ಢಾಕಾದ ಕೊಳೆಗೇರಿಗಳನ್ನು ತೋರಿಸಿ ‘ಇದು ನವದೆಹಲಿ’ ಎಂದ ಚೀನೀ ವ್ಲಾಗರ್‌ಗಳು: ಬಾಂಗ್ಲಾದೇಶದಲ್ಲಿ ವಿವಾದ
ಚೀನೀ ವ್ಲಾಗರ್‌ಗಳು ಢಾಕಾದ ಕೊಳೆಗೇರಿ ಪ್ರದೇಶಗಳನ್ನು ಭಾರತದ ನವದೆಹಲಿ ಎಂದು ತಪ್ಪಾಗಿ ಚಿತ್ರೀಕರಿಸಿ, ಚೀನೀ ಸಾಮಾಜಿಕ ಮಾಧ್ಯಮಗಳಲ್ಲಿ ಪ್ರಸಾರ ಮಾಡುತ್ತಿದ್ದಾರೆ. ಅವಹೇಳನಕಾರಿ ಹೇಳಿಕೆಗಳು, ಅನುಮತಿ ಇಲ್ಲದ ಚಿತ್ರೀಕರಣದಿಂದ ಬಾಂಗ್ಲಾದೇಶದಲ್ಲಿ ವ್ಯಾಪಕ ಆಕ್ರೋಶ ವ್ಯಕ್ತವಾಗಿದೆ. ವ್ಲಾಗರ್‌ಗಳ ಉದ್ದೇಶ ಇನ್ನೂ ಅಸ್ಪಷ್ಟವಾಗಿದ್ದು, ಪೊಲೀಸರು ಗಮನಿಸಿದ್ದಾರೆ. ಇದು ತಪ್ಪು ಮಾಹಿತಿ ಅಭಿಯಾನವೇ ಎಂಬ ಅನುಮಾನ ಮೂಡಿದೆ.
ಢಾಕಾ, ನವೆಂಬರ್ 10: ಬಾಂಗ್ಲಾದೇಶದ ರಾಜಧಾನಿ ಢಾಕಾದ ಕೊಳೆಗೇರಿ ಪ್ರದೇಶಗಳನ್ನು ಚಿತ್ರೀಕರಿಸಿ, ಅವುಗಳನ್ನು ಭಾರತದ ರಾಜಧಾನಿ ನವದೆಹಲಿ ಎಂದು ಬಿಂಬಿಸುತ್ತಿದ್ದಾರೆ ಎಂಬ ಆರೋಪ ಚೀನಾದ ಕೆಲವು ವ್ಲಾಗರ್‌ಗಳ ವಿರುದ್ಧ ಕೇಳಿಬಂದಿದೆ. ತಿಂಗಳುಗಳಿಂದ ನಡೆಯುತ್ತಿರುವ ಈ ಲೈವ್‌ಸ್ಟ್ರೀಮ್‌ಗಳು ಈಗ ಬಾಂಗ್ಲಾದೇಶದಲ್ಲಿ ಚರ್ಚೆಗೆ ಕಾರಣವಾಗಿವೆ. ಸ್ಥಳೀಯರ ಅನುಮತಿಯಿಲ್ಲದೆ ಮನೆಗಳಿಗೆ ನುಗ್ಗಿ ಚಿತ್ರೀಕರಣ ಮಾಡುತ್ತಿದ್ದಾರೆ ಎಂಬ ಆರೋಪವೂ ಕೇಳಿಬಂದಿದೆ.
ಬಾಂಗ್ಲಾದೇಶದ ಪತ್ರಿಕೆ ಪ್ರೋಥೋಮ್ ಅಲೋ ನಡೆಸಿದ ವರದಿಯ ಪ್ರಕಾರ, ಢಾಕಾದ ಉತ್ತರಾ ಪ್ರದೇಶದ ಸೆಕ್ಟರ್ 12 ಮತ್ತು ಅದರ ಸಮೀಪದ ಟೆಕ್ಪರಾ ಬಡಾವಣೆಯಲ್ಲಿ ಚೀನಾದ ಹಲವು ಪ್ರಜೆಗಳು ವಿಡಿಯೊ ಚಿತ್ರೀಕರಣ ಮಾಡುತ್ತಿದ್ದಾರೆ. ಈ ಪ್ರದೇಶಗಳ ದೃಶ್ಯಗಳನ್ನು ಚೀನಾದ ಸಾಮಾಜಿಕ ಮಾಧ್ಯಮಗಳಲ್ಲಿ ಪ್ರಸಾರ ಮಾಡುವಾಗ, ಅವು ಭಾರತದಲ್ಲಿವೆ ಎಂದು ಹೇಳಲಾಗುತ್ತಿದೆ.
‘ಗೋಮೂತ್ರದ ಚಹಾ’ ಎಂದ ವ್ಲಾಗರ್!
ಈ ಚಿತ್ರೀಕರಣದ ವೇಳೆ ಕೆಲವು ಚೀನೀ ವ್ಲಾಗರ್‌ಗಳು ಸ್ಥಳೀಯರ ಬಗ್ಗೆ ಅವಹೇಳನಕಾರಿ ಹೇಳಿಕೆಗಳನ್ನು ನೀಡಿದ್ದಾರೆ ಎನ್ನಲಾಗಿದೆ. ನವೆಂಬರ್ 1ರಂದು ಮಿಯಾನ್ಮಿಯಾನ್ ಎಂಬ ಮಹಿಳೆ ಲೈವ್‌ಸ್ಟ್ರೀಮ್‌ನಲ್ಲಿ ಟೆಕ್ಪರಾ ಪ್ರದೇಶವನ್ನು ತೋರಿಸುತ್ತಾ, “ಇದು ನವದೆಹಲಿ. ಇಲ್ಲಿನ ಮನೆಗಳು ತುಂಬಾ ಕೊಳಕಾಗಿವೆ. ತಗಡಿನ ಛಾವಣಿಯ ಮನೆಗಳಲ್ಲಿ ಫ್ಯಾನ್ ಕೂಡ ಇಲ್ಲ” ಎಂದು ಹೇಳಿರುವುದಾಗಿ ವರದಿಯಾಗಿದೆ.
ಇನ್ನೊಂದು ವಿಡಿಯೊದಲ್ಲಿ ವಾಂಗ್ ವೀ ಎಂಬ ವ್ಯಕ್ತಿ ರಸ್ತೆ ಬದಿಯ ಚಹಾ ಅಂಗಡಿಯನ್ನು ಚಿತ್ರೀಕರಿಸಿ, ಅಲ್ಲಿನ ಚಹಾವನ್ನು “ಗೋಮೂತ್ರದಿಂದ ತಯಾರಿಸಿದ ಚಹಾ” ಎಂದು ಕರೆದಿದ್ದಾರೆ ಎನ್ನಲಾಗಿದೆ. ಚಹಾ ಕೊಳಕು ನದಿ ನೀರಿನಿಂದ ತಯಾರಾಗಿದೆ ಎಂದೂ ಅವರು ಹೇಳಿಕೊಂಡಿದ್ದಾರೆ ಎಂದು ವರದಿ ತಿಳಿಸಿದೆ.
ದಿನಕ್ಕೆ 700–800 ಟಾಕಾ ಪಡೆದು ಮಾರ್ಗದರ್ಶಕರಾಗಿ ಕೆಲಸ
ಬಾಂಗ್ಲಾದೇಶದ ಪತ್ರಕರ್ತರು ಅಕ್ಟೋಬರ್ 27 ಮತ್ತು ನವೆಂಬರ್ 3ರಂದು ಈ ಪ್ರದೇಶಗಳಿಗೆ ಭೇಟಿ ನೀಡಿ, ಸುಮಾರು 17 ಚೀನೀ ವ್ಲಾಗರ್‌ಗಳೊಂದಿಗೆ ಮಾತನಾಡಲು ಪ್ರಯತ್ನಿಸಿದ್ದಾರೆ. ಆದರೆ ಹೆಚ್ಚಿನವರು ಪ್ರತಿಕ್ರಿಯಿಸಲು ನಿರಾಕರಿಸಿದ್ದಾರೆ.
ಈ ವೇಳೆ ರಿತು ಅಖ್ತರ್ ಎಂಬ ಸ್ಥಳೀಯ ಮಹಿಳೆ ತಾನು ಹಲವು ತಿಂಗಳುಗಳಿಂದ ಚೀನೀ ಪ್ರಜೆಗಳಿಗೆ ಮಾರ್ಗದರ್ಶಿಯಾಗಿ ಕೆಲಸ ಮಾಡುತ್ತಿರುವುದಾಗಿ ತಿಳಿಸಿದ್ದಾರೆ. ಅವರಿಗೆ ಸಹಾಯ ಮಾಡುವುದಕ್ಕಾಗಿ ದಿನಕ್ಕೆ 700ರಿಂದ 800 ಬಾಂಗ್ಲಾದೇಶಿ ಟಾಕಾ ಪಡೆಯುತ್ತಿದ್ದೇನೆ ಎಂದಿದ್ದಾರೆ. ಇತರ ಸ್ಥಳೀಯ ಮಹಿಳೆಯರೂ ಇದೇ ರೀತಿಯ ಕೆಲಸ ಮಾಡುತ್ತಿದ್ದಾರೆ ಎಂದು ಅವರು ಹೇಳಿದ್ದಾರೆ.
ಇದನ್ನೂ ಓದಿ:
ಶೇಖ್ ಹಸೀನಾ ಪಲಾಯನದ ವಿಡಿಯೋ ಹಂಚಿಕೊಂಡಿದ್ದ ಬಾಂಗ್ಲಾದೇಶ ವಾಯುಪಡೆಯ ಮಾಜಿ ಅಧಿಕಾರಿ ನಿಗೂಢ ಸಾವು
ಈ ವಿಡಿಯೊಗಳು ಮತ್ತು ನೇರಪ್ರಸಾರಗಳ ಮೂಲಕ ಚೀನೀ ಪ್ರಜೆಗಳು ಹಣ ಗಳಿಸುತ್ತಿದ್ದಾರೆ ಎನ್ನಲಾಗಿದೆ. WeChat ಮತ್ತು ಡೌಯಿನ್‌ನಂತಹ ಚೀನಾದ ಸಾಮಾಜಿಕ ಮಾಧ್ಯಮ ವೇದಿಕೆಗಳಲ್ಲಿ ಇವುಗಳನ್ನು ಪ್ರಸಾರ ಮಾಡಲಾಗುತ್ತಿದೆ. ಫ್ಯಾಂಗ್ಯೂ ಎಂಬ ಚೀನೀ ಪ್ರಜೆ, ಈ ನೇರಪ್ರಸಾರಗಳು ಉತ್ಪನ್ನಗಳ ಪ್ರಚಾರಕ್ಕೆ ಸಂಬಂಧಿಸಿವೆ ಎಂದು ಪತ್ರಕರ್ತರಿಗೆ ತಿಳಿಸಿದ್ದಾರೆ. ಆದರೆ ಬಡ ಪ್ರದೇಶಗಳನ್ನೇ ಏಕೆ ಆಯ್ಕೆ ಮಾಡಲಾಗಿದೆ ಎಂಬುದನ್ನು ವಿವರಿಸಿಲ್ಲ.
ವಿಡಿಯೋ
ಮನೆಗಳಿಗೆ ನುಗ್ಗಿ ಚಿತ್ರೀಕರಣ: ಸ್ಥಳೀಯರ ಆಕ್ರೋಶ
ವ್ಲಾಗರ್‌ಗಳ ವರ್ತನೆಯಿಂದ ಟೆಕ್ಪರಾ ನಿವಾಸಿಗಳು ಅಸಮಾಧಾನಗೊಂಡಿದ್ದಾರೆ. ಕೆಲವರು ಅನುಮತಿ ಪಡೆಯದೆ ಮನೆಗಳಿಗೆ ಪ್ರವೇಶಿಸಿ ವಿಡಿಯೊ ಚಿತ್ರೀಕರಣ ಮಾಡುತ್ತಿದ್ದಾರೆ ಎಂಬ ಆರೋಪವಿದೆ. ಕೆಲವರು ಸ್ನಾನಗೃಹಗಳಿಗೂ ಪ್ರವೇಶಿಸಿ ಚಿತ್ರೀಕರಿಸಿದ್ದಾರೆ ಎಂದು ಸ್ಥಳೀಯ ಮಹಿಳೆಯರು ದೂರಿದ್ದಾರೆ.
ತಮ್ಮ ಮನೆಗಳ ಒಳಗೆ ಏನು ಚಿತ್ರೀಕರಿಸಲಾಗುತ್ತಿದೆ, ಆ ದೃಶ್ಯಗಳನ್ನು ಯಾವ ವೇದಿಕೆಯಲ್ಲಿ ಪ್ರಸಾರ ಮಾಡಲಾಗುತ್ತಿದೆ ಎಂಬ ಮಾಹಿತಿ ತಮಗಿಲ್ಲ ಎಂದು ನಿವಾಸಿಗಳು ಆತಂಕ ವ್ಯಕ್ತಪಡಿಸಿದ್ದಾರೆ. ಚಿತ್ರೀಕರಣ ನಿಲ್ಲಿಸುವಂತೆ ಹೇಳಿದರೂ ಭಾಷೆಯ ಸಮಸ್ಯೆಯಿಂದ ತಮ್ಮ ಅಸಮಾಧಾನವನ್ನು ಅವರಿಗೆ ಅರ್ಥಮಾಡಿಸಲು ಕಷ್ಟವಾಗುತ್ತಿದೆ ಎಂದಿದ್ದಾರೆ.
ಪೊಲೀಸರಿಗೆ ಮಾಹಿತಿ ಇದೆ, ಆದರೆ ಉದ್ದೇಶ ಇನ್ನೂ ನಿಗೂಢ
ಈ ಚಟುವಟಿಕೆಗಳ ಬಗ್ಗೆ ಸ್ಥಳೀಯ ಪೊಲೀಸರಿಗೆ ಮಾಹಿತಿ ನೀಡಲಾಗಿದೆ ಎಂದು ವರದಿಯಾಗಿದೆ. ಉತ್ತರ ಪಶ್ಚಿಮ ಪೊಲೀಸ್ ಠಾಣೆಯ ಅಧಿಕಾರಿ ಮೊಹಮ್ಮದ್ ಖಾಲಿದ್ ಮನ್ಸೂರ್ ಅವರು, ಚೀನೀ ಪ್ರಜೆಗಳು ಈ ಪ್ರದೇಶಗಳಲ್ಲಿ ಲೈವ್‌ಸ್ಟ್ರೀಮ್ ಮಾಡುತ್ತಿರುವುದನ್ನು ಗಮನಿಸಿದ್ದೇವೆ. ಆದರೆ ಅವರು ಯಾವ ಉದ್ದೇಶಕ್ಕಾಗಿ ವಿಡಿಯೊ ಮಾಡುತ್ತಿದ್ದಾರೆ ಎಂಬುದು ಸ್ಪಷ್ಟವಾಗಿಲ್ಲ. ಈ ಬಗ್ಗೆ ಹಿರಿಯ ಅಧಿಕಾರಿಗಳಿಗೆ ಮಾಹಿತಿ ನೀಡಲಾಗಿದೆ ಎಂದು ತಿಳಿಸಿದ್ದಾರೆ.
ಸದ್ಯಕ್ಕೆ ಈ ಚಿತ್ರೀಕರಣದ ಹಿಂದಿರುವ ನಿಖರ ಉದ್ದೇಶ, ವಿಡಿಯೊಗಳನ್ನು ಯಾರು ಪ್ರಾಯೋಜಿಸುತ್ತಿದ್ದಾರೆ ಮತ್ತು ಅವುಗಳನ್ನು ಯಾವ ಪ್ರೇಕ್ಷಕರಿಗಾಗಿ ಪ್ರಸಾರ ಮಾಡಲಾಗುತ್ತಿದೆ ಎಂಬುದು ಸ್ಪಷ್ಟವಾಗಿಲ್ಲ. ಉತ್ಪನ್ನಗಳ ಪ್ರಚಾರಕ್ಕಾಗಿ ಲೈವ್‌ಸ್ಟ್ರೀಮ್ ಮಾಡುತ್ತಿದ್ದೇವೆ ಎಂಬ ಒಬ್ಬ ಚೀನೀ ಪ್ರಜೆಯ ಹೇಳಿಕೆ ಮಾತ್ರ ವರದಿಯಲ್ಲಿದೆ. ಇದು ಸಂಘಟಿತ ತಪ್ಪುಮಾಹಿತಿ ಅಭಿಯಾನವೇ ಎಂಬುದಕ್ಕೆ ಇನ್ನೂ ದೃಢವಾದ ಪುರಾವೆ ಬಹಿರಂಗವಾಗಿಲ್ಲ.
ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ