Asia Cup 2025: ಹ್ಯಾಂಡ್‌ಶೇಕ್‌ ಮಾಡದಂತೆ ಸೂಚಿಸಿದ್ದೇ ಎಸಿಸಿ..! ಸ್ಫೋಟಕ ಮಾಹಿತಿ ಬಹಿರಂಗ

ಸೆಪ್ಟೆಂಬರ್ 14 ರಂದು ಭಾರತ ಮತ್ತು ಪಾಕಿಸ್ತಾನ (India-Pakistan) ನಡುವೆ ನಡೆದ ಪಂದ್ಯದಲ್ಲಿ, ಎರಡೂ ತಂಡಗಳ ಆಟಗಾರರು ಕೈಕುಲುಕಲು ನಿರಾಕರಿಸಿದ್ದು ಟೂರ್ನಿಯಲ್ಲಿ ದೊಡ್ಡ ವಿವಾದವನ್ನೇ ಸೃಷ್ಟಿಸಿತ್ತು. ಮೊದಮೊದಲು ಭಾರತದ ಮೇಲೆ ಗೂಬೆ ಕೂರಿಸಿದ್ದ ಪಾಕಿಸ್ತಾನ, ಆ ಬಳಿಕ ಮ್ಯಾಚ್ ರೆಫರಿ ಆಂಡಿ ಪೈಕ್ರಾಫ್ಟ್ (Andy Pycroft) ಇದಕ್ಕೆಲ್ಲ ಕಾರಣ ಎಂದಿತ್ತು. ವಾಸ್ತವವಾಗಿ ಆಂಡಿ ಪೈಕ್ರಾಫ್ಟ್ ಅವರೇ ಟಾಸ್​ಗೂ ಮುನ್ನ ಎರಡೂ ತಂಡಗಳ ನಾಯಕರು ಕೈಕುಲುಕದಂತೆ ಹೇಳಿದ್ದಾರೆ ಎಂದು ಪಿಸಿಬಿ (PCB) ಆರೋಪಿಸಿತ್ತು. ಆದರೆ ಇದೀಗ ಈ ವಿವಾದದ ಬಗ್ಗೆ ಸ್ಫೋಟಕ ಮಾಹಿತಿ ಹೊರಬಿದ್ದಿದ್ದು, ಮಾಧ್ಯಮ ವರದಿಗಳ ಪ್ರಕಾರ, ಮ್ಯಾಚ್ ರೆಫರಿ ಆಂಡಿ ಪೈಕ್ರಾಫ್ಟ್​ಗೆ ಕೈಕುಲುಕದಂತೆ ನಾಯಕರಿಗೆ ಹೇಳು ಎಂದು ಸ್ವತಃ ಏಷ್ಯನ್ ಕ್ರಿಕೆಟ್ ಕೌನ್ಸಿಲ್ ಆದೇಶಿಸಿತ್ತು ಎಂದು ವರದಿಯಾಗಿದೆ.

ಮೊಹ್ಸಿನ್ ನಖ್ವಿಯದ್ದೇ ಪಿತೂರಿ

ಟೈಮ್ಸ್ ಆಫ್ ಇಂಡಿಯಾ ವರದಿಯ ಪ್ರಕಾರ, ಭಾರತ-ಪಾಕಿಸ್ತಾನ ಪಂದ್ಯ ನಡೆದ ಮರುದಿನ, ಟಾಸ್ ಸಮಯದಲ್ಲಿ ಮ್ಯಾಚ್ ರೆಫರಿ ನೀತಿ ಸಂಹಿತೆಯನ್ನು ಉಲ್ಲಂಘಿಸಿದ್ದಾರೆ ಎಂದು ಆರೋಪಿಸಿ ಅವರನ್ನು ಪಂದ್ಯಾವಳಿಯಿಂದ ಹೊರಹಾಕುವಂತೆ ಪಿಸಿಬಿ, ಐಸಿಸಿಗೆ ಇಮೇಲ್ ಮಾಡಿತ್ತು. ಅದರಂತೆ ಪಿಸಿಬಿ ಆರೋಪದ ಬಗ್ಗೆ ತನಿಖೆ ಮಾಡಿರುವ ಐಸಿಸಿ, ಪಿಸಿಬಿಗೆ ಇಮೇಲ್ ಮೂಲಕ ಪ್ರತಿಕ್ರಿಯಿಸಿದ್ದು, ಪೈಕ್ರಾಫ್ಟ್ ತನ್ನ ಕರ್ತವ್ಯಗಳನ್ನು ಉತ್ತಮವಾಗಿ ನಿರ್ವಹಿಸಿದ್ದಾರೆ. ಪಂದ್ಯದ ವೇಳೆ ಅವರು ನೀತಿ ಸಂಹಿತೆಯನ್ನು ಉಲ್ಲಂಘಿಸಿಲ್ಲ. ಬದಲಿಗೆ ಟಾಸ್ ಸಮಯದಲ್ಲಿ ಉಭಯ ತಂಡಗಳ ನಾಯಕರಿಗೆ ಪೈಕ್ರಾಫ್ಟ್ ನಿರ್ದೇಶನ ನೀಡಿದ್ದು, ಎಸಿಸಿಯ ಸೂಚನೆಯ ಮೇರೆಗೆ ಎಂದು ಇಮೇಲ್‌ನಲ್ಲಿ ಉಲ್ಲೇಖಿಸಲಾಗಿದೆ.

ಕುತೂಹಲಕಾರಿ ಸಂಗತಿಯೆಂದರೆ ಎಸಿಸಿಯ ಅಧ್ಯಕ್ಷರಾಗಿರುವುದು ಪಿಸಿಬಿ ಮುಖ್ಯಸ್ಥ ಮೊಹ್ಸಿನ್ ನಖ್ವಿ ಅವರೇ. ಒಂದು ವೇಳೆ ವರದಿಯಾಗಿರುವಂತೆ ಎಸಿಸಿ ಈ ಆದೇಶವನ್ನು ಹೊರಡಿಸಿದರೆ, ಮೊಹ್ಸಿನ್ ನಖ್ವಿ ಅವರೇ ಇದಕ್ಕೆಲ್ಲ ನೇರ ಹೊಣೆಗಾರರಾಗಿದ್ದಾರೆ. ಇದರರ್ಥ ಹ್ಯಾಂಡ್‌ಶೇಕ್‌ ವಿವಾದ ಹುಟ್ಟಿಕೊಳ್ಳಲು ಮೂಲ ಕಾರಣ ಪಾಕಿಸ್ತಾನ ಎನ್ನಬಹುದು.

Asia Cup 2025: ಹ್ಯಾಂಡ್‌ಶೇಕ್‌ ವಿವಾದದ ನಡುವೆ ಭಾರತ-ಪಾಕ್ ಪಂದ್ಯಕ್ಕೆ ದಿನಾಂಕ ನಿಗದಿ

ಮತ್ತೊಮ್ಮೆ ಇಮೇಲ್ ಕಳುಹಿಸಿದ್ದ ಪಿಸಿಬಿ

ಟೈಮ್ಸ್ ಆಫ್ ಇಂಡಿಯಾ ವರದಿಯ ಪ್ರಕಾರ, ಐಸಿಸಿಯ ಪ್ರತಿಕ್ರಿಯೆಯಿಂದ ಪಿಸಿಬಿ ಅಸಮಾಧಾನಗೊಂಡು ಏಷ್ಯಾಕಪ್‌ನಿಂದ ಹಿಂದೆ ಸರಿಯುವುದಾಗಿ ಬೆದರಿಕೆ ಹಾಕಿತ್ತು. ಪೈಕ್ರಾಫ್ಟ್ ಅವರನ್ನು ತಮ್ಮ ತಂಡದ ಪಂದ್ಯಗಳಿಂದ ತೆಗೆದುಹಾಕದಿದ್ದರೆ, ನಾವು ಪಂದ್ಯಾವಳಿಯಿಂದ ಹಿಂದೆ ಸರಿಯುವುದಾಗಿ ಪಾಕ್ ಬೆದರಿಕೆ ಹಾಕಿತ್ತು. ಆದಾಗ್ಯೂ, ಐಸಿಸಿ ತನ್ನ ನಿಲುವಿಗೆ ಬದ್ಧವಾಗಿದ್ದು, ಮ್ಯಾಚ್ ರೆಫರಿ ನೀತಿ ಸಂಹಿತೆ ಉಲ್ಲಂಘನೆಯಲ್ಲಿ ಯಾವುದೇ ತಪ್ಪು ಮಾಡಿಲ್ಲ. ಅಲ್ಲದೆ ಯಾವುದೇ ತಂಡದ ಆಜ್ಞೆಯ ಮೇರೆಗೆ ಅಧಿಕಾರಿಯನ್ನು ಬದಲಾಯಿಸಲು ಸಾಧ್ಯವಿಲ್ಲ. ನಾವು ಅವರನ್ನು ಪಂದ್ಯದಿಂದ ಹೊರಗಿಟ್ಟರೆ ಇದು ತಪ್ಪು ಸಂದೇಶವನ್ನು ನೀಡುತ್ತದೆ ಎಂದು ಐಸಿಸಿ ಅಭಿಪ್ರಾಯಪಟ್ಟಿದೆ.

ಈ ಪ್ರತಿಕ್ರಿಯೆಯ ಹೊರತಾಗಿಯೂ ಸೆಪ್ಟೆಂಬರ್ 17 ರಂದು ಪಿಸಿಬಿ, ಭಾರತ-ಪಾಕಿಸ್ತಾನ ಪಂದ್ಯದ ಸಮಯದಲ್ಲಿ ಮತ್ತು ನಂತರ ನೀತಿ ಸಂಹಿತೆ ಉಲ್ಲಂಘನೆಗಳು ನಡೆದಿವೆ ಎಂದು ಹೇಳುವ ಮತ್ತೊಂದು ಇಮೇಲ್ ಅನ್ನು ಐಸಿಸಿಗೆ ಕಳುಹಿಸಿತ್ತು. ಇದರಲ್ಲಿ ಮ್ಯಾಚ್ ರೆಫರಿಯ ಪಾತ್ರವನ್ನು ಮತ್ತೆ ಪ್ರಶ್ನಿಸಿತು. ಇದಕ್ಕೆ ಪ್ರತಿಕ್ರಿಯೆಯಾಗಿ, ಐಸಿಸಿ ಪಿಸಿಬಿಯಿಂದ ಹೆಚ್ಚಿನ ಮಾಹಿತಿಯನ್ನು ಕೋರಿತ್ತಾದರೂ, ಪಿಸಿಬಿ ಅದನ್ನು ಇನ್ನೂ ಐಸಿಸಿಗೆ ಒದಗಿಸಿಲ್ಲ.

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ