೆ ವಿಶೇಷ ದಾಖಲೆಗಳನ್ನು ಕೂಡ ತಮ್ಮದಾಗಿಸಿಕೊಂಡಿದ್ದಾರೆ. ಈ ಬಾರಿಯ ರಣಜಿ ಟೂರ್ನಿಯಲ್ಲಿ ಒಂದು ದ್ವಿಶತಕ (275 ರನ್‌), 4 ಶತಕ ಹಾಗೂ 2 ಅರ್ಧ ಶತಕ ಬಾರಿಸಿರುವ ಸರ್ಫರಾಜ್ 900 ಕ್ಕೂ ಅಧಿಕ ರನ್​ ಕಲೆಹಾಕಿದ್ದಾರೆ. ಇದರೊಂದಿಗೆ ರಣಜಿ ಸೀಸನ್​ಗಳಲ್ಲಿ 2 ಬಾರಿ 900+ ರನ್​ಗಳಿಸಿದ ಮೂರನೇ ಆಟಗಾರ ಎನಿಸಿಕೊಂಡರು.

ಮುಂಬೈ ಪರ ಈ ಸಾಧನೆ ಮಾಡಿದ ಮೊದಲ ಆಟಗಾರ ಎಂದರೆ ಅಜಯ್ ಶರ್ಮಾ. 88 ವರ್ಷಗಳ ರಣಜಿ ಟ್ರೋಫಿ ಇತಿಹಾಸದಲ್ಲಿ ಮೊದಲ ಬಾರಿಗೆ ಅಜಯ್ ಶರ್ಮಾ ಈ ಸಾಧನೆ ಮಾಡಿದರು. ಅಜಯ್ ಶರ್ಮಾ 1991-92ರ ರಣಜಿ ಸೀಸನ್​ನಲ್ಲಿ 993 ರನ್ ಮತ್ತು 1996-97ರ ಸೀಸನ್​ನಲ್ಲಿ 1033 ರನ್ ಗಳಿಸಿದ್ದರು. ಇನ್ನು ಈ ಸಾಧನೆ ಮತ್ತೋರ್ವ ಆಟಗಾರೆಂದರೆ ವಾಸಿಂ ಜಾಫರ್.

ಮುಂಬೈನ ಶ್ರೇಷ್ಠ ರಣಜಿ ಆಟಗಾರ ವಾಸಿಫ್ ಜಾಫರ್ 2008-09 ಸೀಸನ್​ನಲ್ಲಿ 1260 ರನ್ ಬಾರಿಸಿದ್ದರು. ಇನ್ನು ತಮ್ಮ ವೃತ್ತಿಜೀವನದ ಕೊನೆಯ ದಿನಗಳಲ್ಲಿ ಜಾಫರ್​ ವಿದರ್ಭ ಪರ ಆಡಿದ್ದರು. ಈ ವೇಳೆ 2020ರ ಸೀಸನ್​ನಲ್ಲಿ 1037 ರನ್‌ಗಳನ್ನು ಬಾರಿಸಿ ಮಿಂಚಿದ್ದರು. ವಿಶೇಷ ಎಂದರೆ ರಣಜಿ ಸೀಸನ್​ಗಳಲ್ಲಿ ಎರಡು ಬಾರಿ ಸಾವಿರ ರನ್ ಗಡಿ ದಾಟಿದ ಏಕೈಕ ಆಟಗಾರ ಎಂಬ ದಾಖಲೆ ಕೂಡ ವಾಸಿಂ ಜಾಫರ್ ಹೆಸರಿನಲ್ಲಿದೆ.

ಇದನ್ನೂ ಓದಿ

Irfan Pathan: ಟಿ20 ವಿಶ್ವಕಪ್​ಗೆ ಇರ್ಫಾನ್ ಪಠಾಣ್​ರ ಟೀಮ್ ಇಂಡಿಯಾ ಪ್ಲೇಯಿಂಗ್ 11

Team India: 8 ತಿಂಗಳಲ್ಲಿ 6 ನಾಯಕರನ್ನು ಕಣಕ್ಕಿಳಿಸಿದ ಟೀಮ್ ಇಂಡಿಯಾ

ಪೆಟ್ರೋಲ್ ಪಂಪ್​ನಲ್ಲಿ ಚಹಾ ನೀಡುತ್ತಿರುವ ಶ್ರೀಲಂಕಾ ಕ್ರಿಕೆಟಿಗ

Rishabh Pant: ನಾಯಕನಾಗಿ ಅತ್ಯಂತ ಕೆಟ್ಟ ದಾಖಲೆ ಬರೆದ ರಿಷಭ್ ಪಂತ್

ಇದೀಗ 6 ಪಂದ್ಯಗಳಿಂದ 900+ ರನ್​ಗಳಿಸುವ ಮೂಲಕ ಸರ್ಫರಾಜ್ ಖಾನ್ ಕೂಡ ಎರಡು ಸೀಸನ್​ನಲ್ಲಿ ಒಂಬೈನೂರಕ್ಕಿಂತ ಅಧಿಕ ರನ್​ಗಳಿಸಿದ ಆಟಗಾರರ ಪಟ್ಟಿಗೆ ಸೇರ್ಪಡೆಯಾಗಿದ್ದಾರೆ. ಇದಕ್ಕೂ ಮುನ್ನ 2019-20 ರಲ್ಲಿ  ಸರ್ಫರಾಜ್ ಖಾನ್ 6 ಪಂದ್ಯಗಳ 9 ಇನ್ನಿಂಗ್ಸ್‌ಗಳಲ್ಲಿ 926 ರನ್ ಕಲೆಹಾಕಿದ್ದರು. ಅಂದರೆ 155ರ ಸರಾಸರಿಯಲ್ಲಿ ರನ್​ಗಳಿಸಿದ್ದರು. ಈ ವೇಳೆ ಒಂದು ತ್ರಿಶತಕ (301), 3 ಶತಕ ಹಾಗೂ 2 ಅರ್ಧ ಶತಕಗಳನ್ನೂ ಸಹ ಬಾರಿಸಿದ್ದರು.

ಸದ್ಯ ಸರ್ಫರಾಜ್​ ಖಾನ್​ಗೆ ಈ ಪಂದ್ಯದ ಮೂಲಕ ಒಂದೇ ಸೀಸನ್​ನಲ್ಲಿ 1000 ರನ್ ಪೂರೈಸುವ ಅವಕಾಶವಿದೆ. ಮುಂಬೈ ಪರ ಶ್ರೇಯಸ್ ಅಯ್ಯರ್ (1321 ರನ್), ವಾಸಿಂ ಜಾಫರ್ (1260 ರನ್), ಅಜಿಂಕ್ಯ ರಹಾನೆ (1089) ಮತ್ತು ರುಸಿ ಮೋದಿ (1008) ಮಾತ್ರ ಒಂದು ಸೀಸನ್​ನಲ್ಲಿ ಸಾವಿರಕ್ಕೂ ಹೆಚ್ಚು ಗಳಿಸಿದ್ದರು. ಇದೀಗ ಈ ಸಾಧನೆ ಮಾಡುವ ಅವಕಾಶ ಸರ್ಫರಾಜ್ ಖಾನ್ ಮುಂದಿದ್ದು, ಅದರಂತೆ ಫೈನಲ್ ಪಂದ್ಯದ ಮೂಲಕ ಹೊಸ ದಾಖಲೆ ಬರೆಯಲಿದೆಯಾ ಕಾದು ನೋಡಬೇಕಿದೆ.

ಇನ್ನು ಈ ಪಂದ್ಯದಲ್ಲಿ ಸರ್ಫರಾಜ್ ಖಾನ್ ಅವರ ಶತಕದ ನೆರವಿನಿಂದ ಸದ್ಯ ಮುಂಬೈ ತಂಡವು 8 ವಿಕೆಟ್ ನಷ್ಟಕ್ಕೆ 351 ರನ್​ ಕಲೆಹಾಕಿದೆ. ಸದ್ಯ ಮಧ್ಯಪ್ರದೇಶ ತಂಡವು ಮುಂಬೈ ತಂಡವನ್ನು ಆಲೌಟ್​ ಮಾಡಲು ಇನ್ನಿಲ್ಲದ ಪ್ರಯತ್ನದಲ್ಲಿದ್ದು, ಅತ್ತ ಕ್ರೀಸ್​ನಲ್ಲಿ ಅಜೇಯ 119 ರನ್​ಗಳಿಸಿ ಸರ್ಫರಾಜ್ ಖಾನ್ ಹಾಗೂ ತುಷಾರ್ ದೇಶಪಾಂಡೆ ಬ್ಯಾಟಿಂಗ್ ಮುಂದುವರೆಸಿದ್ದಾರೆ.

ಕ್ರಿಕೆಟ್​ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.

ಪ್ರಮುಖ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.