ಪದಾರ್ಪಣೆಯ ಟೆಸ್ಟ್​ನಲ್ಲಿ ಫೇಲಾಗಿ ಹತಾಷನಾಗಿದ್ದ ನನ್ನಲ್ಲಿ ಅನುಷ್ಕಾ ಮತ್ತು ವಿರಾಟ್​ ಆತ್ಮವಿಶ್ವಾಸ ತುಂಬಿದರು: ಕೆ ಎಲ್​ ರಾಹುಲ್

ಟೆಸ್ಟ್​ ಕ್ರಿಕೆಟ್​ ಆಡಲು ತಮ್ಮ ರಾಷ್ಟ್ರೀಯ ತಂಡ ಆಯ್ಕೆಯಾಗುವ ಆಟಗಾರರು ಪದಾರ್ಪಣೆಯ ಟೆಸ್ಟ್​ನಲ್ಲಿ ಮಿಂಚಿದ ಉದಾಹರಣೆಗಳು ಜಾಸ್ತಿಯಿಲ್ಲ. ಚೊಚ್ಚಲು ಟೆಸ್ಟ್​ನಲ್ಲೇ ಶತಕ ಬಾರಿಸಿದ ಅಥವಾ 5 ವಿಕೆಟ್ ಪಡೆಯುವ ಸಾಧನೆ ಮಾಡಿದ ಆಟಗಾರರು ಬೆರಳಣಿಕೆಯಷ್ಟು ಮಾತ್ರ. ಹಾಗೆಯೇ, ಅಂತರರಾಷ್ಟ್ರೀಯ ಕ್ರಿಕೆಟ್​ಗೆ ಕುದುರಿಕೊಂಡ ಆಟಗಾರರೆಲ್ಲ ತಾವಾಡುವ ಪ್ರತಿ ಪಂದ್ಯದಲ್ಲಿ ಮಿಂಚಲಾರರು. ಆಟಗಾರನೊಬ್ಬ ಎಷ್ಟೇ ಪ್ರತಿಭಾವಂತನಾಗಿದ್ದರೂ, ಅವನ ಕರೀಯರ್​ನಲ್ಲಿ ಏರಿಳಿತಗಳಿರುತ್ತವೆ. ಬ್ಯಾಟ್ಸ್​ಮನ್​ಗಳ ಸಾಧನೆಗಳನ್ನೇ ಒಮ್ಮೆ ಗಮನಿಸಿ. ಕೇವಲ ಬ್ಯಾಟಿಂಗ್ ಪಿತಾಮಹ ಡಾನ್ ಬ್ರಾಡ್ಮನ್​ಗೆ ಮಾತ್ರ ಟೆಸ್ಟ್ ಕ್ರಿಕೆಟ್​ನಲ್ಲಿ ಹೆಚ್ಚು ಕಡಿಮೆ 100 ರಷ್ಟು (99.96) ಸರಾಸರಿ ಕಾಯ್ದುಕೊಳ್ಳಲು ಸಾಧ್ಯವಾಯಿತು. ಟೆಸ್ಟ್ ಕ್ರಿಕೆಟ್​ ಇತಿಹಾಸದಲ್ಲಿ ಕೆಲವೇ ಕೆಲ ಬ್ಯಾಟ್ಸ್​ಮನ್​ಗಳನ್ನು ಬಿಟ್ಟರೆ, ಗ್ರೇಟ್​, ಲೆಜೆಂಡರಿ ಅಂಕ ಕರೆಸಿಕೊಂಡ ಬ್ಯಾಟ್ಸ್​ಮನ್​ಗಳ ಕರೀಯರ್ ಸರಾಸರಿ 50ರಿಂದ 58 ರನ್ ಇದೆ. ಇದನ್ನೆಲ್ಲ ಹೇಳುವ ಹಿಂದಿನ ತಾತ್ಪರ್ಯವೆಂದರೆ, ಬ್ಯಾಟ್ಸ್​ಮನ್​ಗಳ ಸಾಮರ್ಥ್ಯ ಏನೇ ಆಗಿದ್ದರೂ ವೃತ್ತಿಬದುಕಿನಲ್ಲಿ ಸತತವಾಗಿ ರನ್​ಗಳಿಸುತ್ತಾ ಸಾಗುವುದು ಸಾಧ್ಯವಾಗುವುದಿಲ್ಲ.

ನಮ್ಮ ಹುಡುಗ ಕೆ ಎಲ್ ರಾಹುಲ್ ಅಪ್ಪಟ ಪ್ರತಿಭಾವಂತ ಅನ್ನುವುದರಲ್ಲಿ ಎರಡು ಮಾತಿಲ್ಲ. ನೀವೊಂದು ಅಂಶ ಗಮನಿಸರಬಹುದು. ಒಬ್ಬ ಬ್ಯಾಟ್ಸ್​ಮನ್​ನಲ್ಲಿ ಪ್ರತಿಭೆ ಹೇರಳವಾಗಿದ್ದರೆ, ಅವನು ಯಾವುದೇ ಫಾರ್ಮಾಟ್​ಗೆ ಒಗ್ಗಿಕೊಳ್ಳುತ್ತಾನೆ ಮತ್ತು ಮೂರು ಆವೃತ್ತಿಗಳಲ್ಲೂ ಸರಾಗವಾಗಿ ರನ್ ಗಳಿಸುತ್ತಾನೆ. ರಾಹುಲ ಅಂಥ ಆಟಗಾರರರಲ್ಲಿ ಒಬ್ಬರಾಗಿದ್ದಾರೆ. ಟೆಸ್ಟ್ ಕ್ರಿಕೆಟ್​ನಲ್ಲಿ ಅವರಿಗೆ ವಿಪುಲ ಅವಕಾಶಗಳು ಸಿಗುತ್ತಿಲ್ಲವಾದರೂ ಸೀಮಿತ ಓವರ್​ಗಳ ಕ್ರಿಕೆಟ್​ನಲ್ಲಿ ಅವರು ಟೀಮಿನ ಖಾಯಂ ಸದಸ್ಯ.

ಅವರ ಟೆಸ್ಟ್ ಕರೀಯರ್ ಹೇಗೆ ಆರಂಭವಾಯಿತೆನ್ನುವುದು ನಿಮಗೆ ನೆನಪಿದೆಯಾ? 2014 ರಲ್ಲಿ ಭಾರತ ಡೌನ್ ಅಂಡರ್ ಪ್ರವಾಸ ಹೋಗಿದ್ದಾಗ ಮೆಲ್ಬರ್ನ್ (ಎಮ್​ಸಿಜಿ) ಟೆಸ್ಟ್​ನಲ್ಲಿ ಅವರು ಡೆಬ್ಯೂ ಮಾಡಿದರು. ಅಹಮದಾಬಾದಿನ ನರೇಂದ್ರ ಮೋದಿ ಸ್ಟೇಡಿಯಂಕ್ಕಿಂತ ಮೊದಲು ಎಮ್​ಸಿಜಿ ವಿಶ್ವದ ಅತಿ ದೊಡ್ಡ ಕ್ರಿಕೆಟ್ ಮೈದಾನವಾಗಿತ್ತು. ಈ ಟೆಸ್ಟ್​ನ ಎರಡೂ ಇನ್ನಿಂಗ್ಸ್​ಗಳಲ್ಲಿ ರಾಹುಲ್ ರನ್ ಗಳಿಸಲು ವಿಫಲಾಗಿ ತೀವ್ರ ಹತಾಷೆಗೊಳಗಾಗಿದ್ದರು.

ಮುಂದಿನ ಟೆಸ್ಟ್​ಗೆ ಸೆಲಕ್ಟ್​ ಆಗಲಾರೆ, ತನ್ನ ಕರೀಯರ್ ಇನ್ನು ಮುಗೀತು, ಅಂತ ಖಿನ್ನರಾಗಿ ರಾಹುಲ್ ಹೋಟೆಲ್​ನ ತಮ್ಮ ರೂಮಿನಲ್ಲಿ ಕೂತಿದ್ದಾಗ ಅಲ್ಲಿಗೆ ಅಗಮಿಸಿದ ಅನುಷ್ಕಾ ಶರ್ಮ (ಆಗ ಅವರನ್ನೂ ವಿರಾಟ್ ಕೊಹ್ಲಿಯವರ ಗರ್ಲ್ ಫ್ರೆಂಡ್​ಮಾತ್ರ ಆಗಿದ್ದರು) ತನ್ನ ಮತ್ತು ವಿರಾಟ್ ಜೊತೆ ಡಿನ್ನರ್ ಮಾಡುವುದಕ್ಕೆ ಆಹ್ವಾನಿಸಿದರು.

ಮುಂದಿನ ಕತೆಯನ್ನು ರಾಹುಲ್ ಅವರ ಬಾಯಿಂದಲೇ ಕೇಳಿ.

‘ಅವರಿಬ್ಬರ (ಅನುಷ್ಕಾ ಮತ್ತು ವಿರಾಟ್) ಒಳ್ಳೆಯತನವನ್ನು ನಾನ್ಯಾವತ್ತೂ ಮರೆಯಲಾರೆ. ಅವರ ನನಗೆ ಮಾಡಿದ ಉಪಕಾರದ ಕತೆಯನ್ನು ನಿಮಗೆ ಹೇಳಬೇಕಿದೆ. ಮೆಲ್ಬರ್ನ್​ ಪಂದ್ಯ ನೋಡಲು ಅನುಷ್ಕಾ ಬಂದಿದ್ದರು. ಸದರಿ ಟೆಸ್ಟ್​ನ ಎರಡೂ ಇನ್ನಿಂಗ್ಸ್​ಗಳಲ್ಲಿ ಫೇಲಾದ ನಂತರ ನಾನು ಹತಾಷಗೊಳಗಾಗಿರುವುದನ್ನು ಆಕೆ ಗಮನಿಸಿದ್ದರು. ನನ್ನ ಟೆಸ್ಟ್ ಕರೀಯರ್​ ಮಗೀತು ಅಂತ ನಾನು ಯೋಚಿಸುತ್ತಾ ರೂಮಿನಲ್ಲಿ ಕೂತಿದ್ದಾಗ ಆಕೆ ಅಲ್ಲಿಗೆ ಬಂದು, ನೀವು ಹೀಗೆ ತಲೆ ಮೇಲೆ ಕೈ ಹೊತ್ತು ಕೂರೋದನ್ನು ನಾನು ನೋಡಲಾರೆ. ದಿನವಿಡೀ ಕ್ರಿಕೆಟ್​ ಬಗ್ಗೆ ಮಾತ್ರ ಯೋಚಿಸುವುದು ಸರಿಯಲ್ಲ. ನಾನು ಮತ್ತು ವಿರಾಟ್​ ರಾತ್ರಿ ಊಟಕ್ಕೆ ನಿಮ್ಮನ್ನು ಹೊರಗೆ ಕರೆದೊಯ್ಯಲು ನಿರ್ಧರಿಸಿದ್ದೇವೆ, ಬೇಗ ರೆಡಿಯಾಗಿ ಅಂತ ಹೇಳಿದರು,’ ಎಂದು ರಾಹುಲ್ ಓಪನ್ ಹೌಸ್​ ವಿದ್ ರೆನಿಲ್ ಕಾರ್ಯಕ್ರಮದಲ್ಲಿ ರಾಹುಲ್ ಹೇಳಿದ್ದಾರೆ. ಅನುಷ್ಕಾ ಮತ್ತು ವಿರಾಟ್ ಜೊತೆ ಸಮಯ ಕಳೆದ ನಂತರ ತನ್ನಲ್ಲಿ ಮನೆ ಮಾಡಿದ್ದ ಹತಾಷೆ ಮಾಯವಾಯಿತು ಎಂದು ಅವರು ಹೇಳಿದ್ದಾರೆ.

ನಿಮಗೆ ನೆನಪಿರಬಹುದು, ಮುಂದಿನ ಟೆಸ್ಟ್​ನಲ್ಲೇ ರಾಹುಲ್ ಅಮೋಘ ಶತಕ ಬಾರಿಸಿದರು. ಅದಾಗಿ ಈಗ ಹೆಚ್ಚು ಕಡಿಮೆ 6 ವರ್ಷ ಕಳೆದಿವೆ. ರಾಹುಲ್ ಇದುವರೆಗೆ 36 ಟೆಸ್ಟ್​ಗಳಲ್ಲಿ ಭಾರತವನ್ನು ಪ್ರತಿನಿಧಿಸಿ 5 ಶತಕ ಮತ್ತು 11 ಅರ್ಧ ಶತಕಗಳೊಂದಿಗೆ 2000 ಕ್ಕಿಂತ ಹೆಚ್ಚು ರನ್ ಗಳಿಸಿದ್ದಾರೆ. ಈಗ ಇಂಗ್ಲೆಂಡ್​ ಪ್ರವಾಸದಲ್ಲಿರುವ ಭಾರತ 5 ಟೆಸ್ಟ್​ ಪಂದ್ಯಗಳನ್ನಾಡಲಿದ್ದು, ರಾಹುಲ್ ಟೀಮಿನ ಭಾಗವಾಗಿದ್ದರೆ, ಆರಂಭ ಆಟಗಾರ ಶುಭ್ಮನ್ ಗಿಲ್​ಗೆ ಗಾಯದ ಸಮಸ್ಯೆ ಕಾಡುತ್ತಿರವುದರಿಂದ ಕನ್ನಡಿಗ ಆಡುವ ಎಲೆವೆನ್​ನಲ್ಲಿ ಅವಕಾಶ ಪಡೆಯುವ ಸಾಧ್ಯತೆ ಇದೆ.

ವಿಶ್ವ ಟೆಸ್ಟ್​ ಚಾಂಪಿಯನ್​ಶಿಪ್​ ಫೈನಲ್​ ಪಂದ್ಯದಲ್ಲಿ ನ್ಯೂಜಿಲೆಂಡ್ ವಿರುದ್ಧ ಸುಲಭ ಸೋಲನ್ನಪ್ಪಿದ ನಂತರ ತೀವ್ರ ಸ್ವರೂಪದ ಟೀಕೆಗೆ ಗುರಿಯಗಿರುವ ವಿರಾಟ್​ ಕೊಹ್ಲಿ ಮತ್ತು ಟೀಮ್ ಕೆರಳಿದ ಸಿಂಹಗಳಂತಾಗಿದ್ದ್ದಾರೆ. ಇಂಗ್ಲೆಂಡ್​ ವಿರುದ್ಧ ನಡೆಯುವ ಸರಣೆಯಲ್ಲಿ ಟೀಮ್ ಪುಟಿದೇಳುವ ಸಾಧ್ಯತೆಯಂತೂ ಇದ್ದೇ ಇದೆ.

ಇದನ್ನೂ ಓದಿ: Virat Kohli, Anushka Sharma: ವಿರಾಟ್ ಕೊಹ್ಲಿ- ಅನುಷ್ಕಾ ಶರ್ಮಾ ಬಳಿ ಇರುವ 4 ಅತಿ ದುಬಾರಿ ವಸ್ತುಗಳಿವು!