ನೆದರ್ಲ್ಯಾಂಡ್ಸ್ ಚುನಾವಣೆ: ನೂಪುರ್ ಶರ್ಮಾರನ್ನು ಸಮರ್ಥಿಸಿಕೊಂಡಿದ್ದ ಡಚ್ ನಾಯಕ ಪ್ರಧಾನಿ ಆಕಾಂಕ್ಷಿ

ದೆಹಲಿ ನವೆಂಬರ್ 24: ಗುರುವಾರ ಎಣಿಕೆಯಾದ 98% ಮತಗಳೊಂದಿಗೆ, ಡಚ್ ಸಂಸತ್ತಿನಲ್ಲಿ (Dutch Parliament)150 ಸ್ಥಾನಗಳಲ್ಲಿ 37 ಸ್ಥಾನಗಳಲ್ಲಿ ಗೀರ್ಟ್ ವೈಲ್ಡರ್ಸ್ (Geert Wilders) ಅವರ ಬಲಪಂಥೀಯ ಪಕ್ಷ (PVV) ಗೆದ್ದಿದೆ. ವೈಲ್ಡರ್ಸ್ ಪಕ್ಷ, ಆಂಟಿ-ಇಸ್ಲಾಂ ಪಾರ್ಟಿ ಫಾರ್ ಫ್ರೀಡಮ್, ಈಗ ಡಚ್ ಸಂಸತ್ತಿನಲ್ಲಿ 37 ಸ್ಥಾನಗಳನ್ನು ಹೊಂದಿದ್ದು ಸದನದಲ್ಲಿ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮುವ ಹಾದಿಯಲ್ಲಿದೆ. ಆದರೆ ಅವರು ಪ್ರಧಾನಿಯಾಗುವ ತಮ್ಮ ಕನಸಿಗೆ ಇನ್ನೂ ಬಹಳ ದೂರವಿದ್ದು, ಅದಕ್ಕಾಗಿ ಅವರ ಪಕ್ಷವು ಮೈತ್ರಿಕೂಟದ ಮೂಲಕ ಮ್ಯಾಜಿಕ್ ಸಂಖ್ಯೆ 76 ಅನ್ನು ದಾಟಬೇಕಾಗಿದೆ.

ವಲಸೆಯನ್ನು ನಿಗ್ರಹಿಸುವತ್ತ ತನ್ನ ಗಮನ ಹರಿಸುವುದಾಗಿ ವೈಲ್ಡರ್ಸ್ ಹೇಳಿದ್ದಾರೆ. ಪ್ರಚಾರದ ಸಮಯದಲ್ಲಿ, ಅವರು ತಮ್ಮ ಇಸ್ಲಾಂ ವಿರೋಧಿ ಮಾತುಗಳಿಂದ ದೂರವಿದ್ದು, ಜೀವನ ವೆಚ್ಚ ಮತ್ತು ವಲಸೆಯಂತಹ ವಿಷಯಗಳ ಬಗ್ಗೆ ಮಾತನಾಡಿದ್ದಾರೆ. ಹಾಗಾಗಿ ವಿಶ್ಲೇಷಕರು ಇವರನ್ನು “ಗೀರ್ಟ್ ಮೈಲ್ಡರ್ಸ್” ಎಂದು ಬಣ್ಣಿಸಿದ್ದಾರೆ.

60ರ ಹರೆಯದ ಗೀರ್ಟ್ ವೈಲ್ಡರ್ಸ್ ದಶಕಗಳಿಂದ ಡಚ್ ರಾಜಕೀಯದಲ್ಲಿ ಸಕ್ರಿಯರಾಗಿದ್ದಾರೆ. ಅವರು ಮಾಜಿ ಪ್ರಧಾನಿ ಮಾರ್ಕ್ ರುಟ್ಟೆಯವರ ಉದಾರವಾದಿ ಗುಂಪಿನ ಸದಸ್ಯರಾಗಿ ತಮ್ಮ ವೃತ್ತಿಜೀವನವನ್ನು ಪ್ರಾರಂಭಿಸಿದರು,ಆದರೆ ಡಚ್‌ನಲ್ಲಿ PVV ಎಂದು ಕರೆಯಲ್ಪಡುವ ವಲಸೆ ವಿರೋಧಿ ಫ್ರೀಡಂ ಪಾರ್ಟಿಯನ್ನು ಸ್ಥಾಪಿಸುವ ಮೊದಲು ಸ್ವತಂತ್ರ ಶಾಸಕರಾಗಿ ಸೇವೆ ಸಲ್ಲಿಸಲು ಬೇರ್ಪಟ್ಟರು.

ಅವರ ಇಸ್ಲಾಂ ವಿರೋಧಿ ದೃಷ್ಟಿಕೋನಗಳ ಕಾರಣದಿಂದಾಗಿ ಅವರು ಮರಣದಂಡನೆಯನ್ನು ಎದುರಿಸುತ್ತಿದ್ದಾರೆ .2004 ರಿಂದ ಬಿಗಿಯಾದ ಪೊಲೀಸ್ ರಕ್ಷಣೆಯಲ್ಲಿದ್ದಾರೆ. 2020 ರಲ್ಲಿ, ಮೊರೊಕನ್ ವಲಸಿಗರ ಬಗ್ಗೆ ಅವರು ಮಾಡಿದ ಕಾಮೆಂಟ್‌ಗಳಿಗಾಗಿ ನ್ಯಾಯಾಲಯವು ಅವರನ್ನು ಅಪರಾಧಿ ಎಂದು ಪರಿಗಣಿಸಿತು, ಆದರೆ ನ್ಯಾಯಾಧೀಶರು ಯಾವುದೇ ದಂಡವನ್ನು ವಿಧಿಸಲಿಲ್ಲ.

ಇದನ್ನೂ ಓದಿ:ಪ್ರವಾದಿ ಬಗ್ಗೆ ನೂಪುರ್ ಶರ್ಮಾ ಹೇಳಿಕೆ ಬೆಂಬಲಿಸಿ ಪೋಸ್ಟ್​​ ಹಾಕಿದ್ದ ಉಮೇಶ್ ಕೊಲ್ಹೆಯನ್ನು ಕೊಂದಿದ್ದು ತಬ್ಲಿಘಿ ಜಮಾತ್ ಸದಸ್ಯರು: ಎನ್ಐಎ 

2022 ರಲ್ಲಿ, ವೈಲ್ಡರ್ಸ್ ಬಿಜೆಪಿ ನಾಯಕಿ ನೂಪುರ್ ಶರ್ಮಾ ಅವರು ಪ್ರವಾದಿ ಮುಹಮ್ಮದ್ ಬಗ್ಗೆ ನೀಡಿದ್ದ ಹೇಳಿಕೆಗಳನ್ನ ಸಮರ್ಥಿಸಿಕೊಂಡಿದ್ದರು.

“ನೂಪುರ್ ಶರ್ಮಾ ಸತ್ಯವನ್ನು ಬಿಟ್ಟು ಬೇರೇನೂ ಮಾತನಾಡದವರು. ಇಡೀ ಜಗತ್ತು ಅವಳ ಬಗ್ಗೆ ಹೆಮ್ಮೆ ಪಡಬೇಕು. ಅವಳು ನೊಬೆಲ್ ಪ್ರಶಸ್ತಿಗೆ ಅರ್ಹಳು. ಭಾರತವು ಹಿಂದೂ ರಾಷ್ಟ್ರವಾಗಿದೆ, ಭಾರತ ಸರ್ಕಾರವು ಇಸ್ಲಾಮಿಕ್ ದ್ವೇಷ ಮತ್ತು ಹಿಂಸಾಚಾರದ ವಿರುದ್ಧ ಹಿಂದೂಗಳನ್ನು ಬಲವಾಗಿ ರಕ್ಷಿಸಲು ನಿರ್ಬಂಧವನ್ನು ಹೊಂದಿದೆ ಎಂದು ಅವರು ಟ್ವೀಟ್ ಮಾಡಿದ್ದರು.+

ಮತ್ತಷ್ಟು ವಿದೇಶ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ