Mad Cow Disease: ಬ್ರೆಜಿಲ್​ನಿಂದ ಚೀನಾಕ್ಕೆ ಗೋಮಾಂಸ ರಫ್ತು ಸ್ಥಗಿತ; ‘ಮ್ಯಾಡ್ ಕೌ’ ರೋಗ ಎಂದರೇನು?

ಬ್ರೆಜಿಲ್: ಬ್ರೆಜಿಲ್​ನ ರಾಜ್ಯವೊಂದರಲ್ಲ ಮ್ಯಾಡ್ ಕೌ ಕಾಯಿಲೆ (mad cow disease) ದೃಢಪಟ್ಟ ನಂತರ ಬ್ರೆಜಿಲ್ (Brazil) ಇಂದಿನಿಂದ (ಫೆಬ್ರವರಿ 23) ಚೀನಾಕ್ಕೆ ಗೋಮಾಂಸ ರಫ್ತು (Brazil’s beef exports) ಸ್ಥಗಿತಗೊಳಿಸಲಿದೆ ಎಂದು ದೇಶದ ಕೃಷಿ ಮತ್ತು ಜಾನುವಾರು ಸಚಿವಾಲಯ ತಿಳಿಸಿದೆ ಎಂದು ರೂಟರ್ಸ್ ಸುದ್ದಿ ಸಂಸ್ಥೆ ತಿಳಿಸಿದೆ. ಹಿಂದೆ ಚೀನಾ ಮತ್ತು ಬ್ರೆಜಿಲ್ ನಡುವೆ ಒಪ್ಪಿಕೊಂಡ ಪ್ರಾಣಿಗಳ ಆರೋಗ್ಯ ಒಪ್ಪಂದದ ಭಾಗವಾಗಿ ರಫ್ತು ಸ್ಥಗಿತಗೊಳಿಸಲಾಗಿದೆ. ಇದು ತಾತ್ಕಾಲಿಕವಾಗಿರಬಹುದು ಎಂದು ನಿರೀಕ್ಷಿಸಲಾಗಿದೆ. ಚೀನಾ ಬ್ರೆಜಿಲ್‌ನ ಗೋಮಾಂಸ ರಫ್ತಿಗೆ ಪ್ರಮುಖ ತಾಣವಾಗಿರುವುದರಿಂದ ಬ್ರೆಜಿಲ್ ರೈತರಿಗೆ ಹೊಡೆತಬಿದ್ದಿದೆ.

ಬ್ರೆಜಿಲ್ ಸಚಿವ ಕಾರ್ಲೋಸ್ ಫಾವರೊ, “ಈಗಾಗಲೇ ಎಲ್ಲಾ ಕ್ರಮಗಳನ್ನು ತೆಗೆದುಕೊಳ್ಳಲಾಗುತ್ತಿದೆ. ಬ್ರೆಜಿಲಿಯನ್ ಮತ್ತು ಜಾಗತಿಕ ಗ್ರಾಹಕರಿಗೆ ನಮ್ಮ ಮಾಂಸದ ಮಾನ್ಯತೆ ಗುಣಮಟ್ಟವನ್ನು ಖಾತರಿಪಡಿಸಲು ಸಂಪೂರ್ಣ ಪಾರದರ್ಶಕತೆಯೊಂದಿಗೆ ತನಿಖೆಯ ಹಂತಗಳನ್ನು ನಿರ್ವಹಿಸಲಾಗುತ್ತಿದೆ” ಎಂದು ಹೇಳಿದರು. “ಇದು ಪ್ರಕೃತಿಯಲ್ಲಿ ಸ್ವಯಂಪ್ರೇರಿತವಾಗಿ ಕಾಣಿಸಿಕೊಳ್ಳುವ ರೋಗ. ಈ ರೋಗ ಹಿಂಡಿಗೆ ಅಥವಾ ಮಾನವರಿಗೆ ಹರಡುವುದಿಲ್ಲ” ಎಂದು ಪ್ಯಾರಾ ರಾಜ್ಯದ ಕೃಷಿ ರಕ್ಷಣಾ ಸಂಸ್ಥೆ ಹೇಳಿದೆ.

ಇದು ಸ್ವತಃ ಮ್ಯಾಡ್ ಕೌ ರೋಗವಾ ಅಥವಾ ಅದರ ರೂಪತರಿಯೇ ಎಂಬುದನ್ನು ದೃಢೀಕರಿಸಲು ಕೆನಡಾದ ಆಲ್ಬರ್ಟಾದಲ್ಲಿರುವ ವರ್ಲ್ಡ್ ಆರ್ಗನೈಸೇಶನ್ ಫಾರ್ ಅನಿಮಲ್ ಹೆಲ್ತ್ ಲ್ಯಾಬ್‌ಗೆ ಮಾದರಿಗಳನ್ನು ಕಳುಹಿಸಲಾಗಿದೆ. 2021 ರಲ್ಲಿ, ಇದೇ ರೋಗದ ಎರಡು ಪ್ರಕರಣಗಳು ಚೀನಾದಲ್ಲಿ ಕಾಣಿಸಿಕೊಂಡಿತ್ತು. ಇದರಿಂದ ಗೋಮಾಂಸ ರಫ್ತುನ್ನು ಮೂರು ತಿಂಗಳಿಗಿಂತ ಹೆಚ್ಚು ಕಾಲ ಸ್ಥಗಿತಗೊಳಿಸಲಾಗಿತ್ತು.

ಮ್ಯಾಡ್ ಕೌ ಕಾಯಿಲೆ ಎಂದರೇನು?

ಬೋವಿನ್ ಸ್ಪಾಂಜಿಫಾರ್ಮ್ ಎನ್ಸೆಫಲೋಪತಿ (BSE) ಎಂದೂ ಕರೆಯಲ್ಪಡುವ ಮ್ಯಾಡ್ ಕೌ ಕಾಯಿಲೆಯು ಕ್ಷೀಣಗೊಳ್ಳುವ, ಹರಡುವ, ನಿಧಾನವಾಗಿ ಪ್ರಗತಿಶೀಲ ಮತ್ತು ವಯಸ್ಕ ಜಾನುವಾರುಗಳ ಕೇಂದ್ರ ನರಮಂಡಲದ ಮೇಲೆ ಪರಿಣಾಮ ಬೀರುವ ಮಾರಣಾಂತಿಕ ಸೋಂಕು.

ಮೂಲಭೂತವಾಗಿ, ಸಂಶೋಧನೆಯ ಪ್ರಕಾರ ಪ್ರಿಯಾನ್ ಎಂದು ಕರೆಯಲ್ಪಡುವ ಜೀವಕೋಶದ ಮೇಲ್ಮೈಗಳಲ್ಲಿ ಕಂಡುಬರುವ ಪ್ರೋಟೀನ್‌ನ ಅಸಹಜ ಆವೃತ್ತಿಯಿದು. ಈ ಪ್ರೋಟೀನ್​ಗಳು ಬದಲಾದ ನಂತರ ಮೆದುಳು ಮತ್ತು ಬೆನ್ನುಹುರಿಯ ನರಮಂಡಲದ ಅಂಗಾಂಶವನ್ನು ನಾಶಮಾಡುತ್ತವೆ.

ಹಸುಗಳಲ್ಲಿ ಕಾಣಸಿಗುವ ಬಿಎಸ್ಇ ರೋಗದ ಗುಣಲಕ್ಷಣಗಳೇನು?

ಅಮೆರಿಕಾದ ಫುಡ್ ಅಂಡ್ ಡ್ರಗ್ ಅಡ್ಮಿನಿಸ್ಟ್ರೇಷನ್ ಪ್ರಕಾರ, ಹಸುಗಳಲ್ಲಿ ಬಿಎಸ್ಇ ರೋಗ ಇದ್ದಲ್ಲಿ ಅವುಗಳಲ್ಲಿ ಸಾಮಾನ್ಯ ಅಸಮನ್ವಯತೆಯನ್ನು ಕಾಣಬಹುದು. ಅನಾರೋಗ್ಯದ ಹಸುಗೆ ನಡೆಯಲು ಮತ್ತು ಎದ್ದೇಳಲು ತೊಂದರೆಯಾಗುತ್ತದೆ ಅಥವಾ ಹಿಂಸಾತ್ಮಕವಾಗಿ ವರ್ತಿಸಬಹುದು, ಅದಕ್ಕಾಗಿಯೇ BSE ಅನ್ನು ಸಾಮಾನ್ಯವಾಗಿ “ಹುಚ್ಚು ಹಸು ಕಾಯಿಲೆ” ಅಥವಾ ‘ಮ್ಯಾಡ್ ಕೌ’ ರೋಗ ಎಂದು ಕರೆಯಲಾಗುತ್ತದೆ..

ಹಸು ಅಸಹಜ ಪ್ರಿಯಾನ್ ಸೋಂಕಿಗೆ ಒಳಗಾದ ಸಮಯದಿಂದ ಅದು ಬಿಎಸ್‌ಇ ರೋಗಲಕ್ಷಣಗಳನ್ನು ತೋರಿಸಲು ಸಾಮಾನ್ಯವಾಗಿ ನಾಲ್ಕರಿಂದ ಆರು ವರ್ಷಗಳನ್ನು ತೆಗೆದುಕೊಳ್ಳುತ್ತದೆ. ಈ ಅವಧಿಯಲ್ಲಿ, ಹಸುವಿಗೆ ಬಿಎಸ್‌ಇ ಇದೆ ಎಂದು ಯಾರಿಗೂ ಊಹಿಸಲು ಸಾಧ್ಯವಾಗುವುದಿಲ್ಲ.

ಹಸು ಒಮ್ಮೆ ರೋಗಲಕ್ಷಣಗಳನ್ನು ತೋರಿಸಲು ಪ್ರಾರಂಭಿಸಿದರೆ, ಅದು ಸಾಯುವವರೆಗೂ ಅನಾರೋಗ್ಯಕ್ಕೆ ಒಳಗಾಗುತ್ತದೆ, ಸಾಮಾನ್ಯವಾಗಿ ಎರಡು ವಾರಗಳಿಂದ ಆರು ತಿಂಗಳೊಳಗೆ ಅದು ಸಾಯುತ್ತದೆ. ಬಿಎಸ್‌ಇಗೆ ಯಾವುದೇ ಚಿಕಿತ್ಸೆ ಅಥವಾ ತಡೆಯಲು ಯಾವುದೇ ಲಸಿಕೆ ಇಲ್ಲ.

ಇದನ್ನು ಓದಿ: Russia Ukraine War: ರಷ್ಯಾ ಉಕ್ರೇನ್ ಯುದ್ಧಕ್ಕೆ ಒಂದು ವರ್ಷ, ನೆನಪಿಸುತ್ತಿದೆ ಈ ಭಯಾನಕ ಚಿತ್ರಣ

ಮ್ಯಾಡ್ ಕೌ ಕಾಯಿಲೆ ಏಕೆ ಬರುತ್ತದೆ?

ಹೆಚ್ಚಿನ ವಿಜ್ಞಾನಿಗಳು ಬಿಎಸ್‌ಇಯು ಪ್ರಿಯಾನ್ ಎಂಬ ಪ್ರೋಟೀನ್‌ನಿಂದ ಉಂಟಾಗುತ್ತದೆ ಎಂದು ಭಾವಿಸುತ್ತಾರೆ. ಸಾಮಾನ್ಯ ಪ್ರಿಯಾನ್ ಪ್ರೋಟೀನ್ ಹಾನಿಕಾರಕ ಪ್ರಿಯಾನ್ ಪ್ರೋಟೀನ್ ಆಗಿ ಬದಲಾಗುತ್ತದೆ. ಅನಾರೋಗ್ಯದ ಹಸುವಿನ ದೇಹದಲ್ಲಿ ಅಸಹಜ ಪ್ರಿಯಾನ್ ಇದೆ ಎಂದು ಸಹ ತಿಳಿದಿರುವುದಿಲ್ಲ. ಅದು ಇದೆ ಎಂದು ತಿಳಿಯದೆ, ಹಸುವಿನ ದೇಹವು ರೋಗದ ವಿರುದ್ಧ ಹೋರಾಡಲು ಸಾಧ್ಯವಿಲ್ಲ.

ಹಸುವಿನಲ್ಲಿ ಬಿಎಸ್ಇ ಪರೀಕ್ಷೆ ಮಾಡುವುದು ಹೇಗೆ?

ಸದ್ಯಕ್ಕೆ ಹಸುಗಳಲ್ಲಿ ಬಿಎಸ್‌ಇ ಪರೀಕ್ಷಿಸಲು ಯಾವುದೇ ವಿಶ್ವಾಸಾರ್ಹ ಮಾರ್ಗವಿಲ್ಲ. ಯುಎಸ್‌ಎಫ್‌ಡಿಎ ವರದಿಗಳ ಪ್ರಕಾರ, ಹಸು ಸತ್ತ ನಂತರ, ವಿಜ್ಞಾನಿಗಳು ಅದರ ಮಿದುಳಿನ ಅಂಗಾಂಶವನ್ನು ಸೂಕ್ಷ್ಮದರ್ಶಕದ ಅಡಿಯಲ್ಲಿ ನೋಡುವ ಮೂಲಕ ಅದು ಬಿಎಸ್‌ಇ ಹೊಂದಿದೆಯೇ ಎಂದು ಹೇಳಬಹುದು.ಮೆದುಳಿನಲ್ಲಿರುವ ಅಸಹಜ ಪ್ರಿಯಾನ್ ಅನ್ನು ಪತ್ತೆಹಚ್ಚುವ ಪರೀಕ್ಷಾ ಕಿಟ್‌ಗಳನ್ನು ಬಳಸಿಕೊಂಡು ಹಸುವಿಗೆ ಬಿಎಸ್‌ಇ ಇದೆಯೇ ಎಂದು ವಿಜ್ಞಾನಿಗಳು ಹೇಳಬಹುದು.

ಇದನ್ನು ಓದಿ: ಫ್ಲೋರಿಡಾದಲ್ಲಿ ಶೂಟೌಟ್​, ಓರ್ವ ಪತ್ರಕರ್ತ ಹಾಗೂ 9 ವರ್ಷದ ಬಾಲಕಿ ಬಲಿ

ಹಸು ಬಿಎಸ್‌ಇ ರೋಗ ಹೇಗೆ ಬರುತ್ತದೆ?

ಜನರು ತಿನ್ನದ ಹಸುವಿನ ಭಾಗಗಳನ್ನು ಬೇಯಿಸಿ, ಒಣಗಿಸಿ, ಪುಡಿ ಮಾಡುತ್ತಾರೆ. ನಂತರ ಪಶು ಆಹಾರದಲ್ಲಿ ಪುಡಿಯನ್ನು ಬಳಸಲಾಗುತ್ತದೆ ಎಂದು ಆರೋಗ್ಯ ಇಲಾಖೆಯ ಫೆಡರಲ್ ಏಜೆನ್ಸಿ ತಿಳಿಸಿದೆ. BSE ಯಿಂದ ಅಸ್ವಸ್ಥಗೊಂಡ ಮತ್ತೊಂದು ಹಸುವಿನ ಭಾಗಗಳಿಂದ ಕಲುಷಿತಗೊಂಡ ಆಹಾರವನ್ನು ತಿನ್ನುವ ಮೂಲಕ ಮತ್ತೊಂದು ಹಸು BSE ಅನ್ನು ಪಡೆಯುತ್ತದೆ. ಕಲುಷಿತ ಆಹಾರವು ಅಸಹಜ ಪ್ರಿಯಾನ್ ಅನ್ನು ಹೊಂದಿರುತ್ತದೆ ಮತ್ತು ಹಸುವು ಆಹಾರವನ್ನು ತಿನ್ನುವಾಗ ಅಸಹಜ ಪ್ರಿಯಾನ್‌ನಿಂದ ಸೋಂಕಿಗೆ ಒಳಗಾಗುತ್ತದೆ.

Published On - 12:28 pm, Thu, 23 February 23