ಥೈಲ್ಯಾಂಡ್ನ ಬ್ಲ್ಯಾಕ್ ನೂಡಲ್ಸ್; ಅಯ್ಯಯ್ಯೋ ಕೊರೊನಾವೈರಸ್ ಎನ್ನುತ್ತಿರುವ ನೆಟ್ಟಿಗರು
Black Noodles : ಅಣ್ಣಾ, ಇದು ನೂಡಲ್ಸ್ ಅಲ್ಲವೇ ಅಲ್ಲ, ಪ್ಲಾಸ್ಟಿಕ್ ಅಥವಾ ರಬ್ಬರ್. ಎಲ್ಲರೂ ಇದನ್ನು ತಿಂದು ಬೂಮರ್ಯಾಂಗ್ ಆಡೋಣವೆ? ಎನ್ನುತ್ತಿದ್ಧಾರೆ ನೆಟ್ಟಿಗರು. ಸ್ಕ್ವಿಡ್ ಇಂಕ್ ನೂಡಲ್ಸ್ ಹೇಗೆ ತಯಾರಿಸುತ್ತಾರೆ ನೋಡಿ ವಿಡಿಯೋ.
Updated on:Feb 18, 2023 | 1:28 PM
Viral Video : ನೂಡಲ್ಸ್ ಎಂದಾಗ ನಿಮ್ಮ ಕಣ್ಣಮುಂದೆ ಬರುವ ಬಣ್ಣಗಳು ಬಿಳಿ, ಕೆನೆಬಣ್ಣ, ತಿಳಿ ಕಂದು, ತಿಳಿ ಹಸಿರು, ತಿಳೀ ಹಳದಿ, ತಿಳಿ ಕೇಸರಿ. ಆದರೆ ಕಪ್ಪು? ಕಪ್ಪು ನೂಡಲ್ಸ್ ಅನ್ನು ಈತನಕ ನೀವು ಯಾರಾದರೂ ಕಲ್ಪಿಸಿಕೊಂಡಿದ್ದಿದೆಯೇ? ಹಾಗಿದ್ದರೆ ಈಗ ಪ್ರತ್ಯಕ್ಷ ನೋಡಿಬಿಡಿ. ಥೈಲ್ಯಾಂಡ್ನ ರಸ್ತೆಬದಿ ಅಂಗಡಿಯಲ್ಲಿ ಸಿಗುತ್ತದೆ ಈ ಕಪ್ಪು ನೂಡಲ್ಸ್. ಈ ವಿಡಿಯೋ ನೋಡಿದ ನೆಟ್ಟಿಗರು ಇದು ಕೊರೊನಾ ವೈರಸ್ ಎಂದು ಅಸಹ್ಯಪಟ್ಟುಕೊಳ್ಳುತ್ತಿದ್ದಾರೆ.
View this post on Instagram
ಥೈಲ್ಯಾಂಡ್ಗೆ ಹೋದಾಗ ಅಲ್ಲಿಯ ಬೀದಿಗಳನ್ನು ಸುತ್ತಲು ಹೋದರೆ ಖಂಡಿತ ನೀವು ನೂಡಲ್ಸ್ ಸವಿದಿರುತ್ತೀರಿ. ಅಕಸ್ಮಾತ್ ಮುಂದಿನ ದಿನಗಳಲ್ಲಿ ಹೋಗುವ ಇರಾದೆ ಇದ್ದರೆ ಅಲ್ಲಿಯ ನೂಡಲ್ಸ್ ತಿನ್ನುವುದು ನಿಮ್ಮ ಲಿಸ್ಟ್ನಲ್ಲಿರುತ್ತದೆ. ಆದರೆ ಈ ವಿಡಿಯೋದಲ್ಲಿರುವ ಸ್ಕ್ವಿಡ್ ಇಂಕ್ ನೂಡಲ್ಸ್ ನೋಡಿ ನಿಮಗೇನಾದರೂ ಇದನ್ನು ತಿನ್ನುವ ಆಸಕ್ತಿ ಹುಟ್ಟೀತೇ? ಏಕೆಂದರೆ ನೆಟ್ಟಿಗರು ಅದರಲ್ಲೂ ಭಾರತೀಯರು ಇದನ್ನು ನೋಡಿ ಉಗಿದು ಉಪ್ಪಿನಕಾಯಿ ಹಾಕುತ್ತಿದ್ದಾರೆ.
ಇದನ್ನೂ ಓದಿ : ‘ಎಂಬಿಎ ಚಾಯ್ವಾಲಾ’ ರೂ. 90 ಲಕ್ಷದ ಮರ್ಸಿಡೀಝ್ ಕಾರು ಖರೀದಿಸಿದ ವಿಡಿಯೋ ವೈರಲ್
ರಸ್ತೆಬದಿಯ ವ್ಯಾಪಾರಿ ಮಹಿಳೆಯೊಬ್ಬರು ತರಕಾರಿ, ಮಸಾಲೆ, ಹರ್ಬ್ಸ್, ಸೀಗಡಿಗಳೊಂದಿಗೆ ಕಪ್ಪು ನೂಡಲ್ಸ್ ಹಾಕಿ ಬೇಯಿಸುವುದನ್ನು ನೋಡುತ್ತಿದ್ದರೆ ಎಂಥವರಿಗೂ ಹೊಟ್ಟೆಯಲ್ಲಿ ಮಳಮಳಿಸಿದ ಹಾಗೆ ಆಗುತ್ತದೆ. ಆದರೆ ಇಲ್ಲಿಯವರಿಗೆ ಇದು ಸಹಜವಾದ ಆಹಾರ. ಆದರೆ ನೆಟ್ಟಿಗರು ಮನಬಂದಂತೆ ತಮಾಷೆ ಮಾಡುತ್ತಿದ್ದಾರೆ.
ಇದನ್ನೂ ಓದಿ : ತಮಿಳುನಾಡಿನ ಮಲ್ಲಿಗೆಗೆ ಮಾರುಹೋದ ಲಂಡನ್ ಪತ್ರಕರ್ತೆಯ ವಿಡಿಯೋ ವೈರಲ್
ಅಣ್ಣಾ ಇದು ನೂಡಲ್ಸ್ ಅಲ್ಲವೇ ಅಲ್ಲ, ಇದು ಪ್ಲಾಸ್ಟಕ್ ಅಥವಾ ರಬ್ಬರ್. ಎಲ್ಲರೂ ಇದನ್ನು ತಿಂದು ಬೂಮರ್ಯಾಂಗ್ ಆಡೋಣ ಎಂದು ತಮಾಷೆ ಮಾಡಿದ್ದಾರೆ ಒಬ್ಬರು. ಇದು ಕಬ್ಬಿಣದಿಂದ ಮಾಡಿದ ನೂಡಲ್ಸ್ ಎಂದುಕೊಂಡೆ ಎಂದು ಮತ್ತೊಬ್ಬರು. ಕೊರೊನಾ ವೈರಸ್ನಿಂದ ಕೂಡಿದ ವಿಷಕಾರಿ ನೂಡಲ್ಸ್ ಇವು ಎಂದು ಮಗದೊಬ್ಬರು ಹೇಳಿದ್ದಾರೆ.
ಈತನಕ ಮೇಲಿನ ವಿಡಿಯೋ ಅನ್ನು 6 ಮಿಲಿಯನ್ ಜನರು ನೋಡಿದ್ದಾರೆ. 1 ಲಕ್ಷಕ್ಕಿಂತಲೂ ಹೆಚ್ಚು ಜನರು ಇಷ್ಟಪಟ್ಟಿದ್ದಾರೆ. ಸಾವಿರಕ್ಕೂ ಹೆಚ್ಚು ಜನರು ಪ್ರತಿಕ್ರಿಯಿಸಿದ್ದಾರೆ.
ಅಷ್ಟಕ್ಕೂ ಸ್ಕ್ವಿಡ್ ಇಂಕ್ ನೂಡಲ್ಸ್ ಎಂದರೇನು? TasteAtlas.com ಪ್ರಕಾರ, ಇಟಲಿಯ ಸಿಸಿಲಿಯಾದ ವಿಶಿಷ್ಟ ಸ್ಪಗೆಟಿ ಖಾದ್ಯ. ಇದು ಇಲ್ಲಿಯ ಅತ್ಯಂತ ಪ್ರಸಿದ್ಧ ಖಾದ್ಯಗಳಲ್ಲಿ ಒಂದು. ಸೀಗಡಿ, ಬೆಳ್ಳುಳ್ಳಿ, ಆಲೀವ್, ಬಿಳಿ ವೈನ್, ಸ್ಕ್ವಿಡ್ ಇಂಕ್ ಸ್ಪಗೆಟಿ ಹಾಕಿ ಪಾಸ್ತಾ ಸಾಸ್ನಲ್ಲಿ ಬೇಯಿಸುತ್ತಾರೆ. ಸ್ಕ್ವಿಡ್ ಇಂಕ್ ಸ್ಪಗೆಟಿ ತಯಾರಿಸುವಾಗ ಹಿಟ್ಟಿನಲ್ಲಿಯೇ ಇಂಕ್ ಬೆರೆಸಿರುತ್ತಾರೆ. ಅದಕ್ಕೆ ಸ್ಪೆಗೆಟಿ ಕಪ್ಪಾಗಿ ಕಾಣುತ್ತವೆ.
ಇದನ್ನು ನೋಡಿದ ನಿಮ್ಮ ಅಭಿಪ್ರಾಯವೇನು?
ಮತ್ತಷ್ಟು ವೈರಲ್ ವಿಡಿಯೋ ನೋಡಲು ಕ್ಲಿಕ್ ಮಾಡಿ
Published On - 1:17 pm, Sat, 18 February 23
