ರಸ್ತೆ ಪೂರ್ಣಗೊಳ್ಳುವ ಮೊದಲೇ ಸುಂಕ ವಸೂಲಾತಿ ವಿರೋಧಿಸಿ ವಾಶಿಮ್‌ನಲ್ಲಿ ಟೋಲ್ ಪ್ಲಾಜಾ ಧ್ವಂಸ

ಮುಂಬೈ, ಜುಲೈ 9: ರಸ್ತೆ ಕಾಮಗಾರಿ ಅಪೂರ್ಣವಾಗಿದ್ದರೂ ಟೋಲ್ ಸಂಗ್ರಹವಾಗಿದೆ ಎಂದು ಆರೋಪಿಸಿ ಮಹಾರಾಷ್ಟ್ರ ನವನಿರ್ಮಾಣ ಸೇನೆ (ಎಂಎನ್‌ಎಸ್) ಕಾರ್ಯಕರ್ತರು ಇಂದು (ಬುಧವಾರ) ವಾಶಿಮ್ ಜಿಲ್ಲೆಯ ಅಕೋಲಾ-ನಾಂದೇಡ್ ಹೆದ್ದಾರಿಯಲ್ಲಿರುವ ಟೋಂಡ್‌ಗಾಂವ್ ಟೋಲ್ ಪ್ಲಾಜಾವನ್ನು (Toll Plaza Vandalism) ಧ್ವಂಸಗೊಳಿಸಿದರು. ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿರುವ ಈ ಘಟನೆಯ ವಿಡಿಯೋದಲ್ಲಿ ಎಂಎನ್‌ಎಸ್ ಸದಸ್ಯರು ಹಗಲು ಹೊತ್ತಿನಲ್ಲಿ ಕಬ್ಬಿಣದ ರಾಡ್‌ಗಳನ್ನು ಬಳಸಿ ಟೋಲ್ ಬೂತ್‌ಗಳ ಗಾಜಿನ ಫಲಕಗಳನ್ನು ಒಡೆದುಹಾಕಿದ್ದಾರೆ. ಇದರಿಂದಾಗಿ ಟೋಲ್ ಪ್ಲಾಜಾಗೆ ಭಾರೀ ಹಾನಿಯಾಗಿದೆ.

ಹೆದ್ದಾರಿಯಲ್ಲಿನ ಕಳಪೆ ಮೂಲಸೌಕರ್ಯ ಮತ್ತು ಮೂಲಭೂತ ಸೌಕರ್ಯಗಳ ಕೊರತೆಯ ಬಗ್ಗೆ ದೀರ್ಘಕಾಲದ ದೂರುಗಳ ಪರಿಣಾಮವಾಗಿ ಈ ದಾಳಿ ನಡೆದಿದೆ ಎಂದು ಎಂಎನ್‌ಎಸ್ ವಾಶಿಮ್ ಜಿಲ್ಲಾಧ್ಯಕ್ಷ ರಾಜು ಪಾಟೀಲ್ ಕಿಡ್ಸೆ ತಿಳಿಸಿದ್ದಾರೆ. “ಟೋಲ್ ಪ್ಲಾಜಾದ ಆಚೆಗಿನ ರಸ್ತೆ ಬಳಕೆಗೆ ಸಿದ್ಧವಾಗಿಲ್ಲ, ಆದರೆ ಟೋಲ್ ಸಂಗ್ರಹ ಈಗಾಗಲೇ ಪ್ರಾರಂಭವಾಗಿದೆ. ಪದೇ ಪದೇ ಮನವಿ ಮಾಡಿದರೂ ಯಾವುದೇ ಕ್ರಮ ಕೈಗೊಳ್ಳಲಾಗಿಲ್ಲ. ಇದು ಸಂಪೂರ್ಣ ಶೋಷಣೆಯಾಗುತ್ತಿದೆ” ಎಂದು ಅವರು ಹೇಳಿದ್ದಾರೆ.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ