ಚಿತ್ರದುರ್ಗದಲ್ಲಿ ಮಹಾಗಣಪತಿ ಉತ್ಸವಕ್ಕೆ ನಗರ ದೇವತೆಗಳ ಮೆರುಗು: ಬರ ಪರಿಹಾರಕ್ಕೆ ಭಕ್ತರ ಪ್ರಾರ್ಥನೆ

ಕೋಟೆನಾಡು ಚಿತ್ರದುರ್ಗದಲ್ಲಿ ವಿಶ್ವ ಹಿಂದೂ ಪರಿಷತ್ ಮತ್ತು ಬಜರಂಗದಳ ಆಯೋಜಿಸಿರುವ ಹಿಂದೂ ಮಹಾಗಣಪತಿ ಉತ್ಸವಕ್ಕೆ ಈ ಬಾರಿ ವಿಶೇಷ ಮೆರುಗು ಬಂದಿದೆ. ಕಳೆದ ಇಪ್ಪತ್ತು ವರ್ಷಗಳಿಂದ ಸತತವಾಗಿ ನಡೆಯುತ್ತಿರುವ ಈ ಉತ್ಸವದ 20ನೇ ವರ್ಷಾಚರಣೆಯು ವಿಶಿಷ್ಟ ಆಚರಣೆಗೆ ಸಾಕ್ಷಿಯಾಗಿದೆ. ಈ ವರ್ಷದ ಪ್ರಮುಖ ಆಕರ್ಷಣೆಯೆಂದರೆ ನಗರದ 13 ದೇವತೆಗಳ, ಅಂದರೆ ನವದುರ್ಗಿಯರು ಸೇರಿದಂತೆ ಕಣಿವೆ ಮಾರಮ್ಮ, ಉಚ್ಚಂಗಿ ಯಲ್ಲಮ್ಮ, ಬರಗೇರಮ್ಮ, ಏಕನಾಥೇಶ್ವರಿ ಮುಂತಾದ ದೇವತೆಗಳ ದಿವ್ಯ ಮೆರವಣಿಗೆ. ಇಂದು ಬೆಳಗ್ಗೆ 9:30ಕ್ಕೆ ಸಿಹಿನೀರು ಹೊಂಡದಲ್ಲಿ ಗಂಗಾಪೂಜೆಯೊಂದಿಗೆ ಆರಂಭವಾದ ಈ ಮೆರವಣಿಗೆ, ಮುಖ್ಯ ರಸ್ತೆಯ ಮೂಲಕ ಜಯದೇವ ಕ್ರೀಡಾಂಗಣದಲ್ಲಿ ಪ್ರತಿಷ್ಠಾಪಿಸಲಾದ ಮಹಾಗಣಪತಿ ಮಂಟಪವನ್ನು ತಲುಪಿತು. ಬರಗಾಲದಿಂದ ಬಳಲುತ್ತಿರುವ ಜಿಲ್ಲೆಗೆ ಮಳೆಗಾಗಿ ದೇವಾನುದೇವತೆಗಳಿಗೆ ಭಕ್ತರು ಸಾಮೂಹಿಕವಾಗಿ ಪ್ರಾರ್ಥನೆ ಸಲ್ಲಿಸುತ್ತಿದ್ದಾರೆ. ಗಣಪನ ದರ್ಶನಕ್ಕೆ ಬರುವ ಭಕ್ತರಿಗೆ ಒಂದೇ ಸೂರಿನಡಿ ಇತರೆ ದೇವತೆಗಳ ದರ್ಶನವೂ ಲಭ್ಯವಾಗುತ್ತಿದ್ದು, ಜನಸಂದಣಿ ದುಪ್ಪಟ್ಟಾಗಿದೆ. ಈ ವಿಶೇಷ ಉತ್ಸವ ನಾಳೆ ಸಂಜೆಯವರೆಗೂ ಮುಂದುವರಿಯಲಿದೆ.

ಮತ್ತಷ್ಟು ವಿಡಿಯೋ ಸುದ್ದಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ