ಬ್ಯಾಟರ್… ಫೀಲ್ಡರ್… ಈಗ ಸ್ಪಿನ್ನರ್ ಸೂರ್ಯ

ಸೂರ್ಯಕುಮಾರ್ ಯಾದವ್ ಎಂದರೆ ಕಣ್ಮುಂದೆ ಬರುತ್ತಿದದ್ದು 360 ಡಿಗ್ರಿಯ ಬ್ಯಾಟಿಂಗ್… ಆದರೆ ಈ ಬಾರಿಯ ಟಿ20 ವಿಶ್ವಕಪ್ ಫೈನಲ್​ನಲ್ಲಿ ಅದ್ಭುತ ಕ್ಯಾಚ್ ಹಿಡಿಯುವ ಮೂಲಕ ತಾನು ಅತ್ಯುತ್ತಮ ಫೀಲ್ಡರ್ ಎಂಬುದನ್ನು ನಿರೂಪಿಸಿದ್ದರು. ಹೀಗಾಗಿಯೇ ಇದೀಗ ಸೂರ್ಯಕುಮಾರ್ ಎಂದರೆ ಸೌತ್ ಆಫ್ರಿಕಾ ವಿರುದ್ಧದ ಅವಿಸ್ಮರಣೀಯ ಕ್ಯಾಚ್ ಕಣ್ಮುಂದೆ ಬಂದು ಹೋಗುತ್ತೆ. ಇದೀಗ ತಾನು ಆಲ್​ರೌಂಡರ್ ಎಂಬುದನ್ನು ಸಹ ನಿರೂಪಿಸಲು ಹೊರಟಿದ್ದಾರೆ. ಹೌದು, ಶ್ರೀಲಂಕಾ ವಿರುದ್ಧದ 3ನೇ ಟಿ20 ಪಂದ್ಯದಲ್ಲಿ ಟೀಮ್ ಇಂಡಿಯಾ ರೋಚಕ ಜಯ ಸಾಧಿಸಿದೆ. ಈ ಗೆಲುವಿನ ರುವಾರಿಗಳೆಂದರೆ ಸೂರ್ಯಕುಮಾರ್ ಯಾದವ್ ಹಾಗೂ ರಿಂಕು ಸಿಂಗ್.

ಕೊನೆಯ 2 ಓವರ್​ಗಳಲ್ಲಿ 9 ರನ್ ಬೇಕಿದ್ದಾಗ ಕ್ಯಾಪ್ಟನ್ ಸೂರ್ಯ ಚೆಂಡು ನೀಡಿದ್ದು ರಿಂಕು ಸಿಂಗ್​ ಕೈಗೆ. ಅದರಂತೆ 19ನೇ ಓವರ್​ ಎಸೆದ ರಿಂಕು ಸಿಂಗ್ 2 ವಿಕೆಟ್ ಕಬಳಿಸಿ ಕೇವಲ 3 ರನ್​ ಮಾತ್ರ ನೀಡಿದ್ದರು. ಇದಾಗ್ಯೂ ಕೊನೆಯ ಓವರ್​ನಲ್ಲಿ ಲಂಕಾ ತಂಡಕ್ಕೆ ಕೇವಲ 6 ರನ್​ಗಳ ಅವಶ್ಯಕತೆಯಿತ್ತು. ಎಲ್ಲರೂ ಮೊಹಮ್ಮದ್ ಸಿರಾಜ್ ಅಥವಾ ಖಲೀಲ್ ಅಹ್ಮದ್​ಗೆ ಚೆಂಡು ನೀಡುತ್ತಾರೆ ಎಂದು ಭಾವಿಸಿದ್ದರು.

ಆದರೆ ಕೊನೆಯ ಓವರ್​ನ ಸಂಪೂರ್ಣ ಹೊಣೆಯನ್ನು ಖುದ್ದು ಸೂರ್ಯಕುಮಾರ್ ಯಾದವ್ ಹೊತ್ತುಕೊಂಡರು. ಅಲ್ಲದೆ ಅದ್ಭುತ ಸ್ಪಿನ್ ಮೋಡಿ ಮಾಡಿದ ಸೂರ್ಯ ಮೊದಲ ಎಸೆತದಲ್ಲಿ ಯಾವುದೇ ರನ್ ನೀಡದೇ ಲಂಕಾ ಬ್ಯಾಟರ್​ಗಳ ಮೇಲೆ ಒತ್ತ ಹೇರಿದರು. ಇನ್ನು 2ನೇ ಮತ್ತು 3ನೇ ಎಸೆತಗಳಲ್ಲಿ ವಿಕೆಟ್ ಕಬಳಿಸಿದರು. 4ನೇ ಎಸೆತದಲ್ಲಿ ಒಂದು ರನ್​. 5ನೇ ಎಸೆತದಲ್ಲಿ ಲಂಕಾ ಬ್ಯಾಟರ್​ಗಳು 2 ರನ್ ಓಡಿದರು. ಕೊನೆಯ ಎಸೆತದಲ್ಲಿ 3 ರನ್​ಗಳು ಬೇಕಿತ್ತು. ಈ ವೇಳೆ ಕೇವಲ 2 ರನ್ ಮಾತ್ರ ನೀಡುವ ಮೂಲಕ ಸೂರ್ಯಕುಮಾರ್ ಯಾದವ್ ಪಂದ್ಯವನ್ನು ಟೈ ಮಾಡುವಲ್ಲಿ ಯಶಸ್ವಿಯಾದರು. ಈ ಮೂಲಕ ನಾನು ಬ್ಯಾಟರ್, ಫೀಲ್ಡರ್ ಮಾತ್ರವಲ್ಲ ಬೌಲರ್ ಕೂಡ ಎಂಬುದನ್ನು ಸೂರ್ಯಕುಮಾರ್ ಯಾದವ್ ಸಾರಿ ಹೇಳಿದ್ದಾರೆ. ಇದೀಗ ಸೂರ್ಯನ ಕೊನೆಯ ಓವರ್​ನ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದ್ದು, ಈ ವಿಡಿಯೋವನ್ನು ಈ ಮೇಲೆ ನೀಡಲಾಗಿದೆ.