Viral: ಲೂಯೀಸ್ ವ್ಯೂಟ್ಟನ್; ಅಕ್ಕಿಕಾಳಿಗಿಂತಲೂ ಚಿಕ್ಕ ಚೀಲ, ರೂ. 51 ಲಕ್ಷಕ್ಕೆ ಮಾರಾಟ

Microscopic Handbag : ಶೀರ್ಷಿಕೆ ಓದಿ ಅಚ್ಚರಿಯಾಗಿರಬೇಕಲ್ಲ? ಹೌದು ಇದನ್ನು ಮೈಕ್ರೋಸ್ಕೋಪಿಕ್​ ಹ್ಯಾಂಡ್​ಬ್ಯಾಗ್​ ಎಂದು ಕರೆದಿದೆ ಇದನ್ನು ತಯಾರಿಸಿದ ಲೂಯೀಸ್​ ವ್ಯೂಟ್ಟನ್​ (Louis Vuitton) ಕಂಪೆನಿ. ಫ್ಲೋರೋಸೆಂಟ್​ ಹಸಿರು ಮತ್ತು ಹಳದೀ ಬಣ್ಣದಿಂದ ಕೂಡಿರುವ ಈ ಚೀಲ ಅಕ್ಕಿಕಾಳಿಗಿಂತಲೂ ಚಿಕ್ಕ ಗಾತ್ರದಲ್ಲಿದೆ. ಆನ್​​​ಲೈನ್​ನಲ್ಲಿ ಹರಾಜಿಗೆ ಹಾಕಿದಾಗ ಇದು ರೂ. 51 ಲಕ್ಷಕ್ಕೆ ಮಾರಾಟವಾಗಿದೆ. ಬ್ರೂಕ್ಲಿನ್ ಕಲೆ ಮತ್ತು ಜಾಹೀರಾತು (Advertisement) ಸಮೂಹವು (MSCHF) ಸಂಬಂಧಿಸಿದ ಚಿತ್ರಗಳನ್ನು ಇನ್​ಸ್ಟಾನಲ್ಲಿ ಹಂಚಿಕೊಂಡಾಗಿನಿಂದ ಅಂತರ್ಜಾಲದಲ್ಲಿ ಸಂಚಲನ ಮೂಡಿದೆ. ನೆಟ್ಟಿಗರು ಉತ್ಸುಕತೆಯಿಂದ ಪ್ರತಿಕ್ರಿಯಿಸುತ್ತಿದ್ದಾರೆ.

ಇದರ ಗಾತ್ರದ ಬಗ್ಗೆ ಇನ್ನಷ್ಟು ನಿಖರವಾಗಿ ಹೇಳಬೇಕೆಂದರೆ, ಸಮುದ್ರದ ಉಪ್ಪಿನ ಕಣಕ್ಕಿಂತ ಮತ್ತು ಸೂಜಿಯ ಕಣ್ಣಿನೊಳಗಿಂದ ಹಾಯ್ದು ಹೋಗುವಷ್ಟು ಚಿಕ್ಕದು. ಈ ಮೈಕ್ರೋಸ್ಕೋಪಿಕ್ ಚೀಲವನ್ನು ಸೂಕ್ಷ್ಮದರ್ಶಕ ಯಂತ್ರದ ಮೂಲಕವಷ್ಟೇ ನೋಡಲು ಸಾಧ್ಯ. ಜುಪಿಟರ್​ ಎಂಬ ಆನ್​ಲೈನ್​ ಹರಾಜು ಕಂಪೆನಿಯ ವೆಬ್​ಸೈಟ್​ ಇದರ ಬಗ್ಗೆ ಮಾಹಿತಿ ಮತ್ತು ವಿವರಗಳನ್ನು ಹಂಚಿಕೊಂಡಿದೆ. ಈ ಬ್ಯಾಗ್​ ಅನ್ನು 2 ಫೋಟಾನ್​ ಪಾಲಿಮರ್​ ಮುದ್ರಣ ವಿಧಾನದಿಂದ ರೂಪಿಸಲಾಗಿದೆ. ಡಿಜಿಟಲ್​ ಡಿಸ್ಪ್ಲೇ ಕೂಡ ಇದೆ.

ಇದನ್ನೂ ಓದಿ : Viral Video: ಟೀಚರ್​ ಡ್ರೆಸ್​ ಮೇಲೆ ಮಕ್ಕಳ ಡ್ರಾಯಿಂಗ್​; ಹೀಗೊಂದು ಮಧುರ ಬೀಳ್ಕೊಡುಗೆ

ನಾನು ಈ ಚೀಲವನ್ನು ಕದ್ದು ತಿಂದುಬಿಡುತ್ತೇನೆ, ಆಗ ಇದು ಯಾರಿಗೂ ದಕ್ಕಲಾರದು ಎಂದಿದ್ದಾರೆ ಒಬ್ಬರು. ಅದಕ್ಕೆ ಪ್ರತಿಯಾಗಿ, ಈ ಪ್ರತಿಕ್ರಿಯೆಗೆ ಸಾವಿರ ಲೈಕ್​ಗಳು. ನಾನು ಈ ಚೀಲವನ್ನು ತಿಂದುಮುಗಿಸುತ್ತೇನೆ ಎಂದಿದ್ಧಾರೆ ಇನ್ನೊಬ್ಬರು. ಸ್ಪಿರಿಟ್ ಏರ್​​ಲೈನ್ಸ್ (Spirit Airlines) ಇದನ್ನು ಹೇಗೆ ತಪಾಸಣೆ ಮಾಡಬಹುದು ಎಂಬ ಕುತೂಹಲ ಎಂದು ಮತ್ತೊಬ್ಬರು ಹೇಳಿದ್ದಾರೆ. ಇದೂ ಅತ್ಯುತ್ತಮವಾದ ಪ್ರತಿಕ್ರಿಯೆ ಎಂದಿದ್ದಾರೆ ನೆಟ್ಟಿಗರು. ಇದನ್ನು ಖರೀದಿಸಿದರೆ ಮೈಕ್ರೋಸ್ಕೋಪ್​ ಉಚಿತವೇ? ಎಂದು ಕೆಲವರು ಕೇಳಿದ್ದಾರೆ. ಒಟ್ಟಾರೆಯಾಗಿ ಈ ಉತ್ಪನ್ನವು ನೆಟ್ಟಿಗರೊಳಗಿನ ಸೃಜನಶೀಲತೆಯನ್ನು ಬಡಿದೆಬ್ಬಿಸಿದೆ!

ಮತ್ತಷ್ಟು ವೈರಲ್ ನ್ಯೂಸ್​ಗಾಗಿ ಕ್ಲಿಕ್ ಮಾಡಿ