640 ಮಂದಿಯನ್ನು ಒಂದೇ ಬಾರಿಗೆ ಅಫ್ಘಾನ್ನಿಂದ ಕತಾರ್ಗೆ ಸಾಗಿಸಿದ ಯುಎಸ್ ಮಿಲಿಟರಿ ವಿಮಾನ; ಮನಕಲಕುವ ದೃಶ್ಯ
ಅಫ್ಘಾನಿಸ್ತಾನದ ನಿವಾಸಿಗಳು ಸಿಕ್ಕಸಿಕ್ಕ ವಿಮಾಗಳಿಗೆ ಜೋತು ಬಿದ್ದಾದರೂ ಪರವೂರಿಗೆ ಹೋಗಲು ಪರದಾಡುತ್ತಿದ್ದಾರೆ. ಇನ್ನೊಂದೆಡೆ ಅಫ್ಘಾನಿಸ್ತಾನವನ್ನು ಆಕ್ರಮಿಸಿಕೊಂಡ ತಾಲಿಬಾನ್ ಉಗ್ರರು ಸಿಕ್ಕಾಪಟೆ ಎಂಜಾಯ್ ಮಾಡುತ್ತಿದ್ದಾರೆ.
Updated on:Aug 17, 2021 | 12:34 PM
ತಾಲಿಬಾನ್ ಉಗ್ರರ ಹಿಡಿತದಲ್ಲಿರುವ ಅಪ್ಘಾನಿಸ್ತಾನ (Afghanistan)ದಿಂದ ಅನೇಕಾನೇಕ ಜನರು ಪಾರಾಗಲು ಇನ್ನಿಲ್ಲದ ಪ್ರಯತ್ನ ಮಾಡುತ್ತಿದ್ದಾರೆ. ಹಾಗೇ, ಇದೀಗ ಕಾಬೂಲ್ (Kabul)ನಿಂದ ಹೇಗಾದರೂ ಬೇರೆಡೆಗೆ ಹೋಗಬೇಕು ಎಂಬ ಕಾರಣಕ್ಕೆ ಯುಎಸ್ನ ಮಿಲಿಟರಿ ಸರಕು ವಿಮಾನವೊಂದರಲ್ಲಿ ಬರೋಬ್ಬರಿ 640 ಅಫ್ಘಾನಿಗಳು ತುಂಬಿರುವ ಫೋಟೋ ವೈರಲ್ ಆಗಿದೆ. ಯುಎಸ್ನ ರಕ್ಷಣಾ ಮತ್ತು ಭದ್ರತಾ ಸುದ್ದಿ ತಾಣವಾಗಿರುವ ಡಿಫೆನ್ಸ್ ಒನ್ನಿಂದ ಫೋಟೋ ಪ್ರಕಟಿಸಿದೆ. ಅಮೆರಿಕದ C-17 Globemaster III ಸರಕು ವಿಮಾನ ಇದಾಗಿದೆ. ಈ ವಿಮಾನದಲ್ಲಿ ಇಷ್ಟು ದೊಡ್ಡ ಸಂಖ್ಯೆಯಲ್ಲಿ ಪ್ರಯಾಣಿಕರನ್ನು ಹೊತ್ತೊಯ್ದಿದ್ದು ಇದೇ ಮೊದಲು ಎಂದು ಯುಎಸ್ ಭದ್ರತಾ ಪಡೆ ಅಧಿಕಾರಿಗಳು ಹೇಳಿದ್ದಾರೆ. ಹಾಗೇ, ವಿಮಾನದಲ್ಲಿದ್ದ ಮಹಿಳೆಯರು, ಮಕ್ಕಳು ಸೇರಿ ಎಲ್ಲರನ್ನೂ ಕತಾರ್ಗೆ ಸುರಕ್ಷಿತವಾಗಿ ಸ್ಥಳಾಂತರಿಸಲಾಗಿದೆ ಎಂದೂ ತಿಳಿಸಿದ್ದಾರೆ.
C-17 ಸರಕು ವಿಮಾನದಲ್ಲಿ ಇಷ್ಟೆಲ್ಲ ಜನರನ್ನು ಸಾಗಿಸುವ ಯೋಜನೆ ಇರಲಿಲ್ಲ. ಆದರೆ ಅಫ್ಘಾನಿಸ್ತಾನದ ಜನರು ತುಂಬ ಗಾಬರಿಯಾಗಿದ್ದಾರೆ. ವಿಮಾನ ಕಾಣುತ್ತಿದ್ದಂತೆ ನೂಕು-ನುಗ್ಗಲಿನಿಂದ ಹತ್ತಿಕುಳಿತಿದ್ದಾರೆ ಎಂದು ಯುಎಸ್ ಡಿಫೆನ್ಸ್ ಒನ್ ಸುದ್ದಿ ತಾಣ ವರದಿ ಮಾಡಿದೆ. ಹೀಗೆ ಸೀಟುಗಳಿಲ್ಲದ ಕಾರ್ಗೋ ವಿಮಾನದಲ್ಲಿ ಅಫ್ಘಾನರು ಬೆಚ್ಚಗೆ ಕುಳಿತ ಫೋಟೋ ನೋಡಿದರೆ ಎಂಥ ಕಲ್ಲುಮನಸಾದರೂ ಕರಗದೆ ಇರದು.
ಹೀಗೆ ಅಫ್ಘಾನಿಸ್ತಾನದ ನಿವಾಸಿಗಳು ಸಿಕ್ಕಸಿಕ್ಕ ವಿಮಾಗಳಿಗೆ ಜೋತು ಬಿದ್ದಾದರೂ ಪರವೂರಿಗೆ ಹೋಗಲು ಪರದಾಡುತ್ತಿದ್ದಾರೆ. ಇನ್ನೊಂದೆಡೆ ಅಫ್ಘಾನಿಸ್ತಾನವನ್ನು ಆಕ್ರಮಿಸಿಕೊಂಡ ತಾಲಿಬಾನ್ ಉಗ್ರರು ಸಿಕ್ಕಾಪಟೆ ಎಂಜಾಯ್ ಮಾಡುತ್ತಿದ್ದಾರೆ. ಸಂಸತ್ತಿಗೆ ಹೋಗಿ ಕುಳಿತಿದ್ದಾರೆ. ಮನರಂಜನಾ ಪಾರ್ಕ್ನಲ್ಲಿ ಮಸ್ತಿಯಲ್ಲಿ ತೊಡಗಿದ್ದಾರೆ. ಮನುಕುಲದ ವ್ಯತಿರಿಕ್ತ ತೋರಿಸುವ ಸನ್ನಿವೇಶಗಳು ಸ್ಪಷ್ಟವಾಗಿ ಗೋಚರಿಸುತ್ತಿವೆ.
ಅಫ್ಘಾನಿಸ್ತಾನವನ್ನು ತಾಲಿಬಾನ್ ಸಂಪೂರ್ಣವಾಗಿ ನಿಯಂತ್ರಣಕ್ಕೆ ತೆಗೆದುಕೊಂಡ ಮೇಲೆ ಅಲ್ಲಿಂದ ಬೇರೆ ದೇಶಗಳಿಗೆ ಹೋಗುವವರ ಸಂಖ್ಯೆ ಹೆಚ್ಚಾಗಿದೆ. ಈ ಕಾರಣಕ್ಕೆ ಕಾಬೂಲ್ನ ಏರ್ಪೋರ್ಟ್ನಲ್ಲಿ ಸಿಕ್ಕಾಪಟೆ ಅವ್ಯವಸ್ಥೆ ಉಂಟಾಗಿದೆ. ಮೊನ್ನೆ ಕಾಬೂಲ್ನ ವಿಮಾನ ನಿಲ್ದಾಣದಲ್ಲಿ ತಾಲಿಬಾನಿಗಳು ಉಗ್ರರ ದಾಳಿ ನಡೆಸಿದ್ದರು. ಅದಾದ ಮೇಲೆ ಇಬ್ಬರು ಅಫ್ಘಾನಿಗಳು ವಿಮಾನದ ಚಕ್ರದ ಮೇಲೆ ಕುಳಿತು, ಅದು ಮೇಲೆ ಹಾರುತ್ತಿದ್ದಂತೆ ಕೆಳಗೆ ಬಿದ್ದು ಮೃತಪಟ್ಟಿದ್ದರು. ಆ ಭಯನಾಕ ದೃಶ್ಯ ಕೂಡ ವೈರಲ್ ಆಗಿತ್ತು.
ಇದನ್ನೂ ಓದಿ: ನೆಲಮಂಗಲಕ್ಕೆ ಆಗಮಿಸಿದ ಕೇಂದ್ರ ಸಚಿವ ಎ.ನಾರಾಯಣಸ್ವಾಮಿ; ಕೊವಿಡ್ ನಿಯಮ ಉಲ್ಲಂಘಿಸಿ ಸಚಿವರಿಗೆ ಸ್ವಾಗತ
‘ವಿಶ್ವವೇ ವಿಫಲವಾಗಿದೆ’ ಕಣ್ಣೀರಿನಲ್ಲಿರುವ ಅಫ್ಘಾನಿ ಹುಡುಗಿಯ ಹೃದಯ ವಿದ್ರಾವಕ ವಿಡಿಯೋ ವೈರಲ್
(640 Afghans packed in one US military plane to escape from Afghanistan)
Published On - 11:46 am, Tue, 17 August 21
