ನಾನಾಡುವ ದಿನಗಳಲ್ಲೂ ಇಂಟರ್ನೆಟ್​ ಲಭ್ಯವಿದ್ದರೆ ಕಿರಿವಯಸ್ಸಿನಲ್ಲೇ ಭಾರತ ಪರ ಅಂತರರಾಷ್ಟ್ರೀಯ ಕ್ರಿಕೆಟ್ ಆಡಿರುತ್ತಿದ್ದೆ: ಸೆಹ್ವಾಗ್

ಹದಿನಾಲ್ಕು ವರ್ಷಗಳ ಅಂತರರಾಷ್ಟ್ರೀಯ ಕ್ರಿಕೆಟ್​ ಬದುಕಿನಲ್ಲಿ ಬ್ಯಾಟ್ಸ್​ಮನ್​ಗಳ ಎದೆಯಲ್ಲಿ ನಡುಕ ಹುಟ್ಟಿಸಿದ್ದ ಬೌಲರ್​ಗಳಿಗೂ ಸಿಂಹಸ್ವಪ್ನರಾಗಿದ್ದ ಭಾರತದ ಮಾಜಿ ಆರಂಭ ಆಟಗಾರ ವಿರೇಂದ್ರ ಸೆಹ್ವಾಗ್ ಅವರು ಕ್ರಿಕೆಟ್​ನ ಎಲ್ಲ ಫಾರ್ಮಾಟ್​ಗಳಲ್ಲೂ ಅತ್ಯಂತ ಆಕ್ರಮಣಕಾರಿ ಆಟಗಾರಾಗಿದ್ದರು. ಕ್ರಿಕೆಟ್​ ಪ್ರೇಮಿಗಳಿಗೆ ಗೊತ್ತಿರುವ ಹಾಗೆ ಅವರು 2001ರಲ್ಲಿ ಟೆಸ್ಟ್​ ಕರಿಯರ್ ಆರಂಭಿಸಿದ್ದು ಮಧ್ಯಮ ಕ್ರಮಾಂಕದ ಬ್ಯಾಟ್ಸ್​ಮನ್ ರೂಪದಲ್ಲಿ. ಆದರೆ ನಂತರದ ದಿನಗಳಲ್ಲಿ ಆರಂಭ ಆಟಗಾರನಾಗಿ ಬಡ್ತಿ ಪಡೆದು ತಮ್ಮ ಆರಾಧ್ಯದೈವ ಮತ್ತು ಕ್ರಿಕೆಟ್​ ವಿಶ್ವದ ಲಿವಿಂಗ್ ಲೆಜೆಂಡ್ ಸಚಿನ್ ತೆಂಡೂಲ್ಕರ್ ಅವರೊಂದಿಗೆ ಒಂದು ದಿನದ ಪಂದ್ಯಗಳಲ್ಲಿ ಹಲವಾರು ಬಾರಿ ಇನ್ನಿಂಗ್ಸ್ ಆರಂಭಿಸಿದರು. ಸೆಹ್ವಾಗ್ ತಮ್ಮ ವೃತ್ತಿಬದುಕು ಪ್ರಾರಂಭಿಸಿದ್ದು 21ನೇ ವಯಸ್ಸಿನಲ್ಲಿ. ಅದರೆ, ಈಗಿನ ಆಟಗಾರರಿಗೆ ಲಭ್ಯವಾಗುವ ಇಂಟರ್ನೆಟ್​ನಂಥ ಆಧುನಿಕ ತಂತ್ರಜ್ಞಾನದ ನೆರವು ತನಗೆ ಸಿಕ್ಕಿದ್ದರೆ, ಇನ್ನೂ ಚಿಕ್ಕ ವಯಸ್ಸಿನಲ್ಲೇ ಅಂತರರಾಷ್ಟ್ರೀಯ ಕ್ರಿಕೆಟ್​ ಆಡುವುದು ಸಾಧ್ಯವಾಗುತಿತ್ತು ಅಂತ ಬುಧವಾರದಂದು ನವದೆಹಲಿಯಲ್ಲಿ ಅವರು ಹೇಳಿದರು.

ಭಾರತ, 1999ರಲ್ಲಿ ದಕ್ಷಿಣ ಪ್ರವಾಸ ಕೈಗೊಂಡಾಗ ಸೆಹ್ವಾಗ್​ಗೆ ಟೆಸ್ಟ್​ ಕ್ರಿಕೆಟ್​ಗೆ ಪದಾರ್ಪಣೆ ಮಾಡುವ ಅವಕಾಶ ಲಭ್ಯವಾಯಿತು. ತಾನಾಡಿದ ಮೊದಲ ಟೆಸ್ಟ್​ನಲ್ಲೇ ಶತಕ ಬಾರಿಸಿ ಅವರು ಸ್ಥಾನವನ್ನು ಭದ್ರಪಡಿಸಿಕೊಂಡರು. ತಮ್ಮ ಹಾಸ್ಯಭರಿತ ಟ್ವೀಟ್​ಗಳ ಮೂಲಕ ಈಗ ಅಭಿಮಾನಿಗಳನ್ನು ರಂಜಿಸುತ್ತಿರುವ ಸೆಹ್ವಾಗ್, ಈಗಿನ ಬ್ಯಾಟ್ಸ್​ಮನ್​ಗಳಿಗೆ ತಂತ್ರಜ್ಞಾನದ ನೆರವು ಲಭ್ಯವಿರುವುದರಿಂದ ಬ್ಯಾಟಿಂಗ್​ನಲ್ಲಿನ ನ್ಯೂನತೆಗಳನ್ನು ಸರಿಪಡಿಸಿಕೊಳ್ಳಲು ಸಾಧ್ಯವಾಗುತ್ತಿದೆ ಎಂದು ಸರ್ಕುರು ಌಪ್​ ಬಿಡುಗಡೆ ಕಾರ್ಯಕ್ರಮದಲ್ಲಿ ಹೇಳಿದರು.

‘ಇವತ್ತಿನ ಯುವ ಆಟಗಾರರಿಗೆ ಇಂಟರ್ನೆಟ್​ನಲ್ಲಿ ವಿಡಿಯೋಗಳು ಲಭ್ಯವಿವೆ ಮತ್ತು ಕ್ರೀಡೆಗೆ ಸಂಬಂಧಿಸಿದ ಪ್ರತಿಯೊಂದು ಅಂಶ ಬೆರಳ ತುದಿಯಲ್ಲಿ ಸಿಗುತ್ತದೆ. ಈ ಸೌಲಭ್ಯಗಳು ನಾನಾಡುವ ದಿನಗಳಲ್ಲಿ ಸಿಕ್ಕಿದ್ದರೆ ನಾನು ಬ್ಯಾಟಿಂಗ್ ಕಲೆಗೆ ಸಂಬಂಧಿಸಿದ ಅಂಶಗಳನ್ನು ಬೇಗ ಕಲಿತು, ಚಿಕ್ಕ ವಯಸ್ಸಿನಲ್ಲೇ ಭಾರತಕ್ಕೆ ಆಡಬಹುದಿತ್ತು,’ ಎಂದು ಅವರು ಹೇಳಿದರು.

ಬ್ಯಾಟಿಂಗ್​ನಲ್ಲಿ ತೋರುತ್ತಿದ್ದ ಆಕ್ರಮಣಕಾರಿ ಮನೋಭಾವದಿಂದ ಎದುರಾಳಿ ಬೌಲರ್​ಗಳಲ್ಲಿ ಭೀತಿ ಹುಟ್ಟಿಸಿದ್ದ ದೆಹಲಿ ನಜಾಫ್​ಗಡ್​ನ ಸೆಹ್ವಾಗ್​ ಅವರು ಭಾರತಕ್ಕೆ 104 ಟೆಸ್ಟ್, 251 ಒಡಿಐಗಳು ಮತ್ತು 19 ಟಿ20ಐ ಪಂದ್ಯಗಳನ್ನಾಡಿದರು. ತಾನು ಸ್ಟ್ರೇಟ್​ಡ್ರೈವ್ ಬಾರಿಸುವದನ್ನು 1992ರ ವಿಶ್ವಕಪ್​ನಲ್ಲಿ ಸಚಿನ್ ಆದನ್ನು ಬಾರಿಸುತ್ತಿದ್ದ ರೀತಿ ನೋಡಿ ಕಲಿತಿದ್ದು ಅಂತ ಅವರು ಇದೇ ಕಾರ್ಯಕ್ರಮದಲ್ಲಿ ಹೇಳಿದರು.

‘ಟಿವಿಯಲ್ಲಿ ನಾನು ಕ್ರಿಕೆಟ್​ ನೋಡಲಾರಂಭಿಸಿದದ್ದು 1992 ರ ವಿಶ್ಚಕಪ್​ ನಡೆಯುತ್ತಿದ್ದ ಸಂದರ್ಭದಲ್ಲಿ. ಆಗಲೇ ನಾನು ಸಚಿನ್ ತೆಂಡೂಲ್ಕರ್ ಅವರ ಸ್ಟ್ರೇಟ್​ಡ್ರೈವ್ ಕಲಿತಿದ್ದು,’ ಎಂದು ಸೆಹ್ವಾಗ್ ಹೇಳಿದರು.

ಅವರ ಆಕ್ರಮಣಜಾರಿ ಬ್ಯಾಟಿಂಗ್​ನಿಂದ ಭಾರೀ ಪ್ರಭಾವಿತರಾಗಿದ್ದ ಆಗಿನ ಕ್ಯಾಪ್ಟನ್ ಸೌರವ ಗಂಗೂಲಿ ಅವರು ಒಂದು ದಿನದ ಪಂದ್ಯಗಳಲ್ಲಿ ಸಚಿನ್ ಜೊತೆ ಇನ್ನಿಂಗ್ಸ್ ಆರಂಭಿಸಲು ಕಳಿಸಲಾರಂಭಿಸಿದರು. ಹಲವಾರು ವರ್ಷಗಳ ಕಾಲ ಅವರಿಬ್ಬರು ಭಾರತಕ್ಕೆ ಇನ್ನಿಂಗ್ಸ್​ ಆರಂಭಿಸಿದರು. ಆರಂಭ ಆಟಗಾರನಾಗಿ ಸೆಹ್ವಾಗ್ ಮಾಡಿದ ಪ್ರಭಾವ ಹೇಗಿತ್ತೆಂದರೆ, ತೆಂಡೂಲ್ಕರ್ ಮತ್ತು ಗಂಗೂಲಿ ಸರದಿಯ ಮೇಲೆ ಓಪನರ್​ಗಳಾಗಿ ಆಡಲು ನಿರ್ಧರಿಸಿ, ಸೆಹ್ವಾಗ್​ ಅವರನ್ನು ಖಾಯಂ ಆರಂಭ ಆಟಗಾರನಾಗಿ ಉಳಿಸಿಕೊಂಡರು. ಸೆಹ್ವಾಗ್​ರನ್ನು ಮೂರನೇ ಕ್ರಮಾಂಕದಲ್ಲಿ ಆಡಿಸಲು ತಜ್ಞರು ಮತ್ತು ಮಾಜಿ ಆಟಗಾರರು ನೀಡುತ್ತಿದ್ದ ಸಲಹೆಗಳನ್ನು ದಾದಾ ಕಿವಿಗೆ ಹಾಕಿಕೊಂಡಿರಲಿಲ್ಲ.

ಸಚಿನ್, ರಾಹುಲ್ ದ್ರಾವಿಡ್​, ಗಂಗೂಲಿ, ವಿವಿಎಸ್​ ಲಕ್ಷ್ಮಣ್, ಜಿಆರ್ ವಿಶ್ವನಾಥ್, ಸುನಿಲ್ ಗಾವಸ್ಕರ್ ಮೊದಲಾದ ಅತಿರಥ ಮಹಾರಥ ಬ್ಯಾಟ್ಸ್​ಮನ್​ಗಳು ಭಾರತಕ್ಕಾಗಿ ಆಡಿದರೂ ದೇಶದ ಪರ ಮೊಟ್ಟ ಮೊದಲ ತ್ರಿಶತಕ ದಾಖಲಿಸಿದ್ದು ಸೆಹ್ವಾಗ್. ಅವರ ನಂತರ ಕೇವಲ ಕರ್ನಾಟಕದ ಕರುಣ್ ನಾಯರ್ ಮಾತ್ರ ಭಾರತದ ಪರ ಟ್ರಿಪಲ್​ ಸೆಂಚುರಿ ಬಾರಿಸಿದ್ದಾರೆ. ಅಸಲಿಗೆ ಅವರ ಬ್ಯಾಟ್​ನಿಂದ ಎರಡು ತ್ರಿಶತಕಗಳು ಬಂದಿವೆ ಮತ್ತು 6 ಡಬಲ್​ ಸೆಂಚುರಿಗಳೂ ಅವರ ಹೆಸರಿಗಿವೆ.

ಇದನ್ನೂ ಓದಿ: Throwback! ಪಾಕಿಸ್ತಾನದ ವಿರುದ್ಧ ವೀರೂ ದಾದಾ ಎರಡೇ ಎರಡು ಬಾಲ್​ನಲ್ಲಿ 21 ರನ್ ಚಚ್ಚಿದ್ದು ಹೇಗೆ ಅಂತೀರಾ…?

Published On - 8:25 pm, Wed, 9 June 21