TNPL 2026: ಕೇವಲ 90 ಎಸೆತಗಳಲ್ಲಿ ಬರೋಬ್ಬರಿ 239 ರನ್ ದಾಖಲು..!
TNPL 2026: ಟಿಎನ್ಪಿಎಲ್ 2026ರಲ್ಲಿ ದಿಂಡಿಗಲ್ ಡ್ರಾಗನ್ಸ್ ಸೇಲಂ ಸ್ಪಾರ್ಟನ್ಸ್ ವಿರುದ್ಧ 81 ರನ್ಗಳ ಭರ್ಜರಿ ಜಯ ಸಾಧಿಸಿದೆ. ಮಳೆ ಪೀಡಿತ 15 ಓವರ್ಗಳ ಪಂದ್ಯದಲ್ಲಿ ದಿಂಡಿಗಲ್ ಡ್ರಾಗನ್ಸ್ 239 ರನ್ಗಳ ಬೃಹತ್ ಮೊತ್ತ ಕಲೆಹಾಕಿತು. ನಾಯಕ ಬಾಬಾ ಇಂದ್ರಜಿತ್ ಕೇವಲ 25 ಎಸೆತಗಳಲ್ಲಿ ಅಜೇಯ 73 ರನ್ ಗಳಿಸಿ ತಂಡಕ್ಕೆ ನೆರವಾದರು. ಈ ಗುರಿ ಬೆನ್ನತ್ತಿದ ಸೇಲಂ ಸ್ಪಾರ್ಟನ್ಸ್ 158 ರನ್ ಗಳಿಸಲಷ್ಟೇ ಶಕ್ತವಾಗಿ ಸೋಲೊಪ್ಪಿಕೊಂಡಿತು.
Updated on: Aug 14, 2026 | 10:50 PM
ದಿಂಡಿಗಲ್ನಲ್ಲಿ ನಡೆಯುತ್ತಿರುವ ಟಿಎನ್ಪಿಎಲ್ 2026 (TNPL 2026) ಸೀಸನ್ನ 18ನೇ ಪಂದ್ಯದಲ್ಲಿ ಇಂದು ದಿಂಡಿಗಲ್ ಡ್ರಾಗನ್ಸ್ ಹಾಗೂ ಸೇಲಂ ಸ್ಪಾರ್ಟನ್ಸ್ ( Dindigul vs Salem Spartans) ತಂಡಗಳು ಮುಖಾಮುಖಿಯಾಗಿದ್ದವು. ಮಳೆ ಪೀಡಿತ ಈ ಪಂದ್ಯವನ್ನು ತಲಾ 15 ಓವರ್ಗಳಿಗೆ ನಿಗದಿಪಡಿಸಲಾಯಿತು. ಅದರಂತೆ ಮೊದಲು ಬ್ಯಾಟಿಂಗ್ ಮಾಡಿದ ದಿಂಡಿಗಲ್ ಡ್ರಾಗನ್ಸ್ ತಂಡ ಮೈದಾನದಲ್ಲಿ ಬೌಂಡರಿ ಹಾಗೂ ಸಿಕ್ಸರ್ಗಳ ಮಳೆಗರೆದು ಕೇವಲ 90 ಎಸೆತಗಳಲ್ಲಿ ಬರೋಬ್ಬರಿ 239 ರನ್ ಕಲೆಹಾಕಿತು. ಈ ಗುರಿ ಬೆನ್ನಟ್ಟಿದ ಸೇಲಂ ಸ್ಪಾರ್ಟನ್ಸ್ ತಂಡ 158 ರನ್ ಕಲೆಹಾಕಲಷ್ಟೇ ಶಕ್ತವಾಗಿ 81 ರನ್ಗಳಿಂದ ಸೋಲೊಪ್ಪಿಕೊಂಡಿತು.
4.4 ಓವರ್ಗಳಲ್ಲಿ 70 ರನ್
ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ದಿಂಡಿಗಲ್ ಡ್ರಾಗನ್ಸ್ ತಂಡಕ್ಕೆ ಆರಂಭಿಕ ಆಟಗಾರರು ಸ್ಫೋಟಕ ಆರಂಭ ಒದಗಿಸಿಕೊಟ್ಟರು. ಶಿವಂ ಸಿಂಗ್ (38) ಹಾಗೂ ವಿನೀತ್ (45) ಕೇವಲ 4.4 ಓವರ್ಗಳಲ್ಲಿ ತಂಡವನ್ನು 70 ರನ್ಗಳಿಗೆ ಕೊಂಡೊಯ್ದರು. ಆದರೆ ಇದ್ದಕ್ಕಿದ್ದಂತೆ 89 ರನ್ಗಳಿಗೆ ಮೂರು ವಿಕೆಟ್ಗಳು ಬಿದ್ದವು. ನಂತರ ನಾಯಕ ಬಾಬಾ ಇಂದ್ರಜಿತ್ ಸೇಲಂ ಸ್ಪಾರ್ಟನ್ಸ್ ಬೌಲರ್ಗಳನ್ನು ಸರಿಯಾಗಿ ಬೆಂಡೆತ್ತಿ ಸಿಕ್ಸರ್ಗಳ ಮಳೆ ಸುರಿಸಿದರು.
25 ಎಸೆತಗಳಲ್ಲಿ ಅಜೇಯ 73 ರನ್
ಪರಿಣಾಮವಾಗಿ ಕೇವಲ 18 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿ, 25 ಎಸೆತಗಳಲ್ಲಿ ಅಜೇಯ 73 ರನ್ ಬಾರಿಸಿದರು. ಇಂದ್ರಜಿತ್ ತಮ್ಮ ಇನ್ನಿಂಗ್ಸ್ನಲ್ಲಿ ಎಂಟು ಸಿಕ್ಸರ್ಗಳು ಮತ್ತು ಮೂರು ಬೌಂಡರಿಗಳನ್ನು ಬಾರಿಸಿದರು. ಹೀಗಾಗಿ, ದಿಂಡಿಗಲ್ ತಂಡವು 15 ಓವರ್ಗಳಲ್ಲಿ 239 ರನ್ ಕಲೆಹಾಕಿತು. ಇದು ಲೀಗ್ನಲ್ಲಿ ಎರಡನೇ ಅತ್ಯಧಿಕ ಮೊತ್ತವೆಂಬ ದಾಖಲೆಯನ್ನು ಬರೆಯಿತು. ಒಂದು ವೇಳೆ ಈ ಪಂದ್ಯವನ್ನು ಪೂರ್ಣ 20 ಓವರ್ಗಳಿಗೆ ಆಡಿದ್ದರೆ, ತಂಡವು 300 ರನ್ಗಳನ್ನು ಗಳಿಸುವ ಅವಕಾಶವನ್ನು ಹೊಂದಿತ್ತು.
An over full of fireworks! 💥
🏏 August 04-28 | Dindigul & Chennai. 📺 Watch LIVE on Sony Sports Ten 4 Tamil & the TNPL YouTube Channel. 🎟️ Book your tickets now on the District by Zomato app.#TNPL10 #TNPL2026 #NammaOoruNammaGethu #Season10SemmaGethu #DecadeOfKondattam pic.twitter.com/Fe2muQLyzG
— TNPL (@TNPremierLeague) August 14, 2026
81 ರನ್ಗಳ ಸೋಲು
ಈ ಬೆಟ್ಟದಂತಹ ಗುರಿ ಬೆನ್ನಟ್ಟಿದ ಸೇಲಂ ಸ್ಪಾರ್ಟನ್ಸ್ ತಂಡಕ್ಕೆ ಉತ್ತಮ ಆರಂಭ ಸಿಗಲಿಲ್ಲ. ತಂಡದ ನಾಯಕ ಎಸ್. ಅಭಿಷೇಕ್ 18 ಎಸೆತಗಳಲ್ಲಿ 38 ರನ್ ಗಳಿಸುವ ಮೂಲಕ ಗೆಲುವಿಗೆ ಪ್ರಯತ್ನಿಸಿದರಾದರೂ ಇತರ ಬ್ಯಾಟ್ಸ್ಮನ್ಗಳಿಂದ ಅವರಿಗೆ ಬೆಂಬಲ ಸಿಗಲಿಲ್ಲ. 15 ಓವರ್ಗಳಲ್ಲಿ 240 ರನ್ ಗಳಿಸುವ ಒತ್ತಡದಲ್ಲಿದ್ದ ಬ್ಯಾಟರ್ಗಳು ಬೇಗನೇ ಪೆವಿಲಿಯನ್ ಸೇರಿಕೊಂಡರು. ನಾಯಕನನ್ನು ಹೊರತುಪಡಿಸಿ ಉಳಿದ ಯಾವ ಆಟಗಾರನೂ 20 ರನ್ಗಳ ಗಡಿ ದಾಟಲಿಲ್ಲ. ಪರಿಣಾಮವಾಗಿ ಸ್ಪಾರ್ಟನ್ಸ್ ತಂಡವು 15 ಓವರ್ಗಳಲ್ಲಿ ಕೇವಲ 158 ರನ್ಗಳನ್ನು ಗಳಿಸಿ ಪಂದ್ಯವನ್ನು 81 ರನ್ಗಳಿಂದ ಸೋತಿತು.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
