ಮದ್ವೆ ಮನೆಯಲ್ಲಿ ಕಳ್ಳರ ಕೈಚಳಕ: ಮದುವೆಗೆಂದು ಇಟ್ಟಿದ್ದ ಚಿನ್ನ, ಹಣ ದೋಚಿದ ಖದೀಮರು

ಬೆಂಗಳೂರು, (ನವೆಂಬರ್ 17): ಖದೀಮರು ಮದುವೆ ಮನೆಯಲ್ಲಿ ತಮ್ಮ ಕೈಚಳ ತೋರಿಸಿದ್ದಾರೆ. ಹೌದಯ..ಮದುವೆಗೆಂದು ಇಟ್ಟಿದ್ದ ನಗದು ಹಣ ಹಾಗೂ ಚಿನ್ನವನ್ನು ಕದ್ದುಕೊಂಡು ಪರಾರಿಯಾಗಿರುವ ಘಟನೆ ಬೆಂಗಳೂರು ಗ್ರಾಮಾಂತರ ಜಿಲ್ಲೆ ನೆಲಮಂಗಲ ತಾಲೂಕು ಟೀಚರ್ಸ್ ಲೇಔಟ್​ನಲ್ಲಿರುವ ಶಿವಣ್ಣ ಎಂಬುವವರ ಮನೆಯಲ್ಲಿ ನಡೆದಿದೆ. ನಿಶ್ಚಿತಾರ್ಥಕ್ಕೆಂದು ಎಲ್ಲರೂ ಮನೆಯಿಂದ ಕಲ್ಯಾಣ ಮಂಟಪಕ್ಕೆ ತೆರಳಿದ್ದರು. ಅದೇ ಸಮಯದಲ್ಲಿ ಇತ್ತ ಕಳ್ಳರು, ಮನೆಗೆ ನುಗ್ಗಿ ಮದುವೆಗೆಂದು ಇಟ್ಟಿದ್ದ 5 ಲಕ್ಷ ರೂಪಾಯಿ ನಗದು, 6 ಲಕ್ಷ ಮೌಲ್ಯದ 85 ಗ್ರಾಂ ಚಿನ್ನವನ್ನು ದೋಚಿಕೊಂಡು ಪರಾರಿಯಾಗಿದ್ದಾರೆ. ನಿಶ್ಚಿತಾರ್ಥ ಮುಗಿಸಿಕೊಂಡು ಕುಟುಂಬಸ್ಥರು ಮನೆಗೆ ಬಂದು ನೋಡಿದಾಗ ಕಳ್ಳತನವಾಗಿರುವುದು ಬೆಳಕಿಗೆ ಬಂದಿದೆ. ಕಳ್ಳರು ಮನೆ ಬಾಗಿಲು ಮುರಿದು ಎಲ್ಲಾವನ್ನೂ ದೋಚಿಕೊಂಡು ಹೋಗಿದ್ದಾರೆ. ಮದ್ವೆಗೆಂದು ಇಟ್ಟಿದ್ದ ಹಣ, ಚಿನ್ನ ಕಳೆದುಕೊಂಡು ಮನೆಮಂದಿ ಕಂಗಾಲಾಗಿದ್ದಾರೆ.