iPhone Foldable: ಮಡಿಸಬಹುದಾದ ಐಫೋನ್ ಬೆಲೆ ಕೇಳಿದರೆ ಶಾಕ್ ಆಗ್ತೀರಾ: ಇದು ಅತ್ಯಂತ ದುಬಾರಿ ಫೋನ್
ಆಪಲ್ ಮುಂದಿನ ವರ್ಷ ಮಡಚಬಹುದಾದ ಐಫೋನ್ ಅನ್ನು ಬಿಡುಗಡೆ ಮಾಡಲಿದೆ. ಇದರ ಬೆಲೆ ಕೇಳಿದರೆ ನೀವು ಶಾಕ್ ಆಗ್ತೀರಿ. ಇದು ಖಂಡಿತವಾಗಿಯೂ ನಿಮ್ಮ ಜೇಬಿಗೆ ಭಾರಿ ಹೊಡೆತ ಬೀಳುತ್ತದೆ. ಭಾರತದಲ್ಲಿ ಇದರ ಬೆಲೆ ಸರಿಸುಮಾರು ರೂ. 2.14 ಲಕ್ಷ. ಬಳಸಿದ ಪ್ರೀಮಿಯಂ ಘಟಕಗಳ ಜೊತೆಗೆ, ಆಪಲ್ ತನ್ನ ಲಾಭವನ್ನು ಹೆಚ್ಚಿಸಲು ಬಯಸುತ್ತದೆ.
Updated on: Nov 25, 2025 | 11:05 AM
ಬೆಂಗಳೂರು (ನ. 25): ಎಲ್ಲವೂ ನಿರೀಕ್ಷೆಯಂತೆ ನಡೆದರೆ, ಆಪಲ್ ತನ್ನ ಮೊದಲ ಮಡಿಸಬಹುದಾದ ಐಫೋನ್ (Apple iPhone) ಅನ್ನು ಮುಂದಿನ ವರ್ಷ ಸೆಪ್ಟೆಂಬರ್ನಲ್ಲಿ ಬಿಡುಗಡೆ ಮಾಡಬಹುದು. ಕಂಪನಿಯು ಪ್ರಸ್ತುತ ಅದರ ಉತ್ಪಾದನೆಗೆ ಸಿದ್ಧತೆ ನಡೆಸುತ್ತಿದೆ. ಇತ್ತೀಚಿನ ವರದಿಯೊಂದು ಅದರ ಅಂದಾಜು ಬೆಲೆಯನ್ನು ಬಹಿರಂಗಪಡಿಸಿದ್ದು, ಈ ಐಫೋನ್ ಅನ್ನು ಹೆಚ್ಚಿನ ಗ್ರಾಹಕರು ಖರೀದಿಸಲು ತುಂಬಾ ಕಷ್ಟ ಎಂಬಂತೆ ಕಾಣುತ್ತದೆ. ಸದ್ಯ ಮಾರುಕಟ್ಟೆಯಲ್ಲಿ ಸ್ಯಾಮ್ಸಂಗ್ನ ಗ್ಯಾಲಕ್ಸಿ Z ಫೋಲ್ಡ್ 7 ಅನ್ನು ತುಂಬಾ ದುಬಾರಿ ಫೋನ್ ಎಂದು ಪರಿಗಣಿಸಲಾಗಿದೆ, ಆದರೆ ಮಡಿಸಬಹುದಾದ ಐಫೋನ್ ಬೆಲೆ ಇದನ್ನು ಮೀರಿಸುತ್ತದೆ.
ಮಡಿಸಬಹುದಾದ ಐಫೋನ್ ಬೆಲೆ ಎಷ್ಟು?
ಮಡಿಸಬಹುದಾದ ಐಫೋನ್ನ ಬೆಲೆ $1,800 ರಿಂದ $2,500 ರ ನಡುವೆ ಇರಬಹುದೆಂದು ನಿರೀಕ್ಷಿಸಲಾಗಿತ್ತು. ಈಗ, ಇತ್ತೀಚಿನ ವರದಿಯ ಪ್ರಕಾರ ಮಡಿಸಬಹುದಾದ ಐಫೋನ್ನ ಬೆಲೆ $2,399 ಆಗಿರಬಹುದು. ಅಂದರೆ ಭಾರತದಲ್ಲಿ ಇದರ ಬೆಲೆ ಸರಿಸುಮಾರು ರೂ. 2.14 ಲಕ್ಷ. ಬಳಸಿದ ಪ್ರೀಮಿಯಂ ಘಟಕಗಳ ಜೊತೆಗೆ, ಆಪಲ್ ತನ್ನ ಲಾಭವನ್ನು ಹೆಚ್ಚಿಸಲು ಬಯಸುತ್ತದೆ. ಆದ್ದರಿಂದ, ಗ್ರಾಹಕರು ಇದಕ್ಕೆ ಹೆಚ್ಚಿನ ಬೆಲೆಯನ್ನು ಪಾವತಿಸಬೇಕಾಗಬಹುದು.
ಎಷ್ಟು ಮಾರಾಟ ನಿರೀಕ್ಷಿಸಲಾಗಿದೆ?
ಮಡಿಸಬಹುದಾದ ಐಫೋನ್ನ ಮಾರಾಟವನ್ನು ಅದರ ಬೆಲೆಯಿಂದ ನಿರ್ಧರಿಸಲಾಗುತ್ತದೆ, ಆದರೆ ಫ್ಯೂಬನ್ ರಿಸರ್ಚ್ ಮುಂದಿನ ವರ್ಷ ಆಪಲ್ 5.4 ಮಿಲಿಯನ್ ಯುನಿಟ್ಗಳನ್ನು ಮಾರಾಟ ಮಾಡಬಹುದು ಎಂದು ಅಂದಾಜಿಸಿದೆ. ಮುಂದಿನ ವರ್ಷ ಜಾಗತಿಕ ಸ್ಮಾರ್ಟ್ಫೋನ್ ಬೇಡಿಕೆ ಕಡಿಮೆಯಾಗುವ ನಿರೀಕ್ಷೆಯಿದೆ, ಆದರೆ ಮಡಿಸಬಹುದಾದ ವಿಭಾಗಕ್ಕೆ ಬೇಡಿಕೆ ಹೆಚ್ಚಾಗಬಹುದು.
Tech Tips: ಮನೆಯಿಂದ ಹೊರಡುವಾಗ ಫೋನ್ನಲ್ಲಿ ಈ ಸೆಟ್ಟಿಂಗ್ಸ್ ಆಫ್ ಮಾಡಿ: ಇಲ್ಲದಿದ್ದರೆ ಬ್ಯಾಟರಿ ಖಾಲಿಯಾಗುತ್ತೆ
ಮಡಿಸಬಹುದಾದ ಐಫೋನ್ನಲ್ಲಿ ಈ ಅದ್ಭುತ ವೈಶಿಷ್ಟ್ಯಗಳು ಲಭ್ಯವಿರುತ್ತವೆ
ಆಪಲ್ ತನ್ನ ಮಡಿಸಬಹುದಾದ ಐಫೋನ್ನಲ್ಲಿ ಕ್ರೀಸ್-ಮುಕ್ತ ಫೋಲ್ಡಿಂಗ್ ಪ್ಯಾನೆಲ್ ಅನ್ನು ನೀಡಲಿದೆ. ಈ ಕ್ರೀಸ್-ಮುಕ್ತ ಫೋಲ್ಡಬಲ್ ಫೋನ್ ಅನ್ನು ಬೇರೆ ಯಾವುದೇ ಕಂಪನಿ ಇನ್ನೂ ಸಾಧಿಸಿಲ್ಲ. ಇದು 24MP ಡಿಸ್ಪ್ಲೇ ಅಡಿಯಲ್ಲಿ ಕ್ಯಾಮೆರಾ ಸೆನ್ಸರ್ ಅನ್ನು ಸಹ ಒಳಗೊಂಡಿರಬಹುದು. ಮಡಿಸಿದಾಗ, ಈ ಐಫೋನ್ 9-9.5 ಮಿಮೀ ದಪ್ಪವಾಗಿರಬಹುದು, ತೆರೆದಾಗ, ಅದು 4.5-4.8 ಮಿಮೀ ಆಗಬಹುದು. ಸಂಪೂರ್ಣವಾಗಿ ತೆರೆದಾಗ, ಡಿಸ್ಪ್ಲೇ 7.8 ಇಂಚುಗಳಷ್ಟು ಅಳತೆಯನ್ನು ಹೊಂದಿರುತ್ತದೆ, ಆದರೆ ಕವರ್ ಸ್ಕ್ರೀನ್ 5.5 ಇಂಚುಗಳಷ್ಟು ಅಳತೆಯನ್ನು ಹೊಂದಿರುತ್ತದೆ. ಇದು ಎರಡು ಐಫೋನ್ ಏರ್ಗಳನ್ನು ಒಟ್ಟಿಗೆ ಜೋಡಿಸಿದಂತೆ ಕಾಣುತ್ತದೆ ಮತ್ತು ಅಲ್ಟ್ರಾ-ತೆಳುವಾದ ಟೈಟಾನಿಯಂ ಚಾಸಿಸ್ನೊಂದಿಗೆ ಬರುತ್ತದೆ.
ಇದುವರೆಗಿನ ಹಲವಾರು ವರದಿಗಳು ಈ ಫೋನ್ ಅನ್ನು 2026 ರಲ್ಲಿ ಬಿಡುಗಡೆ ಮಾಡಬಹುದು ಎಂದು ಸೂಚಿಸಿವೆ. ಈ ಫೋನ್ ಬಿಡುಗಡೆಯಾದರೆ, ಇದು ಸ್ಯಾಮ್ಸಂಗ್ ಗ್ಯಾಲಕ್ಸಿ Z Fold 7, ಹಾಗೆಯೇ ವಿವೋ X Fold 5 ನಂತಹ ಮಾದರಿಗಳೊಂದಿಗೆ ಸ್ಪರ್ಧಿಸುತ್ತದೆ. ಸದ್ಯ ಆಪಲ್ ತನ್ನ ಹೊಸ ಐಫೋನ್ 18 ಸರಣಿಯ ಕೆಲಸ ಶುರುಮಾಡಿದೆ. ಈ ಸರಣಿಯಲ್ಲಿ ಐಫೋನ್ 18, ಐಫೋನ್ 18 ಪ್ರೊ, ಐಫೋನ್ 18 ಪ್ರೊ ಮ್ಯಾಕ್ಸ್ ಮತ್ತು ಐಫೋನ್ 18 ಏರ್ ಜೊತೆಗೆ ಫೋಲ್ಡೆಬಲ್ ಫೋನ್ ಕೂಡ ಬಿಡುಗಡೆಯಾಗಲಿವೆ.
ತಂತ್ರಜ್ಞಾನ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
