T20 World Cup 2022: ಅಭ್ಯಾಸ ಪಂದ್ಯದಲ್ಲೇ ಪಾಕ್​ಗೆ ಹೀನಾಯ ಸೋಲು

T20 World Cup 2022: ಟಿ20 ವಿಶ್ವಕಪ್​ನಲ್ಲಿ ಆಡಿದ ಮೊದಲ ಅಭ್ಯಾಸ ಪಂದ್ಯದಲ್ಲೇ ಪಾಕಿಸ್ತಾನ್ (Pakistan) ತಂಡವು ಹೀನಾಯ ಸೋಲನುಭವಿಸಿದೆ. ಬ್ರಿಸ್ಬೇನ್​ನ ಗಾಬಾ ಮೈದಾನದಲ್ಲಿ ನಡೆದ 11ನೇ ಅಭ್ಯಾಸ ಪಂದ್ಯದಲ್ಲಿ ಪಾಕಿಸ್ತಾನ್ ಹಾಗೂ ಇಂಗ್ಲೆಂಡ್ ತಂಡಗಳು ಮುಖಾಮುಖಿಯಾಗಿತ್ತು. ಈ ಪಂದ್ಯದಲ್ಲಿ ಟಾಸ್ ಜಯಿಸಿದ ಇಂಗ್ಲೆಂಡ್ ತಂಡದ ನಾಯಕ ಜೋಸ್ ಬಟ್ಲರ್ ಬೌಲಿಂಗ್ ಆಯ್ದುಕೊಂಡರು. ಆದರೆ ಮಳೆಯ ಕಾರಣ ಪಂದ್ಯವನ್ನು 19 ಓವರ್​ಗಳಿಗೆ ಸೀಮಿತಗೊಳಿಸಲಾಗಿತ್ತು. ಅದರಂತೆ ಇನಿಂಗ್ಸ್​ ಆರಂಭಿಸಿದ ಪಾಕ್ ಪರ ಮೊಹಮ್ಮದ್ ರಿಜ್ವಾನ್ ಹಾಗೂ ಬಾಬರ್ ಆಜಂ ಕಣಕ್ಕಿಳಿದಿರಲಿಲ್ಲ. ಬದಲಾಗಿ ಶಾನ್ ಮಸೂದ್ ಹಾಗೂ ಹೈದರ್ ಅಲಿಯನ್ನು ಓಪನರ್​ಗಳಾಗಿ ಕಣಕ್ಕಿಳಿಸಲಾಗಿತ್ತು. ಆದರೆ ಸಿಕ್ಕ ಅವಕಾಶದಲ್ಲಿ ಭರ್ಜರಿ ಬ್ಯಾಟಿಂಗ್ ಪ್ರದರ್ಶಿಸಿದ ಈ ಜೋಡಿಯು ಮೊದಲ 4 ಓವರ್​ಗಳ ವೇಳೆ ತಂಡದ ಮೊತ್ತವನ್ನು 40 ರ ಗಡಿದಾಟಿಸಿದರು.

ಆದರೆ ಈ ಹಂತದಲ್ಲಿ 18 ರನ್​ಗಳಿಸಿದ್ದ ಹೈದರ್​ ಅಲಿ ಬೆನ್​ ಸ್ಟೋಕ್ಸ್​ಗೆ ವಿಕೆಟ್ ಒಪ್ಪಿಸಿದರು. ಇದರ ಬೆನ್ನಲ್ಲೇ ಲಿವಿಂಗ್​ಸ್ಟೋನ್​ರ ಸ್ಪಿನ್ ಮೋಡಿಗೆ ಶಾನ್ ಮಸೂದ್ (39) ಕೂಡ ಬಲಿಯಾದರು. ಉತ್ತಮ ಆರಂಭದ ಹೊರತಾಗಿಯೂ ಆ ಬಳಿಕ ಪಾಕ್ ತಂಡವು ಕಳಪೆ ಬ್ಯಾಟಿಂಗ್ ಪ್ರದರ್ಶಿಸಿತು.

ಮೊದಲ 10 ಓವರ್​ಗಳಲ್ಲಿ 96 ರನ್ ಬಾರಿಸಿದ್ದ ಪಾಕ್ ತಂಡದ ವಿರುದ್ದ ದ್ವಿತಿಯಾರ್ಧದಲ್ಲಿ ಇಂಗ್ಲೆಂಡ್ ಬೌಲರ್​ಗಳು ಮೇಲುಗೈ ಸಾಧಿಸಿದರು. ಪರಿಣಾಮ ಕೊನೆಯ 9 ಓವರ್​ಗಳಲ್ಲಿ ಪಾಕ್ ತಂಡ ಕಲೆಹಾಕಿದ್ದು ಕೇವಲ 64 ರನ್​ಗಳು ಮಾತ್ರ. ಅದರಂತೆ ನಿಗದಿತ 19 ಓವರ್​ಗಳಲ್ಲಿ ಪಾಕಿಸ್ತಾನ್ ತಂಡವು 8 ವಿಕೆಟ್ ನಷ್ಟಕ್ಕೆ 160 ರನ್ ಪೇರಿಸಿತು.

161 ರನ್​ಗಳ ಟಾರ್ಗೆಟ್ ಪಡೆದ ಇಂಗ್ಲೆಂಡ್ ತಂಡಕ್ಕೆ ಯುವ ವೇಗಿ ನಸೀಮ್ ಶಾ ಆರಂಭಿಕ ಆಘಾತ ನೀಡಿದ್ದರು. 1 ರನ್​ಗಳಿಸಿದ್ದ ಆರಂಭಿಕ ಆಟಗಾರ ಫಿಲಿಪ್ ಸಾಲ್ಟ್ ಅವರನ್ನು ಬೌಲ್ಡ್ ಮಾಡುವ ಮೂಲಕ ನಸೀಮ್ ಪಾಕ್​ಗೆ ಮೊದಲ ಯಶಸ್ಸು ತಂದುಕೊಟ್ಟರು. ಇದರ ಬೆನ್ನಲ್ಲೇ ಶಾದಾಬ್ ಖಾನ್ ಅಲೆಕ್ಸ್ ಹೇಲ್ಸ್ (9) ವಿಕೆಟ್ ಪಡೆದರು.

ಮೊದಲೆರಡು ವಿಕೆಟ್ ಪಡೆದ ಹುಮ್ಮಸ್ಸಿನಲ್ಲಿದ್ದ ಪಾಕ್ ತಂಡಕ್ಕೆ ಆ ಬಳಿಕ ಎದುರಾಗಿದ್ದು ಬೆನ್​ ಸ್ಟೋಕ್ಸ್ ಹಾಗೂ ಲಿಯಾಮ್ ಲಿವಿಂಗ್​ಸ್ಟೋನ್​ರ ಉತ್ತಮ ಜೊತೆಯಾಟ. ಕೇವಲ 18 ಎಸೆತಗಳಲ್ಲಿ 3 ಸಿಕ್ಸ್ ಹಾಗೂ 2 ಫೋರ್​ನೊಂದಿಗೆ 36 ರನ್ ಬಾರಿಸಿ ಸ್ಟೋಕ್ಸ್ ತಂಡವನ್ನು ಆರಂಭಿಕ ಆಘಾತದಿಂದ ಪಾರು ಮಾಡಿದರು.

ಮತ್ತೊಂದೆಡೆ ಆರ್ಭಟಿಸಿದ ಲಿವಿಂಗ್​ಸ್ಟೋನ್ 2 ಸಿಕ್ಸ್​ನೊಂದಿಗೆ 18 ಎಸೆತಗಳಲ್ಲಿ 28 ರನ್ ಬಾರಿಸಿ ವಾಸಿಂ ಜೂನಿಯರ್​ಗೆ ವಿಕೆಟ್ ಒಪ್ಪಿಸಿದರು. ಅಷ್ಟರಲ್ಲಾಗಲೇ ಇಂಗ್ಲೆಂಡ್ ತಂಡವು 10.3 ಓವರ್​ಗಳಲ್ಲಿ 104 ರನ್ ಕಲೆಹಾಕಿತ್ತು. ಇನ್ನು ಫಿನಿಶಿಂಗ್ ಜವಾಬ್ದಾರಿವಹಿಸಿಕೊಂಡ ಸ್ಯಾಮ್ ಕರನ್ 14 ಎಸೆತಗಳಲ್ಲಿ 3 ಸಿಕ್ಸ್ ಹಾಗೂ 2 ಫೋರ್​ನೊಂದಿಗೆ 33 ರನ್ ಬಾರಿಸಿದರೆ, ಹ್ಯಾರಿ ಬ್ರೂಕ್ 24 ಎಸೆತಗಳಲ್ಲಿ 4 ಸಿಕ್ಸ್ ಹಾಗೂ 2 ಫೋರ್​ನೊಂದಿಗೆ ಅಜೇಯ 45 ರನ್ ಚಚ್ಚಿದರು. ಪರಿಣಾಮ 14.4 ಓವರ್​ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 163 ರನ್​ಗಳಿಸಿ ಇಂಗ್ಲೆಂಡ್ ತಂಡವು ಭರ್ಜರಿ ಜಯ ಸಾಧಿಸಿತು.

ಸದ್ಯ ಅಭ್ಯಾಸ ಪಂದ್ಯದಲ್ಲಿ ಇಂಗ್ಲೆಂಡ್ ವಿರುದ್ಧ ಸೋತಿರುವ ಪಾಕಿಸ್ತಾನ್ ತಂಡವು ಅಕ್ಟೋಬರ್ 23 ರಂದು ಟೀಮ್ ಇಂಡಿಯಾ ವಿರುದ್ಧದ ಪಂದ್ಯದ ಮೂಲಕ ಟಿ20 ವಿಶ್ವಕಪ್ ಅಭಿಯಾನ ಆರಂಭಿಸಲಿದೆ. ಅತ್ತ ಬಲಿಷ್ಠ ಆಸ್ಟ್ರೇಲಿಯಾ ವಿರುದ್ಧ ಅಭ್ಯಾಸ ಪಂದ್ಯದಲ್ಲಿ ಗೆದ್ದು ಶುಭಾರಂಭ ಮಾಡಿರುವ ಟೀಮ್ ಇಂಡಿಯಾ ಅಕ್ಟೋಬರ್ 19 ರಂದು ನ್ಯೂಜಿಲೆಂಡ್ ವಿರುದ್ಧ 2ನೇ ಅಭ್ಯಾಸ ಪಂದ್ಯವಾಡಲಿದೆ.