ವಾಷಿಂಗ್ಟನ್: ಕ್ಯಾಪಿಟೊಲ್ನಲ್ಲಿ ಬಾಂಬ್ ಬೆದರಿಕೆ, ದೂರ ಹೋಗುವಂತೆ ಪತ್ರಕರ್ತರಿಗೆ ಪೊಲೀಸರ ಸೂಚನೆ
ಅಮೆರಿಕದ ಜನಪ್ರತಿನಿಧಿಗಳ ಸಭೆ ನಡೆಯುವ ವಾಷಿಂಗ್ಟನ್ನ ಕ್ಯಾಪಿಟೊಲ್ ಪ್ರದೇಶದಲ್ಲಿ ಬಾಂಬ್ ಬೆದರಿಕೆ ಇದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ವಾಷಿಂಗ್ಟನ್: ಅಮೆರಿಕದ ಜನಪ್ರತಿನಿಧಿಗಳ ಸಭೆ ನಡೆಯುವ ವಾಷಿಂಗ್ಟನ್ನ ಕ್ಯಾಪಿಟೊಲ್ ಪ್ರದೇಶದಲ್ಲಿ ಬಾಂಬ್ ಬೆದರಿಕೆ ಇದೆ ಎಂದು ಪೊಲೀಸರು ತಿಳಿಸಿದ್ದಾರೆ. ತನಿಖೆ ಪ್ರಗತಿಯಲ್ಲಿದ್ದು, ಪತ್ರಕರ್ತರು ಕಾಂಗ್ರೆಸ್ (ಅಮೆರಿಕದ ಜನಪ್ರತಿನಿಧಿ ಸಭೆ) ಗ್ರಂಥಾಲಯದ ಆಸುಪಾಸಿನಲ್ಲಿ ಓಡಾಡಬಾರದು ಎಂದು ಕ್ಯಾಪಿಟೊಲ್ ಪೊಲೀಸರು ಟ್ವೀಟ್ ಮೂಲಕ ಮನವಿ ಮಾಡಿದ್ದಾರೆ.
ಕ್ಯಾಪಿಟೊಲ್ ಕಟ್ಟಡದ ಸಮೀಪ ಅನುಮಾನಾಸ್ಪದ ವಾಹನವೊಂದು ನಿಂತಿರುವುದನ್ನು ಗಮನಿಸಿದ ಪೊಲೀಸರು ತಕ್ಷಣ ಎಚ್ಚರಿಕೆಯ ಸಂದೇಶ ರವಾನಿಸಿದರು. ಸ್ಫೋಟಕಗಳು ಇರಬಹುದು ಎಂಬ ಶಂಕೆಯಿಂದ ಕಾಂಗ್ರೆಸ್ ಕಟ್ಟಡದ ಗ್ರಂಥಾಲಯದಲ್ಲಿಯೂ ಪೊಲೀಸರು ತಪಾಸಣೆ ನಡೆಸುತ್ತಿದ್ದಾರೆ. ಎಫ್ಬಿಐ (Federal Bureau of Investigation – FBI) ಏಜೆಂಟ್ಗಳೂ ಸ್ಥಳಕ್ಕೆ ಧಾವಿಸಿದ್ದು, ಪೊಲೀಸರಿಗೆ ನೆರವು ನೀಡುತ್ತಿದ್ದಾರೆ.
ಸಜೀವ ಬಾಂಬ್ ಇರಬಹುದು ಎಂಬ ಶಂಕೆಯಿಂದ ನಾವು ತನಿಖೆ ನಡೆಸುತ್ತಿದ್ದೇವೆ ಎಂದು ಪೊಲೀಸರು ಹೇಳಿದ್ದಾರೆ. ಒಂದು ಪಿಕ್ಅಪ್ ಟ್ರಕ್ನಲ್ಲಿ ಬಂದಿದ್ದ ವ್ಯಕ್ತಿಯೊಬ್ಬ ಬಾಂಬ್ ಇದೆ ಎಂಬ ಸಂದೇಶವನ್ನು ಪೊಲೀಸರಿಗೆ ನೀಡಿದ್ದ. ಬಾಂಬ್ ಬೆದರಿಕೆ ಹಿನ್ನೆಲೆಯಲ್ಲಿ ಅಮೆರಿಕದ ಕಾನೂನು ಜಾರಿ ಇಲಾಖೆ ಮತ್ತು ಎಫ್ಬಿಐ ಸಾಕಷ್ಟು ಸಿಬ್ಬಂದಿಯನ್ನು ಬೆದರಿಕೆ ಕರೆ ಮಾಡಿದ ವ್ಯಕ್ತಿಯ ಪತ್ತೆಗಾಗಿ ನಿಯೋಜಿಸಿವೆ.
ಕಾಂಗ್ರೆಸ್ನ ಮುಖ್ಯ ಕಟ್ಟಡದಿಂದ ಈಗಾಗಲೇ ಎಲ್ಲರನ್ನೂ ದೂರ ಕಳಿಸಲಾಗಿದೆ. ಸೆನೆಟ್ ಕಟ್ಟಡದ ಭದ್ರತೆಯನ್ನು ಹೆಚ್ಚಿಸಲಾಗಿದೆ. ಹತ್ತಿರದಲ್ಲಿಯೇ ಇರುವ ರಿಪಬ್ಲಿಕನ್ ನ್ಯಾಷನಲ್ ಕಮಿಟಿ ಮುಖ್ಯ ಕಚೇರಿಯಿಂದ ಎಲ್ಲರನ್ನೂ ಹೊರಗೆ ಕಳಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಕಳೆದ ಜನವರಿಯಲ್ಲಿ ಟ್ರಂಪ್ ಬೆಂಬಲಿಗರು ತಮ್ಮ ನಾಯಕನ ಸೋಲು ಖಚಿತವಾದ ನಂತರ ಕ್ಯಾಪಿಟೊಲ್ ಕಟ್ಟಡಕ್ಕೆ ನುಗ್ಗಿ ತಲಾಟೆ ಮಾಡಿದ್ದರು. ಅದಾದ ನಂತರ ಕ್ಯಾಪಿಟೊಲ್ ಹೆಸರು ಜಗತ್ತಿನಲ್ಲಿ ಚಿರಪರಿಚಿತವಾಗಿತ್ತು.
MEDIA ALERT: This is an active bomb threat investigation. The staging area for journalists covering this situation is at Constitution and First Street, NW for your safety.
Please continue to avoid the area around the Library of Congress. pic.twitter.com/jTNVaBmVwR
— U.S. Capitol Police (@CapitolPolice) August 19, 2021
(Bomb Threat in Capitol of Washington Police Rushed to spot)
ಇದನ್ನೂ ಓದಿ: ಅಮೆರಿಕ ಕ್ಯಾಪಿಟಲ್ ದಾಳಿ ಪ್ರಕರಣ: 100ಕ್ಕೂ ಹೆಚ್ಚು ಜನರ ಬಂಧನ, 200 ಶಂಕಿತರ ಗುರುತು ಪತ್ತೆ
Published On - 9:11 pm, Thu, 19 August 21