6,6,6,6,6: ಒಂದೇ ಓವರ್​ನಲ್ಲಿ 34 ರನ್ ಚಚ್ಚಿದ ವಿಮಲ್ ಕುಮಾರ್

ತಮಿಳುನಾಡು ಪ್ರೀಮಿಯರ್ ಲೀಗ್​ನ ದ್ವಿತೀಯ ಕ್ವಾಲಿಫೈಯರ್ ಪಂದ್ಯದಲ್ಲಿ ದಿಂಡಿಗಲ್ ಡ್ರಾಗನ್ಸ್ ತಂಡ ಭರ್ಜರಿ ಜಯ ಸಾಧಿಸಿದೆ. ದಿಂಡಿಗಲ್​ನ ಎನ್​ಪಿಆರ್​ ಕಾಲೇಜು ಮೈದಾನದಲ್ಲಿ ನಡೆದ ಚೆಪಾಕ್ ಸೂಪರ್ ಗಿಲ್ಲೀಸ್ ವಿರುದ್ಧದ ಈ ಪಂದ್ಯದಲ್ಲಿ ಟಾಸ್ ಗೆದ್ದ ದಿಂಡಿಗಲ್ ಡ್ರಾಗನ್ಸ್ ತಂಡದ ನಾಯಕ ರವಿಚಂದ್ರನ್ ಅಶ್ವಿನ್ ಬೌಲಿಂಗ್ ಆಯ್ದುಕೊಂಡರು. ಅದರಂತೆ ಮೊದಲು ಬ್ಯಾಟ್ ಮಾಡಿದ ಚೆಪಾಕ್ ಸೂಪರ್ ಗಿಲ್ಲೀಸ್ ಪರ ನಾಯಕ ಬಾಬಾ ಅಪರಜಿತ್ 44 ಎಸೆತಗಳಲ್ಲಿ 3 ಸಿಕ್ಸ್ ಹಾಗೂ 5 ಫೋರ್​ಗಳೊಂದಿಗೆ 67 ರನ್ ಬಾರಿಸಿದರು.

ಇನ್ನು ಮಧ್ಯಮ ಕ್ರಮಾಂಕದಲ್ಲಿ ಸ್ಫೋಟಕ ಇನಿಂಗ್ಸ್ ಆಡಿದ ವಿಕೆಟ್ ಕೀಪರ್ ಬ್ಯಾಟರ್ ಎನ್​ ಜಗದೀಸನ್ 6 ಸಿಕ್ಸ್ ಹಾಗೂ 4 ಫೋರ್​ಗಳೊಂದಿಗೆ ಕೇವಲ 41 ಎಸೆತಗಳಲ್ಲಿ 81 ರನ್ ಚಚ್ಚಿದರು. ಈ ಮೂಲಕ ಚೆಪಾಕ್ ಸೂಪರ್ ಗಿಲ್ಲೀಸ್ ತಂಡವು 20 ಓವರ್​ಗಳಲ್ಲಿ 7 ವಿಕೆಟ್ ಕಳೆದುಕೊಂಡು 178 ರನ್​ ಕಲೆಹಾಕಿತು.

179 ರನ್​ಗಳ ಟಾರ್ಗೆಟ್:

ಫೈನಲ್​ಗೇರಲು 179 ರನ್​ಗಳ ಗುರಿ ಪಡೆದ ದಿಂಡಿಗಲ್ ಡ್ರಾಗನ್ಸ್ ತಂಡವು ಪವರ್​ಪ್ಲೇನಲ್ಲಿ 51 ರನ್​ ಕಲೆಹಾಕಿ ಉತ್ತಮ ಆರಂಭ ಪಡೆಯಿತು. ಆದರೆ ಆ ಬಳಿಕ ರನ್​ ಗತಿಯು ನಿಧಾನ ಗತಿಯತ್ತ ಸಾಗಿತು. ಈ ಹಂತದಲ್ಲಿ ಕಣಕ್ಕಿಳಿದ ಬಾಬಾ ಇಂದ್ರಜಿತ್ 31 ಎಸೆತಗಳಲ್ಲಿ 41 ರನ್​ಗಳಿಸಲಷ್ಟೇ ಶಕ್ತರಾದರು. ಪರಿಣಾಮ ಮೊದಲ 10 ಓವರ್​ಗಳಲ್ಲಿ ದಿಂಡಿಗಲ್ ಡ್ರಾಗನ್ಸ್ ತಂಡ ಕಲೆಹಾಕಿದ್ದು ಕೇವಲ 78 ರನ್​ಗಳು ಮಾತ್ರ.

ಕೊನೆಯ 10 ಓವರ್​ಗಳಲ್ಲಿ 101 ರನ್​ಗಳ ಗುರಿ ಪಡೆದ ದಿಂಡಿಗಲ್ ಡ್ರಾಗನ್ಸ್ ಪರ ವಿಮಲ್ ಕುಮಾರ್ 4ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದರು. ಕ್ರೀಸ್​ಗೆ ಆಗಮಿಸುತ್ತಿದ್ದಂತೆ ಬಿರುಸಿನ ಬ್ಯಾಟಿಂಗ್​ಗೆ ಒತ್ತು ನೀಡಿದ ವಿಮಲ್ ರನ್​ ಗತಿ ಹೆಚ್ಚಿಸುವ ಕಾಯಕಕ್ಕೆ ಕೈ ಹಾಕಿದರು. ಪರಿಣಾಮ 15 ಓವರ್​ ವೇಳೆಗೆ ತಂಡದ ಮೊತ್ತ 123 ಕ್ಕೆ ಬಂದು ನಿಂತಿತು.

ನಿರ್ಣಾಯಕವಾಗಿದ್ದ ಕೊನೆಯ 5 ಓವರ್​ಗಳ ವೇಳೆ ವಿಮಲ್ ಕುಮಾರ್ ಅವರ ಭರ್ಜರಿ ಬ್ಯಾಟಿಂಗ್ ಮುಂದುವರೆಯಿತು. ಅದರಲ್ಲೂ ರೋಹಿತ್ ಸುತಾರ್ ಎಸೆದ 17ನೇ ಓವರ್​ನಲ್ಲಿ  ಫೋರ್ ಹಾಗೂ 5 ಭರ್ಜರಿ ಸಿಕ್ಸ್ ಸಿಡಿಸುವ ಮೂಲಕ ವಿಮಲ್ ಬರೋಬ್ಬರಿ 34 ರನ್​ ಚಚ್ಚಿದರು. ಪರಿಣಾಮ ದಿಂಡಿಗಲ್ ಡ್ರಾಗನ್ಸ್ ತಂಡವು 18.4 ಓವರ್​ಗಳಲ್ಲಿ 182 ರನ್​ಗಳಿಸುವ ಮೂಲಕ 4 ವಿಕೆಟ್​ಗಳ ಭರ್ಜರಿ ಗೆಲುವು ದಾಖಲಿಸಿತು.

ಕೇವಲ 30 ಎಸೆತಗಳಲ್ಲಿ 5 ಭರ್ಜರಿ ಸಿಕ್ಸ್ ಹಾಗೂ 5 ಫೋರ್​ಗಳೊಂದಿಗೆ 65 ರನ್ ಬಾರಿಸುವ ಮೂಲಕ ವಿಮಲ್ ಕುಮಾರ್ ಗೆಲುವಿನ ರೂವಾರಿ ಎನಿಸಿಕೊಂಡರು. ಈ ಗೆಲುವಿನೊಂದಿಗೆ ದಿಂಡಿಗಲ್ ಡ್ರಾಗನ್ಸ್ ತಂಡವು ತಮಿಳುನಾಡು ಪ್ರೀಮಿಯರ್ ಲೀಗ್​ 2025 ರಲ್ಲಿ ಫೈನಲ್​ಗೆ ಎಂಟ್ರಿ ಕೊಟ್ಟಿದೆ.

ವಿಮಲ್ ಕುಮಾರ್ ಬ್ಯಾಟಿಂಗ್:

ದಿಂಡಿಗಲ್ ಡ್ರಾಗನ್ಸ್: ರವಿಚಂದ್ರನ್ ಅಶ್ವಿನ್ (ನಾಯಕ) , ಬಾಬಾ ಇಂದ್ರಜಿತ್ ( ವಿಕೆಟ್ ಕೀಪರ್ ) , ವಿಮಲ್ ಕುಮಾರ್ , ದಿನೇಶ್ ಎಚ್ , ಹುನ್ನಿ ಸೈನಿ , ಮಾನ್ ಬಾಫ್ನಾ , ಕಾರ್ತಿಕ್ ಸರನ್ , ಭುವನೇಶ್ವರ್ ವೆಂಕಟೇಶ್ , ವರುಣ್ ಚಕ್ರವರ್ತಿ , ಶಶಿಧರನ್ ರವಿಚಂದ್ರನ್ , ಗಣೇಶನ್ ಪೆರಿಯಸ್ವಾಮಿ.

ಇದನ್ನೂ ಓದಿ: ಯಶಸ್ವಿ ಜೈಸ್ವಾಲ್ ಆರ್ಭಟಕ್ಕೆ ದ್ರಾವಿಡ್, ಸೆಹ್ವಾಗ್ ದಾಖಲೆಗಳೇ ಧೂಳೀಪಟ

ಚೆಪಾಕ್ ಸೂಪರ್ ಗಿಲ್ಲೀಸ್: ಕೆ. ಆಶಿಕ್ , ಆರ್ ಎಸ್ ಮೋಕಿತ್ ಹರಿಹರನ್ , ಬಾಬಾ ಅಪರಜಿತ್ (ನಾಯಕ) , ವಿಜಯ್ ಶಂಕರ್ , ಎನ್ ಜಗದೀಸನ್ (ವಿಕೆಟ್ ಕೀಪರ್ ) , ಸ್ವಪ್ನಿಲ್ ಸಿಂಗ್ , ಎಸ್ ದಿನೇಶ್ ರಾಜ್ , ಅಭಿಷೇಕ್ ತನ್ವರ್ , ಲೋಕೇಶ್ ರಾಜ್ , ಎಂ ಸಿಲಂಬರಸನ್ , ಜೆ ಪ್ರೇಮ್ ಕುಮಾರ್.