ಡೋಮಿನೋಸ್ ಪಿಝಾದಲ್ಲಿ ಗಾಜಿನ ಚೂರುಗಳು ಪತ್ತೆ, ನೆಟ್ಟಿಗರ ಆಕ್ರೋಶ

Viral : ಹಣವೊಂದಿದ್ದರೆ ಸಾಕು, ಈವತ್ತು ಕುಳಿತಲ್ಲಿಯೇ ಎಲ್ಲವೂ ಸುಲಭವಾಗಿ ಲಭಿಸುತ್ತದೆ. ಬೇಕಾದ್ದು ಬೇಡವಾದ್ದು ಹೀಗೆ ಎಲ್ಲವೂ. ಆದರೆ ಅಪಾಯಕಾರಿಯಾದದ್ದು!? ಅದೂ ಸಿಗುತ್ತದೆ, ಏಮಾರಿದರೆ. ಇತ್ತೀಚೆಗೆ ವೈರಲ್ ಆಗುತ್ತಿರುವ ಟ್ವಿಟರ್ ಪೋಸ್ಟ್​ ಈ ಅಪಾಯದ ಕುರಿತು ಎಚ್ಚರಿಸಿದೆ. ಡೋಮಿನೋಸ್​ ಪಿಝಾನಲ್ಲಿ ಗಾಜಿನ ಚೂರುಗಳು ಪತ್ತೆಯಾಗಿದ್ದು, ಆರ್ಡರ್ ಮಾಡಿದ ವ್ಯಕ್ತಿ ಫೋಟೋ ತೆಗೆದು ಆನ್​ಲೈನಿನಲ್ಲಿ ಹಂಚಿಕೊಂಡಿದ್ದಾರೆ.  ಮುಂಬೈ ಪೊಲೀಸರು ಈ ಪೋಸ್ಟ್​ಗೆ ಪ್ರತಿಕ್ರಿಯಿಸಿದ್ದಾರೆ.

ಮಹಾರಾಷ್ಟ್ರದ ಅರುಣ್ ಎಂಬುವವರು ಡೋಮಿನೋಸ್​ ಪಿಝಾ ಅನ್ನು ಆರ್ಡರ್ ಮೂಲಕ ತರಿಸಿಕೊಂಡಿದ್ದಾರೆ. ತಿನ್ನುವಾಗ ಎರಡುಮೂರು ಗಾಜಿನ ಚೂರುಗಳು ಅದರೊಳಗಿದ್ದದ್ದು ಪತ್ತೆಯಾಗಿದೆ. ತಮಗಾದ ಅನ್ಯಾಯವನ್ನು ಹೇಳಿಕೊಳ್ಳಲು ತಕ್ಷಣವೇ ಫೋಟೋ ತೆಗೆದು ಟ್ವಿಟರ್​ನಲ್ಲಿ ಹಂಚಿಕೊಂಡಿದ್ದಾರೆ. ಈ ವಿಷಯವನ್ನು ಪರಿಶೀಲಿಸುವಂತೆ ಡೋಮಿನೋಸ್​ ಇಂಡಿಯಾ, ಮುಂಬೈ ಪೊಲೀಸ್​ ಮತ್ತು ಸಂಬಂಧಿಸಿದ ಇತರರಿಗೆ ಟ್ಯಾಗ್​ ಮಾಡಿದ್ದಾರೆ.

ಝೊಮ್ಯಾಟೋ ಮೂಲಕ ಅರುಣ್ ಆರ್ಡರ್ ತರಿಸಿಕೊಂಡಿದ್ದಾರೆ. ‘ಬಾಕ್ಸ್​ ಡ್ಯಾಮೇಜ್ ಆಗಿತ್ತೇ?’ ಎಂದು ಝೊಮ್ಯಾಟೋ ಕೇಳಿದೆ. ಇಲ್ಲ ಸುಸ್ಥಿತಿಯಲ್ಲಿತ್ತು ಎಂದು ಅರುಣ್ ಉತ್ತರಿಸಿದ್ದಾರೆ. ಕ್ಷಮಿಸಿ, ಈ ಕುರಿತು ಪರಿಶೀಲಿಸುತ್ತೇವೆ ಮತ್ತೊಂದು ಪಿಝಾ ತಲುಪಿಸುತ್ತೇವೆ ಎಂದು ಝೊಮ್ಯಾಟೊ ತಿಳಿಸಿದೆ.

ನಂತರ ಮುಂಬೈ ಪೊಲೀಸರು, ಕಸ್ಟಮರ್ ಕೇರ್‌ಗೆ ಈ ಕುರಿತು ತಿಳಿಸಿರಿ ಎಂದಿದ್ದಾರೆ. ಒಂದು ವೇಳೆ ಅವರು ನಿಮಗೆ ಉತ್ತರಿಸದಿದ್ದರೆ ಅಥವಾ ಸಮರ್ಪಕವಾಗಿ ಸ್ಪಂದಿಸದಿದ್ದರೆ ನೀವು ಕಾನೂನಿನ ಮೊರೆ ಹೋಗಬಹುದು ಎಂದಿದ್ದಾರೆ. ಆ ಪ್ರಕಾರ ಅರುಣ್, ಕಸ್ಟಮರ್ ಕೇರ್​ ವಿಭಾಗವನ್ನು ಸಂಪರ್ಕಸಿದ್ದಾರೆ. ಡೋಮಿನೋಸ್ ಪ್ರತಿನಿಧಿ ಅರುಣ್ ಅವರನ್ನು ಪುನಾ ಸಂಪರ್ಕಿಸಿ, ಈ ಕುರಿತು ಸಂಪೂರ್ಣ ತನಿಖೆಯನ್ನು ನಡೆಸಲಾಗಿದೆ. ನಮ್ಮ ಅಡುಗೆಮನೆಯಲ್ಲಿ ಎಲ್ಲವೂ ಶುಚಿತ್ವದ ನೀತಿನಿಯಮಗಳನ್ನು ಪಾಲಿಸಲಾಗುತ್ತಿದೆ. ಗಾಜಿನಿಂದ ಕೂಡಿದ ವಸ್ತುಗಳ ಬಳಕೆಯೂ ಅಲ್ಲಿ ನಿಯಮಕ್ಕನುಸಾರವಾಗಿ ನಿಷಿದ್ಧ ಎಂದು ತಿಳಿಸಿದ್ದಾರೆ.

ಈ ಪೋಸ್ಟ್​ಗೆ ಸಂಬಂಧಿಸಿ ಅನೇಕರು ತಮ್ಮ ತಮ್ಮ ಕಹಿ ಅನುಭವಗಳನ್ನೂ ಹಂಚಿಕೊಂಡಿದ್ದಾರೆ. ಡೋಮಿನೋಸ್​ ತನ್ನ ಕಡೆಯಿಂದ ಏನೂ ವ್ಯತ್ಯಯ ಉಂಟಾಗಿಲ್ಲ ಎಂದು ಹೇಳುತ್ತಿರುವಾಗ, ಅರುಣ್ ಕಾನೂನಿನ ಸಹಾಯ ಯಾಚಿಸುತ್ತಾರಾ ನೋಡಬೇಕು.

ಮತ್ತಷ್ಟು ವೈರಲ್​ ವಿಡಿಯೋಗಾಗಿ ಕ್ಲಿಕ್ ಮಾಡಿ