India vs England Test Series: ಜೋ ರೂಟ್ ಪ್ರಸ್ತುತವಾಗಿ ವಿಶ್ವದ ಸರ್ವಶ್ರೇಷ್ಠ ಬ್ಯಾಟ್ಸ್ಮನ್ ಅಲ್ಲ: ಗಾವಸ್ಕರ್

ರೂಟ್ ನಿರರ್ಗಳವಾದ ಬ್ಯಾಟಿಂಗ್ ಮೂಲಕ ರನ್ ಗಳಿಸಿ ಟೀಮನ್ನು ಆದ್ಭುತವಾಗಿ ಲೀಡ್ ಮಾಡುತ್ತಾ ಸತತವಾಗಿ ಜಯಗಳನ್ನು ದೊರಕಿಸಿಕೊಡುತ್ತಿದ್ದರೂ ವಿರಾಟ್ ಕೊಹ್ಲಿ, ಸ್ಟೀವ್ ಸ್ಮಿತ್ ಮತ್ತು ಕೇನ್ ವಿಲಿಯಮ್ಸನ್ ಅವರಷ್ಟು ಶ್ರೇಷ್ಠರಲ್ಲ ಅಂತ ಗಾವಸ್ಕರ್ ಹೇಳಿದ್ದಾರೆ.

ಜೋ ರೂಟ್

ಅರುಣ್ ಕುಮಾರ್ ಬೆಳ್ಳಿ|
Updated on:Feb 11, 2021 | 5:40 PM

ಪ್ರಸ್ತುತ ಭಾರತ ಪ್ರವಾಸದಲ್ಲಿರುವ ಇಂಗ್ಲೆಂಡ್ ಟೀಮಿನ ಕ್ಯಾಪ್ಟನ್ ಜೋ ರೂಟ್ ನಿಸ್ಸಂದೇಹವಾಗಿ ತಮ್ಮ ಕ್ರಿಕೆಟ್ ಕರೀಯರ್ನ ಉತ್ಕೃಷ್ಟ ಫಾರಂನಲ್ಲಿದ್ದಾರೆ. ಉಪಖಂಡದ ಪಿಚ್ಗಳಲ್ಲಿ ಸತತವಾಗಿ ಮೂರು ಶತಕಗಳನ್ನು ಬಾರಿಸುವುದು ಸುಲಭದ ಮಾತಲ್ಲ. ಆದರೆ ರೂಟ್, ಶ್ರೀಲಂಕಾದಲ್ಲಿ 228 ಮತ್ತು 186ರನ್ಗಳ ಇನ್ನಿಂಗ್ಸ್ಗಳನ್ನಾಡಿ ಭಾರತದ ವಿರುದ್ಧ ಚೆನೈನಲ್ಲಿ ನಡೆದ ಮೊದಲ ಟೆಸ್ಟ್ನಲ್ಲಿ ಅಮೋಘ ದ್ವಿಶತಕ (218) ಬಾರಿಸಿದರು. ಅವರು ನಿಷ್ಕಂಳಕವಾಗಿ ಟನ್ಗಟ್ಟಲೆ ರನ್ ಗಳಿಸುತ್ತಿರುವುದನ್ನು ನೋಡಿ ಕೆಲ ಕ್ರಿಕೆಟ್ ಪರಿಣಿತರು ಮತ್ತು ಕಾಮೆಂಟೇಟರ್ಗಳು ಅದರಲ್ಲೂ ವಿಶೇಷವಾಗಿ ಇಂಗ್ಲಿಷ್ ಕಾಮೆಂಟೇಟರ್ಗಳು ಅವರನ್ನು ಸಮಕಾಲೀನ ಕ್ರಿಕೆಟ್ನ ಅತಿಶ್ರೇಷ್ಠ ಬ್ಯಾಟ್ಸ್ಮನ್ ಎಂದು ಬಣ್ಣಿಸುತ್ತಿದ್ದಾರೆ. ಆದರೆ ಭಾರತದ ಲೆಜಂಡರಿ ಆರಂಭ ಆಟಗಾರ ಸುನಿಲ್ ಗಾವಸ್ಕರ್ ಈ ವಾದವನ್ನು ಒಪ್ಪುತ್ತಿಲ್ಲ.

ರೂಟ್ ನಿರರ್ಗಳವಾದ ಬ್ಯಾಟಿಂಗ್ ಮೂಲಕ ರನ್ ಗಳಿಸಿ ಟೀಮನ್ನು ಆದ್ಭುತವಾಗಿ ಲೀಡ್ ಮಾಡುತ್ತಾ ಸತತವಾಗಿ ಜಯಗಳನ್ನು ದೊರಕಿಸಿಕೊಡುತ್ತಿದ್ದರೂ ಬಾರತದ ವಿರಾಟ್ ಕೊಹ್ಲಿ, ಆಸ್ಟ್ರೇಲಿಯಾದ ಸ್ಟೀವ್ ಸ್ಮಿತ್ ಮತ್ತು ನ್ಯೂಜಿಲೆಂಡ್ ಕ್ಯಾಪ್ಟನ್ ಕೇನ್ ವಿಲಿಯಮ್ಸನ್ ಅವರಷ್ಟು ಶ್ರೇಷ್ಠರಲ್ಲ ಎಂದು ಮೊದಲ ಟೆಸ್ಟ್ನಲ್ಲಿ ಕಾಮೆಂಟರಿ ನೀಡುವಾಗ ಗಾವಸ್ಕರ್ ಹೇಳಿದರು.

‘ರೂಟ್ ಅತ್ಯುತ್ತಮ ಬ್ಯಾಟ್ಸ್ಮನ್ ಎನ್ನುವುದರಲ್ಲಿ ಎರಡು ಮಾತಿಲ್ಲ. ಆದರೆ ಅವರೀಗ ವಿಶ್ವದ ಶ್ರೇಷ್ಠ ಬ್ಯಾಟ್ಸ್ಮನ್ ಅಂತ ನಾನು ಖಂಡಿತವಾಗಿಯೂ ಭಾವಿಸುವುದಿಲ್ಲ. ಆ ಪಟ್ಟಕ್ಕೆ ನಾಲ್ವರು ದಾವೆದಾರರಿದ್ದಾರೆ, ಅವರಲ್ಲಿ ರೂಟ್ ಕೂಡ ಒಬ್ಬರು. ಆದರೆ, ಉಳಿದ ಮೂವರಿಗಿಂತ ಅವರು ಒಂದಷ್ಟು ಕಡಿಮೆ ಎಂದೇ ನಾನು ಭಾವಿಸುತ್ತೇನೆ,’ ಎಂದು ಸನ್ನಿ ಹೇಳಿದರು.

ಸುನಿಲ್ ಗಾವಸ್ಕರ್

ಚೆನೈನಲ್ಲಿ ರೂಟ್ ಪ್ರದರ್ಶಿದ ಬ್ಯಾಟಿಂಗ್ ಕಲೆಯನ್ನು ಅಪಾರವಾಗಿ ಪ್ರಶಂಸಿದ ಗಾವಸ್ಕರ್, ಅವರ ಡಬಲ್ ಶತಕ ಇಂಗ್ಲೆಂಡ್ನ ಗೆಲುವಿಗೆ ಅಡಿಪಾಯವಾಯಿತು ಎಂದರು. ಚೆಂಡಿನ ತಿರುವನ್ನು ಹೊಸಕಿ ಹಾಕುವಲ್ಲಿ ಅವರು ಪ್ರದರ್ಶಿದ ಪುಟ್ವರ್ಕ್ ನಂಬಲಸದಳವಾಗಿತ್ತು ಎಂದು ಸನ್ನಿ ಹೇಳಿದರು.

ಇದನ್ನೂ ಓದಿ: India vs England Test Series: ಎರಡನೇ ಟೆಸ್ಟ್ ಪಂದ್ಯವನ್ನೂ ಭಾರತ ಸೋತರೆ ಕೊಹ್ಲಿ ನಾಯಕತ್ವದಿಂದ ಕೆಳಗಿಳಿಯಲಿದ್ದಾರೆ: ಮಾಂಟಿ ಪನೆಸಾರ್

‘ರೂಟ್ ಚೆನೈನಲ್ಲಿ ಬಾರಿಸಿದ ಡಬಲ್ ಸೆಂಚುರಿಯ ಬಗ್ಗೆ ಮಾತಾಡುವುದಾದರೆ ಅವರಲ್ಲಿದ್ದ ಆತ್ಮವಿಶ್ವಾಸ ಮತ್ತು ಸಕಾರಾತ್ಮಕ ಧೋರಣೆ ಬಹಳ ಪ್ರಭಾವಕಾರಿಯಾಗಿತ್ತು. ತಾನೆದುರಿಸಿದ ಪ್ರಥಮ ಎಸೆತದಿಂದಲೇ ಅವರು ಆತ್ಮವಿಶ್ವಾಸದ ಮೂಟೆಯಾಗಿದ್ದರು. ಸ್ಪಿನ್ನರ್ಗಳನ್ನು ಎದುರಿಸಿ ಅಡುವಾಗ ಅವರ ಫುಟ್ವರ್ಕ್ ಅಪ್ರತಿಮವಾಗಿತ್ತು. ಫ್ರಂಟ್ಫುಟ್ನಲ್ಲಾಡುವಾಗ ಅವರು ಚೆಂಡಿನ ತಿರುವನ್ನು ಹೊಸಕಿ ಹಾಕಿದರು ಮತ್ತು ಹಿಂದೆ ಸರಿದು ಆಡುವಾಗ ಎಸೆತವನ್ನು ಕಟ್ ಮಾಡಲು ಇಲ್ಲವೇ ಪುಲ್ ಮಾಡಲು ಅವರಲ್ಲಿ ಸಾಕಷ್ಟು ಸಮಯವಿತ್ತು. ಇದು ಖಂಡಿತವಾಗಿಯೂ ವಿಶ್ವದರ್ಜೆಯ ಬ್ಯಾಟ್ಸ್ಮನೊಬ್ಬನ ಲಕ್ಷಣ,’ ಎಂದು ಗಾವಸ್ಕರ್ ಹೇಳಿದರು.

ವಿಕೆಟ್ ಪತನವನ್ನು ಸಂಭ್ರಮಿಸುತ್ತಿರುವ ಇಂಗ್ಲಿಷ್ ಆಟಗಾರರು

ಉಪಖಂಡದ ಪಿಚ್ಗಳಲ್ಲಿ ಆಡುವಾಗ ಸ್ವೀಪ್ ಶಾಟ್ ಮುನ್ನೆಲೆಗೆ ಬರುತ್ತದೆ. ಈ ಹೊಡೆತದಿಂದಲೇ ಬ್ಯಾಟ್ಸ್ಮನ್ಗಳು ಬಹಳಷ್ಟು ರನ್ ಶೇಖರಿಸುತ್ತಾರೆ. ರೂಟ್ ಈ ಹೊಡೆತವನ್ನು ಪರಿಪೂರ್ಣತೆಯಿಂದಆಡಿದರು ಅಂತ ಗಾವಸ್ಕರ್ ಹೇಳಿದರು.

‘ಬಾರತೀಯ ಸ್ಪಿನ್ನರ್ಗಲ ವಿರುದ್ಧ ರೂಟ್ ಸ್ವೀಪ್ ಶಾಟ್ ಅನ್ನು ಬಹಳ ಲೆಕ್ಕಾಚಾರದಿಂದ ಆಡಿದರು. ಯಾವ ಎಸೆತವನ್ನು ಈ ಹೊಡೆತಕ್ಕೆ ಆರಿಸಿಕೊಳ್ಳಬೇಕು ಎನ್ನುವ ಬಗ್ಗೆ ಅವರ ಮನಸ್ಸಿನಲ್ಲಿ ಸ್ಪಷ್ಟತೆಯಿತ್ತೇ ವಿನಃ ಗೊಂದಲವಿರಲಿಲ್ಲ. ಅವರ ಲೆಕ್ಕಾಚಾರ ಅತ್ಯಂತ ಸಮಂಜಸವಾಗಿತ್ತು. ಹಾಗಾಗೇ ಅವರು ಉಪಖಂಡದಲ್ಲಿ ಆಡಿದ ಮೂರು ಟೆಸ್ಟ್ಗಳಲ್ಲಿ ಶತಕಗಳನ್ನು ಬಾರಿಸಿದ್ದಾರೆ,’ ಎಂದು ಗಾವಸ್ಕರ್ ಹೇಳಿದರು.

Published On - 5:05 pm, Thu, 11 February 21

LIVETV

ಅರುಣ್ ಕುಮಾರ್ ಬೆಳ್ಳಿ

ಹುಟ್ಟೂರು ಯಾದಗಿರಿ ಜಿಲ್ಲೆಯ ಗುರುಮಠಕಲ್. ಓದಿದ್ದು ಬಿಎಸ್ಸಿಯಾದರೂ ಮೆಡಿಕಲ್ ರಿಪ್ರಸೆಂಟೇಟಿವ್ ಆಗಿ ಕೆಲಸ ಮಾಡಿಕೊಂಡಿದ್ದ ನನ್ನನ್ನು ಖ್ಯಾತ ಪತ್ರಕರ್ತ ದಿವಂಗತ ರವಿ ಬೆಳಗೆರೆಯವರು ಪತ್ರಿಕೋದ್ಯಮಕ್ಕೆ ಎಳೆತಂದರು. ಮೊದಲು ಅವರ ಓ ಮನಸೇ ಪಾಕ್ಷಿಕದಲ್ಲಿ ಉಪ ಸಂಪಾದಕನಾಗಿ ಕೆಲಸ ಮಾಡಿದ ಬಳಿಕ ಲಂಕೇಶ್ ಪತ್ರಿಕೆ (ಸಹಾಯಕ ಸಂಪಾದಕ), ದುನಿಯಾ (ಕಾರ್ಯನಿರ್ವಾಹಕ ಸಂಪಾದಕ) ಮತ್ತು ಕ್ರಿಕೆಟ್ ಪಾಕ್ಷಿಕ ಪತ್ರಿಕೆಯ ಸಂಪಾದಕನಾಗಿ ಕೆಲಸ ಮಾಡಿದೆ. 2012 ರಲ್ಲಿ ಟಿವಿ9 ಸಂಸ್ಥೆಯ ಇಂಗ್ಲಿಷ್ ಚ್ಯಾನೆಲ್ ನಲ್ಲಿ ಸಹಾಯಕ ಸಂಪಾದಕನಾಗಿ ಸೇರಿ 8 ವರ್ಷ ದುಡಿದ ಬಳಿಕ 2020 ರಿಂದ ಟಿವಿ9 ಕನ್ನಡ ಡಿಜಿಟಲ್ ಗೆ ಹಿರಿಯ ಉಪ ಸಂಪಾದಕನಾಗಿ (ವಿಡಿಯೋ ಸುದ್ದಿ ವಿಭಾಗ) ಕಾರ್ಯನಿರ್ವಹಿಸುತ್ತಿರುವೆ.