Diamond League: ಡೈಮಂಡ್ ಲೀಗ್ನಿಂದ ಹಿಂದೆ ಸರಿದ ಅರ್ಷದ್: ಕಣದಲ್ಲಿ ನೀರಜ್ ಚೋಪ್ರಾ
Diamond League 2024: ಸ್ವಿಟ್ಜರ್ಲೆಂಡ್‌ನಲ್ಲಿ ನಡೆಯಲಿರುವ ಡೈಮಂಡ್ ಲೀಗ್ ಜಾವೆಲಿನ್ ಥ್ರೋ ಸ್ಪರ್ಧೆಯಲ್ಲಿ ನೀರಜ್ ಚೋಪ್ರಾ ಕಣಕ್ಕಿಳಿಯಲಿದ್ದಾರೆ. ಶುಕ್ರವಾರ (22) ಮಧ್ಯರಾತ್ರಿ ನಡೆಯಲಿರುವ ಈ ಸ್ಪರ್ಧೆಯಿಂದ ಪಾಕಿಸ್ತಾನದ ಅರ್ಷದ್ ನದೀಮ್ ಹಿಂದೆ ಸರಿದಿದ್ದಾರೆ. ಇದಾಗ್ಯೂ ಒಲಿಂಪಿಕ್ಸ್ ಪದಕ ವಿಜೇತರಾದ ವಡ್ಲೆಜ್ ಹಾಗೂ ಪೀಟರ್ಸ್ ಕಣದಲ್ಲಿದ್ದು, ಹೀಗಾಗಿ ಭರ್ಜರಿ ಪೈಪೋಟಿಯನ್ನು ನಿರೀಕ್ಷಿಸಬಹುದು.
ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಬೆಳ್ಳಿ ಪದಕ ಗೆದ್ದು ಭಾರತದ ಕೀರ್ತಿ ಪತಾಕೆಯನ್ನು ಮುಗಿಲೆತ್ತಕ್ಕೇರಿಸಿದ ನೀರಜ್ ಚೋಪ್ರಾ ಇದೀಗ ಮತ್ತೆ ಕಣಕ್ಕಿಳಿಯಲು ಸಜ್ಜಾಗಿದ್ದಾರೆ. ಸ್ವಿಟ್ಜರ್ಲೆಂಡ್‌ನ ಲೌಸನ್ನೆಯಲ್ಲಿ ನಡೆಯಲಿರುವ ಜಾವೆಲಿನ್ ಥ್ರೋ ಸ್ಪರ್ಧೆಯಲ್ಲಿ ನೀರಜ್ ಚೋಪ್ರಾ ಕಾಣಿಸಿಕೊಳ್ಳಲಿದ್ದಾರೆ. ಆದರೆ ಈ ಲೀಗ್ನಿಂದ ಪ್ಯಾರಿಸ್ ಒಲಿಂಪಿಕ್ಸ್ನ ಚಿನ್ನದ ಪದಕ ವಿಜೇತ ಪಾಕಿಸ್ತಾನದ ಅರ್ಷದ್ ನದೀಮ್ ಹಿಂದೆ ಸರಿದಿದ್ದಾರೆ.
ಪ್ಯಾರಿಸ್ ಒಲಿಂಪಿಕ್ಸ್ ಮುಗಿಸಿ ತವರಿಗೆ ಹಿಂತಿರುಗಿರುವ ಅರ್ಷದ್ ನದೀಮ್ ವಿಶ್ರಾಂತಿಯ ಕಾರಣ ಡೈಮಂಡ್ ಲೀಗ್ನಿಂದ ಹಿಂದೆ ಸರಿದಿದ್ದಾರೆ. ಮತ್ತೊಂದೆಡೆ ತೊಡೆಸಂದು ಗಾಯದ ಸಮಸ್ಯೆಯಿಂದ ಬಳಲುತ್ತಿದ್ದ ನೀರಜ್ ಚೋಪ್ರಾ ಲೌಸನ್ನೆಯಲ್ಲಿ ನಡೆಯಲಿರುವ ಸ್ಪರ್ಧೆಯಲ್ಲಿ ಪಾಲ್ಗೊಳ್ಳಲು ನಿರ್ಧರಿಸಿರುವುದು ವಿಶೇಷ.
ಇನ್ನು ನೀರಜ್ ಚೋಪ್ರಾ ಅವರೊಂದಿಗೆ ವಿಶ್ವದ ಅಗ್ರಗಣ್ಯ ಜಾವೆಲಿನ್ ಎಸೆತಗಾರರಾದ ಜೆಕ್ ರಿಪಬ್ಲಿಕ್ನ ಜಾಕುಬ್ ವಡ್ಲೆಜ್ ಮತ್ತು ಗ್ರೆನಡಾದ ಅ್ಯಂಡರ್ಸನ್ ಪೀಟರ್ಸ್ ಕೂಡ ಕಣಕ್ಕಿಳಿಯುತ್ತಿದ್ದಾರೆ. ವಿಶೇಷ ಎಂದರೆ ಅಂಡರ್ಸನ್ ಪೀಟರ್ಸ್ ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಕಂಚಿನ ಪದಕ ಗೆದ್ದಿದ್ದರು. ಹಾಗೆಯೇ ಟೋಕಿಯೋ ಒಲಿಂಪಿಕ್ಸ್ನಲ್ಲಿ ವಡ್ಲೆಜ್ ಬೆಳ್ಳಿ ಪದಕಕ್ಕೆ ಮುತ್ತಿಕ್ಕಿದ್ದರು. ಇದೀಗ ಮೂವರು ಒಲಿಂಪಿಕ್ಸ್ ಪದಕ ವಿಜೇತರು ಡೈಮಂಡ್ ಲೀಗ್ನಲ್ಲಿ ಕಣಕ್ಕಿಳಿಯುತ್ತಿದ್ದು, ಹೀಗಾಗಿ ಭರ್ಜರಿ ಪೈಪೋಟಿಯನ್ನು ನಿರೀಕ್ಷಿಸಬಹುದು.
ಎಷ್ಟು ಗಂಟೆಗೆ ಸ್ಪರ್ಧೆ ಶುರು?
ಲೌಸನ್ನೆ ಡೈಮಂಡ್ ಲೀಗ್ನಲ್ಲಿ ನೀರಜ್ ಚೋಪ್ರಾ ಅವರ ಜಾವೆಲಿನ್ ಥ್ರೋ ಸ್ಪರ್ಧೆಯು ಶುಕ್ರವಾರ 12:12 AM IST ಕ್ಕೆ ಶುರುವಾಗಲಿದೆ.
ಯಾವ ಚಾನೆಲ್ನಲ್ಲಿ ನೇರ ಪ್ರಸಾರ?
ಭಾರತದಲ್ಲಿ ಲೌಸನ್ನೆ ಡೈಮಂಡ್ ಲೀಗ್ ಜಾವೆಲಿನ್ ಥ್ರೋ ಸ್ಪರ್ಧೆಯನ್ನು ಸ್ಪೋರ್ಟ್ಸ್ 18 ನೆಟ್‌ವರ್ಕ್‌ ಚಾನೆಲ್ನಲ್ಲಿ ಲೈವ್ ವೀಕ್ಷಿಸಬಹುದು. ಹಾಗೆಯೇ ಜಿಯೋ ಸಿನಿಮಾ ಆ್ಯಪ್ನಲ್ಲೂ ಲೈವ್ ಇರಲಿದೆ.
ಲೌಸನ್ನೆ ಡೈಮಂಡ್ ಲೀಗ್‌ಗೆ ಎಂಟ್ರಿ ಲಿಸ್ಟ್:
- ನೀರಜ್ ಚೋಪ್ರಾ (ಭಾರತ): SB – 89.45 ಮೀ; PB – 89.94 ಮೀ
- ರೋಡ್ರಿಕ್ ಜೆಂಕಿ ಡೀನ್ (ಜಪಾನ್): SB – 82.48 ಮೀ; PB – 84.28 ಮೀ
- ಲಸ್ಸಿ ಎಟಲಾಟಾಲೊ (ಫಿನ್ಲ್ಯಾಂಡ್): SB – 84.67m; PB – 86.44 ಮೀ
- ಆರ್ಟರ್ ಫೆಲ್ಫ್ನರ್ (ಉಕ್ರೇನ್): SB – 83.95 ಮೀ; PB – 84.32 ಮೀ
- ಆಂಡ್ರಿಯನ್ ಮರ್ಡೇರೆ (ಮೊಲ್ಡೊವ): SB – 84.13m; PB – 86.66 ಮೀ
- ಎಡಿಸ್ ಮಾಟುಸೆವಿಸಿಯಸ್ (ಲಿಥುವೇನಿಯಾ): SB – 85.68m; PB – 89.17 ಮೀ
- ಆಂಡರ್ಸನ್ ಪೀಟರ್ಸ್ (ಗ್ರೆನೆಡಾ): SB – 88.63m; PB – 93.07 ಮೀ
- ಜಾಕುಬ್ ವಡ್ಲೆಜ್ (ಜೆಕ್ ರಿಪಬ್ಲಿಕ್): SB – 88.65 ಮೀ; PB – 90.88 ಮೀ
- ಜೂಲಿಯನ್ ವೆಬರ್ (ಜರ್ಮನಿ): SB – 88.37m; PB – 89.54 ಮೀ
- ಜೂಲಿಯಸ್ ಯೆಗೊ (ಕೀನ್ಯಾ): SB – 87.72 ಮೀ; PB – 92.72 ಮೀ
*SB- ಸೀಸನ್ ಬೆಸ್ಟ್
*PB- ಪರ್ಸನಲ್ ಬೆಸ್ಟ್