South Africa vs India: ಭಾರತದ ಗೆಲುವಿಗೆ ಎದುರಾಯ್ತು ದೊಡ್ಡ ಕಂಟಕ: ಐದನೇ ದಿನದ ಸೆಂಚುರಿಯನ್ ವಾತಾವರಣ ಹೇಗಿದೆ?
IND vs SA 1st Test Centurion Weather Day 5: ಭಾರತ- ದಕ್ಷಿಣ ಆಫ್ರಿಕಾ ಮೊದಲ ಟೆಸ್ಟ್ನ ಎರಡನೇ ದಿನ ಅಡ್ಡಿಯಾಗಿದ್ದ ಮಳೆ ಐದನೇ ದಿನ ಮರಳಿ ಬರುವ ಸಾಧ್ಯತೆ ಇದೆ ಎನ್ನಲಾಗಿದೆ. ಸದ್ಯಕ್ಕೆ ಟೀಮ್ ಇಂಡಿಯಾ ಗೆಲುವಿಗೆ ಆಫ್ರಿಕಾರನ್ನರ 6 ವಿಕೆಟ್ಗಳು ಬೇಕಿದ್ದರೆ ಇತ್ತ ಹರಿಣಗಳ ಗೆಲುವಿಗೆ 211 ರನ್ಗಳ ಅವಶ್ಯಕತೆಯಿದೆ.
Updated on:Dec 30, 2021 | 8:42 AM
ಭಾರತ ಹಾಗೂ ದಕ್ಷಿಣ ಆಫ್ರಿಕಾ (India vs South Africa) ನಡುವಣ ಮೊದಲ ಟೆಸ್ಟ್ ಪಂದ್ಯದ ಅಂತಿಮ ದಿನದಾಟ ವೀಕ್ಷಿಸಲು ಇಡೀ ಕ್ರಿಕೆಟ್ ಜಗತ್ತೇ ಕಾತುರದಲ್ಲಿದೆ. ಅಷ್ಟೊಂದು ರೋಚಕತೆ ಸೃಷ್ಟಿಸಿದೆ ಐದನೇ ದಿನದಾಟ. ಬ್ಯಾಟರ್ಗಳಿಗೆ ವಿಶೇಷ ನೆರವು ನೀಡದ ಸೆಂಚುರಿಯನ್ (Centurion) ಟ್ರ್ಯಾಕ್‌ನಲ್ಲಿ ದಕ್ಷಿಣ ಆಫ್ರಿಕಾಕ್ಕೆ 305 ರನ್ ಗುರಿ ನೀಡಿರುವ ಭಾರತ ಬಾಕ್ಸಿಂಗ್‌ ಡೇ ಟೆಸ್ಟ್ (Boxing Day Test) ಪಂದ್ಯವನ್ನು ಗೆಲ್ಲುವ ನೆಚ್ಚಿನ ತಂಡವಾಗಿದೆ. ಹೀಗಾದಲ್ಲಿ ವಿರಾಟ್ ಕೊಹ್ಲಿ (Virat Kohli) ಪಡೆ ಇತಿಹಾಸ ಸೃಷ್ಟಿಸಲಿದೆ. ಸದ್ಯಕ್ಕೆ ಟೀಮ್ ಇಂಡಿಯಾ (Team India) ಗೆಲುವಿಗೆ ಆಫ್ರಿಕಾರನ್ನರ 6 ವಿಕೆಟ್ಗಳು ಬೇಕಿದ್ದರೆ ಇತ್ತ ಹರಿಣಗಳ ಗೆಲುವಿಗೆ 211 ರನ್ಗಳ ಅವಶ್ಯಕತೆಯಿದೆ. ಇವೆಲ್ಲದರ ನಡುವೆ ಅಂತಿಮ ಐದನೇ ದಿನದಾಟಕ್ಕೆ ಮಳೆರಾಯನ ಕಾಣ ಎದುರಾಗಲಿದೆಯೇ ಎಂಬ ಭಯ ಶುರುವಾಗಿದೆ. ಹಾಗಾದ್ರೆ ಇಂದು ಸೆಂಚುರಿಯನ್ ವಾತಾವರಣ ಹೇಗಿರಲಿದೆ ಎಂಬುದನ್ನು ನೋಡೋಣ.
ಭಾರತ- ದಕ್ಷಿಣ ಆಫ್ರಿಕಾ ಮೊದಲ ಟೆಸ್ಟ್ನ ಎರಡನೇ ದಿನ ಅಡ್ಡಿಯಾಗಿದ್ದ ಮಳೆ ಐದನೇ ದಿನ ಮರಳಿ ಬರುವ ಸಾಧ್ಯತೆ ಇದೆ ಎನ್ನಲಾಗಿದೆ. ಇಂದು ಮಳೆ ಬಂದರೆ ಸೌತ್ ಆಫ್ರಿಕಾ ಸೋಲಿನ ಸುಳಿಯಿಂದ ಪಾರಾಗಿ ಪಂದ್ಯ ಡ್ರಾ ಆಗಬಹುದು. ಮಳೆ ಬರದೇ ಹೋದರೆ ಟೀಮ್ ಇಂಡಿಯಾವೇ ಪಂದ್ಯ ಗೆಲ್ಲುವ ಸಾಧ್ಯತೆ ದಟ್ಟವಾಗಿದೆ. ಸ್ಥಳೀಯ ಹವಾಮಾನ ಮುನ್ಸೂಚನೆ ಪ್ರಕಾರ, ಇಂದು 47 ಡಿಗ್ರಿ ಸೆ. ನಷ್ಟು ಕನಿಷ್ಠ ತಾಪಮಾನ ಇರಲಿದೆಯಂತೆ. ಗರಿಷ್ಠ ತಾಪಮಾನ 32 ಡಿಗ್ರಿ ಸೆ. ಇರಲಿದೆ. ಇದರ ಪ್ರಕಾರ 24-51% ವ್ಯಾಪ್ತಿಯಲ್ಲಿ ದಿನವಿಡೀ ಮಳೆಯಾಗುವ ನಿರೀಕ್ಷೆಯಿದೆ.
ಇನ್ನು ಸೆಂಚುರಿಯನ್ ಟೆಸ್ಟ್ ಪಂದ್ಯದ 4ನೇ ಇನ್ನಿಂಗ್ಸ್‌ನಲ್ಲಿ ಈ ವರೆಗಿನ ಯಶಸ್ವಿ ಚೇಸಿಂಗ್‌ ದಾಖಲೆಯೆಂದರೆ 251 ರನ್. 2000-01ರಲ್ಲಿ ಪ್ರವಾಸಿ ಇಂಗ್ಲೆಂಡ್‌ ಈ ಸಾಧನೆಗೈದಿತ್ತು. ತವರಿನ ಟೆಸ್ಟ್ ಪಂದ್ಯಗಳಲ್ಲಿ ದಕ್ಷಿಣ ಆಫ್ರಿಕಾ ಈವರೆಗೆ ಒಮ್ಮೆಯಷ್ಟೇ 300 ಪ್ಲಸ್‌ ಮೊತ್ತವನ್ನು ಚೇಸ್‌ ಮಾಡಿ ಗೆದ್ದಿದೆ.
ಮೂರನೇ ದಿನಾಂತ್ಯದಲ್ಲಿ 1 ವಿಕೆಟ್ ನಷ್ಟಕ್ಕೆ 16 ರನ್ ಗಳಿಸಿದ್ದ ಟೀಮ್ ಇಂಡಿಯಾದ ಆಟಗಾರರು 4ನೇ ದಿನ ಎಚ್ಚರಿಕೆಯಿಂದಲೇ ಬ್ಯಾಟ್ ನಡೆಸಿದರಾದರೂ ಅನಿರ್ದಿಷ್ಟವಾಗಿ ಚಿಮ್ಮುತ್ತಿದ್ದ ಬೌನ್ಸರ್ಗಳಿಂದ ಕಂಗೆಟ್ಟರು. 4ನೇ ದಿನದಾಟದಲ್ಲೂ ಪಿಚ್‌ ಸಂಪೂರ್ಣವಾಗಿ ವೇಗಿಗಳಿಗೆ ನೆರವಾಯಿತು. ಬ್ಯಾಟ್ಸ್‌ಮನ್‌ಗಳ ಪರದಾಟ ಮುಂದುವರಿಯಿತು. ಭಾರತ ಬುಧವಾರ ಸುಮಾರು ಮೂರೂವರೆ ಗಂಟೆಗಳ ಕಾಲವಷ್ಟೇ ಬ್ಯಾಟಿಂಗ್ ನಡೆಸಿ 174ಕ್ಕೆ ಆಲೌಟ್‌ ಆಯಿತು. 158 ರನ್ ಅಂತರದಲ್ಲಿ ಉಳಿದೆಲ್ಲ ವಿಕೆಟ್ಗಳು ಉದುರಿದವು. ರಬಾಡ ಮತ್ತು ಜಾನ್ಸೆನ್‌ ತಲಾ 4, ಎನ್‌ಗಿಡಿ 2 ವಿಕೆಟ್ ಕೆಡವಿದರು. ಇದರೊಂದಿಗೆ ಪಂದ್ಯದ ಮೊದಲ 3 ಇನ್ನಿಂಗ್ಸ್‌ಗಳ ಎಲ್ಲ ವಿಕೆಟ್‌ಗಳನ್ನು ವೇಗಿಗಳೇ ಉದುರಿಸಿದಂತಾಯಿತು.
ಗೆಲ್ಲಲು 303 ರನ್ ಗುರಿಯೊಂದಿಗೆ ಎರಡನೇ ಇನ್ನಿಂಗ್ಸ್ ಆರಂಭಿಸಿದ ಸೌತ್ ಆಫ್ರಿಕಾ ಬ್ಯಾಟುಗಾರರು ಭಾರತದ ವೇಗದ ಬೌಲರ್ಗಳ ಮಾರಕ ದಾಳಿಯ ರುಚಿ ಉಣ್ಣಬೇಕಾಯಿತು. ನಾಯಕ ಡೀನ್ ಎಲ್ಗಾರ್ ಅರ್ಧಶತಕ ಗಳಿಸಿ ಕ್ರೀಸ್ನಲ್ಲಿದ್ದಾರೆ. ಈಗ ಸೌತ್ ಆಫ್ರಿಕಾದ ಬ್ಯಾಟಿಂಗ್ ಲೈನಪ್ನಲ್ಲಿ ಎಲ್ಗಾರ್ ಬಿಟ್ಟರೆ ಉಳಿದಿರುವುದು ಟೆಂಬಾ ಬವುಮಾ ಮತ್ತು ಕ್ವಿಂಟಾನ್ ಡೀಕಾಕ್ ಮಾತ್ರ. ಇನ್ನೂ 211 ರನ್ ಗಳಿಸಬೇಕಿದ್ದು, ಗೆಲುವಿನ ದಡ ಮುಟ್ಟುವುದು ದೂರದ ಮಾತಾಗಿದೆ.
South Africa vs India: ಸೆಂಚುರಿಯನ್ನಲ್ಲಿ ಇತಿಹಾಸ ಸೃಷ್ಟಿಸುತ್ತಾ ಭಾರತ: ರೋಚಕತೆ ಪಡೆದುಕೊಂಡ ಐದನೇ ದಿನದಾಟ
(South Africa vs India Weather Forecast for Day 5 1st Test Will rain hit Team India chances for win)
Published On - 8:41 am, Thu, 30 December 21
