Stuart Broad: ಮತ್ತೊಮ್ಮೆ ಬ್ರಾಡ್ ಬಲೆಗೆ ಬಿದ್ದ ವಾರ್ನರ್…ಹೊಸ ದಾಖಲೆ
Stuart Broad: ಬ್ಯಾಟರೊಬ್ಬರನ್ನು 19 ಬಾರಿ ಔಟ್ ಮಾಡಿರುವ ಗ್ಲೆನ್ ಮೆಕ್ಗ್ರಾಥ್ ದಾಖಲೆ ಮುರಿಯಲು ಸ್ಟುವರ್ಟ್ ಬ್ರಾಡ್ ಇನ್ನು ಡೇವಿಡ್ ವಾರ್ನರ್ ಅವರನ್ನು ಮೂರು ಬಾರಿ ಔಟ್ ಮಾಡಿದರೆ ಸಾಕು.
Updated on: Jul 08, 2023 | 3:30 PM
Ashes 2023: ಲೀಡ್ಸ್ನ ಹೆಡಿಂಗ್ಲಿ ಮೈದಾನದಲ್ಲಿ ನಡೆಯುತ್ತಿರುವ ಆ್ಯಶಸ್ ಸರಣಿಯ ಮೂರನೇ ಟೆಸ್ಟ್ ಪಂದ್ಯದ 2 ಇನಿಂಗ್ಸ್ನಲ್ಲೂ ಡೇವಿಡ್ ವಾರ್ನರ್ (David Warner) ಇಂಗ್ಲೆಂಡ್ ಸ್ಟುವರ್ಟ್ ಬ್ರಾಡ್ಗೆ (Stuart Broad) ವಿಕೆಟ್ ಒಪ್ಪಿಸಿದ್ದಾರೆ. ಮೊದಲ ಇನಿಂಗ್ಸ್ನಲ್ಲಿ 4 ರನ್ಗಳಿಸಿ ಬ್ರಾಡ್ ಎಸೆತದಲ್ಲಿ ಕ್ಯಾಚ್ ನೀಡಿದ್ದ ವಾರ್ನರ್, 2ನೇ ಇನಿಂಗ್ಸ್ನಲ್ಲಿ 1 ರನ್ ಬಾರಿಸಿ ಔಟಾಗಿದ್ದಾರೆ. ಇದರೊಂದಿಗೆ ಡೇವಿಡ್ ವಾರ್ನರ್ ಅವರನ್ನು 17 ಬಾರಿ ಔಟ್ ಮಾಡಿದ ವಿಶೇಷ ದಾಖಲೆಯೊಂದು ಸ್ಟುವರ್ಟ್ ಬ್ರಾಡ್ ಹೆಸರಿಗೆ ಸೇರ್ಪಡೆಯಾಗಿದೆ.
ಡೇವಿಡ್ ವಾರ್ನರ್ ಹಾಗೂ ಸ್ಟುವರ್ಟ್ ಬ್ರಾಡ್ ಒಟ್ಟು 51 ಇನಿಂಗ್ಸ್ಗಳಲ್ಲಿ ಮುಖಾಮುಖಿಯಾಗಿದ್ದಾರೆ. ಈ ವೇಳೆ ಬ್ರಾಡ್ ಎಸೆತಗಳಲ್ಲಿ 1 ಸಿಕ್ಸ್ ಹಾಗೂ 52 ಫೋರ್ಗಳೊಂದಿಗೆ ವಾರ್ನರ್ 424 ರನ್ ಬಾರಿಸಿದ್ದರು. ಆದರೆ ಮತ್ತೊಂದೆಡೆ 17 ಬಾರಿ ಔಟ್ ಮಾಡುವಲ್ಲಿ ಸ್ಟುವರ್ಟ್ ಬ್ರಾಡ್ ಯಶಸ್ವಿಯಾಗಿದ್ದಾರೆ.
ಇನ್ನು ಟೆಸ್ಟ್ ಕ್ರಿಕೆಟ್ನಲ್ಲಿ ಬ್ಯಾಟರ್ರೊಬ್ಬರನ್ನು ಅತ್ಯಧಿಕ ಬಾರಿ ಔಟ್ ಮಾಡಿದ ವಿಶ್ವ ದಾಖಲೆ ಆಸ್ಟ್ರೇಲಿಯಾದ ಮಾಜಿ ವೇಗಿ ಗ್ಲೆನ್ ಮೆಕ್ಗ್ರಾಥ್ ಹೆಸರಿನಲ್ಲಿದೆ. ಇಂಗ್ಲೆಂಡ್ ಆಟಗಾರ ಮೈಕಲ್ ಅರ್ಥಟನ್ ಅವರನ್ನು ಮೆಕ್ಗ್ರಾಥ್ ಒಟ್ಟು 19 ಬಾರಿ ಔಟ್ ಮಾಡಿದ್ದರು.
ಹಾಗೆಯೇ ಇಂಗ್ಲೆಂಡ್ ವೇಗಿ ಅಲೆಕ್ ಬೆಡ್ಸರ್ ಆಸ್ಟ್ರೇಲಿಯಾದ ಆರ್ಥರ್ ಮೋರಿಸ್ ಅವರನ್ನು 18 ಬಾರಿ ಔಟ್ ಮಾಡಿದ್ದರು. ಇದಲ್ಲದೆ ವೆಸ್ಟ್ ಇಂಡೀಸ್ನ ಕರ್ಟ್ಲಿ ಆಂಬ್ರೋಸ್ ಇಂಗ್ಲೆಂಡ್ನ ಮೈಕೆಲ್ ಅರ್ಥಟನ್ರನ್ನು 17 ಬಾರಿ ವಜಾಗೊಳಿಸಿದ್ದರು.
ಇದೀಗ ಡೇವಿಡ್ ವಾರ್ನರ್ ಅವರನ್ನು 17 ಸಲ ಔಟ್ ಮಾಡುವ ಮೂಲಕ ಸ್ಟುವರ್ಟ್ ಬ್ರಾಡ್ ಈ ಪಟ್ಟಿಯಲ್ಲಿ ಮೂರನೇ ಸ್ಥಾನಕ್ಕೇರಿದ್ದಾರೆ. ವಿಶೇಷ ಎಂದರೆ ಆಸ್ಟ್ರೇಲಿಯಾ ವಿರುದ್ಧ ಇನ್ನೂ ಎರಡು ಟೆಸ್ಟ್ ಪಂದ್ಯಗಳು ಬಾಕಿಯಿದ್ದು, ಈ 4 ಇನಿಂಗ್ಸ್ಗಳಲ್ಲಿ ವಾರ್ನರ್ ಅವರನ್ನು ಸ್ಟುವರ್ಟ್ ಬ್ರಾಡ್ 3 ಬಾರಿ ಔಟ್ ಮಾಡಿದರೆ ಹೊಸ ಇತಿಹಾಸ ನಿರ್ಮಾಣವಾಗಲಿದೆ.
ಇದನ್ನೂ ಓದಿ: India T20 Squad: ಟೀಮ್ ಇಂಡಿಯಾದಲ್ಲಿ ಇಬ್ಬರೇ ಆಲ್ರೌಂಡರ್ಗಳು..!
ಏಕೆಂದರೆ ಬ್ಯಾಟರೊಬ್ಬರನ್ನು 19 ಬಾರಿ ಔಟ್ ಮಾಡಿರುವ ಗ್ಲೆನ್ ಮೆಕ್ಗ್ರಾಥ್ ದಾಖಲೆ ಮುರಿಯಲು ಸ್ಟುವರ್ಟ್ ಬ್ರಾಡ್ ಇನ್ನು ಡೇವಿಡ್ ವಾರ್ನರ್ ಅವರನ್ನು ಮೂರು ಬಾರಿ ಔಟ್ ಮಾಡಿದರೆ ಸಾಕು. ಹೀಗಾಗಿ ಈ ಬಾರಿಯ ಆ್ಯಶಸ್ ಸರಣಿಯಲ್ಲಿ ಹೊಸ ವಿಶ್ವ ದಾಖಲೆ ನಿರ್ಮಾಣವಾಗಲಿದೆಯಾ ಕಾದು ನೋಡಬೇಕಿದೆ.
