Mi11 Ultra smartphone launch: ಆ್ಯಪಲ್, ಸ್ಯಾಮ್ಸಂಗ್ಗೂ ಸಡ್ಡು ಹೊಡೆಯಲು ಬಂತು Mi11 ಅಲ್ಟ್ರಾ
ಶಿಯೋಮಿಯಿಂದ Mi11 Ultra ಸ್ಮಾರ್ಟ್ಫೋನ್ ಭಾರತದಲ್ಲಿ ಶುಕ್ರವಾರ ಬಿಡುಗಡೆ ಮಾಡಲಾಗಿದೆ. ಈ ದುಬಾರಿ ಫೋನ್ ಅನ್ನು ಆಪಲ್ ಹಾಗೂ ಸ್ಯಾಮ್ಸಂಗ್ ಫೋನ್ಗಳಿಗೆ ಸಡ್ಡು ಹೊಡೆಯುವಂತೆ ರೂಪಿಸಲಾಗಿದೆ.
Updated on: Apr 24, 2021 | 5:40 PM
ಶಿಯೋಮಿ ಕಂಪೆನಿಯಿಂದ ಮೂರು ಹೊಸ ಸ್ಮಾರ್ಟ್ಫೋನ್ಗಳನ್ನು ಶುಕ್ರವಾರ ಬಿಡುಗಡೆ ಮಾಡಲಾಗಿದೆ. ಈ ಹೊಸ ಫೋನ್ಗಳ ಸರಣಿಯಲ್ಲಿ ಚೈನೀಸ್ ಬ್ರ್ಯಾಂಡ್ ಆದ ಶಿಯೋಮಿಯಿಂದ Mi ಅಲ್ಟ್ರಾ ಎಂಬ ದುಬಾರಿ ಫೋನ್ ಅನ್ನು ಸಹ ಪರಿಚಯಿಸಲಾಗಿದೆ. ಈ ತನಕ ಭಾರತದಲ್ಲಿ ಬಿಡುಗಡೆ ಆಗಿರುವ Mi ಕಂಪೆನಿಯ ಫೋನ್ಗಳಲ್ಲೇ ಇದು ದುಬಾರಿಯಾಗಿದೆ. ಈ ದರವನ್ನು ಸಮರ್ಥಿಸಿಕೊಳ್ಳುವ ರೀತಿಯಲ್ಲಿ Mi ಅಲ್ಟ್ರಾ ಸ್ಮಾರ್ಟ್ಫೋನ್ನಲ್ಲಿ ಹಲವು ಫ್ಲ್ಯಾಗ್ಷಿಪ್ ವೈಶಿಷ್ಟ್ಯಗಳಿವೆ. ಶಿಯೋಮಿ Mi11 ಅಲ್ಟ್ರಾಕ್ಕೆ ಭಾರತದಲ್ಲಿ ರೂ. 69,999 ಬೆಲೆ ನಿಗದಿ ಮಾಡಲಾಗಿದೆ. ಈ ಹಿಂದಿನ ವರ್ಷದಲ್ಲಿ ಬಂದಿದ್ದ ಫ್ಲ್ಯಾಗ್ಷಿಪ್ ಫೋನ್ನ ಬೆಲೆ ರೂ. 49,999 ಎಂದು ನಿಗದಿ ಮಾಡಲಾಗಿತ್ತು. ಬಿಡುಗಡೆಯಾದ ಮೂರು ವಾರಕ್ಕೆ 400 ಕೋಟಿ ರೂಪಾಯಿಯಷ್ಟು ವ್ಯವಹಾರವನ್ನು ಆ ಫೋನ್ ಮಾಡಿತ್ತು ಎಂದು ಶಿಯೋಮಿ ಹೇಳಿಕೊಂಡಿತ್ತು.
Mi11 ಅಲ್ಟ್ರಾದ ಹಿಂಬದಿಯ ಪ್ಯಾನೆಲ್ನಲ್ಲಿ “ಪ್ರೋ ಗುಣಮಟ್ಟದ” ಕ್ಯಾಮೆರಾದೊಂದಿಗೆ ಬರುತ್ತದೆ. ಇದರಲ್ಲಿ 48MP ಅಲ್ಟ್ರಾ-ವೈಡ್ ಕ್ಯಾಮೆರಾ, 50MP ಟ್ರೂಪಿಕ್ಸೆಲ್ GN2 ಕ್ಯಾಮೆರಾ ಮತ್ತು 48MP ಪೆರಿಸ್ಕೋಪ್ ಟೆಲಿಫೋಟೋ ಕ್ಯಾಮೆರಾ ಬರುತ್ತದೆ. ಇನ್ನು ಈ ಫೋನ್ನಲ್ಲಿ ಕ್ವಾಲ್ಕಾಮ್ನ 5G ಚಿಪ್ಸೆಟ್ ಇದೆ. ಸ್ನ್ಯಾಪ್ಡ್ರ್ಯಾಗನ್ 888 ಪ್ರೊಸೆಸರ್ನೊಂದಿಗೆ ಬರಲಿದ್ದು, ಈ ಹಿಂದಿನ ವರ್ಷನ್ಗಿಂತ ಶೇಕಡಾ 35ರಷ್ಟು ವೇಗವಾಗಿ ಕಾರ್ಯ ನಿರ್ವಹಿಸುತ್ತದೆ.
Mi11 ಅಲ್ಟ್ರಾದ ಲಭ್ಯತೆಯ ಬಗ್ಗೆ ಇನ್ನೂ ಘೋಷಣೆ ಮಾಡಬೇಕಿದೆ. Mi11X ಪ್ರೋ ಮತ್ತು Mi11X ಫೋನ್ಗಳಿಗೆ ಕ್ರಮವಾಗಿ ರೂ. 29,999ರಿಂದ ರೂ. 41,999ರ ಮಧ್ಯೆ ಬೆಲೆ ನಿಗದಿ ಮಾಡಿದೆ. Mi11X ಪ್ರೋಗೆ ಭಾರತದಲ್ಲಿ ಮೇ 3ರಿಂದ ಹಾಗೂ Mi11Xಗೆ ಏಪ್ರಿಲ್ 27 ಮೇಲ್ಪಟ್ಟು ಪ್ರೀ ಆರ್ಡರ್ ಮಾಡಬಹುದು. ಈಗಿನ ಫ್ಲ್ಯಾಗ್ಷಿಪ್ ಫೋನ್ನ ಬಿಡುಗಡೆ ಮೂಲಕವಾಗಿ ತನ್ನದೇ ಸ್ಮಾರ್ಟ್ಫೊನ್ ಲೈನ್ಅಪ್ ಆದ ರೆಡ್ಮಿಯಿಂದ ಬಹಳ ದೂರಕ್ಕೆ ಸಾಗಿದಂತಾಗಿದೆ. 2020ರ ಆರಂಭದಲ್ಲಿ ಶಿಯೋಮಿ ಘೋಷಣೆ ಮಾಡಿದ ಪ್ರಕಾರ, Mi ಹಾಗೂ ರೆಡ್ಮಿ ಎರಡೂ ಪ್ರತ್ಯೇಕ ಬ್ರ್ಯಾಂಡ್ಗಳು, ಪ್ರತ್ಯೇಕ ಉತ್ಪನ್ನಗಳು, ಉದ್ಯಮ ಮತ್ತು ಮಾರ್ಕೆಟಿಂಗ್ ತಂಡಗಳಾಗಿ ಕಾರ್ಯ ನಿರ್ವಹಣೆ ಮಾಡುತ್ತವೆ.
“Mi11 ಸರಣಿ ಬಿಡುಗಡೆಯೊಂದಿಗೆ ಬರೀ ಭವಿಷ್ಯದ ಸಾಕ್ಷಿಯ ತಂತ್ರಜ್ಞಾನ ಮಾತ್ರ ಪರಿಚಯಿಸಿಲ್ಲ. ಇದರ ಜತೆಗೆ ಬೇರೆ ಯಾವುದರಲ್ಲೂ ಇಲ್ಲದಂತೆ ಬಳಕೆದಾರರ ಅನುಭವನ್ನು ಮೇಲಕ್ಕೆ ಏರಿಸಿದ್ದೇವೆ. ಆವಿಷ್ಕಾರದ ವಿಚಾರದಲ್ಲಿ ಗಡಿಯನ್ನು ಮೀರಿದ್ದೇವೆ. ಕ್ಯಾಮೆರಾ, ಪರ್ಫಾರ್ಮೆನ್ಸ್, ಧ್ವನಿ ಮತ್ತು ಡಿಸ್ಪ್ಲೇಯಲ್ಲಿ ತುಂಬ ದೊಡ್ಡ ಹೆಜ್ಜೆಯನ್ನು ಇರಿಸಿದ್ದೇವೆ,” ಎಂದು ಶಿಯೋಮಿ ಇಂಡಿಯಾ ಮಾರ್ಕೆಟಿಂಗ್ ಮುಖ್ಯಸ್ಥ ಸುಮಿತ್ ಸೋನಲ್ ಹೇಳಿದ್ದಾರೆ. Mi ಜತೆಗೆ ಮಾರ್ಕೆಟ್ನಲ್ಲಿ ಪ್ರೀಮಿಯಂ ಬ್ರ್ಯಾಂಡ್ ಸೃಷ್ಟಿಸಲು ಗಮನ ನೆಟ್ಟಿದ್ದೇವೆ. ನಮ್ಮ Mi ಅಭಿಮಾನಿಗಳಿಗೆ ಹೊಸ ಮತ್ತು ಆಧುನಿಕ ತಂತ್ರಜ್ಞಾನ ಒದಗಿಸಬೇಕು ಎಂಬುದು ನಮ್ಮ ಗುರಿ. ರೆಡ್ಮಿ ಮತ್ತು Mi ಮಧ್ಯೆ ವ್ಯತ್ಯಾಸ ಕಾಣುವಂತೆ ಮಾಡುವ ದೃಷ್ಟಿಯಿಂದ Mi ಪೋರ್ಟ್ಫೋಲಿಯೋ ಅಡಿಯಲ್ಲಿ ಪ್ರೀಮಿಯಂ ಪ್ರಾಡಕ್ಟ್ಗಳನ್ನು ಬಿಡುಗಡೆ ಮಾಡುವುದು ಮುಂದುವರಿಸುತ್ತೇವೆ ಎಂದು ಹೇಳಿದ್ದಾರೆ.
ಇದನ್ನೂ ಓದಿ: Miನಿಂದ QLED TV 75 ದುಬಾರಿ ಟೀವಿ ಭಾರತದಲ್ಲಿ ಬಿಡುಗಡೆ; ಬೆಲೆ ರೂ. 1,19,999 ನಿಗದಿ
(Xiaomi’s Mi11 Ultra flagship smart phone launched in India along with 2 other models with same series)
