ವಿಮಾನ ನಿಲ್ದಾಣದಲ್ಲಿಯೂ ತಾಯಿಯ ಆಲೂಪರಾಠಾ ಸವಿದ ಮಧುರ್ ಸಿಂಗ್

Viral Video : ವಿಮಾನಗಳು ಆಕಾಶದಿಂದ ನೆಲಕ್ಕಿಳಿದರೂ ನಿಲ್ದಾಣಗಳ ಆಹಾರ ಮಳಿಗೆಗಳಲ್ಲಿರುವ ತಿಂಡಿ ಪದಾರ್ಥಗಳ ಬೆಲೆ ಮಾತ್ರ ಗಗನದಲ್ಲಿಯೇ ಇರುತ್ತವೆ ಎನ್ನುವ ಕೂಗು ಆಗಾಗ ಸಾಮಾಜಿಕ ಜಾಲತಾಣದಲ್ಲಿ ಕೇಳಿಬರುತ್ತಲೇ ಇರುತ್ತದೆ. ಇತ್ತೀಚೆಗಷ್ಟೇ ಮುಂಬೈನ ಏರ್​ಪೋರ್ಟ್​ವೊಂದರಲ್ಲಿ ಪತ್ರಕರ್ತೆಯೊಬ್ಬರು ‘ಅಚ್ಛೇ ದಿನ್’ ಅನ್ನು ಗೇಲಿ ಮಾಡಿದ್ದರು. 2 ಸಮೋಸಾ, 1 ಕಾಫಿ, 1 ನೀರಿನ ಬಾಟಲಿಗೆ ಮುಂಬೈ ಏರ್​ಪೋರ್ಟ್​ನಲ್ಲಿ ರೂ. 490 ಕೊಡಬೇಕೇ? ಎಂದು ಕೇಳಿದ್ದರು. ಆಗ ನೆಟ್ಟಿಗರೆಲ್ಲರೂ ಏರ್​ಪೋರ್ಟ್​ ಮತ್ತು ಮಲ್ಟಿಪ್ಲೆಕ್ಸ್​​ ಆಹಾರ ಮಳಿಗೆಗಳಲ್ಲಿರುವ ಪದಾರ್ಥಗಳ ಬೆಲೆಯ ಬಗ್ಗೆ ಚರ್ಚಿಸಿದ್ದರು. ಇದೀಗ ವೈರಲ್ ಆಗಿರುವ ಈ ವಿಡಿಯೋ ಟ್ವೀಟ್ ಕೂಡ ಇದೇ ವಿಷಯಕ್ಕೆ ಸಂಬಂಧಿಸಿದ್ದು.

‘ಮಧ್ಯಮ ವರ್ಗದವರಿಗೆ ವಿಮಾನ ಪ್ರಯಾಣವೇನೋ ಸುಲಭವಾಯಿತು. ಆದರೆ ರೂ. 400 ಗೆ ಒಂದು ದೋಸೆ, ರೂ. 100ಗೆ ನೀರಿನ ಬಾಟಲಿ ಖರೀದಿಸುವುದು ಇನ್ನೂ ಒಂದು ರೀತಿಯ ಸಾಮಾಜಿಕ ಒತ್ತಡದಂತೆ ತೋರುತ್ತಿದೆ. ಈ ಮಧ್ಯೆ ಅಮ್ಮನೊಂದಿಗೆ ಗೋವಾಕ್ಕೆ ಪ್ರಯಾಣಿಸುವ ಸಂದರ್ಭದಲ್ಲಿ ಆಕೆ ಮಾಡಿದ ರುಚಿಯಾದ ಆಲೂ ಪರಾಠಾ ಅನ್ನು ನಿಂಬೆ ಉಪ್ಪಿನಕಾಯಿಯೊಂದಿಗೆ ಏರ್ಪೋರ್ಟಿನೊಳಗೆ ತಿಂದೆ.’ ಮಧುರ್ ಸಿಂಘ್​ ಎನ್ನುವವರು ಟ್ವೀಟ್ ಮಾಡಿರುವ ಈ ಪೋಸ್ಟ್​ ಇದೀಗ ವೈರಲ್ ಆಗುತ್ತಿದೆ.

ಇದನ್ನೂ ಓದಿ : ಮೇಆಂವೂ? ಲಗೇಜಿನೊಳಗೆ ಬೆಕ್ಕು; ನ್ಯೂಯಾರ್ಕ್​ ಏರ್​ಪೋರ್ಟ್​ನಲ್ಲಿ ನಡೆದ ಅಚ್ಚರಿಯ ಘಟನೆ

ಅನೇಕರು ಈ ಟ್ವೀಟ್​ ಗೆ ಪ್ರತಿಕ್ರಿಯಿಸಿದ್ದಾರೆ. ನಾವು ಹೀಗೆ ಮನೆಯಿಂದ ತಂದ ತಿಂಡಿಯನ್ನು ತಿನ್ನುವಾಗ ಕೆಲವರು ನಮ್ಮನ್ನು ವಿಚಿತ್ರವಾಗಿ ನೋಡುತ್ತಾರೆ. ಆದರೆ ನಾವು ಇಂಥವರನ್ನು ನಿರ್ಲಕ್ಷಿಸುತ್ತೇವೆ ಎಂದಿದ್ದಾರೆ ಒಬ್ಬರು. ನಿಮ್ಮ ಬಜೆಟ್​ಗೆ ತಕ್ಕಂತೆ ಖರ್ಚು ಮಾಡಿ. ಏನು ರುಚಿ ಅನ್ನಿಸುತ್ತದೆಯೋ ಅದನ್ನು ತಿನ್ನಿ. ಸಮಾಜ ನಿಮ್ಮ ಬಗ್ಗೆ ಏನು ಯೋಚಿಸುತ್ತದೆ ಎಂದು ಯೋಚಿಸಲೇಬೇಡಿ. ನಿಮ್ಮ ಜೀವನಶೈಲಿ ನಿಮ್ಮ ಸ್ವಂತದ್ದು ಎಂದಿದ್ದಾರೆ ಮತ್ತೊಬ್ಬರು.

ಇದನ್ನೂ ಓದಿ : ಟರ್ಕಿ: ‘ನೀನೇ ನನ್ನನ್ನು ರಕ್ಷಿಸಿದ್ದು, ಈಗ ಹೊರಟು ನಿಂತರೆ?’ ಬೆಕ್ಕಿನ ವಿಡಿಯೋ ವೈರಲ್

ಮಧ್ಯಮ ವರ್ಗದವರು ಸಮಾಜದಲ್ಲಿ ಸ್ಥಾನಮಾನದ ಬಗ್ಗೆ ಹೆಚ್ಚು ಜಾಗೃತರಾಗಿದ್ದಾರೆಂದು ನಾನಂತೂ ಅಂದುಕೊಂಡಿಲ್ಲ. ಈತನಕವೂ ನನ್ನ ಅಮ್ಮ ಅಥವಾ ಹೆಂಡತಿ ಕಟ್ಟಿ ಕಳಿಸಿದ ಬುತ್ತಿಯನ್ನೇ ಉಣ್ಣುತ್ತೇನೆ. ಅವರ ಈ ಕಾಳಜಿ ಮತ್ತು ಪ್ರೀತಿಯ ಬಗ್ಗೆ ಹೆಮ್ಮೆ ಪಡುತ್ತೇನೆ ಎಂದಿದ್ದಾರೆ ಮಗದೊಬ್ಬರು. ನಾವೂ ಕೂಡ ವಿಮಾನ ನಿಲ್ದಾಣಕ್ಕೆ ಹೋಗುವಾಗೆಲ್ಲ ಆಲೂ ಪರಾಠಾವನ್ನೇ ತಿನ್ನುತ್ತೇವೆ ಎಂದಿದ್ದಾರೆ ಅನೇಕರು.

ಇದನ್ನು ಓದಿದ ನಿಮ್ಮ ಅಭಿಪ್ರಾಯವೇನು?

ಮತ್ತಷ್ಟು ವೈರಲ್ ನ್ಯೂಸ್​ಗಾಗಿ ಕ್ಲಿಕ್ ಮಾಡಿ