Viral Video: ಟೆನ್​-ಪಿನ್​ ಬೌಲಿಂಗ್ ಆಡಿದ ಅಜ್ಜಿ, ಒಂದೇ ಬೌಲಿಂಗ್​ಗೆ ಸ್ಟ್ರೈಕ್​; ಅಜ್ಜಿಯ ಸಾಮರ್ಥ್ಯಕ್ಕೆ ನೆಟ್ಟಿಗರ ಪ್ರಶಂಸೆ

ವಯಸ್ಸು ಸಂಖ್ಯೆಯಷ್ಟೇ.. ಆಟ ಆಡಲು ಶಕ್ತಿ, ಸಾಮರ್ಥ್ಯವಿದ್ದರೆ ಸಾಕು. ಯಾವ ವಯಸ್ಸಿನಲ್ಲೂ ಆಡಿ ಗೆಲ್ಲಬಹುದು ಎಂಬುದಕ್ಕೆ ಉತ್ತಮ ಉದಾಹಣೆಯಾಗಿ ಇಲ್ಲೋರ್ವ ವೃದ್ಧೆಯಿದ್ದಾರೆ. ಇವರು ಟೆನ್​-ಪಿಂಗ್​ ಬೌಲಿಂಗ್​ ಆಟ ಆಡಿದ ವಿಡಿಯೋವನ್ನು ಸುದರ್ಶನ್​ ಕೃಷ್ಣಮೂರ್ತಿ ಎನ್ನುವರು ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್​ ಮಾಡಿದ್ದು, ಅಜ್ಜಿಯ ಕೌಶಲ್ಯಕ್ಕೆ ನೆಟ್ಟಿಗರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ಅಜ್ಜಿ ಹಳದಿ ಬಣ್ಣದ ಸೀರೆಯುಟ್ಟು ಮುಖಗವಸು ಧರಿಸಿ, ಕಾಲಿಗೆ ಶೂ ಹಾಕಿಕೊಂಡು ಆಟಕ್ಕೆಂದು ಸಿದ್ಧರಾಗಿರುವುದನ್ನು ನೀವು ವಿಡಿಯೋದಲ್ಲಿ ನೋಡಬಹುದು. ಕೈಯಲ್ಲಿ ಚೆಂಡು ಹಿಡಿದು ಬಾಲ್​ ಟ್ರ್ಯಾಕ್​ ಮೂಲಕ ಚೆಂಡನ್ನು ಎಸೆಯುತ್ತಾರೆ. ಎಲ್ಲಾ ಪಿನ್​ಗಳು ನೆಲಕ್ಕುರುಳಿ ಸ್ಟ್ರೈಕ್​ ಆಗುತ್ತದೆ. ಅಜ್ಜಿ ಒಮ್ಮೆಲೆ ಹಿಂತಿರುಗಿದಾಗ ಮುಖದಲ್ಲಿನ ನಗು ಆಟ ಗೆದ್ದ ಖುಷಿಯನ್ನು ತೋರಿಸುತ್ತದೆ.

ಹಾಯ್​ ಟ್ವಿಟರ್​, ದಯವಿಟ್ಟು ನನ್ನ ಅಜ್ಜಿ ಸೀರೆಯುಟ್ಟು ಸ್ಟ್ರೈಕ್​ ಬೌಲಿಂಗ್​ ಮಾಡುವುದನ್ನು ನೋಡಿ ಪ್ರಶಂಸೆ ನೀಡಿ, ಆಟ ಗೆದ್ದ ಖುಷಿಯಲ್ಲಿ ತನ್ನ ಮುಖಗವಸನ್ನು ಮೂಗಿಗೆ ಮುಚ್ಚಿಕೊಳ್ಳುತ್ತಾ ಸಂತೋಷದಿಂದ ಹಿಂತಿರುಗುತ್ತಾರೆ ಎಂಬುದಾಗಿ ಸುದರ್ಶನ್​ ಕೃಷ್ಣಮೂರ್ತಿಯವರು ಟ್ವಿಟರ್​ನಲ್ಲಿ ಪೋಸ್ಟ್​ ಹಂಚಿಕೊಂಡಿದ್ದಾರೆ.

ವಯಸ್ಸಿಗೆ ಸವಾಲು ಒಡ್ಡಿ, ಮನಸ್ಸಿಗೆ ಖುಷಿ ನೀಡುವ ಆಟಗಳನ್ನು ಆಡುತ್ತಾ ಆರೋಗ್ಯವಾಗಿರುವ ಅಜ್ಜಿಯಂದಿರನ್ನು ನೋಡಿದರೆ ಮನಸ್ಸಿಗೆ ಖುಷಿ ಸಿಗುವುದಂತೂ ಸತ್ಯ. ಮಕ್ಕಳು ತಮಾಷೆ ಮಾಡುತ್ತಾ, ಮೊಮ್ಮಕ್ಕಳೊಂದಿಗೆ ತರಲೆ ಮಾಡುತ್ತಾ ಖುಷಿಯಿಂದಿರುವ ಅಜ್ಜ-ಅಜ್ಜಿಯರು, ವಯಸ್ಸು ಕೇಲವ ಸಂಖ್ಯೆಯಷ್ಟೇ ಎಂಬುದನ್ನು ಸಾರಿ ಹೇಳುತ್ತಾರೆ.

ಅಜ್ಜಿ ಆಡಿದ ಸ್ಟ್ರೈಕ್​ ಬೌಲಿಂಗ್​ ಆಟ ಸಾಮಾಜಿಕ ಜಾಲತಾಣದಲ್ಲಿ 4,31,100 ವೀಕ್ಷಣೆ ಗಳಿಸಿಕೊಂಡಿದೆ. ಈ ಮೂಲಕ ಅಜ್ಜಿ ನೆಟ್ಟಿಗರ ಪ್ರೀತಿಯನ್ನು ಗಳಿಸಿಕೊಂಡಿದ್ದಾರೆ. ‘ಜೀವನವನ್ನು ಹೇಗೆ ನಿಭಾಯಿಸಬೇಕು ಜೊತೆಗೆ ಜೀವನದಲ್ಲಿ ಹೇಗೆ ದೃಢವಾಗಿರಬೇಕು ಎಂಬುದನ್ನು ಅಜ್ಜಿ ಹೇಳಿಕೊಟ್ಟಿದ್ದಾರೆ. ಈ ಪ್ರಸ್ತುತ ಸಮಯದಲ್ಲಿ ಮುಖಗವಸನ್ನು ಧರಿಸಿದ ಅಜ್ಜಿ, ಸುರಕ್ಷತಾ ಕ್ರಮವನ್ನು ಅನುಸರಿಸಿ ಎನ್ನುವ ಸಂದೇಶವನ್ನು ಸಾರುತ್ತಿದ್ದಾರೆ’. ಇವರನ್ನು ನೋಡಿ ಇದೀಗ ನನ್ನ ಅಜ್ಜಿ ನನಗೆ ನೆನಪಾಗುತ್ತಿದ್ದಾರೆ ಎಂದು ನೆಟ್ಟಿಗರೋರ್ವರು ಅಭಿಪ್ರಾಯ ಹಂಚಿಕೊಂಡಿದ್ದಾರೆ.

Hi Twitter, please appreciate my grandma bowling a strike in her saree, and then proceeding to ensure her mask covers her nose#QueenShit, if you ask me! ?? pic.twitter.com/T3g4x5dpbk

— Sudarshan Krishnamurthy (@sudkrish) May 17, 2021