IPL Auction 2021: ಐಪಿಎಲ್ ಟೈಟಲ್ ಪ್ರಾಯೋಜಕತ್ವ ಮತ್ತೆ ದಕ್ಕಿಸಿಕೊಂಡ ವಿವೊ

ಕಳೆದ ವರ್ಷ ಜೂನ್ ತಿಂಗಳಲ್ಲಿ ಬಾರತ-ಚೀನಾ ನಡುವಿನ ಸಂಘರ್ಷವು ತಾರಕಕ್ಕೇರಿದ ಹಿನ್ನೆಲೆ ಮತ್ತು ಭಾರತವು ಚೀನಾದ ಅನೇಕ ಉತ್ಪಾದನೆಗಳ ಮೇಲೆ ನಿಷೇಧ ಹೇರಿದ್ದರಿಂದ ವಿವೊ ಸಂಸ್ಥೆಯನ್ನು ಐಪಿಎಲ್ ಪ್ರಾಯೋಜಕತ್ವದಿಂದ ಕೈಬಿಡಲಾಗಿತ್ತು.

ಪ್ರಾತಿನಿಧಿಕ ಚಿತ್ರ

ಅರುಣ್ ಕುಮಾರ್ ಬೆಳ್ಳಿ|
Updated on:Feb 18, 2021 | 9:07 PM

ಚೆನೈ: ಕಳೆದ ಬಾರಿ ಇಂಡಿಯನ್ ಪ್ರಿಮಿಯರ್ ಲೀಗ್ (Indian Premier League – IPL) ಟೈಟಲ್ ಪ್ರಾಯೋಜಕತ್ವದ ಹಕ್ಕು ಪಡೆದಿದ್ದ ಅನ್ಲೈನ್ ಗೇಮಿಂಗ್ ಪ್ಲಾಟ್ಫಾರ್ಮ್ ಡ್ರೀಮ್ 11 ಅನ್ನು ಸ್ಥಾನಪಲ್ಲಟಗೊಳಿಸಿ ವಿವೊ ಮೊಬೈಲ್ ಮತ್ತು ಟೆಕ್ನಾಲಜಿ ಕಂಪನಿಯು ಮತ್ತೊಮ್ಮೆ ಆ ಹಕ್ಕನ್ನು ಪಡೆಯುವಲ್ಲಿ ಯಶಸ್ವಿಯಾಗಿದೆ. ಚೆನೈಯಲ್ಲಿ ಐಪಿಎಲ್ 2021 ಸೀಸನ್ನ ಮಿನಿ-ಹರಾಜನ್ನು ಉದ್ಘಾಟಿಸಿ ಮಾತಾಡಿದ ಐಪಿಎಲ್ ಅಧ್ಯಕ್ಷ ಬ್ರಿಜೇಶ್ ಪಟೇಲ್ ವಿವೊ ಸಂಸ್ಥೆಯು ಟೈಟಲ್ ಸ್ಪಾನ್ಸರ್ ಅಗಿ ವಾಪಸ್ಸಾಗಿರುವುದನ್ನು ಪ್ರಕಟಿಸಿದರು.

ಕ್ರಿಕೆಟ್ ಪ್ರೇಮಿಗಳಿಗೆ ನೆನಪಿರಬಹುದು, ಕಳೆದ ವರ್ಷದ ಐಪಿಎಲ್ ಟೂರ್ನಿಯು ಡ್ರೀಮ್ 11 ಐಪಿಎಲ್ ಆಗಿತ್ತು. ಹೋದ ವರ್ಷ ಜೂನ್ನಲ್ಲಿ ಬಾರತ-ಚೀನಾ ನಡುವಿನ ಗಡಿ ಸಂಘರ್ಷ ತಾರಕಕ್ಕೇರಿದ ಹಿನ್ನೆಲೆ ಮತ್ತು ಭಾರತವು ಚೀನಾದ ಅನೇಕ ಉತ್ಪಾದನೆಗಳ ಮೇಲೆ ನಿಷೇಧ ಹೇರಿದ್ದರಿಂದ ವಿವೊ ಸಂಸ್ಥೆಯನ್ನು ಐಪಿಎಲ್ ಪ್ರಾಯೋಜಕತ್ವದಿಂದ ಕೈಬಿಡಲಾಗಿತ್ತು.

2015ರಲ್ಲಿ ಮೊದಲ ಬಾರಿಗೆ ವಿವೊ ಐಪಿಎಲ್ ಟೈಟಲ್ ಪ್ರಾಯೋಜಕತ್ವದ ಹಕ್ಕನ್ನು 2 ಸೀಸನ್ಗಳಿಗೆ ಅಂದರೆ 2017ರ ಸೀಸನ್ವರೆಗೆ ಪಡೆದುಕೊಂಡಿತ್ತು. ನಂತರ 2017ರಲ್ಲಿ ಅದು ಸುಮಾರು 2475 ಕೋಟಿ ರೂಪಾಯಿ ತೆತ್ತು 2022ರ ಅವಧಿವರೆಗೆ ಆ ಹಕ್ಕನ್ನು ವಿಸ್ತರಿಸಿಕೊಂಡಿತ್ತು. ಆದರೆ ವಿವೊ ಸಂಸ್ಥೆಯೊಂದಿಗೆ ಮಾಡಿಕೊಂಡಿದ್ದ ಒಪ್ಪಂದವನ್ನು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿಯು (ಬಿಸಿಸಿಐ) ಆಗಸ್ಟ್ 2020ರಲ್ಲಿ ಕೇವಲ ಒಂದು ಸಾಲಿನ ಹೇಳಿಕೆಯನ್ನು ಬಿಡುಗಡೆಗೊಳಿಸಿ ಅಮಾನತು ಮಾಡಿತ್ತು.

ಐಪಿಎಲ್ ಅಧ್ಯಕ್ಷ ಬ್ರಿಜೇಶ್ ಪಟೇಲ್

ಬಿಸಿಸಿಐ ಅಂದು ಬಿಡುಗಡೆ ಮಾಡಿದ ಹೇಳಿಕೆ ಹೀಗಿತ್ತು: ‘ಬಿಸಿಸಿಐ ಮತ್ತು ವಿವೊ ಮೊಬೈಲ್ ಇಂಡಿಯಾ ಪ್ರೈವೇಟ್ ಲಿಮಿಟೆಡ್, ಇಂಡಿಯನ್ ಪ್ರಿಮೀಯರ್ ಲೀಗ್ಗೆ ಸಂಬಂಧಿಸಿದ ಪಾಲುದಾರಿಕೆಯನ್ನು ಅಮಾನತುಗೊಳಿಸಿವೆ’.

ಅದಾದ ನಂತರ ಟೈಟಲ್ ಪ್ರಾಯೋಜತ್ವಕ್ಕೆ ಹೊಸ ಪಾಲುದಾರನನ್ನು ಆಯ್ಕೆ ಮಾಡುವ ಪ್ರಕ್ರಿಯೆ ಶುರುವಾಯಿತು. ಹಲವಾರು ಉಮೇದುವಾರರನ್ನು ಹಿಂದಿಕ್ಕಿದ ಡ್ರೀಮ್ 11 ಆ ಹಕ್ಕನ್ನು ₹ 222 ಕೋಟಿಗೆ ತನ್ನದಾಗಿಸಿಕೊಂಡಿತು. ಭಾರತೀಯ ಆಟಗಾರರ ಕಿಟ್ ಮತ್ತು ಟೆಸ್ಟ್ ಕ್ರಿಕೆಟ್ನಲ್ಲಿ ಧರಿಸುವ ಉಡುಪನ್ನು ಸ್ಪಾನ್ಸರ್ ಮಾಡುವ ಬೈಜೂಸ್ ಸಂಸ್ಥೆ ಸಹ ರೇಸ್ನಲ್ಲಿತ್ತು.

ಐಪಿಎಲ್ ಟೈಟಲ್ ಪ್ರಾಯೋಜಕತ್ವವು ಟೂರ್ನಮೆಂಟ್ ಆದಾಯ ಹಂಚಿಕೆ ಒಪ್ಪಂದದ ಪ್ರಮುಖ ಭಾಗವಾಗಿದೆ. ಪ್ರಾಯೋಜಕತ್ವದ ಶೇ 50 ರಷ್ಟು ಭಾಗವು 8 ಫ್ರಾಂಚೈಸಿಗಳಿಗೆ ಹೋಗುತ್ತದೆ. ಒಂದು ಅಂದಾಜಿನ ಪ್ರಕಾರ ಪ್ರತಿ ಸೀಸನ್ನಲ್ಲಿ ಎಲ್ಲ ಫ್ರಾಂಚೈಸಿಗಳು ಈ ಮೂಲದ ಮೂಲಕ ತಲಾ ₹ 20 ಕೋಟಿಯನ್ನು ಪಡೆಯುತ್ತವೆ. ಡ್ರೀಮ್ 11 ಸಂಸ್ಥೆಯು 2018ರಿಂದ ಐಪಿಎಲ್ನ ಅಧಿಕೃತ ಪಾಲುದಾರನಾಗಿದ್ದು ಐಪಿಎಲ್ ವೆಬ್ಸೈಟ್ನಲ್ಲಿ ಈಗಲೂ ಲಿಸ್ಟ್ ಆಗಿದೆ.

ಇದನ್ನೂ ಓದಿ: RCB ಈ ಇಬ್ಬರು ಆಟಗಾರರಿಗೆ ಖರ್ಚು ಮಾಡಿದ್ದು ಬರೋಬ್ಬರಿ 30 ಕೋಟಿ ರೂಪಾಯಿ!

Published On - 8:58 pm, Thu, 18 February 21

LIVETV

Arun Belly

ಹುಟ್ಟೂರು ಯಾದಗಿರಿ ಜಿಲ್ಲೆಯ ಗುರುಮಠಕಲ್. ಓದಿದ್ದು ಬಿಎಸ್ಸಿಯಾದರೂ ಮೆಡಿಕಲ್ ರಿಪ್ರಸೆಂಟೇಟಿವ್ ಆಗಿ ಕೆಲಸ ಮಾಡಿಕೊಂಡಿದ್ದ ನನ್ನನ್ನು ಖ್ಯಾತ ಪತ್ರಕರ್ತ ದಿವಂಗತ ರವಿ ಬೆಳಗೆರೆಯವರು ಪತ್ರಿಕೋದ್ಯಮಕ್ಕೆ ಎಳೆತಂದರು. ಮೊದಲು ಅವರ ಓ ಮನಸೇ ಪಾಕ್ಷಿಕದಲ್ಲಿ ಉಪ ಸಂಪಾದಕನಾಗಿ ಕೆಲಸ ಮಾಡಿದ ಬಳಿಕ ಲಂಕೇಶ್ ಪತ್ರಿಕೆ (ಸಹಾಯಕ ಸಂಪಾದಕ), ದುನಿಯಾ (ಕಾರ್ಯನಿರ್ವಾಹಕ ಸಂಪಾದಕ) ಮತ್ತು ಕ್ರಿಕೆಟ್ ಪಾಕ್ಷಿಕ ಪತ್ರಿಕೆಯ ಸಂಪಾದಕನಾಗಿ ಕೆಲಸ ಮಾಡಿದೆ. 2012 ರಲ್ಲಿ ಟಿವಿ9 ಸಂಸ್ಥೆಯ ಇಂಗ್ಲಿಷ್ ಚ್ಯಾನೆಲ್ ನಲ್ಲಿ ಸಹಾಯಕ ಸಂಪಾದಕನಾಗಿ ಸೇರಿ 8 ವರ್ಷ ದುಡಿದ ಬಳಿಕ 2020 ರಿಂದ ಟಿವಿ9 ಕನ್ನಡ ಡಿಜಿಟಲ್ ಗೆ ಹಿರಿಯ ಉಪ ಸಂಪಾದಕನಾಗಿ (ವಿಡಿಯೋ ಸುದ್ದಿ ವಿಭಾಗ) ಕಾರ್ಯನಿರ್ವಹಿಸುತ್ತಿರುವೆ.