Viral Photo: ನಾಗರಹಾವನ್ನು ತಿನ್ನುತ್ತಿರುವ ಕಾಳಿಂಗ ಸರ್ಪ; ಈ ಫೋಟೋವನ್ನು ನೀವೂ ನೋಡಲೇಬೇಕು..!

ನಿಸರ್ಗವೆಂದರೆ ಅದು ಅಚ್ಚರಿ, ರಹಸ್ಯಗಳನ್ನೇ ತುಂಬಿಕೊಂಡಿರುವ ಒಂದು ಸುಂದರ ಅಂಶ. ಅದೆಷ್ಟೆಷ್ಟೋ ಹೊಸಹೊಸ ವಿಚಾರಗಳನ್ನು ಹೊರಸೂಸುತ್ತ ಇರುತ್ತದೆ. ಅದರಲ್ಲೂ ಈಗೀಗ ಈ ಇಂಟರ್​ನೆಟ್​, ಸಾಮಾಜಿಕ ಜಾಲತಾಣಗಳಿಂದಾಗಿ ಪ್ರಕೃತಿಯಲ್ಲಿ ನಡೆಯುವ ಅನೇಕಾನೇಕ ವಿಚಿತ್ರ, ಅಚ್ಚರಿಗಳು ಹಲವು ಜನರಿಗೆ ಸರಳವಾಗಿ ತಲುಪುತ್ತವೆ. ಅದರಲ್ಲೂ ಇತ್ತೀಚೆಗೆ ಕಾಳಿಂಗ ಸರ್ಪವೊಂದು (King Kobra)ಇನ್ನೊಂದು ಹಾವನ್ನು ತಿನ್ನುತ್ತಿರುವ ಅಪರೂಪದಲ್ಲಿ ಅಪರೂಪವೆಂಬಂಥ ಫೋಟೋವೊಂದು ಟ್ವಿಟರ್​ನಲ್ಲಿ ವೈರಲ್ ಆಗುತ್ತಿದೆ. ನೆಟ್ಟಿಗರಂತೂ ಶಾಕ್​ ಆಗಿದ್ದಾರೆ.

ಸದಾ ಪ್ರಕೃತಿಗೆ ಸಂಬಂಧಪಟ್ಟ ಒಂದಿಲ್ಲೊಂದು ವಿಭಿನ್ನ ಪೋಸ್ಟ್​ಗಳನ್ನು ಶೇರ್ ಮಾಡುವ ಭಾರತೀಯ ಅರಣ್ಯ ಸಂರಕ್ಷಣಾಧಿಕಾರಿ (IFS) ಪರ್ವೀನ್​ ಕಸ್ವಾನ್​ ಈ ಫೋಟೋ ಶೇರ್ ಮಾಡಿಕೊಂಡಿದ್ದಾರೆ. ಕಾಳಿಂಗ ಸರ್ಪದ ತೀಕ್ಷ್ಣ ಕಣ್ಣು ಮತ್ತು ಅದರ ಬಾಯಲ್ಲಿರುವ ಇನ್ನೊಂದು ನಾಗರ ಹಾವು ನಿಜಕ್ಕೂ ಭಯಹುಟ್ಟಿಸುವಂತಿದೆ. ಅಂದಹಾಗೆ ಈ ಫೋಟೋ ತೆಗೆದವರೂ ಪರ್ವೀನ್​ ಕಸ್ವಾನ್​ ಅವರೇ.

ಹಾವನ್ನು ತಿನ್ನುತ್ತಿರುವ ಕಾಳಿಂಗ ಸರ್ಪ

ಫೋಟೋದೊಂದಿಗೆ ಕಾಳಿಂಗ ಸರ್ಪದ ಬಗ್ಗೆ ತುಸು ಮಾಹಿತಿಯನ್ನೂ ಅವರು ಶೇರ್​ ಮಾಡಿಕೊಂಡಿದ್ದಾರೆ. ಒಫಿಯೋಫಾಗಸ್ ಹನ್ನಾ (Ophiophagus Hannah) ಎಂಬುದು ಕಾಳಿಂಗ ಸರ್ಪದ ವೈಜ್ಞಾನಿಕ ಹೆಸರು. Ophiophagus ಎಂಬ ಶಬ್ದ ಉತ್ಪತ್ತಿಯಾಗಿದ್ದು ಗ್ರೀಕ್​ನಿಂದ. ಹಾವು-ತಿನ್ನುವುದು ಎಂಬುದು ಈ ಪದದ ಅರ್ಥ. Hannah ಅಂದರೆ ಗ್ರೀಕ್​ ಪುರಾಣದಲ್ಲಿ ಮರಗಳಲ್ಲಿ ವಾಸಿಸುವ ಅಪ್ಸರೆಯರು. ಕಾಳಿಂಗ ಸರ್ಪಗಳಿಗೆ ಈ ಹೆಸರು ಅನ್ವರ್ಥದಂತಿದೆ ಎಂದು ಪರ್ವೀನ್​ ಕಸ್ವಾನ್​ ತಿಳಿಸಿದ್ದಾರೆ. ಹಾಗೇ, ಗೂಡು ಕಟ್ಟುವ ಏಕೈಕ ಹಾವೆಂದರೆ ಅದು ಕಾಳಿಂಗ ಸರ್ಪ. ಬೇರೆ ಹಾವುಗಳಿಗೆ ಹೋಲಿಸಿದರೆ ಕಿಂಗ್​ ಕೋಬ್ರಾ ತುಂಬ ತಿಂಡಿಪೋತ ಹಾವು ಎಂದೂ ಹೇಳಿದ್ದಾರೆ.

ಪರ್ವೀನ್ ಶೇರ್ ಮಾಡಿದ ಅದ್ಭುತ ಫೋಟೋವೀಗ ಸೋಷಿಯಲ್ ಮೀಡಿಯಾಗಳಲ್ಲಿ ಸಿಕ್ಕಾಪಟೆ ವೈರಲ್ ಆಗಿದೆ. ಅನೇಕರು ಅವರನ್ನು ಹೊಗಳಿದ್ದಾರೆ. ಇನ್ನೂ ಅನೇಕರು ತಾವು ಅಕ್ಷರಶಃ ಶಾಕ್​ ಆಗಿದ್ದಾಗಿ ತಿಳಿಸಿದ್ದಾರೆ.

ಇದನ್ನೂ ಓದಿ: ಪ್ಲಾಸ್ಟಿಕ್​ ಬಾಟಲ್, ಒಡೆದ ಕೋಳಿ ಮೊಟ್ಟೆಯಲ್ಲಿ ಅರಳಿದ ಹಸಿರು; ಮನೆಯಲ್ಲಿಯೇ ನಿರ್ಮಾಣವಾಗಿದೆ ಸುಂದರ ಉದ್ಯಾನವನ