Manish Pandey IPL 2021 SRH Team Player: ಐಪಿಎಲ್ನಲ್ಲಿ ಭಾರತದ ಪರ ಮೊಟ್ಟಮೊದಲ ಶತಕ ಬಾರಿಸಿದ ಮನೀಷ್ ಪಾಂಡೆ ಮೇಲೆ ಎಸ್ಆರ್ಹೆಚ್ಗೆ ಅಪಾರ ವಿಶ್ವಾಸ!
ಒಂದು ದಿನ ಪಂದ್ಯಗಳಿಗೆ ಪಾಂಡೆಯನ್ನು 2015 ರಲ್ಲಿ ರಾಷ್ಟ್ರೀಯ ತಂಡಕ್ಕೆ ಆಯ್ಕೆ ಮಾಡಲಾಗಿತ್ತು. ಮರು ವರ್ಷ ಆಸ್ಟ್ರೇಲಿಯಾದಲ್ಲಿ ನಡೆದ ಸಿಬಿ ಒಂದು ದಿನದ ಪಂದ್ಯಗಳ ಸರಣಿಯಲ್ಲಿ ಅವರು ಶತಕ ಬಾರಿಸಿ ಬಾರತಕ್ಕೆ ಗೆಲುವು ದೊರಕಿಸಿದ್ದರು.
Updated on: Apr 11, 2021 | 2:47 PM
ಇಂಡಿಯನ್ ಪ್ರಿಮೀಯರ್ ಲೀಗ್ನಲ್ಲಿ ಭಾರತೀಯ ಆಟಗಾರರ ಪೈಕಿ ಮೊಟ್ಟ ಮೊದಲ ಶತಕ ಬಾರಿಸಿದ್ದು ಯಾರು ಅಂತ ನಿಮಗೆ ಗೊತ್ತಿರಬಹುದು. ಕನ್ನಡಿಗನೊಬ್ಬ ಮಾಡಿರುವ ಸಾಧನೆ ಅದು ಹಾಗೂ ಮತ್ತಷ್ಟು ಸ್ವಾರಸ್ಯಕರ ಅಂಶವೆಂದರೆ ಆ ಆಟಗಾರನ ಸಾಧನೆ ಕನ್ನಡದ ತಂಡ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಪರವಾಗಿ ಆಡುವಾಗ ಬಂದಿದ್ದು. ಹೌದು ನಿಮ್ಮ ಊಹೆ ಸರಿ, 2009ರ ಐಪಿಎಲ್ ಸೀಸನ್ನಲ್ಲಿ ಆರ್ಸಿಬಿ ಪರ ಆಡಿದ ಕರ್ನಾಟಕದ ಮನೀಷ್ ಪಾಂಡೆ ಡೆಕ್ಕನ್ ಚಾರ್ಜರ್ಸ್ ವಿರುದ್ಧ ಆಡಿದ ಪಂದ್ಯದಲ್ಲಿ ಶತಕ ಬಾರಿಸಿದರು. ಅತ್ಯಂತ ಪ್ರತಿಭಾನ್ವಿತ ಬ್ಯಾಟ್ಸ್ಮನ್ ಪಾಂಡೆ ಇಂಡಿಯನ್ ಪ್ರೀಮಿಯರ್ ಲೀಗ್ ಶುರುವಾದಾಗಿನಿಂದ ಬೇರೆ ಬೇರೆ ತಂಡಗಳಿಗೆ ಆಡುತ್ತಿದ್ದಾರೆ. ಮೊದಲ ಮೂರು ಸೀಸನ್ಗಳಿಗೆ ಅವರು ಆರ್ಸಿಬಿ ಪರ ಆಡಿದರು. 2011ರಲ್ಲಿ ಪಾಂಡೆಯನ್ನು ಪುಣೆ ವಾರಿಯರ್ಸ್ ತಂಡ ಖರೀದಿಸಿತು. ಆ ತಂಡಕ್ಕೆ ಎರಡು ಸೀಸನ್ ಆಡಿದ ಬಳಿಕ 2014ರಲ್ಲಿ ನಡೆದ ಹರಾಜಿನಲ್ಲಿ ಪಾಂಡೆಯನ್ನು ಕೊಲ್ಕತ್ತಾ ನೈಟ್ ರೈಡರ್ಸ್ ತಂಡ ಖರೀದಿಸಿತು. ಆ ತಂಡಕ್ಕೆ ನಾಲ್ಕು ಸೀಸನ್ ಆಡಿದ ನಂತರ 2018ರಲ್ಲಿ ಅವರನ್ನು ಸನ್ರೈಸರ್ಸ್ ಹೈದರಾಬಾದ್ ತಂಡ ರೂ.11 ಕೋಟಿಗಳ ಭಾರಿ ಮೊತ್ತಕ್ಕೆ ಖರೀದಿಸಿತು. ಆ ಸಾಲಿನ ಅತ್ಯಂತ ದುಬಾರಿ ಖರೀದಿ ಆದಾಗಿತ್ತು.
ಇತ್ತೀಚಿಗೆ ಐಪಿಎಲ್ 2021 ಸೀಸನ್ ಬಗ್ಗೆ ಟಿವಿ9 ನಡೆಸಿದ ಚರ್ಚೆಯಲ್ಲಿ ಭಾಗವಹಿಸಿದ್ದ ಖ್ಯಾತ ಪತ್ರಕರ್ತ ಜೋಸೆಫ್ ಹೂವರ್ ಅವರು ಮನೀಷ್ ಪಾಂಡೆ ಅಪಾರ ಪ್ರತಿಭಾವಂತನಾಗಿದ್ದರೂ ಬಿಸಿಸಿಐ ಅದನ್ನು ಗುರುತಿಸಲಿಲ್ಲ, ಒಂದೆರಡು ಪಂದ್ಯಗಳಲ್ಲಿ ವಿಫಲರಾದ ತಕ್ಷಣ ಅವರನ್ನು ತಂಡದಿಂದ ಕೈಬಿಡಲಾಗುತ್ತದೆ, ಅದು ಅವರ ಆತ್ಮವಿಶ್ವಾಸದ ಮೇಲೆ ಪರಿಣಾಮವನ್ನುಂಟು ಮಾಡುತ್ತಿದೆ ಎಂದು ಹೇಳಿದ್ದರು.
ಒಂದು ದಿನ ಪಂದ್ಯಗಳಿಗೆ ಪಾಂಡೆಯನ್ನು 2015 ರಲ್ಲಿ ರಾಷ್ಟ್ರೀಯ ತಂಡಕ್ಕೆ ಆಯ್ಕೆ ಮಾಡಲಾಗಿತ್ತು. ಮರು ವರ್ಷ ಆಸ್ಟ್ರೇಲಿಯಾದಲ್ಲಿ ನಡೆದ ಸಿಬಿ ಒಂದು ದಿನದ ಪಂದ್ಯಗಳ ಸರಣಿಯಲ್ಲಿ ಅವರು ಶತಕ ಬಾರಿಸಿ ಬಾರತಕ್ಕೆ ಗೆಲುವು ದೊರಕಿಸಿದ್ದರು. ಬ್ಯಾಟಿಂಗ್ನಲ್ಲಿ ತೋರಿದ ಪ್ರಭುದ್ಧತೆಯೇ ಹೈದರಾಬಾದ್ ತಂಡ ಅವರನ್ನು ಭಾರಿ ಮೊತ್ತ ತೆತ್ತು ಖರೀದಿಸುವಂತೆ ಪ್ರೇರೇಪಿಸಿತು. ಅಷ್ಟೇ ಅಲ್ಲ 2019ರ ಸೀಸನ್ಗೆ ಅವರನ್ನು ರಿಟೇನ್ ಮಾಡಿಕೊಳ್ಳುವ ಮೂಲಕ ಅವರ ಮೇಲೆ ತಾನಿಟ್ಟಿರುವ ವಿಶ್ವಾಸವನ್ನು ಸ್ಪಷ್ಟಪಡಿಸಿತು. ಆ ಸೀಸನ್ನಲ್ಲಿ 12 ಪಂದ್ಯಗಳನ್ನಾಡಿದ ಪಾಂಡೆ 344 ರನ್ ಕಲೆ ಹಾಕಿದರು.
ಮನೀಶ್ ಪಾಂಡೆ
ಪಾಂಡೆ ಅವರನ್ನು ಬಿಸಿಸಿಐ ಸಂಪೂರ್ಣವಾಗಿ ಕಡೆಗಣಸಿದೆ ಅಂತೇನೂ ಇಲ್ಲ. ಐಪಿಎಲ್ 2020 ಸೀಸನಲ್ಲಿ ಅವರು 16 ಪಂದ್ಯಗಳಿಂದ 425 ಬಾರಿಸಿದಾಗ ಆಸ್ಟ್ರೇಲಿಯಾ ಪ್ರವಾಸಕ್ಕೆ ಟಿ20 ಪಂದ್ಯಗಳ ಸರಣಿಗೆ ಆಯ್ಕೆ ಮಾಡಲಾಯಿತು. ಮೊದಲ ಪಂದ್ಯದಲ್ಲಿ ಪಾಂಡೆ ಸಂಜು ಸ್ಯಾಮ್ಸನ್ ನಂತರ ಬ್ಯಾಟಿಂಗ್ ಮಾಡಲು ಬಂದರು. 8 ಎಸೆತಗಳನ್ನಾಡಿ ಅವರು ಗಳಿಸಿದ್ದು 2ರನ್ ಮಾತ್ರ. ದುರದೃಷ್ಟದ ಸಂಗತಿಯೆಂದರೆ, ಮುಂದಿನ ಪಂದ್ಯಕ್ಕೆ ಅವರನ್ನು ಡ್ರಾಪ್ ಮಾಡಲಾಯಿತು. ಹೂವರ್ ಹೇಳಿದ್ದು ಅದೇ, ಪಾಂಡೆಗೆ ಫೇರ್ ರನ್ ನೀಡದೆ, ತಂಡದಿಂದ ಕೈಬಿಡಲಾಗುತ್ತಿದೆ.
ಇಲ್ಲಿ ಗಮನಿಸಬೇಕಾದ ಸಂಗತಿಯೆಂದರೆ, ಹೈದರಾಬಾದ ತಂಡಕ್ಕೆ ಆಡುವಾಗ ತೋರುವ ಪ್ರದರ್ಶನಗಳಿಗಿಂತಲೂ ಅವರು ಭಾರತಕ್ಕೆ ಆಡುವಾಗಿನ ಪ್ರದರ್ಶನಗಳು ಚೆನ್ನಾಗಿರುತ್ತವೆ. ಕ್ರಿಕೆಟ್ ಪರಿಣಿತರ ಪ್ರಕಾರ, 31 ವರ್ಷ ವಯಸ್ಸಿನ ಪಾಂಡೆ ಹೈದರಾಬಾದ್ ತಂಡದಲ್ಲಿ ಸೀನಿಯರ್ ಆಗಿರುವುದರಿಂದ ಒತ್ತಡದಲ್ಲಿ ಆಡುತ್ತಾರೆ, ಆದರೆ ಟೀಮ್ ಇಂಡಿಯಾದಲ್ಲಿ ಅವರು ಸೀನಿಯರ್ ಅಲ್ಲ, ಆ ಹಿನ್ನೆಲೆಯಲ್ಲಿ ಅವರ ಮೇಲೆ ಒತ್ತಡ ಇರೋದಿಲ್ಲ. ಹಾಗಾಗಿ ರಾಷ್ಟ್ರೀಯ ತಂಡಕ್ಕೆ ಆಡುವಾಗ ಅವರ ಪ್ರದರ್ಶನಗಳು ಉತ್ತಮವಾಗಿರುತ್ತವೆ.
ರಾಷ್ಟ್ರೀಯ ತಂಡಕ್ಕೆ ಮರಳಬೇಕಾದರೆ ಮತ್ತು ಅಕ್ಟೋಬರ್-ನವೆಂಬರ್ನಲ್ಲಿ ನಡೆಯುವ ಟಿ20 ವಿಶ್ವಕಪ್ನಲ್ಲಿ ಟೀಮ್ ಇಂಡಿಯಾದ ಭಾಗವಾಗಬೇಕಾದರೆ, ಪಾಂಡೆ ಐಪಿಎಲ್ನಲ್ಲಿ ಸತತವಾಗಿ ಉತ್ತಮ ಪ್ರದರ್ಶನಗಳನ್ನು ನೀಡಲೇಬೇಕು. ಯಾಕೆಂದರೆ ಟೀಮ್ ಇಂಡಿಯಾದಲ್ಲಿ ಸ್ಥಾನ ಗಿಟ್ಟಿಸಲು ಸ್ಪರ್ಧೆ ಹೆಚ್ಚಾಗುತ್ತಿದೆ. ಸೂರ್ಯಕುಮಾರ ಯಾದವ್, ಇಶಾನ್ ಕಿಷನ್, ಸಂಜು ಸ್ಯಾಮ್ಸನ್ ಮೊದಲಾದವರೆಲ್ಲ ಮಧ್ಯಮ ಕ್ರಮಾಂಕದ ಸ್ಲಾಟ್ಗಾಗಿ ಕಾಯುತ್ತಿದ್ದಾರೆ. ಯಾದವ್ ಮತ್ತು ಕಿಷನ್ ತಮಗೆ ದೊರೆತ ಅವಕಾಶಗಳಲ್ಲಿ ಮಿಂಚಿದ್ದಾರೆ.
ಪಾಂಡೆ ಭಾರತದ ಅತ್ಯುತ್ತಮ ಫೀಲ್ಡರ್ಗಳಲ್ಲಿ ಒಬ್ಬರು ಎನ್ನುವುದು ನಿರ್ವಿವಾದಿತ. ಆದರೆ, ಟೀಮಿಗೆ ಆಯ್ಕೆಯಾಗುತ್ತಿರುವ ಯುವ ಆಟಗಾರರು ಸಹ ಉತ್ತಮ ಫೀಲ್ಡರ್ಗಳಾಗಿದ್ದಾರೆ. ಹಾಗಾಗಿ, ಪಾಂಡೆ ಬ್ಯಾಟಿಂಗ್ ಮಾತ್ರವಲ್ಲದೆ ಫೀಲ್ಡಿಂಗ್ನಲ್ಲೂ ಪಾರಮ್ಯ ಮೆರೆಯಬೇಕು.
ಐಪಿಎಲ್ನಲ್ಲಿ ಇದುವರೆಗೆ 146 ಪಂದ್ಯಗಳನ್ನಾಡಿರುವ ಪಾಂಡೆ 29.71 ಸರಾಸರಿ ಮತ್ತು 121.6 ಸ್ಟ್ರೈಕ್ರೇಟ್ನೊಂದಿಗೆ 3,268 ರನ್ ಗಳಿಸಿದ್ದಾರೆ. ಒಂದು ಶತಕ ಮತ್ತು 18 ಅರ್ಧ ಶತಕಗಳು ಅವರ ಬ್ಯಾಟ್ನಿಂದ ಸಿಡಿದಿವೆ. ಹೈದರಾಬಾದ ತಂಡಕ್ಕೆ ಈಗಲೂ ಅವರ ಮೇಲೆ ಆಷ್ಟೇ ವಿಶ್ವಾಸವಿದೆ. ಅದನ್ನು ಉಳಿಸಿಕೊಂಡು ಪಾಂಡೆ ಟನ್ಗಟ್ಟಲೆ ರನ್ ಗಳಿಸಬೇಕಿದೆ.
ಇದನ್ನೂ ಓದಿ: IPL 2021: ಐಪಿಎಲ್ 14ನೇ ಆವೃತ್ತಿಯ ಕೆಲವು ಪಂದ್ಯಗಳಿಗೆ ಅಲಭ್ಯರಾಗಲಿರುವ ಆಟಗಾರರು ಇವರೇ!
