ಪೆಟ್ರೋಲ್​ ತುಂಬಿಸಿದ ಬಳಿಕ ಕೆಟ್ಟು ನಿಂತ ಕಾರು; ಚೆಕ್ ಮಾಡಿದಾಗ ಬಯಲಾಯ್ತು ವಂಚನೆಯ ಸತ್ಯ!

ಹೈದರಾಬಾದ್, ಸೆಪ್ಟೆಂಬರ್ 16: ಕಳೆದ ಹಲವು ದಿನಗಳಿಂದ ಪೆಟ್ರೋಲ್‌ನಲ್ಲಿ ಎಥೆನಾಲ್ ಮಿಶ್ರಣ ಮಾಡುವುದರಿಂದ ವಾಹನಗಳ ಎಂಜಿನ್‌ಗಳಿಗೆ ಹಾನಿಯಾಗಿದೆ ಎಂಬ ಆರೋಪಗಳು ಕೇಳಿಬರುತ್ತಿವೆ. ಸಾಮಾಜಿಕ ಮಾಧ್ಯಮಗಳಲ್ಲಿಯೂ ಜನರು ಎಥೆನಾಲ್ ಬಗ್ಗೆ ತಮ್ಮ ಅಸಮಾಧಾನ ವ್ಯಕ್ತಪಡಿಸಿದ್ದರು. ಆದರೆ, ಈಗ ಒಬ್ಬ ವ್ಯಕ್ತಿ ತಮ್ಮ ಕಾರಿಗೆ ಹಾಕಲಾದ ಪೆಟ್ರೋಲ್‌ನಲ್ಲಿ (Petrol) ನೀರು ಬೆರೆಸಿದ್ದಾರೆ ಎಂದು ಆರೋಪಿಸಿದ್ದಾರೆ. ಹೈದರಾಬಾದ್‌ನ ರಂಗಾರೆಡ್ಡಿ ಜಿಲ್ಲೆಯ ಶೇರಿಗುಡಾದಲ್ಲಿರುವ HPCL ಪೆಟ್ರೋಲ್ ಪಂಪ್‌ನಲ್ಲಿ ಈ ಘಟನೆ ಬೆಳಕಿಗೆ ಬಂದಿದೆ. ಮಹೇಶ್ ಎಂಬ ವ್ಯಕ್ತಿ ತನ್ನ ಬ್ರೆಜಾ ಕಾರಿನಲ್ಲಿ ಪೆಟ್ರೋಲ್ ತುಂಬಿಸಿಕೊಂಡಿದ್ದರು. ಅದಾದ ನಂತರ ಕಾರು ಸ್ಟಾರ್ಟ್ ಆಗಲಿಲ್ಲ. ಕಾರನ್ನು ಮೆಕ್ಯಾನಿಕ್ ಬಳಿಗೆ ತೆಗೆದುಕೊಂಡು ಹೋದಾಗ, ಮೆಕ್ಯಾನಿಕ್ ಪೆಟ್ರೋಲ್‌ನಲ್ಲಿ ನೀರು ಬೆರೆಸಲಾಗಿದೆ, ಇದರಿಂದಾಗಿ ಎಂಜಿನ್ ಹಾನಿಗೊಳಗಾಗಿದೆ ಎಂದು ಹೇಳಿದನು. ಇದಾದ ನಂತರ ಅವರು ಪೆಟ್ರೋಲ್ ಪಂಪ್‌ಗೆ ಹೋದರು. ಆದರೆ ನೌಕರರು ಅವರ ಆರೋಪವನ್ನು ನಿರಾಕರಿಸಿದರು.

ಕೊನೆಗೆ ಮಹೇಶ್ ತಮ್ಮ ಕಾರಿನಿಂದ ಬಾಟಲಿಯಲ್ಲಿ ನೀರು ಮಿಶ್ರಿತ ಪೆಟ್ರೋಲ್ ಅನ್ನು ತೆಗೆದುಕೊಂಡು ಪೆಟ್ರೋಲ್ ಪಂಪ್ ಸಿಬ್ಬಂದಿಗೆ ತೋರಿಸಿದರು. ಈ ಸಂದರ್ಭದಲ್ಲಿ ಗ್ರಾಹಕರು ಮತ್ತು ಪಂಪ್ ಸಿಬ್ಬಂದಿ ನಡುವೆ ವಾಗ್ವಾದ ನಡೆಯಿತು. ವಾಹನಗಳಿಗೆ ಹಾನಿ ಮಾಡುವ ಇಂಧನವನ್ನು ಪಂಪ್‌ನಿಂದ ಮಾರಾಟ ಮಾಡಲಾಗುತ್ತಿದೆ ಎಂದು ಅವರು ಆರೋಪಿಸಿದರು. ಇದು ಮೊದಲ ಘಟನೆಯಲ್ಲ ಎಂದು ಸ್ಥಳೀಯ ಜನರು ಹೇಳಿದ್ದಾರೆ. ಇದಕ್ಕೂ ಮೊದಲು, ಈ ಪಂಪ್‌ನಿಂದ ನೀರು ಮಿಶ್ರಿತ ಪೆಟ್ರೋಲ್ ಸೋರಿಕೆಯಾಗಿರುವ ಬಗ್ಗೆ ದೂರುಗಳು ಬಂದಿವೆ. ದೂರುಗಳಿದ್ದರೂ ಪೆಟ್ರೋಲ್ ಪಂಪ್ ಆಡಳಿತ ಮಂಡಳಿ ಯಾವುದೇ ಕ್ರಮ ಕೈಗೊಳ್ಳುತ್ತಿಲ್ಲ ಎಂದು ಜನರು ಆರೋಪಿಸಿದ್ದಾರೆ.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ