VIDEO: ನಿಜಕ್ಕೂ ಇದು ನೋ ಬಾಲಾ? ಇಲ್ಲಿದೆ ಉತ್ತರ
IPL 2025 RCB vs LSG: ಇಂಡಿಯನ್ ಪ್ರೀಮಿಯರ್ ಲೀಗ್ನ 70ನೇ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಲಕ್ನೋ ಸೂಪರ್ ಜೈಂಟ್ಸ್ ತಂಡವು 20 ಓವರ್ಗಳಲ್ಲಿ 227 ರನ್ ಕಲೆಹಾಕಿತು. ಈ ಗುರಿಯನ್ನು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ 18.4 ಓವರ್ಗಳಲ್ಲಿ ಚೇಸ್ ಮಾಡಿದೆ. ಈ ಮೂಲಕ ಆರ್ಸಿಬಿ 6 ವಿಕೆಟ್ಗಳ ಜಯ ಸಾಧಿಸಿದೆ.
ಐಪಿಎಲ್ನ 70ನೇ ಪಂದ್ಯವು ಹಲವು ನಾಟಕೀಯ ತಿರುವುಗಳಿಗೆ ಸಾಕ್ಷಿಯಾಗಿತ್ತು. ಲಕ್ನೋನ ಏಕಾನ ಸ್ಟೇಡಿಯಂನಲ್ಲಿ ನಡೆದ ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಲಕ್ನೋ ಸೂಪರ್ ಜೈಂಟ್ಸ್ ಪರ ರಿಷಭ್ ಪಂತ್ ಭರ್ಜರಿ ಶತಕ ಬಾರಿಸಿದ್ದರು. ವಿಶೇಷ ಎಂದರೆ ಕಳೆದ 12 ಪಂದ್ಯಗಳಲ್ಲಿ ಪಂತ್ ಕಡೆಯಿಂದ ನಿರೀಕ್ಷಿತ ಪ್ರದರ್ಶನವೇ ಮೂಡಿಬಂದಿರಲಿಲ್ಲ. ಆದರೆ ಕೊನೆಯ ಮ್ಯಾಚ್ನಲ್ಲಿ ಅಜೇಯ 118 ರನ್ ಬಾರಿಸಿದ್ದರು. ಈ ಮೂಲಕ ಲಕ್ನೋ ಸೂಪರ್ ಜೈಂಟ್ಸ್ 20 ಓವರ್ಗಳಲ್ಲಿ 227 ರನ್ ಕಲೆಹಾಕಿತು.
ಈ ಗುರಿಯನ್ನು ಬೆನ್ನತ್ತಿದ ಆರ್ಸಿಬಿ ಪರ ಜಿತೇಶ್ ಶರ್ಮಾ ಜವಾಬ್ದಾರಿಯುತ ಬ್ಯಾಟಿಂಗ್ ಪ್ರದರ್ಶಿಸಿದ್ದರು. ಆದರೆ ಕೊನೆಯ ಹಂತದಲ್ಲಿ ರಿವರ್ಸ್ ಸ್ವೀಪ್ ಶಾಟ್ ಬಾರಿಸಲು ಹೋಗಿ ಜಿತೇಶ್ ಕ್ಯಾಚ್ ನೀಡಿದ್ದರು. ಅದೃಷ್ಟವಶಾತ್ ಅದು ನೋ ಬಾಲ್ ಆಗಿತ್ತು. ದಿಗ್ವೇಶ್ ರಾಥಿ ಬ್ಯಾಕ್ ಫೂಟ್ ನೋ ಬಾಲ್ ಮಾಡಿದ್ದರಿಂದ ಜಿತೇಶ್ ಶರ್ಮಾಗೆ ಜೀವದಾನ ಲಭಿಸಿತು.
ಇದರ ಬೆನ್ನಲ್ಲೇ ದಿಗ್ವೇಶ್ ರಾಥಿ ಅವರ ಕಾಲು ಸೈಡ್ಲೈನ್ಗೆ ತಾಗಿಲ್ಲ ಎಂಬ ವಾದ ಕೂಡ ಸೋಷಿಯಲ್ ಮೀಡಿಯಾದಲ್ಲಿ ಕೇಳಿ ಬಂದಿದೆ. ಹಾಗಿದ್ರೆ, ನಿಜಕ್ಕೂ ಅದು ನೋ ಬಾಲ್ ಆಗಿತ್ತಾ? ಎಂದು ನೋಡುವುದಾದರೆ…
ಇಲ್ಲಿ ದಿಗ್ವೇಶ್ ರಾಥಿ ಅವರ ಶೂಸ್ನ ಸಣ್ಣ ಭಾಗ ರಿಟರ್ನ್ ಕ್ರೀಸ್ಗೆ (ಸೈಡ್ ಲೈನ್) ತಾಗಿದೆ. ಸೈಡ್ ನೋಬಾಲ್ ಎಂದು ಪರಿಗಣಿಸಲು ಲೈನ್ ದಾಟಬೇಕಿಲ್ಲ. ಅಂದರೆ ಸಾಮಾನ್ಯವಾಗಿ ಲೈನ್ ನೋ ಬಾಲ್ ನೀಡಬೇಕಿದ್ದರೆ ಬೌಲರ್ನ ಕಾಲು ಕ್ರೀಸ್ ದಾಟಿರಬೇಕು. ಆದರೆ ಸೈಡ್ ನೋಬಾಲ್ ವಿಷಯದಲ್ಲಿ ರಿಟರ್ನ್ ಕ್ರೀಸ್ಗೆ ಶೂಸ್ನ ಭಾಗ ತಾಗಿದರೆ ಸಾಕು. ಬದಲಾಗಿ ಕಾಲಿನ ಭಾಗ ಲೈನ್ ಅನ್ನು ದಾಟಬೇಕಾಗಿಲ್ಲ.
ಅದರಂತೆ 17ನೇ ಓವರ್ನ ಮೊದಲ ಎಸೆತದ ವೇಳೆ ದಿಗ್ವೇಶ್ ರಾಥಿ ಅವರ ಹಿಂಗಾಲಿನ ಕೆಲ ಭಾಗ ರಿಟರ್ನ್ ಕ್ರೀಸ್ಗೆ ತಾಗಿದೆ. ಹೀಗಾಗಿಯೇ ಮೂರನೇ ಅಂಪೈರ್ ಅದನ್ನು ನೋ ಬಾಲ್ ಎಂದು ಪರಿಗಣಿಸಿದ್ದಾರೆ.ಹಾಗಾಗಿ ಸೋಷಿಯಲ್ ಮೀಡಿಯಾದಲ್ಲಿ ಮಾಡುತ್ತಿರುವ ನೋ ಬಾಲ್ ಅಲ್ಲ ಎಂಬ ವಾದಕ್ಕೆ ಯಾವುದೇ ಹುರುಳಿಲ್ಲ.
ಇನ್ನು ಸೈಡ್ ನೋಬಾಲ್ನಿಂದ ಸಿಕ್ಕ ಜೀವದಾನವನ್ನು ಬಳಸಿಕೊಂಡ ಜಿತೇಶ್ ಶರ್ಮಾ ಮರು ಎಸೆತದಲ್ಲಿ ಭರ್ಜರಿ ಸಿಕ್ಸ್ ಸಿಡಿಸಿದರು. ಈ ಮೂಲಕ ಅರ್ಧಶತಕ ಪೂರೈಸಿದರು. ಅಲ್ಲದೆ ಅಂತಿಮವಾಗಿ 33 ಎಸೆತಗಳಲ್ಲಿ 85 ರನ್ ಬಾರಿಸಿ ಆರ್ಸಿಬಿ ತಂಡಕ್ಕೆ 6 ವಿಕೆಟ್ಗಳ ಜಯ ತಂದುಕೊಟ್ಟರು.