19 ರನ್ಗೆ 6 ವಿಕೆಟ್ ಕಳೆದುಕೊಂಡು ಹೀನಾಯವಾಗಿ ಸೋಲುಂಡ ಆಸ್ಟ್ರೇಲಿಯಾ: ವಿಂಡೀಸ್ಗೆ ರೋಚಕ ಜಯ: ವಿಡಿಯೋ

ಈ ಸಂದರ್ಭ ರೋಚಕತೆ ಪಡೆದ ಪಂದ್ಯವನ್ನು ಸಂಪೂರ್ಣ ವಿಂಡೀಸ್ ಪರ ವಾಲಿಸಿದ್ದುಒಬೆಡ್ ಮೆಖಾಯ್. 10.3 ಓವರ್ಗೆ 108 ರನ್ಗೆ 5 ವಿಕೆಟ್ ಕಳೆದುಕೊಂಡು ಸುಲಭ ಜಯ ಸಾಧಿಸಿಬಹುದಾಗಿದ್ದ ಆಸ್ಟ್ರೇಲಿಯಾಕ್ಕೆ ಸೋಲಿನ ಹಾದಿ ತೋರಿಸಿದ್ದು ಮೆಖಾಯ್.

WI vs Aus 1st T20I

TV9 Web | Edited By: Vinay Bhat|
Updated on: Jul 10, 2021 | 3:03 PM

ಕೆರಿಬಿಯನ್ ಪ್ರವಾಸ ಬೆಳೆಸಿರುವ ಆಸ್ಟ್ರೇಲಿಯಾ ಕ್ರಿಕೆಟ್ ತಂಡ ವೆಸ್ಟ್ ಇಂಡೀಸ್ ವಿರುದ್ಧ ಟಿ-20 ಸರಣಿ ಆಡುತ್ತಿದೆ. ಭಾರತದ ಕಾಲ ಮಾನದ ಪ್ರಕಾರ ಇಂದು ಮುಂಜಾನೆ ನಡೆದ ಮೊದಲ ಟಿ-20 ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ತಂಡ 18 ರನ್ಗಳ ರೋಚಕ ಜಯ ಸಾಧಿಸಿದೆ. ಒಂದುಹಂತದಲ್ಲಿ ಸುಲಭ ಜಯ ಸಾಧಿಸುವಲ್ಲಿದ್ದ ಕಾಂಗರೂ ಪಡೆ ಕೊನೆ ಕ್ಷಣದಲ್ಲಿ ಕೇವಲ 19 ರನ್ಗೆ ಉಳಿದ 6 ವಿಕೆಟ್ಗಳನ್ನು ಕಳೆದುಕೊಂಡು ಸೋಲಿಗೆ ಶರಣಾಯಿತು.

ಟಾಸ್ ಸೋತು ಬ್ಯಾಟಿಂಗ್ಗೆ ಇಳಿದ ವೆಸ್ಟ್ ಇಂಡೀಸ್ ಉತ್ತಮ ಆರಂಭ ಪಡೆದುಕೊಂಡಿಲ್ಲವಾದರೂ ಮಧ್ಯಮ ಕ್ರಮಾಂಕದಲ್ಲಿ ಚೇತರಿಕೆ ಕಂಡಿತು. ಓಪನರ್ಗಳಾದ ಎವಿನ್ ಲೆವಿಸ್ ಸೊನ್ನೆ ಸುತ್ತಿದರೆ ಲೆಂಡಲ್ ಸಿಮನ್ಸ್ 27 ರನ್ಗೆ ಔಟ್ ಆದರು. ಕ್ರಿಸ್ ಗೇಲ್ ಆಟ 4 ರನ್ಗೆ, ಶಿಮ್ರೋನ್ ಹೆಟ್ಮೇರ್ 20 ರನ್ಗೆ ನಿರ್ಗಮಿಸಿದರು. ನಿಕೋಲಸ್ ಪೂರನ್ ಕೂಡ 17 ರನ್ಗೆ ಸುಸ್ತಾದರು.

ಬಳಿಕ ಅಂತಿಮ ಹಂತದಲ್ಲಿ ಶುರುವಾಗಿದ್ದು ಆಂಡ್ರೊ ರಸೆಲ್ ಆರ್ಭಟ. ಆಸೀಸ್ ಬೌಲರ್ಗಳನ್ನು ಮನಬಂದಂತೆ ದಂಡಿಸಿದ ರಸೆಲ್ ಕೇವಲ 28 ಎಸೆತಗಳಲ್ಲಿ 3 ಬೌಂಡರಿ, 5 ಸಿಕ್ಸರ್ ಸಿಡಿಸಿ 51 ರನ್ ಚಚ್ಚಿ ಕೊನೆಯ ಓವರ್ನಲ್ಲಿ ಔಟ್ ಆದರು. ಪರಿಣಾಮ ವೆಸ್ಟ್ ಇಂಡೀಸ್ ನಿಗದಿತ 20 ಓವರ್ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 145 ರನ್ ಗಳಿಸಿತು. ಆಸೀಸ್ ಪರ ಜೋಷ್ ಹ್ಯಾಜ್ಲೆವುಡ್ 3 ವಿಕೆಟ್ ಪಡೆದರು.

146 ರನ್ಗಳ ಸಾಧಾರಣ ಮೊತ್ತ ಬೆನ್ನಟ್ಟಿದ ಆಸ್ಟ್ರೇಲಿಯಾ ಆರಂಭದಲ್ಲಿ ನಾಯಕ ಆ್ಯರೋನ್ ಫಿಂಚ್(4) ವಿಕೆಟ್ ಕಳೆದುಕೊಂಡಿತಾದರೂ 2ನೇ ವಿಕೆಟ್ಗೆ ಮ್ಯಾಥ್ಯೂ ವೇಡ್(33) ಮತ್ತು ಮಿಚೆಲ್ ಮಾರ್ಶ್ ಅತ್ಯುತ್ತಮ ಆಟ ಪ್ರದರ್ಶಿಸಿದರು. ಪವರ್ ಪ್ಲೇ ಓವರ್ ನಲ್ಲಿ ಬೌಂಡರಿ-ಸಿಕ್ಸರ್ಗಳ ಮಳೆ ಸುರಿಸಿದರು. ವೇಡ್ ನಿರ್ಗಮನದ ಬಳಿಕ ಬಂದ ಬ್ಯಾಟ್ಸ್ಮನ್ಗಳು ಅಷ್ಟೇನು ಪರಿಣಾಮಕಾರಿಯಾಗಿ ಗೋಚರಿಸಲಿಲ್ಲ. ಮಾರ್ಶ್ಗೆ ಸಾಥ್ ನೀಡಲಿಲ್ಲ.

ಜೋಷ್ ಫಿಲಿಪ್ 1, ಬೆನ್ ಮೆಕ್ಡೆರ್ಮಾಟ್ 2 ರನ್ಗೆ ಸುಸ್ತಾದರು. ಮಿಚೆಲ್ ಮಾರ್ಷ್ ಕೂಡ 31 ಎಸೆತಗಳಲ್ಲಿ 5 ಬೌಂಡರಿ, 2 ಸಿಕ್ಸರ್ ಬಾರಿಸಿ 51 ರನ್ಗೆ ಬ್ಯಾಟ್ ಕೆಳಗಿಟ್ಟರು. ಈ ಸಂದರ್ಭ ರೋಚಕತೆ ಪಡೆದ ಪಂದ್ಯವನ್ನು ಸಂಪೂರ್ಣ ವಿಂಡೀಸ್ ಪರ ವಾಲಿಸಿದ್ದುಒಬೆಡ್ ಮೆಖಾಯ್. 10.3 ಓವರ್ಗೆ 108 ರನ್ಗೆ 5 ವಿಕೆಟ್ ಕಳೆದುಕೊಂಡು ಸುಲಭ ಜಯ ಸಾಧಿಸಿಬಹುದಾಗಿದ್ದ ಆಸ್ಟ್ರೇಲಿಯಾಕ್ಕೆ ಸೋಲಿನ ಹಾದಿ ತೋರಿಸಿದ್ದು ಮೆಖಾಯ್.

ಕೇವಲ 15.6 ಓವರ್ಗೆ 127 ರನ್ ಗಳಿಸಿ ಆಸ್ಟ್ರೇಲಿಯಾವನ್ನು ಆಲೌಟ್ ಮಾಡುವಲ್ಲಿ ಮೆಖಾಯ್ ಪ್ರಮುಖ ಪಾತ್ರವಹಿಸಿದರು. 4 ಓವರ್ ಬೌಲಿಂಗ್ ಮಾಡಿದ ಇವರು 26 ರನ್ ನೀಡಿ 4 ವಿಕೆಟ್ ಕಿತ್ತರು. 18 ರನ್ಗಳ ಗೆಲುವಿನೊಂದಿಗೆ ವೆಸ್ಟ್ ಇಂಡೀಸ್ 5 ಪಂದ್ಯಗಳ ಟಿ-20 ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿದೆ. ಎರಡನೇ ಟಿ-20 ಜುಲೈ 10ಕ್ಕೆ ಅಂದರೆ ಭಾರತದ ಕಾಲಮಾನದ ಪ್ರಕಾರ ಜುಲೈ 11 ಮುಂಜಾನೆ 5 ಗಂಟೆಗೆ ಆರಂಭವಾಗಲಿದೆ.