Free Wi-fi: ಬಿಟ್ಟಿ ಸಿಕ್ಕಿತೆಂದು ಉಚಿತ ವೈಫೈ ಬಳಸುವ ಮುನ್ನ ಎಚ್ಚರ! ಏನೆಲ್ಲ ಅಪಾಯ ಇದೆ ನೋಡಿ

(ಬೆಂಗಳೂರು, ಮಾ 04): ನಾವು ಸ್ಮಾರ್ಟ್​ಫೋನ್ (Smartphone) ಉಪಯೋಗಿಸುವಾಗ ಅದರಲ್ಲಿನ ಹಲವು ಕೆಲಸಗಳಿಗೆ ಇಂಟರ್ನೆಟ್ ಬೇಕಾಗುತ್ತವೆ. ಇಂಟರ್ನೆಟ್ ಇಲ್ಲದಿದ್ದರೆ ಕೆಲವು ಸಿಕ್ಕ-ಸಿಕ್ಕಲ್ಲಿ ಸಾರ್ವಜನಿಕ ಸ್ಥಳಗಳಲ್ಲಿ ಲಭ್ಯವಿರುವ ಉಚಿತ ವೈ-ಫೈ ಅನ್ನು ಬಳಸುತ್ತಾರೆ. ಹೀಗೆ ಉಚಿತ ವೈ-ಫೈ ಬಳಸುವುದು ಸುರಕ್ಷಿತವೇ?. ಯಾವುದೇ ದೊಡ್ಡ ಮಾಲ್, ಶಾಪಿಂಗ್ ಕಾಂಪ್ಲೆಕ್ಸ್, ರೈಲ್ವೆ ನಿಲ್ದಾಣ, ವಿಮಾನ ನಿಲ್ದಾಣ, ಹೋಟೆಲ್ ಇತ್ಯಾದಿಗಳಿಗೆ ಹೋದಾಗಲೆಲ್ಲಾ ಅಲ್ಲಿ ಉಚಿತ ವೈ-ಫೈ ಸಿಗುತ್ತದೆ. ಈ ಸ್ಥಳಗಳಲ್ಲಿ ನಿಮ್ಮ ಸ್ಮಾರ್ಟ್‌ಫೋನ್, ಲ್ಯಾಪ್‌ಟಾಪ್ ಇತ್ಯಾದಿಗಳನ್ನು ವೈ-ಫೈಗೆ ಸಂಪರ್ಕಿಸುವ ಮೂಲಕ ನೀವು ಇಂಟರ್ನೆಟ್ ಅನ್ನು ಬಳಸುತ್ತೀರಿ. ಈ ರೀತಿಯ ವೈ-ಫೈ ವಲಯವನ್ನು ಸಾರ್ವಜನಿಕ ವೈ-ಫೈ ಎಂದು ಕರೆಯಲಾಗುತ್ತದೆ. ನೀವು ಅಂತಹ ಉಚಿತ ವೈ-ಫೈ ಬಳಸಬಹುದೇ ಅಥವಾ ಬೇಡವೇ?, ಇದು ಸುರಕ್ಷಿತವೇ?.

ಹಲವು ಬಾರಿ ನಾವು ರೈಲ್ವೆ ನಿಲ್ದಾಣದಲ್ಲಿ ರೈಲಿಗಾಗಿ ಕಾಯುತ್ತಿರುವಾಗ ಅಥವಾ ಬಸ್ ನಿಲ್ದಾಣದಲ್ಲಿ ಬಸ್​ಗಾಗಿ ಕಾಯುತ್ತಿರುವಾಗ ಅನೇಕ ಸಮಯವಿರುತ್ತದೆ. ಆಗ ನಮ್ಮ ಮೊಬೈಲ್‌ನಲ್ಲಿ ಇಂಟರ್ನೆಟ್ ಮೂಲಕ ಅನೇಕ ಕೆಲಸಗಳನ್ನು ಮಾಡಲು ನಾವು ಬಯಸುತ್ತೇವೆ. ಆದರೆ ಇಂಟರ್ನೆಟ್ ಇಲ್ಲದಿದ್ದರೆ, ಸಾರ್ವಜನಿಕ ಸ್ಥಳಗಳಲ್ಲಿ ಲಭ್ಯವಿರುವ ಉಚಿತ ವೈ-ಫೈ ಅನ್ನು ಬಳಸುತ್ತೇವೆ. ಹೀಗೆ ಉಚಿತ ವೈ-ಫೈ ಬಳಸುವ ಮುನ್ನ ಎಚ್ಚರ ವಹಿಸುವುದು ಬಹಳ ಮುಖ್ಯ.

ಡೇಟಾ ಹ್ಯಾಕ್: ಸಾರ್ವಜನಿಕ ವೈ- ಫೈನಲ್ಲಿ ಇಂಟರ್ನೆಟ್ ಬಳಸುವಾಗ, ನಿಮ್ಮ ವೈಯಕ್ತಿಕ ಡೇಟಾವನ್ನು ಹ್ಯಾಕ್ ಮಾಡಬಹುದು ಮತ್ತು ಈ ಸಂದರ್ಭ ನೀವು ವಂಚನೆಗೆ ಬಲಿಯಾಗಬಹುದು. ಅನೇಕ ಭದ್ರತಾ ಸಂಶೋಧನಾ ಸಂಸ್ಥೆಗಳು ಇಂತಹ ಸಾರ್ವಜನಿಕ ವೈ- ಫೈ ವಲಯಗಳನ್ನು ಅಸುರಕ್ಷಿತವೆಂದು ಪರಿಗಣಿಸಿವೆ. ಅಂತಹ ಸಾರ್ವಜನಿಕ ವೈ- ಫೈ ವಲಯಗಳಲ್ಲಿ ಬಳಕೆದಾರರು ಆನ್‌ಲೈನ್ ಬ್ಯಾಂಕಿಂಗ್ ಸೇವೆಗಳು, ವೈಯಕ್ತಿಕ ಇ- ಮೇಲ್ ಇತ್ಯಾದಿಗಳನ್ನು ಬಳಸಬಾರದು.

Tech Tips: ನಿಮ್ಮ ವಾಟ್ಸ್ಆ್ಯಪ್ ಅನ್ನು ಬೇರೆ ಯಾರಾದರೂ ಬಳಸುತ್ತಿದ್ದಾರೆಯೇ?: ಹೀಗೆ ತಿಳಿದುಕೊಳ್ಳಿ

ಫೋನ್​ನ ವೈಯಕ್ತಿಕ ಮಾಹಿತಿ ಸೋರಿಕೆ: ಯಾವುದೇ ಸಾರ್ವಜನಿಕ ವೈ- ಫೈ ವಲಯವನ್ನು ಸುರಕ್ಷಿತವೆಂದು ಪರಿಗಣಿಸಲಾಗುವುದಿಲ್ಲ, ಏಕೆಂದರೆ ಅಂತಹ ಉಚಿತ ವೈ- ಫೈ ಮೂಲಕ ಯಾರು ಬೇಕಾದರು ಪ್ರವೇಶಿಸಬಹುದಾಗಿದೆ. ಸಾರ್ವಜನಿಕ ವೈ- ಫೈ ಮೂಲಕ ಹ್ಯಾಕರ್‌ಗಳು ಮತ್ತು ಸೈಬರ್ ಅಪರಾಧಿಗಳು ಯಾರೊಬ್ಬರ ಸಾಧನವನ್ನು ಪ್ರವೇಶಿಸುವುದು ತುಂಬಾ ಸುಲಭ. ಆದ್ದರಿಂದ ನಿಮ್ಮ ಮೀಡಿಯಾ ಫೈಲ್‌ಗಳು, ಬ್ಯಾಂಕ್ ಖಾತೆ ವಿವರಗಳು, ಇಮೇಲ್ ವಿಳಾಸಗಳು ಮತ್ತು ಸಾಮಾಜಿಕ ಮಾಧ್ಯಮ ಐಡಿಗಳನ್ನು ಕದಿಯಬಹುದು.

ಗೌಪ್ಯತಾ ಸಮಸ್ಯೆಗಳು: ಹ್ಯಾಕರ್‌ಗಳು ನಿಮ್ಮ ಆನ್‌ಲೈನ್ ಚಟುವಟಿಕೆಯನ್ನು ಟ್ರ್ಯಾಕ್ ಮಾಡಬಹುದು ಮತ್ತು ನಿಮ್ಮನ್ನೂ ಸಹ ಟ್ರ್ಯಾಕ್ ಮಾಡುವ ಸಂಭವವಿದೆ.

ಮಾಲ್‌ವೇರ್: ಸೈಬರ್ ಅಪರಾಧಿಗಳು ನಿಮ್ಮ ಸಾಧನಕ್ಕೆ ವೈರಸ್‌ಗಳನ್ನು ಕಳುಹಿಸಲು ಈ ಸಾರ್ವಜನಿಕ ವೈ- ಫೈ ಅನ್ನು ಸಹ ಬಳಸಬಹುದು. ಇದು ಅವರಿಗಿರುವ ಸುಲಭ ಮಾರ್ಗವಾಗಿದೆ. ಅಂತಹ ಪರಿಸ್ಥಿತಿಯಲ್ಲಿ, ಸಾರ್ವಜನಿಕ ವೈ- ಫೈ ಬಳಸುವಾಗ ನಾವು ಸಾಕಷ್ಟು ಮುನ್ನೆಚ್ಚರಿಕೆಗಳನ್ನು ತೆಗೆದುಕೊಳ್ಳಬೇಕಾಗುತ್ತದೆ. ನಮ್ಮ ಒಂದು ಸಣ್ಣ ತಪ್ಪು ದೊಡ್ಡ ಹಾನಿಯನ್ನುಂಟುಮಾಡಬಹುದು.

ಆದಾಗ್ಯೂ, ತುರ್ತು ಪರಿಸ್ಥಿತಿಯಲ್ಲಿ ನಿಮಗೆ ಇಂಟರ್ನೆನೆಟ್ ಅಗತ್ಯವಿದ್ದರೆ, ಸಾರ್ವಜನಿಕ ವೈ- ಫೈ ಬಳಸುವಾಗ VPN ಬಳಸಿ. ಹಾಗೆ ಮಾಡುವುದರಿಂದ ನಿಮ್ಮ ಸಾಧನಕ್ಕೆ ಹೆಚ್ಚುವರಿ ಭದ್ರತೆ ಸಿಗುತ್ತದೆ.

ತಂತ್ರಜ್ಞಾನ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ