ಏಲಕ್ಕಿ ಮಾಲೆಗೆ ದೇಶ ವಿದೇಶಗಳಿಂದಲೂ ಡಿಮ್ಯಾಂಡ್: ಏಲಕ್ಕಿ ನಗರಿ ಎಂದು ಹಾವೇರಿಗೆ ಕರೆಯೋದ್ಯಾಕೆ?
Updated on: Sep 03, 2026 | 10:27 PM
ಹಾವೇರಿಯ ಏಲಕ್ಕಿ ಕಂಪಿನ ನಗರಿಯೆಂಬ ಹೆಸರು ಅದರ ಸುಪ್ರಸಿದ್ಧ ಏಲಕ್ಕಿ ಮಾಲೆಗಳಿಂದ ಬಂದಿದೆ. ಪಟೇಗಾರ್ ಕುಟುಂಬದ ಶತಮಾನಗಳ ಪರಂಪರೆಯ ಈ ಮಾಲೆಗಳು, ತಮ್ಮ ನೈಸರ್ಗಿಕ ಸುವಾಸನೆ ಮತ್ತು ಬಾಳಿಕೆಗೆ ಹೆಸರಾಗಿವೆ. ಗಣೇಶ ಚತುರ್ಥಿಯಂದು ದೇಶಾದ್ಯಂತ ಅಪಾರ ಬೇಡಿಕೆ ಇರುವ ಇವು, ಹಿಂದೂ-ಮುಸ್ಲಿಂ ಸೌಹಾರ್ದದ ಪ್ರತೀಕವೂ ಹೌದು.
ಹಾವೇರಿ, ಸೆಪ್ಟೆಂಬರ್ 03: ಉತ್ತರ ಕರ್ನಾಟಕದ ಹೆಬ್ಬಾಗಿಲು ಎಂದು ಕರೆಯಲ್ಪಡುವ ಹಾವೇರಿ ಜಿಲ್ಲೆಯು ಏಲಕ್ಕಿ ಕಂಪಿನ ನಗರಿ ಎಂಬ ಖ್ಯಾತಿ ಪಡೆದಿದೆ. ಶತಮಾನಗಳ ಹಿಂದೆ ಈ ಪ್ರದೇಶದ ಬೀದಿಗಳಲ್ಲಿ ಏಲಕ್ಕಿಯನ್ನು ಒಣಗಿಸುತ್ತಿದ್ದುದರಿಂದ, ಸುತ್ತಮುತ್ತಲ ವಾತಾವರಣವು ಸುವಾಸನೆಯಿಂದ ತುಂಬಿರುತ್ತಿತ್ತು. ಈ ವಿಶಿಷ್ಟ ಪರಂಪರೆಯು ಕಾಲಾನಂತರದಲ್ಲಿ ಏಲಕ್ಕಿ ಮಾಲೆಗಳ ತಯಾರಿಕೆಗೆ ನಾಂದಿ ಹಾಡಿತು. ಪಟೇಗಾರ್ ಕುಟುಂಬವು ಈ ಕಲೆಯ ಮೂಲವಾಗಿದೆ. ಬಂಗಾರದ ಕೆಲಸದಿಂದ ಏಲಕ್ಕಿ ಮಾಲೆ ತಯಾರಿಕೆಗೆ ತಿರುಗಿದ ಮೈದುಂಬಿ ಪಟೇಗಾರ್ ಅವರು ಈ ವೃತ್ತಿಗೆ ಅಡಿಪಾಯ ಹಾಕಿದರು. ಅವರ ಮಗ ಉಸ್ಮಾನ್ ಸಾಬ್ ಪಟೇಗಾರ್ ಮತ್ತು ಅವರ ಕುಟುಂಬದವರು ಇಂದು ಈ ಕಲಾ ವೃತ್ತಿಯನ್ನು ಮುಂದುವರಿಸಿಕೊಂಡು ಹೋಗುತ್ತಿದ್ದಾರೆ. ಹಾವೇರಿಯ ಏಲಕ್ಕಿ ಮಾಲೆಗಳು ತಮ್ಮ ನೈಸರ್ಗಿಕ ಸುವಾಸನೆ, ಬಾಳಿಕೆ ಮತ್ತು ಯಾವುದೇ ರಾಸಾಯನಿಕಗಳಿಲ್ಲದೆ ತಯಾರಾಗುವುದರಿಂದ ವಿಶ್ವದಾದ್ಯಂತ ಪ್ರಸಿದ್ಧಿ ಪಡೆದಿವೆ.
ವರದಿ: ಅಣ್ಣಪ್ಪ ಬಾರ್ಕಿ ಟಿವಿ9 ಹಾವೇರಿ
ಮತ್ತಷ್ಟು ವಿಡಿಯೋ ಸುದ್ದಿಗಳನ್ನು ನೋಡಲು ಇಲ್ಲಿ ಕ್ಲಿಕ್ ಮಾಡಿ.
