ಅಸಭ್ಯ ವರ್ತನೆ ತೋರಿದ ಮ್ಯಾನೇಜರ್​ಗೆ ಕಚೇರಿಯಲ್ಲೇ ಬಾರಿಸಿದ ಮಹಿಳೆ; ವಿಡಿಯೋ ವೈರಲ್

ಸಾಮಾಜಿಕ ಜಾಲತಾಣಗಳಲ್ಲಿ ಯಾವಾಗ ಯಾವ ವಿಡಿಯೋ ವೈರಲ್​ ಆಗುತ್ತದೆ ಎಂದು ಹೇಳಲಾಗುವುದಿಲ್ಲ. ಕೆಲವೊಮ್ಮೆ ಒಳ್ಳೆಯ ಕೆಲಸಗಳು ಸುದ್ದಿಯಾದರೆ, ಹೆಚ್ಚಿನ ಬಾರಿ ಮಾಡಬಾರದ ಕೆಲಸ ಮಾಡಿ ಸಿಕ್ಕಿಹಾಕಿಕೊಂಡವರೇ ದೊಡ್ಡ ಸದ್ದು ಮಾಡುತ್ತಾರೆ. ಇದೀಗ 14 ನಿಮಿಷಗಳ ವಿಡಿಯೋ ಒಂದು ಸೋಷಿಯಲ್​ ಮೀಡಿಯಾದಲ್ಲಿ ಹವಾ ಸೃಷ್ಟಿಸುತ್ತಿದೆ. ಆ ವಿಡಿಯೋದಲ್ಲಿರುವ ಮಹಿಳೆ ಮಾಡಿದ ಕೆಲಸಕ್ಕೆ ಜನರು ಹೊಗಳಿದ್ದಾರೆ. ತನಗಾದ ನೋವಿಗೆ ಮತ್ತು ತನ್ನ ಜೊತೆಗೆ ಕೆಲಸ ಮಾಡುವ ಇತರ ಮಹಿಳೆಯರ ನೋವಿಗೆ ಧ್ವನಿ ಆದ ಮಹಿಳೆಯ ವಿಡಿಯೋ ಭಾರೀ ಸದ್ದು ಮಾಡುತ್ತಿದೆ.

ಚೀನಾದಲ್ಲಿ ಮಹಿಳೆಯೊಬ್ಬರು ತನ್ನ ಕಚೇರಿಯ ಮ್ಯಾನೇಜರ್​ಗೆ ಮಾಬ್​ನಿಂದ(ನೆಲ ಸ್ವಚ್ಛಗೊಳಿಸುವ ಸಾಧನ) ಹೊಡೆದಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಸಖತ್​ ವೈರಲ್​ ಆಗಿದೆ. ಮಹಿಳೆ ಮಾಡಿರುವ ಕೆಲಸಕ್ಕೆ ಇದೀಗ ಸಾಕಷ್ಟು ಪ್ರಶಂಸೆಯ ಮಾತುಗಳು ಕೇಳಿ ಬಂದಿದೆ. ಅಷ್ಟಕ್ಕೂ ಈ ಮಹಿಳೆ ಮಾಬ್​ನಿಂದ ಹೊಡೆಯಲು ಕಾರಣ ಏನಿರಬಹುದು ಎಂಬುದನ್ನು ನೀವು ಕೇಳಿದರೆ ನಿಜಕ್ಕೂ ಕೋಪಗೊಳ್ಳುತ್ತೀರಿ. ಏನಿರಬಹುದು ಅವರಿಬ್ಬರ ನಡುವಿನ ಅಂತಹ ಕಲಹ?

ಚೀನಾದ ಸರ್ಕಾರಿ ಕಚೇರಿಯಲ್ಲಿ ಕೆಲಸ ಮಾಡುತ್ತಿದ್ದ ಮಹಿಳೆಗೆ ಆಕೆಯ ಕಚೇರಿ ಮ್ಯಾನೇಜರ್​ ಅಸಭ್ಯ ಸಂದೇಶವನ್ನು ಕಳುಹಿಸುತ್ತಿದ್ದ. ಈ ಕಾರಣಕ್ಕಾಗಿ ಮಹಿಳೆ ಮೊದಲಿಗೆ ಬಾತ್​ರೂಮ್​ನಲ್ಲಿ ತುಂಬಿಟ್ಟಿದ್ದ ಟಬ್​ನಿಂದ​ ನೀರನ್ನು ತೆಗೆದು ಆತನ ಮುಖಕ್ಕೆ ಎರಚುತ್ತಾಳೆ. ನಂತರ ಬಂದು ಮಾಬ್​ ಹಿಡಿದು ಮ್ಯಾನೇಜರ್​ಗೆ ಹೊಡೆಯುತ್ತಾಳೆ. ಇದಷ್ಟೂ ಸಂಗತಿಗಳನ್ನು ಮೊಬೈಲ್​ನಲ್ಲಿ ಸೆರೆ ಹಿಡಿಯಲಾಗಿದೆ. ಜೊತೆಗೆ ಮ್ಯಾನೇಜರ್​ ಕಳುಹಿಸಿದ ಅಸಭ್ಯ ಸಂದೇಶವನ್ನು ವಿಡಿಯೋದಲ್ಲಿ ಆಕೆ ಹೇಳಿದ್ದಾಳೆ.

ಅಷ್ಟೇ ಅಲ್ಲ, ಮ್ಯಾನೇಜರ್​ ಟೇಬಲ್​ ಮೇಲಿದ್ದ ಅಷ್ಟೂ ಪುಸ್ತಕದ ರಾಶಿಯನ್ನು ಸಿಟ್ಟಿನಿಂದ ಬಿಸಾಡುತ್ತಾಳೆ. ಮಾಬ್​ ಹಿಡಿದು ಹೊಡೆಯುತ್ತಿರುವ ದೃಶ್ಯವನ್ನು ಮತ್ತೊಂದು ಮಹಿಳೆ ಸೆರೆ ಹಿಡಿಯುವುದನ್ನು ಕಂಡ ಮ್ಯಾನೇಜರ್​ ತಲೆ ತಗ್ಗಿಸಿ ಮುಖ ಮುಚ್ಚಿಕೊಳ್ಳಲು ಪ್ರಯತ್ನಿಸುತ್ತಾನೆ ಮತ್ತು ಕ್ಷಮೆಯಾಚಿಸುತ್ತಾನೆ. ನಾನು ಜೋಕ್​ಗೆ ಕಳುಹಿಸಿರುವ ಸಂದೇಶ ಎಂದು ಮ್ಯಾನೇಜರ್​ ಸಮರ್ಥಿಸಿಕೊಳ್ಳಲು ಹೋದಾಗ, ಪಕ್ಕದಲ್ಲಿ ನಿಂತು ವಿಡಿಯೋ ಮಾಡುತ್ತಿದ್ದ ಮಹಿಳೆ ಇದು ತಮಾಷೆಯಾ? ಜೋಕ್​ ಆಗಲು ಹೇಗೆ ಸಾಧ್ಯ? ಎಂದು ಪ್ರಶ್ನಿಸಿದ್ದಾಳೆ. ಇದು ನಿಮ್ಮ ಕೆಟ್ಟ ಮನಸ್ಥಿತಿಯನ್ನು ತೋರ್ಪಡಿಸುತ್ತದೆ. ಕಚೇರಿಯ ಸಿಬ್ಬಂದಿಯ ಬಗ್ಗೆ ಎಂದಾದರೂ ಯೋಚಿಸಿದ್ದೀರಾ? ಎಂದು ಮಹಿಳೆ ಕೋಪದಿಂದ ವಾರ್ನಿಂಗ್​ ಮಾಡಿರುವ ದೃಶ್ಯ ಸೆರೆಯಾಗಿದೆ.

ಹಲವಾರು ಜನರಿಗೆ ಇವರು ಕರೆ ಮಾಡಿ ಕಿರುಕುಳ ನೀಡುತ್ತಿದ್ದಾರೆ. ಜೊತೆಗೆ ಕಚೇರಿಯ ಹೆಣ್ಣು ಮಕ್ಕಳಿಗೂ ಕಿರುಕುಳ ನೀಡುತ್ತಿದ್ದಾರೆ ಎಂದು ಮಹಿಳೆ ಹೇಳಿರುವುದನ್ನು ನೋಡಿದ ನೆಟ್ಟಿಗರು ಮಹಿಳೆ ಮಾಡಿದ ಕೆಲಸದ ಕುರಿತಾಗಿ ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ.