ರಷ್ಯಾದ ಬಿಗ್​ ಪ್ಲ್ಯಾನ್​; ಮತ್ತೆ ಮುನ್ನೆಲೆಗೆ ಬಂತು ವಿಕ್ಟರ್ ಯಾನುಕೋವಿಚ್ ಹೆಸರು, ಅಷ್ಟಕ್ಕೂ ಯಾರಿವರು ವಿಕ್ಟರ್​?

ರಷ್ಯಾದ ಬಿಗ್​ ಪ್ಲ್ಯಾನ್​; ಮತ್ತೆ ಮುನ್ನೆಲೆಗೆ ಬಂತು ವಿಕ್ಟರ್ ಯಾನುಕೋವಿಚ್ ಹೆಸರು, ಅಷ್ಟಕ್ಕೂ ಯಾರಿವರು ವಿಕ್ಟರ್​?
ವಿಕ್ಟರ್ ಮತ್ತು ಪುಟಿನ್​

ವಿಕ್ಟರ್​ ಅಧ್ಯಕ್ಷನಾಗುವುದಕ್ಕೂ ಮೊದಲು 2006-2007ರವರೆಗೆ ಉಕ್ರೇನ್​ ಪ್ರಧಾನಿಯಾಗಿದ್ದರು. ಅದಕ್ಕೂ ಪೂರ್ವ 1997 ರಿಂದ 2002 ರವರೆಗೆ ಪೂರ್ವ ಉಕ್ರೇನ್‌ನ ಡೊನೆಟ್ಸ್ಕ್ ಒಬ್ಲಾಸ್ಟ್‌ನ ಗವರ್ನರ್ ಕೂಡ ಆಗಿದ್ದವರು. 

TV9kannada Web Team

| Edited By: Lakshmi Hegde

Mar 03, 2022 | 4:10 PM

2014ರಲ್ಲಿ ರಷ್ಯಾಕ್ಕೆ ಪಲಾಯನ ಮಾಡಿರುವ ಉಕ್ರೇನ್​ನ ಮಾಜಿ ಅಧ್ಯಕ್ಷ ವಿಕ್ಟರ್ ಯಾನುಕೋವಿಚ್ ಹೆಸರು ಮತ್ತೀಗ ಮುನ್ನೆಲೆಗೆ ಬಂದಿದೆ. ಈ ವಿಕ್ಟರ್​ ಅವರನ್ನು ಒಂದು ವಿಶೇಷ ಸಂದರ್ಭಕ್ಕಾಗಿ ರಷ್ಯಾ ಸರ್ಕಾರ ಸಜ್ಜುಗೊಳಿಸುತ್ತಿದೆ ಎಂದು ಉಕ್ರೇಯಿನ್ಸ್ಕಾ ಪ್ರಾವ್ಡಾ ಎಂಬ ಆನ್​ಲೈನ್​ ಪತ್ರಿಕೆಯ ವರದಿಯನ್ನು ಉಲ್ಲೇಖಿಸಿ, ಕೀವ್​ ಇಂಡಿಪೆಂಡೆಂಟ್​ ಮಾಧ್ಯಮ ಟ್ವೀಟ್ ಮಾಡಿದೆ.  ಈ ಅಧ್ಯಕ್ಷ ಮೊದಲಿನಿಂದಲೂ ರಷ್ಯಾದೊಂದಿಗೆ ಉತ್ತಮ ಸಂಬಂಧವನ್ನೇ ಹೊಂದಿದ್ದರು. 2014ರಲ್ಲಿ ವೊಲೊಡಿಮಿರ್​ ಝೆಲೆನ್ಸ್ಕಿ ಅಧ್ಯಕ್ಷರಾದ ಬಳಿಕ ವಿಕ್ಟರ್ ರಷ್ಯಾಕ್ಕೆ ಹೋಗಿ ನೆಲೆಸಿದ್ದರು. ಇದೀಗ ಉಕ್ರೇನ್​ ಮೇಲೆ ಯುದ್ಧ ಸಾರಿರುವ ರಷ್ಯಾ, ಆ ದೇಶವನ್ನು ಸಂಪೂರ್ಣವಾಗಿ ವಶಪಡಿಸಿಕೊಂಡು ಮತ್ತೆ ಇದೇ ವಿಕ್ಟರ್​​ರನ್ನು ಅಧ್ಯಕ್ಷರನ್ನಾಗಿ ಘೋಷಿಸಲು ಸಿದ್ಧತೆ ನಡೆಸಿದೆ ಎಂಬುದನ್ನು ಉಕ್ರೇನ್​ ಗುಪ್ತಚರ ಇಲಾಖೆಗಳು ತಿಳಿಸಿದ್ದಾಗಿ ವರದಿಯಲ್ಲಿ ಹೇಳಲಾಗಿದೆ.

ಯಾರಿವರು ವಿಕ್ಟರ್​?

ವಿಕ್ಟರ್ ಯಾನುಕೋವಿಚ್ ಅವರು 2010ರಲ್ಲಿ ಉಕ್ರೇನ್​ನ ನಾಲ್ಕನೇ ಅಧ್ಯಕ್ಷರಾಗಿ ಆಯ್ಕೆಯಾದವರಾಗಿದ್ದರು. 2013ರ ನವೆಂಬರ್​ನಲ್ಲಿ ಘನತೆಯ ಕ್ರಾಂತಿ  ಶುರುವಾಗಿ 2014ರವರೆಗೂ ಅದು ಮುಂದುವರಿಯಿತು.  ವಿಕ್ಟರ್​ ರಷ್ಯಾದೊಂದಿಗೆ ತುಂಬ ಆಪ್ತ ಸಂಬಂಧ ಹೊಂದಿದ್ದರು. ಈ ನಿಕಟತೆಗೆ ಧಕ್ಕೆಯಾಗಬಾರದು ಎಂಬ ಕಾರಣಕ್ಕೆ ಅವರು ಯುರೋಪಿಯನ್ ಒಕ್ಕೂಟದೊಂದಿಗೆ ರಾಜಕೀಯ ಮತ್ತು ವ್ಯಾಪಾರ ಒಪ್ಪಂದಕ್ಕೆ ಸಹಿ ಹಾಕಲು ನಿರಾಕರಿಸಿದ್ದರು. ಅಲ್ಲಿಂದಲೇ ಶುರುವಾಗಿತ್ತು ಅವರ ವಿರುದ್ಧ ಪ್ರತಿಭಟನೆ. ಅದಕ್ಕೆ ಘನತೆಯ ಕ್ರಾಂತಿ ಎಂದೇ ಕರೆಯಲಾಯಿತು. ಉಕ್ರೇನ್​ನಾದ್ಯಂತ ಪ್ರತಿಭಟನೆ, ಹಿಂಸಾಚಾರ, ದಂಗೆ, ಫೈರಿಂಗ್​ ಶುರುವಾಯಿತು. ಇದೆಲ್ಲದರ ಪರಿಣಾಮವಾಗಿ 2014ರ ಫೆಬ್ರವರಿಯಲ್ಲಿ ಅಧ್ಯಕ್ಷ ಸ್ಥಾನದಿಂದ ಇಳಿದ ವಿಕ್ಟರ್​, ರಷ್ಯಾಕ್ಕೆ ಪಲಾಯನ ಮಾಡಿದರು. ಈಗಲೂ ಕೂಡ ಕ್ರೆಮ್ಲಿನ್​ ಅಂದರೆ ರಷ್ಯಾ ಸರ್ಕಾರದ ರಕ್ಷಣೆಯಲ್ಲೇ ಇದ್ದಾರೆ.

ಉಕ್ರೇನ್​ ಅಧ್ಯಕ್ಷನಾಗಿದ್ದಾಗಲೂ ರಷ್ಯಾದ ಬೆಂಬಲ ಪಡೆದು, ಆ  ದೇಶದ ಅಭ್ಯರ್ಥಿಯಂತೆಯೇ ಇದ್ದ ವಿಕ್ಟರ್​ ಇದೀಗ ಮತ್ತೆ ಆ ಸ್ಥಾನಕ್ಕೆ ಏರಲು ಸಿದ್ಧತೆ ನಡೆದಿದೆ ಎಂಬ ವರದಿ ಬಲವಾಗಿ ಕೇಳಿಬಂದಿದೆ. ವಿಕ್ಟರ್​ ಅಧ್ಯಕ್ಷನಾಗುವುದಕ್ಕೂ ಮೊದಲು 2006-2007ರವರೆಗೆ ಉಕ್ರೇನ್​ ಪ್ರಧಾನಿಯಾಗಿದ್ದರು. ಅದಕ್ಕೂ ಪೂರ್ವ 1997 ರಿಂದ 2002 ರವರೆಗೆ ಪೂರ್ವ ಉಕ್ರೇನ್‌ನ ಡೊನೆಟ್ಸ್ಕ್ ಒಬ್ಲಾಸ್ಟ್‌ನ ಗವರ್ನರ್ ಕೂಡ ಆಗಿದ್ದವರು.   2004ರಲ್ಲಿ ಮೊದಲಬಾರಿಗೆ ಇವರು ಅಧ್ಯಕ್ಷೀಯ ಚುನಾವಣೆಯಲ್ಲಿ ಸ್ಪರ್ಧಿಸಿದರು. ಆದರೆ ಆ ಚುನಾವಣೆಯಲ್ಲಿ ವಿವಿಧ ವಂಚನೆಯ ಆರೋಪ ಕೇಳಿಬಂತು. ಆ ಪ್ರಕರಣ ಅಲ್ಲಿನ ಸುಪ್ರೀಂಕೋರ್ಟ್ ಮೆಟ್ಟಿಲೇರಿದ್ದಲ್ಲದೆ, ಚುನಾವಣೆಯನ್ನು ಕೋರ್ಟ್​ ಅನೂರ್ಜಿತಗೊಳಿಸಿತು. ಹಾಗಾಗಿ ಮತ್ತೆ ಅಧ್ಯಕ್ಷೀಯ ಚುನಾವಣೆ ನಡೆಯಿತು. ಇದೇ ಕಾರಣಕ್ಕೆ ಅಲ್ಲಿ ಆರೆಂಜ್​ ಕ್ರಾಂತಿಯ ಹೆಸರಲ್ಲಿ ಸಾಲುಸಾಲು ಪ್ರತಿಭಟನೆಗಳು ನಡೆದವು. ಅಷ್ಟೆಲ್ಲ ಆದ ಮೇಲೆ ವಿಕ್ಟರ್​ ಯಾನುಕೋವಿಚ್ ಆ ಚುನಾವಣೆಯಲ್ಲಿ, ಯುಶ್​ಚೆಂಕೋ ವಿರುದ್ಧ ಸೋಲುಂಡರು. ಮತ್ತೆ 2010ರಲ್ಲಿ ಗೆದ್ದರೂ 2014ರಲ್ಲಿ ಅಧಿಕಾರ ಹೋಯಿತು.

ಇದನ್ನೂ ಓದಿ: ಯುದ್ಧದಿಂದ ಕಂಗೆಟ್ಟಿರುವ ಉಕ್ರೇನ್​ನಲ್ಲಿ ಸಿಲುಕಿದ ಭಾರತೀಯ ವಿದ್ಯಾರ್ಥಿಗಳ ರಕ್ಷಣೆಗೆ ಧಾವಿಸಿದ ನಟ ಸೋನು ಸೂದ್

Follow us on

Related Stories

Most Read Stories

Click on your DTH Provider to Add TV9 Kannada