ವರನ ಹುಡುಕಾಟದಲ್ಲಿ ಉದ್ಯಮಿ ಕುಟುಂಬ, ವಧುವಿನ ಹಿನ್ನಲೆ ಬದಲು ಕುಟುಂಬ ಆರ್ಥಿಕ ಸ್ಥಿತಿಯೇ ಜಾಹೀರಾತಿನಲ್ಲಿ ಹೈಲೈಟ್

ಇತ್ತೀಚೆಗಿನ ದಿನಗಳಲ್ಲಿ ಮದುವೆಗೆ ಸೂಕ್ತ ವರ ಹಾಗೂ ವಧುವನ್ನೇ ಹುಡುಕುವುದೇ ಬಹುದೊಡ್ಡ ತಲೆ ನೋವು. ಹೀಗಾಗಿ ಹೆಚ್ಚಿನವರು ವಧುವರರ ಹುಡುಕಾಟಕ್ಕಾಗಿ ವೈವಾಹಿಕ ವೆಬ್‌ಸೈಟ್‌ಗಳು ಮತ್ತು ಅಪ್ಲಿಕೇಶನ್‌ಗಳನ್ನು ಅವಲಂಬಿಸಿಕೊಂಡಿರುತ್ತಾರೆ. ಈ ಮೂಲಕ ತಮಗೆ ಹೊಂದಾಣಿಕಯಾಗುವ ಯೋಗ್ಯ ಜೀವನ ಸಂಗಾತಿಯನ್ನು ಆಯ್ಕೆ ಮಾಡಿಕೊಳ್ಳುತ್ತಾರೆ. ಇನ್ನು ಕೆಲವರು ತಮ್ಮ ಪರಿಚಯಸ್ಥರು ಮತ್ತು ಸಂಬಂಧಿಕರಲ್ಲಿ ಒಳ್ಳೆಯ ಹುಡುಗ ಅಥವಾ ಹುಡುಗಿ ಎಲ್ಲಾದರೂ ಇದ್ದರೆ ತಿಳಿಸಿ ಎಂದು ಹೇಳುವುದನ್ನು ನೋಡಿರಬಹುದು. ಕೆಲವರು ವಧು ಬೇಕಾಗಿದ್ದಾರೆ ಅಥವಾ ವರ ಬೇಕಾಗಿದ್ದಾರೆ ಪತ್ರಿಕೆಯಲ್ಲಿ ಜಾಹಿರಾತು ಪ್ರಕಟಿಸುವುದನ್ನು ನೋಡಿರಬಹುದು. ಇದೀಗ ವೈರಲ್ ಆಗಿರುವ ವಿಡಿಯೋದಲ್ಲಿ ತನ್ನ 28 ವರ್ಷದ ಮಗಳಿಗೆ ಮಾರ್ವಾಡಿ ಅಥವಾ ಗುಜರಾತಿ ಹುಡುಗನನ್ನು ಹುಡುಕುತ್ತಿದ್ದೇವೆ ಎಂದು ಜಾಹೀರಾತು ನೀಡಿದ್ದು ಈ ಫೋಟೋ ಸಿಕ್ಕಾಪಟ್ಟೆ ವೈರಲ್ ಆಗಿದೆ.

ಪತ್ರಿಕೆಯೊಂದರಲ್ಲಿ ಪ್ರಕಟವಾದ ಈ ಜಾಹೀರಾತಿನಲ್ಲಿ, “500 ಕೋಟಿಗೂ ಅಧಿಕ ಆಸ್ತಿ ಹೊಂದಿರುವ ಮುಂಬೈ ಮೂಲದ ಉದ್ಯಮಿ ಕುಟುಂಬವು ತಮ್ಮ ಮಗಳ (28 ವರ್ಷ) ಮದುವೆಗೆ ಸೂಕ್ತವಾದ ಮಾರ್ವಾಡಿ ಅಥವಾ ಗುಜರಾತಿ ಹುಡುಗನನ್ನು ಹುಡುಕುತ್ತಿದೆ” ಎಂದು ಬರೆಯಲಾಗಿದೆ. ಇಂತಹ ಜಾಹೀರಾತುಗಳಲ್ಲಿ ವಧು ವರರ ವಯಸ್ಸು, ಎತ್ತರ, ಶೈಕ್ಷಣಿಕ ಹಿನ್ನೆಲೆ ಮತ್ತು ಉದ್ಯೋಗದಂತಹ ವೈಯಕ್ತಿಕ ವಿವರಗಳನ್ನು ನೋಡಬಹುದು. ಆದರೆ ಇಲ್ಲಿ ವರ ಬೇಕಾಗಿರುವ ಕುಟುಂಬದ ಮಾರುಕಟ್ಟೆ ಮೌಲ್ಯದ ಬಗ್ಗೆ ಮಾಹಿತಿ ನೀಡಿದೆ.

ಇದನ್ನೂ ಓದಿ: ಕೋಳಿ ಸಾಗಾಟದ ಪಿಕಪ್‌ ಟ್ರಕ್‌ ಪಲ್ಟಿ; ವಾಹನದಿಂದ ಬಿದ್ದ ಕೋಳಿಗಳಿಗಾಗಿ ಮುಗಿಬಿದ್ದ ಚಿಕನ್‌ ಪ್ರಿಯರು

ಈ ಜಾಹೀರಾತಿನ ಫೋಟೋ ವೈರಲ್ ಆಗುತ್ತಿದ್ದಂತೆ ನೆಟ್ಟಿಗರು ಕಾಮೆಂಟ್ ಗಳ ಸುರಿಮಳೆಗೈದಿದ್ದಾರೆ. ಬಳಕೆದಾರರೊಬ್ಬರು, ಶ್ರೀಮಂತ ಕುಟುಂಬಗಳು ಸಾಮಾನ್ಯವಾಗಿ ಸಾರ್ವಜನಿಕ ಜಾಹೀರಾತುಗಳಿಗಿಂತ ಖಾಸಗಿ ನೆಟ್‌ವರ್ಕ್‌ಗಳು ಅಥವಾ ವೈವಾಹಿಕ ಏಜೆಂಟ್‌ಗಳನ್ನು ಅವಲಂಬಿಸಿರುತ್ತಾರೆ ಎಂದು ಕಾಮೆಂಟ್ ಮಾಡಿದ್ದಾರೆ. ಮತ್ತೊಬ್ಬರು, 500 ಕೋಟಿ ರೂಪಾಯಿಗಿಂತ ಹೆಚ್ಚು ಆಸ್ತಿ ಇರುವವರು 5 ರೂಪಾಯಿ ಪತ್ರಿಕೆಗಳಲ್ಲಿ ವೈವಾಹಿಕ ಜಾಹೀರಾತುಗಳನ್ನು ಹಾಕುವುದಿಲ್ಲ. ಇದಕ್ಕಾಗಿ ಅವರ ಬಳಿ ಮದುವೆ ಏಜೆಂಟ್‌ಗಳಿದ್ದಾರೆ. ಇದು ಖಂಡಿತವಾಗಿಯೂ ವಂಚನೆ ಎಂದಿದ್ದಾರೆ. ಇನ್ನೊಬ್ಬರು, ಇದು ವ್ಯವಹಾರ ವಿಲೀನವೋ ಅಥವಾ ಮದುವೆಯ ಪ್ರಸ್ತಾಪವೋ?” ಎಂದು ವ್ಯಂಗ್ಯವಾಡಿದ್ದಾರೆ.

ವೈರಲ್​ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್  ಮಾಡಿ