ಐಪಿಎಲ್​ನಲ್ಲಿ ರಾಜಸ್ತಾನ ರಾಯಲ್ಸ್ ಆಟಗಾರರ ಮೇಲೆ TV9 ಭಾರತ​ವರ್ಷ್ ಜೆರ್ಸಿ!

ಸೆಪ್ಟಂಬರ್ 19ರಿಂದ ನವೆಂಬರ್10ವರೆಗೆ ಯುನೈಟೆಡ್ ಅರಬ್ ಎಮಿರೇಟ್ಸ್​ನಲ್ಲಿ ನಡೆಯಲಿರುವ ಇಂಡಿಯನ್ ಪ್ರೀಮಿಯರ್ ಲೀಗ್​ನ 13ನೇ ಆವೃತಿಯಲ್ಲಿ ಭಾಗವಹಿಸುವ ರಾಜಸ್ತಾನ ರಾಯಲ್ಸ್ ತಂಡಕ್ಕೆ TV9 ಭಾರತ​ವರ್ಷ್ ಪ್ರಮುಖ ಪಾಲುದಾರನಾಗಿರುತ್ತದೆ. ರಾಯಲ್ಸ್ ಫ್ರಾಂಚೈಸಿಯ ಆಟಗಾರರು TV9 ಲೊಗೊ ಮುಂಭಾಗದಲ್ಲಿರುವ ಜೆರ್ಸಿಯನ್ನು ಅತ್ಯಂತ ಹೆಮ್ಮೆಯಿಂದ ಧರಿಸಲಿದ್ದಾರೆಂದು ತಂಡದ ಆಡಳಿತ ವರ್ಗ ಪ್ರಕಟಿಸಿದೆ.

ರಾಜಸ್ತಾನ ರಾಯಲ್ಸ್ ಆಟಗಾರರು ಧರಿಸುವ ಜೆರ್ಸಿಯ ಮುಂಭಾಗದಲ್ಲಿರಬೇಕಿದ್ದ EXPO 2020 Dubai ಬ್ರ್ಯಾಂಡನ್ನು TV9 ಭಾರತ​ವರ್ಷ್ ಸ್ಥಾನಪಲ್ಲಟಗೊಳಿಸಿದೆ. ಕೊವಿಡ್ ಪಿಡುಗಿನಿಂದಾಗಿ ಈ ಬಾರಿಯ ಐಪಿಎಲ್-13 ಮಹಾ ಕ್ರಿಕೆಟ್ ಮೇಳ ಸೆಪ್ಟಂಬರ್​ವರೆಗೆ ಮುಂದೂಡಲ್ಪಟ್ಟಿದೆ.

TV9 ನೆಟ್​ವರ್ಕ್ ಮತ್ತು ರಾಜಸ್ತಾನ ರಾಯಲ್ಸ್ ಹೆಚ್ಚಿನದನ್ನು ಸಾಧಿಸುವ ಬಗ್ಗೆ ಹೆಮ್ಮೆಪಡುತ್ತಿವೆ, ಆದರೆ ಅದು ಈ ಎರಡೂ ಗುಂಪುಗಳು ತಮ್ಮ ತಮ್ಮ ವಹಿವಾಟಿನಲ್ಲಿ ಅವಿಷ್ಕಾರ ಮಾಡುವುದನ್ನು ಯೋಚಿಸಿದಾಗ ಮಾತ್ರ ಸಾಧ್ಯವಾಗುತ್ತದೆ. ರಾಯಲ್ಸ್ ತಂಡವು ಮುಂಬರುವ ಸೀಸನ್​ನಲ್ಲಿ ತನ್ನಲ್ಲಿರುವ ಅಪ್ರತಿಮ ಕ್ರಿಕೆಟ್ ಕಂಟೆಂಟನ್ನು TV9 ನ ವಿವಿಧ ಪ್ಲಾಟ್​ಫಾರ್ಮ್​ಗಳಲ್ಲಿ ಹಂಚಿಕೊಳ್ಳುವುದಕ್ಕೆ ಎದುರು ನೋಡುತ್ತಿದೆ, ಎಂದು ತಂಡದ ಪ್ರಕಟಣೆ ತಿಳಿಸಿದೆ.

ಈ ಸಹಭಾಗಿತ್ವದ ಬಗ್ಗೆ ಪ್ರತಿಕ್ರಿಯಿಸಿರುವ TV9 ನೆಟ್​ವರ್ಕ್​ನ ಸಿಈಒ, ಬರುನ್ ದಾಸ್, ‘‘ಭಾರತದಲ್ಲೀಗ ಕ್ರಿಕೆಟ್​ ಕೇವಲ ಕ್ರೀಡೆ ಮಾತ್ರವಾಗಿರದೆ, ಒಂದು ಧರ್ಮವಾಗಿ ಮಾರ್ಪಟ್ಟಿದೆ. ಈ ಹಿನ್ನೆಲೆಯಲ್ಲೇ ಭಾರತದ ಅತಿ ದೊಡ್ಡ ಸುದ್ದ್ದಿ ಜಾಲವಾಗಿರುವ TV9 ನೆಟ್​ವರ್ಕ್, ಮುಂಬರುವ ಇಂಡಿಯನ್ ಪ್ರೀಮಿಯರ್ ಲೀಗ್​ನಲ್ಲಿ ರಾಜಸ್ತಾನ ರಾಯಲ್ಸ್ ತಂಡದೊಂದಿಗೆ ಪಾಲುದಾರಿಕೆ ಹೊಂದಿದೆ.’’ ಎಂದು ಹೇಳಿದರು.

‘‘ನಮ್ಮ ರಾಷ್ಟ್ರೀಯ ಹಿಂದಿ ನ್ಯೂಸ್ ಚ್ಯಾನೆಲ್ TV9 ಭಾರತ​ವರ್ಷ್ ದೇಶದ ಚ್ಯಾನೆಲ್ ಎರಡನೇ ಅತಿ ಜನಪ್ರಿಯ ಚ್ಯಾನೆಲ್ ಎನಿಸಿಕೊಳ್ಳುವಲ್ಲಿ ತೋರಿರುವ ಅಸಾಧಾರಣ ಪ್ರಗತಿಯು, ವೀಕ್ಷಕರು ನೈಜ್ಯ ಸುದ್ದಿ ಮಾತ್ರವಲ್ಲದೆ ಸುದ್ದಿ ಒದಗಿಸುವ ವಿಧಾನದಲ್ಲೂ ಹೊಸ ಅವಿಷ್ಕಾರಗಳನ್ನು ಬಯಸುತ್ತಾರೆ ಎಂದು ನಿರೂಪಿಸುತ್ತದೆ, ಎಂದು ದಾಸ್ ಹೇಳಿದರು.