Smiling Buddha: ಕೊನೆಗೂ ಬುದ್ಧ ನಗುಬೀರಿದ: ಭಾರತದ ಮೊದಲ ನ್ಯೂಕ್ಲಿಯರ್ ಪರೀಕ್ಷೆ ಪೋಖ್ರಾನ್ನಲ್ಲಿ ನಡೆದು ಇಂದಿಗೆ 47 ವರ್ಷ
ಆ ವರ್ಷ ಬುದ್ಧ ಪೂರ್ಣಿಮೆ ದಿನವೇ ಪರೀಕ್ಷೆ ನಡೆಸಿದ ಕಾರಣ ಸ್ಮೈಲಿಂಗ್ ಬುದ್ಧ ಎಂದು ನಾಮಕರಣ ಮಾಡಿದ್ದರು ಮತ್ತು ನ್ಯೂಕ್ಲಿಯರ್ ಪರೀಕ್ಷೆ ಯಶಸ್ವಿಯಾದ ತಕ್ಷಣ ಬಾಬಾ ಅಟಾಮಿಕ್ ರಿಸರ್ಚ್ ಸೆಂಟರ್ನ ನಿರ್ದೇಸಕರಾಗಿದ್ದ ರಾಜಾರಾಮಣ್ಣ ಕೊನೆಗೂ ಬುದ್ಧ ನಗುಬೀರಿದ ಎಂದು ಅಂದಿನ ಪ್ರಧಾನಿ ಇಂದಿರಾಗಾಂಧಿಯವರಿಗೆ ಹೇಳಿದ್ದರು ಎನ್ನುವುದು ವಿಶೇಷ.
Updated on:May 18, 2021 | 11:43 AM
ಭಾರತ ಅತ್ಯಂತ ಯಶಸ್ವಿಯಾಗಿ ಮೊಟ್ಟ ಮೊದಲ ನ್ಯೂಕ್ಲಿಯರ್ ಪರೀಕ್ಷೆ ಪೂರೈಸಿ ಇಂದಿಗೆ 47 ವರ್ಷವಾಗಿದೆ. ರಾಜಸ್ತಾನದ ಪೋಖ್ರಾನ್ನಲ್ಲಿ 1974ರ ಮೇ.18 ರಂದು ಸ್ಮೈಲಿಂಗ್ ಬುದ್ಧ ಎಂಬ ಹೆಸರಿನೊಂದಿಗೆ ಮಾಡಿದ ಈ ಪರೀಕ್ಷೆ ಭಾರತದ ಇತಿಹಾಸದ ಪುಟದಲ್ಲಿ ಅಚ್ಚಳಿಯದ ಸಂಗತಿ. ಆ ವರ್ಷ ಬುದ್ಧ ಪೂರ್ಣಿಮೆ ದಿನವೇ ಪರೀಕ್ಷೆ ನಡೆಸಿದ ಕಾರಣ ಸ್ಮೈಲಿಂಗ್ ಬುದ್ಧ ಎಂದು ನಾಮಕರಣ ಮಾಡಿದ್ದರು ಮತ್ತು ನ್ಯೂಕ್ಲಿಯರ್ ಪರೀಕ್ಷೆ ಯಶಸ್ವಿಯಾದ ತಕ್ಷಣ ಬಾಬಾ ಅಟಾಮಿಕ್ ರಿಸರ್ಚ್ ಸೆಂಟರ್ನ ನಿರ್ದೇಸಕರಾಗಿದ್ದ ರಾಜಾರಾಮಣ್ಣ ಕೊನೆಗೂ ಬುದ್ಧ ನಗುಬೀರಿದ ಎಂದು ಅಂದಿನ ಪ್ರಧಾನಿ ಇಂದಿರಾಗಾಂಧಿಯವರಿಗೆ ಹೇಳಿದ್ದರು ಎನ್ನುವುದು ವಿಶೇಷ.
ಅಂದಿನ ಮಟ್ಟಿಗೆ ಯುಎನ್ಎಸ್ಸಿ (United Nations Security Council) ಶಾಶ್ವತ ಸದಸ್ಯತ್ವ ಹೊಂದಿಲ್ಲದ ರಾಷ್ಟ್ರವೊಂದು ಅಧಿಕೃತವಾಗಿ ನ್ಯೂಕ್ಲಿಯರ್ ಪರೀಕ್ಷೆ ನಡೆಸಿದ್ದು ಅದೇ ಮೊದಲಾಗಿದ್ದು, ಅದರಲ್ಲಿ ಯಶಸ್ವಿಯೂ ಆಯಿತೆಂಬುದು ಗಮನಾರ್ಹ. ಸದರಿ ನ್ಯೂಕ್ಲಿಯರ್ ಪರೀಕ್ಷೆ ಸಾಕಷ್ಟು ಚರ್ಚೆಗೊಳಗಾಗಿತ್ತಲ್ಲದೇ ಅಮೆರಿಕಾ ಹಾಗೂ ವಿಶ್ವದ ಇನ್ನಿತರ ಯಾವುದೇ ಗುಪ್ತಚರ ಇಲಾಖೆಗೆ ಗೊತ್ತಾಗದಂತೆ ಭಾರತ ಇದನ್ನು ನಿರ್ವಹಿಸಿತ್ತು ಎನ್ನುವುದು ಸಹ ಸಾಕಷ್ಟು ಕುತೂಹಲಕಾರಿ. ಅಲ್ಲದೇ ಇದರ ಬೆನ್ನಲ್ಲೇ ಭಾರತಕ್ಕೆ ಅಮೆರಿಕಾದಂತಹ ರಾಷ್ಟ್ರಗಳು ನ್ಯೂಕ್ಲಿಯರ್ ಪ್ರಸರಣಕ್ಕೆ ಈ ಪರೀಕ್ಷೆ ಕಾರಣವಾಗಲಿದೆ ಎಂಬ ನೆಪವೊಡ್ಡಿ ಹಲವು ನಿರ್ಬಂಧಗಳನ್ನೂ ಒಡ್ಡಿದ್ದವು.
ಅವತ್ತಿನ ಪ್ರಧಾನ ಮಂತ್ರಿ ಇಂದಿರಾ ಗಾಂಧಿ 1972ರ ಸೆಪ್ಟೆಂಬರ್ನಲ್ಲಿ ಬಾಬಾ ಅಟಾಮಿಕ್ ರಿಸರ್ಚ್ ಸೆಂಟರ್ ವಿಜ್ಞಾನಿಗಳಿಗೆ ಪರೀಕ್ಷೆ ನಡೆಸಲು ಸಿದ್ಧತೆ ನಡೆಸುವಂತೆ ಹೇಳಿದ್ದರಾದರೂ ಅದು ನೆರವೇರಲು ಸುಮಾರು 2 ವರ್ಷ ಬೇಕಾಯಿತು. 1974ರ ಯಶಸ್ಸಿನ ನಂತರ 1998ರಲ್ಲಿ ಅಟಲ್ ಬಿಹಾರಿ ವಾಜಪೇಯಿ ಪ್ರಧಾನಿಯಾಗಿದ್ದ ಕಾಲಾವಧಿಯಲ್ಲಿ ಅದೇ ಸ್ಥಳದಲ್ಲಿ ಪೋಖ್ರಾನ್ 2 ಪರೀಕ್ಷೆ ನಡೆಸಲಾಯಿತು. ಮೇ 1998ರಲ್ಲಿ ನಡೆದ ಈ ಪರೀಕ್ಷೆಯು ಐದು ಸರಣಿ ನ್ಯೂಕ್ಲಿಯರ್ ಸ್ಪೋಟಗಳಿಗೆ ಸಾಕ್ಷಿಯಾಗಿತ್ತು. ಅಂದಿನಿಂದ ಪೋಖ್ರಾನ್ 2 ನೆನಪಿಗಾಗಿ ಪ್ರತಿವರ್ಷ ಮೇ 11ನೇ ತಾರೀಖನ್ನು ರಾಷ್ಟ್ರೀಯ ತಂತ್ರಜ್ಞಾನ ದಿನವೆಂದು ಆಚರಿಸಿಕೊಂಡು ಬರಲಾಗುತ್ತಿದೆ.
ಇದನ್ನೂ ಓದಿ: National Technology Day: ರಾಷ್ಟ್ರೀಯ ತಂತ್ರಜ್ಞಾನ ದಿನ ಇತಿಹಾಸ, ಮಹತ್ವ, ಈ ವರ್ಷದ ಘೋಷವಾಕ್ಯ ಏನು?
Published On - 11:30 am, Tue, 18 May 21
