Viral Video: ಗಿನ್ನೀಸ್ ವಿಶ್ವ ದಾಖಲೆ; ಈಕೆ ತೇಗು ತೆಗೆದ ಶಬ್ದ ದ್ವಿಚಕ್ರವಾಹನದ ಸದ್ದಿಗೆ ಸಮ!

GWR : ಗಿನ್ನೀಸ್ ದಾಖಲೆ ಮಾಡಿರುವವರ ಕೌಶಲ, ಸಾಹಸ ಮತ್ತು ಚಟುವಟಿಕೆಗಳನ್ನು ಗಮನಿಸಿದರೆ ಅಬ್ಬಬ್ಬಾ ಎನ್ನಿಸುವುದುಂಟು. ಖಂಡಿತ ಇವೆಲ್ಲ ಸಾಮಾನ್ಯರಿಂದ ಸಾಧ್ಯವೇ ಇಲ್ಲ ಎನ್ನುವಷ್ಟರ ಮಟ್ಟಿಗೆ ಅಚ್ಚರಿ, ಆತಂಕ ಹುಟ್ಟಿಸುತ್ತವೆ. ಇತ್ತೀಚೆಗಷ್ಟೇ ಜೀವಕ್ಕೆ ಅಪಾಯಕಾರಿ ಎನ್ನಿಸಿದ ದೀರ್ಘಚುಂಬನ ಸ್ಪರ್ಧೆಯನ್ನು ಗಿನ್ನೀಸ್​ ಪಟ್ಟಿಯಿಂದ ಕೈಬಿಟ್ಟ ಸುದ್ದಿಯನ್ನು ಓದಿದ್ದಿರಿ. ವಿಚಿತ್ರ ಕೌಶಲದಲ್ಲಿ ಗಿನ್ನೀಸ್​ ವಿಶ್ವ ದಾಖಲೆ ಮಾಡಿರುವ 33 ವರ್ಷದ ಅಮೆರಿಕದ ಕಿಂಬರ್ಲಿ ವಿಂಟರ್ (Kimberly Winter)​ ಸುದ್ದಿಯಲ್ಲಿರುವುದು ಏಕೆ ಎಂದು ಓದಿ ಮತ್ತು ನೋಡಿ. ಇವರು ಅತೀ ದೊಡ್ಡ ಪ್ರಮಾಣದಲ್ಲಿ ತೇಗಿನ (Burp) ಶಬ್ದವನ್ನು ಹೊರಡಿಸುವಲ್ಲಿ ದಾಖಲೆ ಮಾಡಿದ್ದಾರೆ. ಈಕೆ ತೆಗೆದ ತೇಗಿನ ಶಬ್ದ 107.3 ಡೆಲಿಬಲ್​, ಅಂದರೆ ದ್ವಿಚಕ್ರವಾಹನದ ಸದ್ದಿಗೆ ಸಮವಾಗಿತ್ತು.

2009ರಲ್ಲಿ ಇಟಲಿಯ ಎಲಿಸಾ ಕಾಗ್ನೋನಿ 107 ಡೆಸಿಬಲ್​ ಪ್ರಮಾಣದಲ್ಲಿ ತೇಗು ತೆಗೆದು ದಾಖಲೆ ನಿರ್ಮಿಸಿದ್ದರು. ಕಿಂಬರ್ಲಿ ಈಗ 107.3 ಡೆಸಿಬಲ್​ ಪ್ರಮಾಣದ ತೇಗು ಹೊರಡಿಸಿ ಆಕೆಯ ದಾಖಲೆಯನ್ನು ಮುರಿದು ವಿಶ್ವದ ಗಮನ ಸೆಳೆದಿದ್ದಾರೆ. ವಿಂಟರ್,​ ರೆಕಾರ್ಡಿಂಗ್​ ರೂಮಿನಲ್ಲಿ ಮೈಕ್ರೋಫೋನ್​ನಿಂದ 2.5 ಮೀಟರ್​ ದೂರದಲ್ಲಿ ನಿಂತು ತೇಗಿನ ಧ್ವನಿಯನ್ನು ರೆಕಾರ್ಡ್ ಮಾಡಿದ್ದಾರೆ. 2021ರಲ್ಲಿ ಪುರುಷರ ವಿಭಾಗದಲ್ಲಿ ಗಿನ್ನೀಸ್​ ದಾಖಲೆ ಮಾಡಿದ ಆಸ್ಟ್ರೇಲಿಯಾದ ನೆವಿಲ್ಲೆ 112.4 ಡೆಸಿಬಲ್​ ತೇಗುಶಬ್ದ ಹೊರಡಿಸಿದ್ದರು. ಆ ಧ್ವನಿ ಎಲೆಕ್ಟ್ರಿಕ್ ಡ್ರಿಲ್ ಅಥವಾ ಟ್ರಂಬೋನ್​ಗಿಂತ ಜೋರಾಗಿ ಇತ್ತು. ಈ ಕೆಳಗಿನ ವಿಡಿಯೋದಲ್ಲಿ ಗಮನಿಸಿ.

ಮಹಿಳೆಯರ ವಿಭಾಗದಲ್ಲಿ ದಾಖಲೆ ಮುರಿದ ವಿಂಟರ್ ಕಾಫಿ, ಬಿಯರ್​, ಬೆಳಗಿನ ಉಪಹಾರ ಸೇವಿಸಿ ದೊಡ್ಡ ಪ್ರಮಾಣದಲ್ಲಿ ತೇಗಿನ ಶಬ್ದ ಹೊರಡಿಸಿ ಹಳೆಯ ದಾಖಲೆಯನ್ನು ಮುರಿಯುವಲ್ಲಿ ಯಶಸ್ವಿಯಾಗಿದ್ದಾರೆ. ಈ ಶಬ್ದ ಜೋರಾಗಿ ಹೊಮ್ಮಲು ಆಕೆ ಮೊದಲು ಆಳವಾಗಿ ಉಸಿರು ತೆಗೆದುಕೊಂಡು ನಂತರ ಕೌಶಲದಿಂದ ತೇಗನ್ನು ಹೊಮ್ಮಿಸುವುದಾಗಿ ಹೇಳಿದ್ದಾರೆ. ಹೀಗೆ ಜೋರಾಗಿ ತೇಗು ತೆಗೆಯುವ ಹುಚ್ಚು ಈಕೆಗೆ ಬಾಲ್ಯದಿಂದಲೇ ಇತ್ತು. ಯೂಟ್ಯೂಬ್​ ಮತ್ತು ಸಾಮಾಜಿಕ ಜಾಲತಾಣಗಳ ಮೂಲಕ ಈಕೆ ತನ್ನ ಈ ಕೌಶಲವನ್ನು ಪ್ರಚುರಪಡಿಸಿಕೊಳ್ಳುತ್ತ ಜೋರಾದ ಧ್ವನಿಯಲ್ಲಿ ತೇಗು ತೆಗೆಯುವ ವಿಶ್ವದ ಕೆಲವರಲ್ಲಿ ತಾನೂ ಒಬ್ಬಾಕೆ ಎನ್ನಿಸಿಕೊಂಡಿದ್ದರು.

ಮತ್ತಷ್ಟು ವೈರಲ್ ನ್ಯೂಸ್​​ಗಾಗಿ ಕ್ಲಿಕ್ ಮಾಡಿ