ತನ್ನ ಮುಖ್ಯಸ್ಥ ಮೃತಪಟ್ಟಿದ್ದನ್ನು ದೃಢಪಡಿಸಿದ ಐಸಿಸ್​; ಹೊಸ ಮುಖ್ಯಸ್ಥನ ಹೆಸರು ಬಹಿರಂಗ ಪಡಿಸಿದ ಉಗ್ರ ಸಂಘಟನೆ

ಇಸ್ಲಾಮಿಕ್​ ಸ್ಟೇಟ್​ ಆಫ್​ ಇರಾಕ್​ ಆ್ಯಂಡ್​ ಸಿರಿಯಾ (ಐಸಿಸ್​ ಉಗ್ರ ಸಂಘಟನೆ-ISIS) ಭಯೋತ್ಪಾದಕ ಸಂಘಟನೆ ತನ್ನ ನೂತನ ಮುಖ್ಯಸ್ಥನ ಹೆಸರನ್ನು ಬಹಿರಂಗಪಡಿಸಿದೆ. ಈ ಹಿಂದಿನ ಮುಖ್ಯಸ್ಥನಾಗಿದ್ದ ಅಬು ಇಬ್ರಾಹಿಂ ಅಲ್​ ಹಾಶಿಮಿ ಅಲ್​ ಕುರೈಶಿ ಮತ್ತು ವಕ್ತಾರ ಅಬು ಹಮ್ಜಾ ಅಲ್ ಕುರೈಶಿ ಇಬ್ಬರೂ ಮೃತಪಟ್ಟಿದ್ದಾಗಿ ಐಸಿಸ್​ ತಿಳಿಸಿದ್ದು, ನೂತನ ಮುಖ್ಯಸ್ಥನನ್ನಾಗಿ ಅಬು ಅಲ್​ ಹಸನ್​ ಅಲ್​ ಹಾಶಿಮಿ ಅಲ್​ ಕುರೈಶಿ ಎಂಬುವನನ್ನು ನೇಮಕ ಮಾಡಿದ್ದಾಗಿ ಹೇಳಿದೆ.

ಅಬು ಇಬ್ರಾಹಿಂ ಅಲ್​ ಹಾಶಿಮಿ ಅಲ್​ ಕುರೈಶಿಯನ್ನು 2022ರ ಫೆಬ್ರವರಿಯಲ್ಲಿ ಯುಎಸ್​ ಸೇನಾಪಡೆ ಸಿರಿಯಾದಲ್ಲಿ ಹತ್ಯೆ ಗೈದಿದೆ. ಈ ಬಗ್ಗೆ ಅಮೆರಿಕ ಅಧ್ಯಕ್ಷ ಜೋ ಬೈಡನ್ ಈಗಾಗಲೇ ಮಾಹಿತಿ ನೀಡಿದ್ದರು. ಉತ್ತರ ಸಿರಿಯಾದ ಮನೆಯೊಂದರಲ್ಲಿ ಇದ್ದ ಅಬು ಇಬ್ರಾಹಿಂ ಅಲ್​ ಹಾಶಿಮಿ ಅಲ್​ ಕುರೈಶಿ ಮತ್ತು ಆತನ ಕುಟುಂಬದವರನ್ನ ಬಾಂಬ್ ಹಾಕಿ ಕೊಲ್ಲಲಾಗಿತ್ತು. ಇದೀಗ ಐಸಿಸ್​, ಹಾಶಿಮಿ ಅಲ್​ ಕುರೈಶಿ ಮೃತಪಟ್ಟಿದ್ದಾಗಿ ತಿಳಿಸಿದ್ದರೂ ಕೂಡ ಆತನನ್ನು ಕೊಂದಿದ್ದು ಯುಎಸ್ ಸೇನೆ ಎಂಬುದನ್ನು ಎಲ್ಲಿಯೂ ಹೇಳಿಲ್ಲ. ಗುರುವಾರ ಒಂದು ರಿಕಾರ್ಡೆಡ್​ ಸ್ಪೀಚ್​ ಬಿಡುಗಡೆ ಮಾಡಿದ ಐಎಸ್​​ನ ಹೊಸ​ ವಕ್ತಾರ ಅಬು ಉಮಾರ್​ ಅಲ್​ ಮುಜಾಹಿರ್​, ಅಬು ಇಬ್ರಾಹಿಂ ಅಲ್​ ಹಾಶಿಮಿ ಕೊನೇದಾಗಿ ಭಾಗವಹಿಸಿದ್ದು, ಈಶಾನ್ಯ ಸಿರಿಯಾದ ನಗರವಾದ ಹಸಾಕಾದ ಘುವೈರಾನ್ ಜೈಲಿನ ಮೇಲೆ ನಡೆಸಲಾದ ದಾಳಿಯಲ್ಲಿ ಎಂದು ತಿಳಿಸಿದ್ದಾರೆ. ಈ ದಾಳಿ ಜನವರಿಯಲ್ಲಿ ನಡೆದಿತ್ತು. ಬಂಧಿತ ಉಗ್ರರರನ್ನು ಬಿಡುಗಡೆ ಮಾಡುವಂತೆ ಐಸಿಸ್​ ಭಯೋತ್ಪಾದಕರು ಜೈಲಿನ ಮೇಲೆ ದಾಳಿ ಮಾಡಿದ್ದರು. ಇದರಲ್ಲಿ ಸುಮಾರು 200ಕ್ಕೂ ಹೆಚ್ಚು ಕೈದಿಗಳು, 30ಕ್ಕೂ ಅಧಿಕ ಭದ್ರತಾ ಸಿಬ್ಬಂದಿ ಮತ್ತೂ ಕೆಲವು ಭಯೋತ್ಪಾದಕರೂ ಸಾವನ್ನಪ್ಪಿದ್ದರು.

ಐಸಿಸ್​​ನ ಹಿಂದಿನ ಮುಖ್ಯಸ್ಥ ಅಬು ಬಕರ್​ ಅಲ್​ ಬಾಗ್ದಾದಿಯನ್ನೂ ಸಿರಿಯಾದಲ್ಲಿ ಅಮೆರಿಕ ಪಡೆ 2019ರಲ್ಲಿ ಹತ್ಯೆಗೈದಿತ್ತು.ಆಗಲೂ ಸಹ ಬಾಂಬ್​ ದಾಳಿ ನಡೆಸಲಾಗಿತ್ತು. ಇದರಲ್ಲಿ ಬಾಗ್ದಾದಿ ಮತ್ತು ಆತನ ಕುಟುಂಬದವರು ಮೃತಪಟ್ಟಿದ್ದರು. ಅದಾದ ಬಳಿಕ ಈ ಕುರೈಶಿ ಮುಖ್ಯಸ್ಥನಾಗಿದ್ದ. ಆದರೆ 45ವರ್ಷದ ಕುರೈಶಿ ಎರಡೇ ವರ್ಷದಲ್ಲಿ ಯುಎಸ್​ ಸೇನೆಯ ದಾಳಿಗೆ ಬಲಿಯಾಗಿದ್ದಾನೆ.

ಇದನ್ನೂ ಓದಿ: US Inflation: ಅಮೆರಿಕದಲ್ಲಿ 40 ವರ್ಷಗಳಲ್ಲೇ ಗರಿಷ್ಠ ವಾರ್ಷಿಕ ಹಣದುಬ್ಬರ ಫೆಬ್ರವರಿಯಲ್ಲಿ ದಾಖಲು