ಬೆಣ್ಣೆ ಹಳ್ಳದ ನೀರನ್ನು ಕೆರೆಗೆ ತುಂಬಿಸಲು ಹೊಸ ತಂತ್ರಜಾನ ಯುವ ರೈತನ ಅದ್ಭುತ ಸಾಧನೆ!
ನವಲಗುಂದದ ಯುವ ಕೃಷಿಕ ವೆಂಕಟೇಶ ರೆಡ್ಡಿ ಬೆಣ್ಣೆ ಹಳ್ಳದಿಂದ ಕೆರೆಗಳಿಗೆ ನೀರು ಹರಿಸಲು ನೂತನ ಪ್ರವಾಹ ರಹಿತ ತಂತ್ರಜ್ಞಾನ ಅಳವಡಿಸಿದ್ದಾರೆ. ಇದು ಸಾಂಪ್ರದಾಯಿಕ ಪಂಪ್‌ಸೆಟ್‌ಗಳು ಪ್ರವಾಹಕ್ಕೆ ಹಾಳಾಗುವುದನ್ನು ತಪ್ಪಿಸುತ್ತದೆ. ಕಡಿಮೆ ವೆಚ್ಚದಲ್ಲಿ ಅಳವಡಿಸಬಹುದಾದ ಈ ವ್ಯವಸ್ಥೆ, ದೂರದವರೆಗೆ ನಿರಂತರವಾಗಿ ನೀರು ಸಾಗಿಸುತ್ತದೆ. ಮಹಾರಾಷ್ಟ್ರ, ಆಂಧ್ರಪ್ರದೇಶದ ರೈತರೂ ಈ ನಾವೀನ್ಯತೆಯನ್ನು ವೀಕ್ಷಿಸಲು ಬರುತ್ತಿದ್ದಾರೆ.
ಧಾರವಾಡ, ನವೆಂಬರ್ 04: ಸಾಮಾನ್ಯವಾಗಿ ನದಿ ಅಥವಾ ಹಳ್ಳಗಳ ದಡದಲ್ಲಿರುವ ರೈತರು ತಮ್ಮ ಕೃಷಿ ಭೂಮಿಗೆ ನೀರು ಹರಿಸಲು ಪಂಪ್‌ಸೆಟ್‌ಗಳನ್ನು ಬಳಸುತ್ತಾರೆ. ಆದರೆ ಮಳೆಗಾಲದಲ್ಲಿ ಪ್ರವಾಹ ಬಂದಾಗ ಪಂಪ್‌ಸೆಟ್‌ಗಳು ನೀರಲ್ಲಿ ಮುಳುಗಿ ಹಾಳಾಗುವುದು ಅಥವಾ ಕೊಚ್ಚಿ ಹೋಗುವುದು ಸಾಮಾನ್ಯ. ಈ ಸಮಸ್ಯೆಗೆ ಪರಿಹಾರ ಕಂಡುಕೊಂಡಿದ್ದಾರೆ ಧಾರವಾಡ ಜಿಲ್ಲೆಯ ನವಲಗುಂದ ತಾಲೂಕಿನ ಸೊಟಕನಾಳ ಗ್ರಾಮದ ಯುವ ರೈತ ವೆಂಕಟೇಶ ರೆಡ್ಡಿ.
ವೆಂಕಟೇಶ ರೆಡ್ಡಿ ಅವರು 12 ಇಂಚಿನ ಪೈಪನ್ನು ಭೂಮಿಯಲ್ಲಿ ಹೂಳಿ, ಅದರಲ್ಲಿ ಸಬ್‌ಮರ್ಸಿಬಲ್ ಪಂಪ್ ಅಳವಡಿಸುವ ಮೂಲಕ ನೂತನ ತಂತ್ರಜ್ಞಾನವನ್ನು ರೂಪಿಸಿದ್ದಾರೆ. ಈ ಪಂಪ್‌ಸೆಟ್ ಪ್ರವಾಹಕ್ಕೆ ಸಿಲುಕಿದರೂ ಹಾನಿಯಾಗುವುದಿಲ್ಲ. ಇದರಿಂದ ಹೆಚ್ಚಿನ ಪ್ರಮಾಣದ ನೀರನ್ನು ನಿರಂತರವಾಗಿ, ಹೆಚ್ಚಿನ ಒತ್ತಡದಲ್ಲಿ 7-8 ಕಿಲೋಮೀಟರ್ ದೂರದವರೆಗೆ ಸಾಗಿಸಲು ಸಾಧ್ಯ. ಈ ತಂತ್ರಜ್ಞಾನದ ಮೂಲಕ ಕೆರೆಗಳನ್ನು ಕಡಿಮೆ ಸಮಯದಲ್ಲಿ ತುಂಬಿಸಬಹುದು.
ಕಂಪನಿಗಳ ಮೂಲಕ ಇಂತಹ ವ್ಯವಸ್ಥೆ ಅಳವಡಿಸಲು ಐದರಿಂದ ಹತ್ತು ಲಕ್ಷ ರೂಪಾಯಿ ಖರ್ಚಾದರೆ, ವೆಂಕಟೇಶ ರೆಡ್ಡಿ ಕೇವಲ ಒಂದರಿಂದ ಒಂದೂವರೆ ಲಕ್ಷ ರೂಪಾಯಿ ವೆಚ್ಚದಲ್ಲಿ ಇದನ್ನು ಸ್ವತಃ ಅಳವಡಿಸಿಕೊಂಡಿದ್ದಾರೆ. ಅವರು ತಮ್ಮ ಈ ತಂತ್ರಜ್ಞಾನವನ್ನು ಆಸಕ್ತ ರೈತರಿಗೆ ಉಚಿತವಾಗಿ ನೀಡಲು ಸಿದ್ಧರಿದ್ದಾರೆ. ಮಹಾರಾಷ್ಟ್ರ ಮತ್ತು ಆಂಧ್ರಪ್ರದೇಶದಿಂದಲೂ ರೈತರು ಈ ನಾವೀನ್ಯತೆಯನ್ನು ನೋಡಲು ಬರುತ್ತಿದ್ದು, ಇದು ರೈತರಿಗೆ ಅತ್ಯಂತ ಉಪಯುಕ್ತವಾದ ಸ್ಮಾರ್ಟ್ ಕೃಷಿ ತಂತ್ರಜ್ಞಾನವಾಗಿದೆ.
ಕರ್ನಾಟಕದ ಇನ್ನಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ